“Mi ta duna instruccion na hende casa​—ma no ami sino Señor.”​—1 COR. 7:10.

1. Con cristiannan ta mira matrimonio, y dicon?

ORA cristiannan casa, nan ta haci un voto dilanti di Dios, y esaki ta algo masha serio. (Ecl. 5:4-6) Den un sentido, ta Jehova, Esun cu a origina matrimonio, ta “uni [esnan cu casa] bou di un yugo.” (Mar. 10:9) Pues, no ta importa kico leynan di un pais ta bisa; pa Dios, parehanan casa ta uni bou di un yugo. Pesey, sirbidornan di Jehova mester mira matrimonio como un union permanente, sea cu nan a casa prome of despues cu nan a bira Testigo.

2. Ki preguntanan nos lo trata den e articulo aki?

² Matrimonio por ta un fuente di gran goso. Pero, kico un pareha casa por haci si nan no ta feliz? Nan por drecha nan matrimonio? Ki yudansa tin pa matrimonionan cu ta na peliger?

BO MATRIMONIO TA UN FUENTE DI GOSO OF DI TRISTEZA?

3, 4. Kico por pasa si nos tuma mal decision ora nos kier casa?

³ Parehanan cristian cu tin un matrimonio exitoso ta feliz, y nan union ta duna gloria na Jehova. Pero ora un matrimonio no ta bay bon, esaki por causa hopi tristeza y dolor. Pesey, ta sabi pa un ruman cu tin pensa di casa sigui Dios su guia pa asina su matrimonio por tin un bon comienso. Dicon? Pasobra si e tuma mal decision, esaki por hiba na decepcion y tristeza. Por ehempel, algun hoben ta cuminsa enamora siendo cu nan no ta cla pa asumi e responsabilidadnan cu matrimonio ta trece cu ne. Algun ruman ta core casa cu hende cu nan a conoce via Internet y despues ta haya nan den un matrimonio infeliz. Otronan ta casa despues  di a comete pica serio durante namoramento, y kisas nan ta cuminsa nan matrimonio cu poco respet pa otro.

⁴ Otronan no ta casa “den Señor” y hopi biaha ta sufri e consecuencianan doloroso cu esey ta trece cu ne. (1 Cor. 7:39) Si bo ta den e situacion ey, pidi Jehova den oracion pa pordona bo y yuda bo. Jehova no ta kita e consecuencianan di pica; pero si e persona ta realmente arepenti, Jehova ta yud’e persevera bou di prueba. (Sal. 130:1-4) Pues, haci tur bo esfuerso pa agrada Dios awor y pa semper, y ‘e goso di Jehova lo fortalece bo.’​—Neh. 8:10.

ORA E MATRIMONIO TA NA PELIGER

5. Ora un persona tin problema matrimonial y ta infeliz, ki clase di pensamento e mester evita?

⁵ Un persona cu tin hopi problema matrimonial y cu ta infeliz kisas ta puntra su mes: ‘Ta bale la pena salba e matrimonio aki?’ Podise e ta pensa: ‘Mare mi por a drai holoshi bek y casa cu un otro persona!’ Soñando cu e supuesto beneficionan cu lo e disfruta di dje si e bandona su casa, kisas e ta bisa: ‘Lo mi ta liber atrobe! Pakico no divorcia? Anto si mi no tin base biblico mes pa divorcia, mi por separa y disfruta di bida atrobe.’ Pero na luga di pensa asina y imagina con cos lo por tabata, un cristian mester haci esfuerso pa mehora su situacion actual, buscando Jehova su guia y siguie.

6. Kico Hesus tabata kiermen cu e palabranan na Mateo 19:9?

⁶ No ta tur cristian cu divorcia ta liber pa casa atrobe. Hesus a bisa: “Mi ta bisa boso cu ken cu divorcia di su esposa y casa cu un otro muher​—si no ta pa motibo cu e esposa a comete fornicacion​—ta comete adulterio.” (Mat. 19:9) “Fornicacion” ta encera adulterio y otro pica sexual serio. Pesey ta masha importante pa un cristian cu tin pensa di divorcia​—si no ta pa motibo di fornicacion​—pidi Jehova su guia den oracion.

7. Kico hende lo por pensa ora un pareha cristian su matrimonio fracasa?

⁷ Divorcio of separacion por ta un indicacion cu un persona ta spiritualmente debil. Apostel Pablo a haci e pregunta serio aki: “Si un homber no sa con pa dirigi su mes cas, con lo e por cuida e congregacion di Dios?” (1 Tim. 3:5) De echo, ora un pareha cristian su matrimonio fracasa, hende lo por pensa cu e pareha ey no ta practica loke nan ta predica.​—Rom. 2:21-24.

8. Kico mester ta bayendo robes si un pareha cristian dicidi di separa of divorcia?

 ⁸ Ora un pareha cristian ta plania pa separa of divorcia sin base biblico, mester tin algo robes cu nan relacion cu Jehova. Aparentemente un di nan of podise niun di dos no ta aplica principio biblico. Si nan tabata ‘confia den Jehova cu henter nan curason’, nan lo no tabatin motibo pa pensa cu nan no por salba nan matrimonio.​—Lesa Proverbionan 3:5, 6.

9. Con algun cristian a ser bendiciona debi na nan esfuerso y pasenshi pa salba nan matrimonio?

⁹ Hopi matrimonio cu tabata a punto di kibra, cu tempo, a resulta masha exitoso. Cristiannan cu tin problema matrimonial pero cu no ta pura pa bandona nan casa hopi biaha ta logra bon resultado. Tuma por ehempel un famia cu ta dividi pa motibo di religion. Apostel Pedro a skirbi: “Boso, esposanan, sea sumiso na boso esposo, ya cu si tin algun cu no ta obedece e palabra, boso por gana nan na e fe pa medio di boso conducta sin papia ni un pia di palabra, como cu nan ta testigo di boso conducta puro compaña pa respet profundo.” (1 Ped. 3:1, 2) Si, debi na e excelente conducta di su casa, esun cu no ta Testigo por acepta adoracion berdadero. Di e manera ey, e ruman ta salba su matrimonio, duna honor na Jehova y henter e famia ta beneficia.

10, 11. Ki problemanan inespera por surgi den un matrimonio, pero kico un cristian por ta sigur di dje?

¹⁰ Mayoria di cristian ta scoge pa casa cu un Testigo pasobra nan kier agrada Jehova. Asina mes cosnan por cambia na un manera cu nan no a spera. Podise e esposo of e esposa ta hay’e cu problema emocional serio. Of cu tempo, un di nan por stop di predica y bira inactivo. Wak kico a pasa cu Linda, * un publicador celoso y un bon mama. Linda a para mira con su casa a desvia for di e berdad y ser expulsa sin cu e por a haci nada. Den un situacion asina un cristian por pensa cu su matrimonio no tin sentido mas. Pero kico e por haci?

¹¹ Kisas bo ta puntra bo mes: ‘Mi mester sigui haci esfuerso pa salba mi matrimonio maske kico cu pasa?’ Wel, ningun hende no por ni mester tuma e decision ey pa bo. Sinembargo, tin motibonan valido pa keda positivo y no entrega maske bo matrimonio ta na peliger. Cristiannan cu pa motibo di nan consenshi ta keda cu nan casa a pesar di problema matrimonial ta precioso den bista di Dios. (Lesa 1 Pedro 2:19, 20.) Y pa medio di su Palabra y spirito santo, Jehova lo yuda cristiannan cu ta haci esfuerso sincero pa fortalece nan matrimonio.

NAN TA CLA PA YUDA

12. Kico ancianonan lo pensa si nos busca nan yudansa?

¹² Si bo tin problema matrimonial, no vacila pa busca yudansa cerca cristiannan maduro. Ancianonan ta sirbi como wardado den congregacion y ta cla pa yuda cu conseho biblico. (Echo. 20:28; Sant. 5:14, 15) No pensa cu abo y bo casa lo perde respet di e ancianonan si  boso papia cu nan tocante un problema matrimonial serio y pidi nan yudansa. Al contrario, nan lo haya mas aprecio y respet pa boso pasobra nan ta mira cu boso di berdad kier agrada Dios.

13. Ki conseho nos ta haya na 1 Corintionan 7:10-16?

¹³ Ora cristiannan cu no ta casa cu Testigo di Jehova acerca ancianonan pa yudansa, ancianonan ta referi na consehonan manera esun aki di Pablo: “Mi ta duna instruccion na hende casa​—ma no ami sino Señor​—cu un esposa no mester separa di su esposo; pero si e separa toch, lag’e keda sin casa, of si no, lag’e haci bon cu su esposo; y un esposo no mester bay laga su esposa. . . . Pasobra, esposa, con bo por sa cu lo bo no salba bo esposo? Of esposo, con bo por sa cu lo bo no salba bo esposa?” (1 Cor. 7:10-16) Ta realmente un bendicion ora un casa cu no ta Testigo bira un sirbidor di Jehova.

14, 15. Ki ora un ruman por separa di su casa, pero dicon ta importante pa e haci oracion tocante e asunto y samina su sintimentonan honestamente?

¹⁴ Awor, bou di ki circunstancianan un esposa cristian tin mag di “separa” di su esposo? Wel, algun ruman ta scoge pa separa pasobra nan casa ta nenga di percura materialmente pa e famia. Otronan ta separa debi na maltrato fisico severo of pasobra nan casa ta pone cu nan no por sirbi Dios.

¹⁵ E decision pa separa of no ta un decision personal. No obstante, cristiannan mester haci oracion tocante e asunto y samina nan sintimentonan honestamente. Por ehempel, ta e casa cu no ta Testigo ta e unico responsabel pa e echo cu e ruman no por sirbi Jehova? Of e ruman mes tambe ta responsabel pa e echo cu e no ta studia su Bijbel, bay su reunionnan y sirbishi riba un base regular?

16. Dicon cristiannan no ta pura pa divorcia?

¹⁶ Nos ta balora nos relacion cu Dios y ta respeta matrimonio como su regalo; pesey nos no ta pura pa divorcia. Como sirbidor di Jehova, nos kier santifica su nomber santo. Pesey, nunca nos lo kibra nos matrimonio djis pa casa cu otro hende.​—Jer. 17:9; Mal. 2:13-16.

17. Ki ora nos por bisa cu Dios a yama cristiannan casa pa biba na paz?

¹⁷ Un cristian cu ta casa cu un persona cu no ta Testigo mester haci tur loke e por pa mantene su matrimonio. Pero si su casa dicidi di separa of divorcia toch a pesar di tur e esfuersonan cu e ruman ta haci pa keda casa, e ruman no mester sintie culpabel. Pablo a skirbi: “Si e casa cu no ta creyente dicidi di bay, lag’e bay; . . . un ruman homber of un ruman muher no ta bou di obligacion di keda  cu ne, pasobra Dios a yama boso pa biba na paz.”​—1 Cor. 7:15. *

CONFIA DEN JEHOVA

18. Ki beneficionan un ruman por ricibi aunke e no logra salba su matrimonio despues di hopi esfuerso?

¹⁸ Ora di trata cu cualkier problema matrimonial, pidi Jehova den oracion pa yuda bo persevera y confia plenamente den dje. (Lesa Salmo 27:14. *) Wak con a bay cu Linda, kende nos a menciona anteriormente. Pa añanan largo, el a haci esfuerso pa salba su matrimonio. Pero a pesar di esey, nan a divorcia. Linda ta sinti cu tur su esfuerso tabata pornada? El a bisa: “Claro cu no! E esfuerso cu mi a haci tabata un bon testimonio pa otro hende. Y mi consenshi ta trankil. Mi bendicion mas grandi ta cu e añanan ey a yuda nos yiu muher keda firme den e berdad. Awor e ta un Testigo di Jehova masha celoso.”

19. Kico lo por ta e resultado ora un persona haci esfuerso pa salba su matrimonio?

¹⁹ Un ruman muher cu yama Marilyn ta masha contento cu el a confia den Dios y a haci extra esfuerso pa salba su matrimonio. El a bisa: ‘Mi tabatin gana di separa di mi casa pasobra mi tabata haya cu e no tabata percura materialmente pa mi y cu e tabata stroba mi di sirbi Jehova. Un tempo, e tabata anciano. Pero el a envolve su mes den negoshi cu no a cumbinie y cu a pon’e perde hopi reunion. Nos a asta stop di comunica cu otro. Despues mi a realisa cu ta e atake terorista cu a tuma luga den nos ciudad a spanta mi asina tanto cu mi no kier a comunica cu otro hende. Pues ami tambe a contribui na nos problemanan. Nos a cuminsa comunica cu otro atrobe, haci nos estudio di famia y asisti regularmente na nos reunionnan. E ancianonan tabata masha bondadoso y a yuda nos bon. Nos matrimonio a cuminsa haya bida atrobe y, cu tempo, mi casa a bolbe cualifica pa ricibi privilegio den congregacion. Nos a pasa den un experencia amargo, pero e tabatin un final feliz.’

20, 21. Kico mester ta nos determinacion relaciona cu matrimonio?

²⁰ Sea cu nos ta soltero of casa, laga nos semper persevera y confia den Jehova. Ora nos tin problema matrimonial, nos mester haci nos maximo esfuerso pa resolve nan, pasobra nos “no ta dos mas, sino un carni.” (Mat. 19:6) Y si nos famia ta dividi pa motibo di religion, laga nos persevera a pesar di dificultad. Asina nos por tin e goso di gana nos casa den e berdad.

²¹ Si, sea loke sea nos situacion, nos conducta semper mester ta un testimonio pa personanan cu no ta forma parti di e congregacion cristian. Pues, si nos matrimonio ta na peliger, laga nos haci oracion intenso, analisa nos motibonan, medita riba e Scritura y busca yudansa di e ancianonan. Pero loke ta mas importante, laga nos ta determina pa agrada Jehova den tur cos y pa demostra cu nos realmente ta balora matrimonio como un maraviyoso regalo di Dios.

[Nota]

[Preguntanan di Estudio]

[Comentario na pagina 20]

Hopi bes, cristiannan cu no ta pura pa divorcia of separa ta ricibi bendicion

[Comentario na pagina 22]

Semper confia den Jehova y pidie yuda bo persevera

[Plachi na pagina 19]

Jehova ta bendiciona cristiannan cu ta haci esfuerso sincero pa fortalece nan matrimonio

[Plachi na pagina 21]

E congregacion cristian por ta un fuente di consuelo y yudansa spiritual