“E ta esun cu ta cambia temponan y epocanan; e ta kita reynan y ta pone reynan.”​—DAN. 2:21.

1, 2. Kico ta mustra cu Jehova sa precies kico tempo ta?

HOPI tempo prome cu Jehova Dios a crea hende, el a crea medionan cu hende por uza pa calcula tempo. Riba e di cuater dia di creacion, el a bisa pa laga fuentenan di luz aparece na cielo pa “separa dia for di nochi” y pa “sirbi como señalnan” y pa indica ‘temporadanan di aña, dianan y añanan.’ (Gen. 1:14, 19, 26) Y ta claro cu su boluntad a cumpli.

² No obstante, te awe cientificonan no por splica exactamente kico tempo ta. Segun un enciclopedia, “tempo ta un di e misterionan di mas grandi na mundo. Niun hende no por bisa kico e ta exactamente.” Pero Jehova si sa precies kico tempo ta encera. Pasobra ta e ta Esun cu “a crea e cielonan, . . . kende a forma tera y a trah’e.” Ademas, Bijbel ta bisa cu ta Jehova ta Esun cu “ta declara e fin for di principio, y for di temponan antiguo, cosnan cu no a wordo haci ainda.” (Isa. 45:18; 46:10) Pesey, pa fortalece nos fe den Jehova y den su Palabra, laga nos haci un analisis cu ta demostra cu Jehova por y ta cumpli cu su proposito na e tempo cu el a stipula. Nos lo analisa: (1) algun aspecto di Jehova su creacion y (2) profecianan cu a cumpli.

CREACION TA FORTALECE NOS FE DEN JEHOVA

3. Con e cosnan cu Jehova a crea ta indica cu nan tin un orario exacto?

³ Hopi cos cu Jehova a crea ta sigui un orario exacto. Tuma por ehempel e planeta- y streanan. Nan ta move cu asina un precision cu hende por sa di antemano nan posicion na cierto momento. Y a base di esaki, hende por determina den ki temporada nos ta y tambe cua ta e ruta corecto pa nabega. No tin duda, Jehova e Creador di e “holoshinan” confiabel aki tin  “poder” y ta merece nos alabanza.​—Lesa Isaias 40:26.

4. Con e holoshi interno den tur loke tin bida ta demostra cu Jehova ta un Dios sabi?

⁴ Tur loke tin bida tambe ta sigui un orario exacto. Si, hopi mata y bestia tin un holoshi interno cu ta dirigi nan ciclo di bida. Ta pesey hopi parha sa precies ki ora nan tin cu cuminsa migra. (Jer. 8:7) Hende tambe tin un holoshi interno. Nos curpa, por ehempel, ta indica nos normalmente ki ora ta di dia y ki ora ta anochi. Pero ora nos biaha cu avion pa un parti di mundo cu tin un orario distinto for di nos pais, tin biaha nos curpa tin mester di algun dia p’e ahusta su mes na esaki. No tin duda, hopi di e cosnan cu Jehova a crea ta demostra su poder y sabiduria y cu e ta e Dios di ‘tempo y epoca.’ (Lesa Salmo 104:24.) Pues, como cu Jehova ta todopoderoso y tin sabiduria infinito, nos por tin fe y confianza cu e por cumpli cu su proposito!

PROFECIANAN A CUMPLI PRECIES NA TEMPO​—ESAKI TA FORTALECE NOS FE

5. (a) Cua ta e unico manera cu nos por haya sa kico ta e futuro di hende? (b) Dicon Jehova por profetisa loke lo sosode y tambe na ki tempo esakinan lo tuma luga?

⁵ Observando e creacion, nos por siña hopi tocante Jehova su “cualidadnan invisibel.” Pero esey no ta contesta preguntanan importante manera: ‘Kico lo ta e futuro di hende?’ (Rom. 1:20) E unico manera cu nos por haya contesta pa e pregunta aki ta acudiendo na Bijbel, e Palabra di Dios. Bijbel ta contene hopi ehempel di profecia cu a cumpli precies na tempo! Si, Jehova por revela futuro pasobra e por mira kico ta bay sosode. Es mas, e profecianan aki semper ta cumpli na tempo pasobra Jehova Dios por pone sucesonan tuma luga di acuerdo cu su proposito y na e tempo cu el a stipula.

6. Kico ta mustra cu Jehova kier pa nos compronde e profecianan den Bijbel?

⁶ Jehova kier pa su adoradonan compronde profecianan biblico y beneficia di esakinan. Pesey, aunke su concepto di tempo ta distinto for di esun di nos, ora e ta profetisa algo, e ta uza un idioma cu nos por compronde. (Lesa Salmo 90:4.) E buki di Revelacion, por ehempel, ta referi na ‘cuater angel’, kendenan “tabata prepara pa e ora, dia, luna y aña”​—cu ta unidadnan di tempo cu nos ta compronde. (Rev. 9:14, 15) Y ora nos mira con profecianan a cumpli exactamente na e tempo cu Dios a stipula, nos fe den dje como e Dios di ‘tempo y epoca’ ta bira mas fuerte. Ademas, esey ta aumenta nos fe den su Palabra. Pesey, laga nos analisa algun di e profecianan ey.

7. Con e profecia di Jeremias tocante Jerusalem ta mustra cu Jehova semper ta cumpli cu su proposito na e tempo cu el a stipula?

⁷ Prome, laga nos ban bek na siglo 7 prome cu nos era. “Den e di cuater aña di Joakim, yiu homber di Josias, rey di Juda”, Jehova a papia cu Jeremias tocante henter e pueblo di Juda. (Jer. 25:1) Jehova a profetisa cu Jerusalem lo a ser destrui y cu e Hudiunan lo a ser hiba for di Juda pa Babilonia. Eynan, nan lo a sirbi e “rey di Babilonia pa setenta aña.” Y esey ta loke a sosode: Na aña 607 prome cu nos era, e Babilonionan a destrui Jerusalem y a saca e Hudiunan for di Juda y hiba nan Babilonia. Pero kico Jehova a bisa cu lo a pasa despues di 70 aña? Jeremias a profetisa: “Asina SEÑOR ta bisa: ‘Despues cu setenta aña wordo cumpli pa Babilonia, lo mi bishita boso y cumpli cu mi bon palabra pa cu boso, pa trece boso bek na e luga aki.” (Jer. 25:11, 12; 29:10) E profecia aki tambe a cumpli precies na tempo: E Hudiunan a regresa nan tera na aña 537 prome cu nos era despues  cu e Medo- y Personan a libra nan for di sclavitud na Babilonia.

8, 9. Con e profecianan di Daniel relaciona cu e binida di e Mesias y e establecimento di e Reino selestial ta mustra cu Jehova ta e Dios di ‘tempo y epoca’?

⁸ Laga nos wak un otro profecia cu a envolve Dios su pueblo den pasado. Un dos aña prome cu e Hudiunan a bandona Babilonia, Dios a profetisa, mediante profeta Daniel, cu e Mesias lo a aparece 483 aña despues cu sali un ordo pa reconstrui Jerusalem. Anto e rey di Medopersia a duna e ordo ey na aña 455 prome cu nos era. Y exactamente 483 aña despues​—na aña 29 di nos era​—ora Hesus di Nazaret a batisa, el a ser ungi cu spirito santo y asina a bira e Mesias. *​—Neh. 2:1, 5-8; Dan. 9:24, 25; Luc. 3:1, 2, 21, 22.

⁹ Awor, pensa riba loke Bijbel a profetisa tocante e Reino di Dios. Bijbel a indica cu e Reino Mesianico lo a ser estableci den cielo na 1914. Con Bijbel a indica esey? Wel, el a duna “e señal” di Hesus su presencia y a señala cu durante e tempo ey lo tin hopi ay, of problema, riba tera debi cu Satanas lo a ser saca for di cielo. (Mat. 24:3-14; Rev. 12:9, 12) Ademas, tin profecianan biblico cu ta yuda nos calcula e aña exacto, esta, 1914, tempo cu “e tempo stipula di e nacionnan” a termina y e Reino a cuminsa goberna den cielo.​—Luc. 21:24; Dan. 4:10-17. *

10. Ki sucesonan lo tuma luga precies na tempo?

¹⁰ Loke tin cu bin ainda ta e “tribulacion grandi” cu Hesus a profetisa. Despues di esey, Hesus su Reinado di Mil Aña lo cuminsa. E cosnan aki tambe sin duda lo tuma luga precies na tempo. Corda, tempo Hesus tabata riba tera, Jehova tabatin “e dia y ora” stipula caba.​—Mat. 24:21, 36; Rev. 20:6.

LAGA NOS HACI BON UZO DI NOS TEMPO

11. Kico nos mester haci si nos ta kere cu nos ta bibando den e tempo di fin?

¹¹ Kico nos mester haci si nos ta kere cu e Reino a cuminsa goberna caba y cu nos ta bibando den ‘e tempo di fin’? (Dan. 12:4) Hopi hende ta mira cu e situacion di mundo ta bayendo di malo pa pio, pero nan no ta compronde cu e desaroyonan aki ta cumplimento di Bijbel su profecianan relaciona cu e ultimo dianan. Algun hende kisas ta pensa cu un dia e sistema di cos aki lo cay den otro, siendo cu otronan ta pensa cu hende lo trece “paz y siguridad.” (1 Tes. 5:3) Awor, kico di nos? Nos ta kere cu nos ta bibando den e parti final di “e ultimo dianan”? Si ta asina, nos tin cu haci esfuerso pa  uza e tempo cu a resta pa sirbi e Dios di ‘tempo y epoca’ y pa yuda otro hende conoc’e. (2 Tim. 3:1) Pues, nos tin cu tuma decisionnan sabi pa nos por uza nos tempo bon.​—Lesa Efesionan 5:15-17.

12. Kico nos por siña for di loke Hesus a bisa tocante e tempo di Noe?

¹² Como cu mundo ta yen di distraccion, no ta facil pa haci bon uzo di nos tempo. Hesus a bisa cu e “presencia di e Yiu di hende” lo ta mescos cu “e dianan di Noe.” Con cos tabata den e dianan di Noe? Wel, di antemano Dios a bisa Noe cu e ta bay pone un fin na e mundo di e tempo ey y cu tur e malbadonan lo hoga den un Diluvio mundial. Y Noe, kende tabata “un predicador di husticia”, a declara e mensahe di Dios fielmente na e hendenan den su tempo. (Mat. 24:37; 2 Ped. 2:5) Pero e hendenan aki tabata “come y bebe, homber y muher tabata casa, . . . y nan no a haci caso te ora e Diluvio a bin y lastra nan tur bay cu ne.” Pesey, Hesus a spierta su siguidonan pa nan ta ‘prepara, pasobra e Yiu di Hende lo bin na un ora cu nan no ta pensa.’ (Mat. 24:38, 39, 44) Nos mester ta manera Noe, y no manera e hendenan di su tempo. Awor, kico lo yuda nos pa ta semper prepara?

13, 14. Kico nos tin cu tene na mente tocante Jehova cu lo yuda nos sigui sirbie fielmente segun cu nos ta spera e binida di e Yiu di hende?

¹³ Aunke e Yiu di hende lo bin na un ora cu nos no ta pensa, nos tin cu corda cu Jehova semper ta cumpli cu su proposito na e momento cu el a stipula. Y su orario no ta depende di sucesonan di mundo ni di hende su plannan. Ta e mes ta dicidi ki ora y con su proposito lo cumpli. (Lesa Daniel 2:21.) De echo, Proverbionan 21:1 ta bisa: “Manera riunan di awa, asina curason di rey ta den e man di SEÑOR; E ta bir’e pa unda cu E kier.”

¹⁴ Pues, Jehova por influencia sucesonan pa e por cumpli cu su proposito na e tempo cu el a stipula. Hopi cambio historico cu a tuma luga riba mundo a contribui na cumplimento di profecianan di Bijbel, specialmente esnan relaciona cu e predicacion mundial di e bon noticia di e Reino di Dios. Tuma por ehempel e caida di Union Sovietico y loke a pasa despues. Hopi hende no a spera cambionan politico asina grandi den un tempo asina cortico. Sinembargo, e cambionan aki a haci posibel cu desde e tempo ey padilanti e bon noticia por a ser predica den hopi pais caminda antes nos trabou tabata prohibi. Pues anto, laga nos haci bon uzo di nos tempo, sirbiendo e Dios di ‘tempo y epoca’ fielmente.

NOS TIN FE CU JEHOVA LO CUMPLI CU SU PROPOSITO PRECIES NA TEMPO

15. Con nos ta demostra cu nos tin fe ora Jehova su organisacion bin cu cierto cambionan?

¹⁵ Pa nos por sigui predica e bon noticia di Reino den e ultimo dianan aki, nos mester tin fe cu Jehova lo cumpli cu su proposito na tempo. Pero tin biaha por bin cambio den e manera cu nos tin cu predica y siña hende debi cu e situacion di mundo ta cambia. Si, de bes en cuando Jehova su organisacion por bin cu cambio pa yuda nos ta mas eficaz den e trabou di predica. Anto nos ta demostra cu nos tin fe den e Dios di ‘tempo y epoca’ ora nos ta adapta nos mes na e ahustenan aki segun cu nos ta sirbie fielmente bou di e liderato di su Yiu, e “cabes di e congregacion.”​—Efe. 5:23.

16. Dicon nos por tin fe cu Jehova lo yuda nos na e momento apropia?

¹⁶ Jehova kier pa nos sinti nos liber pa acerc’e den oracion ki ora cu nos kier y cu e pleno confianza cu e lo “yuda nos na e momento apropia.” (Heb. 4:16)  Esaki ta demostra cuanto e ta interesa den nos y ta stima cada un di nos. (Mat. 6:8; 10:29-31) Y nos na nos turno ta demostra nos fe den Dios ora nos ta haci oracion regularmente, pa nos mes y pa nos rumannan den fe, y ta sigui Jehova su guia.

17, 18. (a) Kico Jehova lo haci pronto cu su enemigonan? (b) Cua trampa nos mester evita?

¹⁷ Awor no ta tempo pa “duda”; ta tempo pa nos tin un fe fuerte cu ta duna nos curashi pa haci Dios su boluntad. (Rom. 4:20) Dios su enemigonan​—Satanas y esnan cu e tin bou di su dominio​—ta purba di para e trabou cu Hesus a asigna na su siguidonan, incluso nos awe. (Mat. 28:19, 20) Aunke Satanas ta ataca nos, nos ta convenci cu Jehova ta e “Dios bibo, kende ta Salbador di tur sorto di hende, specialmente di esnan fiel.” E “sa con pa libra hende devoto na dje for di prueba.”​—1 Tim. 4:10; 2 Ped. 2:9.

¹⁸ Pronto, Jehova lo caba cu e sistema malbado aki. Aunke nos no tin tur detaye ni nos no sa ki dia of ki ora precies esaki lo tuma luga, nos ta sigur cu Cristo lo caba cu e enemigonan di Dios na e momento apropia y cu e soberania di Jehova lo ser vindica. Pesey, ta masha peligroso pa lubida den ki ‘tempo y epoca’ nos ta bibando awe! Laga nos nunca cay den e trampa di pensa cu “tur cos ta sigui exactamente manera nan tabata for di cuminsamento di creacion.”​—1 Tes. 5:1; 2 Ped. 3:3, 4.

‘SPERA RIBA JEHOVA’

19, 20. Dicon nos tin cu spera riba Jehova?

¹⁹ For di tempo cu Dios a crea hende, su proposito tabata pa nan a biba pa semper pa nan por a siña conoc’e y tambe e cosnan bunita cu el a crea. Eclesiastes 3:11 ta bisa: “El a traha tur cos apropia na su tempo. Tambe el a pone eternidad den nan curason, sin cu hende por haya sa e trabou cu Dios a haci for di principio te na fin.”

²⁰ Nos ta masha contento cu Jehova su proposito no a cambia! (Mal. 3:6) Bijbel ta bisa cu Dios “no ta varia ni cambia manera sombra cu ta move.” (Sant. 1:17) Ademas, Jehova no ta depende di e medionan cu hende ta uza pa calcula tempo pa e cumpli cu su proposito. Jehova ta “Rey di eternidad.” (1 Tim. 1:17) Pesey, laga nos ‘spera riba dje, e Dios di nos salbacion.’ (Mik. 7:7) Si, ‘sea fuerte y fortalece boso curason, boso tur cu ta spera riba Jehova.’​—Sal. 31:24.

[Nota]

[Preguntanan di Estudio]

[Plachi na pagina 25]

Daniel tabatin fe cu Jehova lo a cumpli cu Su profecianan

[Plachi na pagina 27]

Bo ta haci bon uzo di bo tempo pa cumpli cu Jehova su boluntad?