▪ Tin hopi manera cu hende ta splica e siñansa di Trinidad. Un di nan ta: “Tin tres Dios​—Dios Tata, Dios Yiu y Dios Spirito Santo. Tur ta todopoderoso, niun no tin comienso ni fin y niun no ta mas cu otro. Hunto nan ta forma un solo Dios.” Pero, e siñansa aki tin base biblico?

Algun hende sa uza Mateo 28:19 pa proba cu e siñansa aki ta biblico. Beibel Santu, por ehempel, ta traduci e versiculo ey asin’aki: “Pesey, bay y haci tur e nacionnan discipel di mi, y batisa nan den nomber di e Tata y di e Yiu y di e Spirito Santo.” En berdad e texto ta menciona tanto e Tata, e Yiu como spirito santo. Pero, e no ta bisa si cu nan ta tres persona den un. Corda tambe cu tempo cu Hesus a duna e mandato na Mateo 28:19, el a dun’e na su discipelnan, kendenan tabata Hudiu. Awor ki concepto e Hudiunan tabatin di Dios?

Wel, ora Dios a duna e nacion di Israel e Ley cu despues a bira parti di e Scritura, el a prohibi nan di tin “otro dios [su] dilanti.” (Deuteronomio 5:7) Awor, ta cuanto persona tabata papia cu e Israelitanan na e ocasion ey? Deuteronomio 6:4 ta bisa bon cla: “Tende, o Israel! SEÑOR ta nos Dios, SEÑOR ta un!” Pues, ta un persona a papia y no tres den un. E tempo ey, Jehova a caba di libra e Israelitanan for di Egipto, caminda hende tabata adora yen di dios trinitario, manera por ehempel Osiris, Isis y Horus. (Wak e plachi na man robes.) Pesey, Jehova a ordena e Israelitanan pa adora un Dios so. Dicon tabata importante pa nan obedece e mandamento aki? Segun Rabi J. H.  Hertz: “E mandato cla aki pa adora un solo Dios ta bay directamente contra politeismo . . . Anto Shema no ta apoya e doctrina di Trinidad cu e credo di cristiandad ta promove, pasobra e doctrina aki ta contra e siñansa cu tin un solo Dios.” *

Siendo cu Hesus mes tabata un hudiu di nacemento, e tambe a ser instrui pa sigui e mandamento aki. Despues cu el a caba di batisa, Satanas a purba persuadie pa adora e y no Jehova. Pero Hesus a bis’e: “Bay for di aki, Satanas! Pasobra ta para skirbi: ‘Ta Jehova bo Dios bo tin cu adora, y ta na e so bo tin cu rindi sirbishi sagrado.’” (Mateo 4:10; Deuteronomio 6:13) Nos por saca por lo menos dos les for di e relato aki. Prome: Si Hesus mes tabata Dios, lo no tabatin ningun sentido pa Satanas purba tenta Hesus pa adora e. Di dos: Hesus a mustra bon cla cu ta un Dios so nos mester adora, pasobra el a bisa cu ta “e so” bo tin cu adora. Si e tabata parti di un Trinidad, lo el a bisa “nos.”

Ora hende siña conoce Dios y kier sirbie, nan ta ser batisa “den nomber di e Tata y di e Yiu y di spirito santo.” (Mateo 28:19) Nan ta acepta e autoridad di Jehova y ta compronde ki papel Hesus tin den cumplimento di Jehova su proposito. (Salmo 83:18; Mateo 28:18) Ademas, nan ta compronde con spirito santo, e forsa activo di Dios, ta funciona.​—Genesis 1:2; Galationan 5:22, 23; 2 Pedro 1:21.

Pa hopi siglo, e siñansa di Trinidad a confundi hende. Di otro banda, Hesus si a siña su siguidonan e berdad y a yuda nan cultiva un bon relacion cu Jehova, “e unico Dios berdadero.”​—Juan 17:3.

[Nota]

[Reconocemento pa Potret na pagina 12]

Musée du Louvre, Paris