“Mi boca lo conta di bo husticia y di bo salbacion henter dia.”​—SAL. 71:15.

1, 2. (a) Kico un persona ta indica ora e dedica su mes na Jehova? (b) Con e ehempel di Noe, Moises, Jeremias y Pablo por beneficia nos?

ORA bo dedica bo mes na Dios y bira un siguido batisa di Hesus, bo ta tuma e decision di mas serio di bo bida. Ta comosifuera bo ta bisa Jehova: ‘Mi kier pa abo ta mi Doño den tur aspecto di mi bida. Mi ta bo sirbidor. Mi kier pa abo bisa mi con mi mester uza mi tempo, kico mester ta mi prioridadnan y con mi mester uza mi recurso- y talentonan.’

² Si bo ta un cristian dedica, esey ta basicamente loke bo a priminti Jehova. Nos kier felicita bo pa e bon decision ey cu bo a tuma; bo a haci loke ta corecto y sabi. Pero awor cu bo a acepta Jehova como bo Doño, con lo bo tin cu uza bo tempo? E ehempel di Noe, Moises, Jeremias y apostel Pablo por yuda nos analisa e pregunta ey. Nan tur a sirbi Jehova di henter nan alma. Nos situacion awe ta mescos cu di nan. E decisionnan cu nan a tuma a demostra kico ta nan prioridad y por anima nos pa analisa e manera cu nos ta uzando nos tempo.​—Mat. 28:19, 20; 2 Tim. 3:1.

PROME CU DILUVIO

3. Den ki manera nos tempo ta mescos cu tempo di Noe?

³ Hesus a compara e tempo di Noe cu nos tempo. El a bisa: “Mescos cu e dianan di Noe tabata, asina presencia di e Yiu di hende lo ta.” E hendenan “tabata come y bebe, homber y muher tabata casa, te riba e dia cu Noe a drenta den arca, y nan no a haci caso te ora e Diluvio a bin y lastra nan tur bay cu ne.” (Mat. 24:37-39) Mayoria di hende awe ta biba trankil di nan sin preocupa cu e urgencia di nos tempo. Nan no ta haci caso di e spiertamento cu e sirbidornan di Dios ta proclama. Mescos cu e hendenan den tempo di Noe, hopi di nan ta hasta haci bofon di e idea cu Dios lo interveni den asunto humano. (2 Ped. 3:3-7) Pero con Noe a uza su tempo a pesar cu e hendenan rond di dje no tabata haci caso di su spiertamento?

4. Con Noe a uza su tempo despues cu el a haya su tarea special cerca Jehova, y dicon?

⁴ Dios a informa Noe cu e ta bay destrui tur hende malbado y a dun’e un tarea special. Noe e ora ey a traha un arca pa salba hende y bestia. (Gen. 6:13, 14, 22) Tambe el a proclama e huicio cu Jehova tabata bay trece. Apostel Pedro a yama Noe “un predicador di husticia”, loke ta indica cu el a haci esfuerso pa yuda su prohimo compronde cu tabata urgente pa nan actua. (Lesa 2 Pedro 2:5.) Bo ta kere cu lo tabata sabi pa Noe y su famia uza nan tempo pa cuminsa un negoshi of pa bira mas exitoso cu otro hende of pa hiba un bida comodo? Claro cu no! Sabiendo kico tabata na caminda, nan a evita tur loke por a kita nan atencion for di nan tarea special.

LOKE UN PRINS DI EGIPTO A SCOGE

5, 6. (a) E educacion cu Moises a haya tabata pa prepar’e pa kico? (b) Dicon Moises no a probecha di e oportunidadnan cu e bida como prins di Egipto a ofrec’e?

⁵ Laga nos wak awor e ehempel di Moises. El a lanta den un palacio di Egipto como yiu di crianza di e yiu muher di Farao. Na mucha, “nan a educa Moises den tur e sabiduria di e Egipcionan.” (Echo. 7:22; Exo. 2:9, 10) E intencion di e educacion aki tabata probablemente pa prepar’e pa un carera como prins den servicio di Farao. E por a haya un puesto importante den e gobierno di mas poderoso di e tempo ey. Tambe e por tabatin e cosnan di luho, e privilegionan y e placernan cu a compaña un puesto asina. Pero ta esey tabata Moises su meta den bida?

⁶ Tempo Moises tabata chikito, su berdadero mayornan probablemente a siñ’e loke Jehova a priminti su antepasadonan: Abraham, Isaak y Jacob. Moises tabatin fe den e promesanan ey. Lo e mester a pensa bon riba su futuro y su lealtad na Jehova. Pues, ora e momento a yega cu e mester a scoge entre ser un prins Egipcio of un esclavo Israelita, kico el a dicidi? “El a scoge pa ser maltrata hunto cu e pueblo di Dios en bes di gosa di e placernan pasahero di pica.” (Lesa Hebreonan 11:24-26.) Mas despues, el a uza su bida manera Jehova a instru’e. (Exo. 3:2, 6-10) Dicon Moises a haci esey? Pasobra el a kere loke Dios a priminti y a yega na e conclusion cu lo e no tin ningun futuro den Egipto. Y en berdad, poco despues di esey e dies plaganan di Dios a aplasta e nacion ey. Bo ta mira e les cu tur hende dedica na Jehova por siña for di esaki awe? Nos mester enfoca riba Jehova y su sirbishi, y no riba un carera of cualkier placer di e mundo aki.

JEREMIAS TABATA SA KICO TA NA CAMINDA

7. Den ki sentido e situacion di Jeremias tabata mescos cu esun di nos?

⁷ Un otro homber cu a pone e sirbishi di Jehova na prome luga tabata profeta Jeremias. Jehova a scoge Jeremias pa sirbi como su profeta y a dun’e e encargo di predica e mensahe cu Jehova lo a trece huicio riba Jerusalem y Juda apostata. Den un sentido, Jeremias tabata biba “den e ultimo dianan.” (Jer. 23:19, 20) E tabata sa bon bon cu e sistema den cua e tabata biba lo no a dura hopi.

8, 9. (a) Dicon Jehova mester a corigi Baruk su manera di pensa? (b) Kico nos mester corda ora nos ta traha plan?

⁸ Kico tabata e consecuencia logico di loke Jeremias tabata kere? E no a purba di traha pa su futuro den e sistema ey cu tabata destina na destruccion. Lo no tabatin sentido pa e haci esey. Ma su secretario, Baruk, si no a pensa asina. Pesey Dios a inspira Jeremias pa bisa su secretario: “Mira, loke mi a edifica mi ta bay bash’abou, y loke mi a planta mi ta bay ranca, esta, henter e tera. Ma abo, bo ta busca cosnan grandi pa bo mes? No busca eseynan; pasobra mira, mi ta bay trece desaster riba tur carni, . . . ma lo mi duna bo bo bida como botin, na tur luga cu bo bay.”​—Jer. 45:4, 5.

⁹ Nos no sa sigur kico tabata e “cosnan grandi” cu Baruk tabata busca pa su mes. * Pero loke si nos sa ta cu e cosnan ey lo no a dura; nan lo a caba ora Babilonia lo a conkista Jerusalem na aña 607 prome cu nos era. Kico nos ta siña for di esaki? Wel, nos mester plania pa futuro pa haci sigur cu nos tin e necesidadnan di bida. (Pro. 6:6-11) Pero lo ta sabi pa dedica gran parti di nos tempo y energia na actividadnan cu no tin balor duradero? Ta berdad cu e organisacion di Jehova ta sigui plania pa Salonnan di Reino, sucursalnan y otro proyectonan teocratico nobo. Pero e proyectonan aki ta diferente, ya cu nan meta ta pa promove interesnan di Reino. Lo ta bon anto pa tur sirbidor dedica di Jehova tambe fiha e tipo di prioridadnan ey ora nan ta traha plan. Abo ta convenci den bo curason cu bo ta ‘buscando prome e Reino y e husticia di Dios’?​—Mat. 6:33.

MI “TA CONSIDERA NAN COMO COS DI BENTA AFO”

10, 11. (a) Riba kico Pablo tabata concentra prome cu el a bira cristian? (b) Dicon Pablo su prioridadnan den bida a cambia completamente?

¹⁰ Por ultimo, laga nos considera e ehempel di Pablo. Prome cu el a bira cristian, e tabatin loke a parce un futuro prometedor. El a studia ley hudiu cerca un di e maestronan mas famoso di su tempo. El a ricibi cierto autoridad for di e sumo sacerdote hudiu. Y el a haci mas progreso den hudaismo cu hopi hende di su edad. (Echo. 9:1, 2; 22:3; 26:10; Gal. 1:13, 14) Pero tur esey a cambia ora Pablo a realisa cu Jehova a rechasa e Hudiunan como nacion.

¹¹ Pablo tabata sa cu for di e punto di bista di Jehova un carera den e sistema Hudiu no tabatin ningun balor; e nacion ey no tabatin futuro. (Mat. 24:2) E ex fariseo aki a haya un comprondemento nobo y mas cla di e proposito di Dios, y tambe el a ricibi e privilegio di e sirbishi cristian. El a hasta bisa cu e cosnan cu antes el a pensa tabata importante awor tabata “como cos di benta afo.” Pablo a bandona su actividadnan den hudaismo y a dedica e resto di su bida na predicacion di e bon noticia.​—Lesa Filipensenan 3:4-8, 15; Echo. 9:15.

ANALISA BO PRIORIDADNAN

12. Riba kico Hesus a concentra despues cu el a batisa?

¹² Noe, Moises, Jeremias, Pablo y hopi otro hende mescos cu nan a dedica mayoria di nan tempo y energia na actividadnan teocratico. Nan ta bon ehempel pa nos. Naturalmente, e mihor ehempel di tur sirbidor dedica di Jehova ta Hesus. (1 Ped. 2:21) Despues cu el a batisa, el a dedica e resto di su bida riba tera na predicacion di e bon noticia y na duna honor na Jehova. Un cristian cu ta reconoce Jehova como su Doño ta conclui for di esaki cu su sirbishi na Jehova mester tin prioridad den su bida. Esey ta bo prioridad? Con nos por traha pa logra metanan teocratico y alabes atende otro responsabilidadnan necesario?​—Lesa Salmo 71:15; 145:2.

13, 14. (a) E organisacion di Jehova ta anima tur cristian dedica pa pensa riba kico? (b) Ki satisfaccion e pueblo di Dios por tin?

¹³ A traves di añanan, e organisacion di Jehova a anima cristiannan bes tras bes pa analisa hunto cu oracion si nan por traha pionero. E circunstancianan di varios sirbidor fiel di Jehova no ta permiti nan dedica un promedio di 70 ora pa luna na e trabou di predica. Nan no mester sinti nan malo pa esaki. (1 Tim. 5:8) Pero kico di abo? Di berdad e trabou di pionero ta fuera di bo alcance?

¹⁴ Pensa un rato riba e goso cu hopi sirbidor di Jehova tabatin durante e temporada di Memorial di e aña aki. Durante luna di maart, e pioneronan auxiliar tabatin e oportunidad special di scoge si nan ta traha 30 of 50 ora den sirbishi di veld. (Sal. 110:3) Miyones di ruman a traha pionero auxiliar, y bo por a sinti e gran entusiasmo y goso cu tabata reina den e congregacionnan. Abo lo por regla bo asuntonan di tal manera cu bo por experencia e goso ey riba un base mas regular? Ora un cristian dedica traha pionero, e ta sinti un gran satisfaccion y por bisa na final di cada dia: “Jehova, mi a haci tur loke mi tabata por den bo sirbishi.”

15. Ki meta un hoben cristian lo mester tin ora e ta bay scol?

¹⁵ Podise bo ta cabando scol, y bo tin bon salud y tiki responsabilidad. Bo a pensa seriamente riba e trabou di pionero regular? Na scol, maestronan sin duda ta kere cu e mihor cos cu bo por haci ta di sigui un estudio avansa, of bay universidad, y plania pa un carera den mundo. Sinembargo, nan confianza ta den un sistema social y financiero cu no tin un futuro duradero. Di otro banda, si bo haci e sirbishi di Jehova bo carera, lo bo ta dedicando bo tempo na metanan duradero cu ta bale la pena. Ademas, lo bo ta imitando e ehempel perfecto di Hesus. Esey ta un decision sabi cu lo haci bo feliz, lo proteha bo y lo demostra cu bo ta determina pa cumpli cu bo dedicacion na Jehova.​—Mat. 6:19-21; 1 Tim. 6:9-12.

16, 17. Menciona algun pregunta cu cristiannan por haci nan mes tocante nan empleo y otro actividadnan.

¹⁶ Hopi sirbidor di Dios awe tin cu traha hopi ora pa nan por cubri e necesidadnan basico di nan famia. Pero algun di nan ta traha mas ora cu ta necesario. (1 Tim. 6:8) E mundo comercial ta haci tur su esfuerso pa convence nos cu nos no por biba sin e tantisimo productonan cu tin riba mercado y tur e modelonan nobo cu ta sali. Pero cristiannan berdadero no kier pa Satanas y su mundo dicidi pa nan kico mester ta na prome luga. (1 Juan 2:15-17) Kico di rumannan cu a baha cu pensioen? E mihor manera cu nan por uza nan tempo ta di traha pionero, y asina nan ta pone e sirbishi di Jehova na prome luga.

¹⁷ Tur sirbidor dedica di Jehova por puntra nan mes: Kico ta e cos mas importante den mi bida? Mi ta pone interesnan di Reino na prome luga? Mi ta imita Hesus su actitud di sacrificio propio? Mi ta haci caso di su conseho pa siguie continuamente? Mi por ahusta mi programa di tal manera cu mi por dedica mas tempo na e trabou di predica of na otro actividadnan teocratico? Hasta si aworaki mi circunstancianan no ta permiti mi haci mas den sirbishi, mi ta sigui cultiva un spirito di sacrificio propio?

“TANTO E DESEO COMO E PODER PA HACI”

18, 19. Kico bo por pidi den oracion, y dicon Jehova lo keda contento cu e peticion ey?

¹⁸ Ta un goso pa mira e celo di e pueblo di Dios. Pero algun ruman cu por traha pionero no tin masha gana di hacie of ta sinti cu nan no ta cualifica pa hacie. (Exo. 4:10; Jer. 1:6) Kico nan por haci? Nan por pidi Jehova yuda nan. Pablo a bisa su rumannan den fe cu Jehova ‘ta esun cu ta obra den nan y ta duna nan tanto e deseo como e poder pa haci tur loke ta agrad’e.’ (Flp. 2:13) Si bo no ta sinti e deseo pa haci mas den bo sirbishi, pidi Jehova duna bo tanto e deseo como e poder pa haci esey.​—2 Ped. 3:9, 11.

¹⁹ Noe, Moises, Jeremias, Pablo y Hesus tur tabata hombernan dedica. Nan a uza nan tempo y energia pa predica Jehova su mensahe di spiertamento. Nan no a laga nada kita nan atencion for di e trabou. Fin di e sistema actual ta cerca. Pesey, nos tur cu a dedica nos bida na Dios tin cu haci sigur cu nos ta haciendo tur nos esfuerso pa imita e ehempelnan excelente aki cu nos ta lesa di dje den Bijbel. (Mat. 24:42; 2 Tim. 2:15) Di e manera ey nos por agrada Jehova y ricibi hopi bendicion.​—Lesa Malakias 3:10.

[Nota]

[Preguntanan di Estudio]

 [Plachi na pagina 22]

Hende no a haci caso di e spiertamento di Noe

 [Plachi na pagina 25]

Abo a pensa seriamente riba e trabou di pionero regular?