“Un revelacion di Hesucristo, cu Dios a dun’e, pa e mustra su esclavonan e cosnan cu tin cu sosode pronto.”​—REV. 1:1.

1, 2. (a) E profecianan di Daniel y di Juan ta yuda nos haci kico? (b) Kico e prome seis cabesnan di e bestia salbahe a representa?

ORA nos considera e profecianan di Daniel y di Juan hunto, nan ta yuda nos compronde hopi cos cu ta pasando awe den mundo y cos cu lo bay pasa den futuro. Kico nos por siña si nos compara e vision cu Juan a haya di e bestia salbahe cu Daniel su relato di e bestia spantoso cu tabatin dies cacho y cu Daniel su splicacion di e imagen inmenso? Y unabes nos compronde e profecianan aki bon, kico nan mester motiva nos pa haci?

² Laga nos analisa Juan su vision di e bestia salbahe. (Rev., cap. 13) Manera nos a mira den e articulo anterior, e prome seis cabesnan di e bestia a representa Egipto, Asiria, Babilonia, Medopersia, Grecia y Roma. Tur e gobiernonan ey a demostra nan odio contra e simia di e muher. (Gen. 3:15) Roma, e di seis cabes, a keda un potencia politico dominante pa varios siglo despues cu Juan a skirbi su vision. Cu tempo, e di shete cabes lo a tuma e luga di Roma. Cua poder mundial politico esey a resulta di ta, y con lo el a trata e simia di e muher?

GRAN BRITANIA Y MERCA TA SUBI NA PODER

3. Kico e bestia spantoso cu tabatin dies cacho a representa, y kico e dies cachonan a representa?

³ Nos por identifica e di shete cabes di e bestia salbahe di Revelacion capitulo 13 si nos compara e vision di Juan cu e vision cu Daniel a haya di e bestia spantoso cu tabatin dies cacho. * (Lesa Daniel 7:7, 8, 23, 24.) E bestia cu Daniel a mira a representa e Poder Mundial di Roma. (Wak e tabel na pagina 14-15.) Den siglo 5 di e era cristian, e Imperio Romano a cuminsa plama for di otro. E dies cachonan cu a sali for di cabes di e bestia spantoso ey a representa e reinonan cu a sali for di e imperio ey.

4, 5. (a) Kico e cacho chikito a haci? (b) Kico tabata e di shete cabes di e bestia salbahe?

⁴ Den e profecia di Daniel tocante e bestia feroz cu tabatin dies cacho, un otro cacho, “un chikito”, ta sali y ranca tres di e dies cachonan cu raiz cu tur. Esaki a cumpli ora Gran Britania, cu tabata un base militar chikito di e Imperio Romano, a crece bira prominente. Te cu siglo 17, Gran Britania tabata un reino relativamente insignificante. Tres otro region di e Imperio Romano bieu tabatin mas tanto influencia, esta, Spaña, Hulanda y Francia. Pero Gran Britania a bringa contra e potencianan ey, y un pa un el a kita nan for di nan puesto di prestigio. Pa meymey di siglo 18, Gran Britania tabata na caminda pa bira e potencia dominante di e escena mundial. Pero ainda e no a bira e di shete cabes di e bestia salbahe.

⁵ A pesar cu Gran Britania a bira un potencia poderoso, su colonianan na Norte America a rebela y a bira Estados Unidos. Pero Gran Britania no a stroba Merca di bira un pais poderoso y hasta a uza e forsa naval Britanico pa proteha Merca. Na aña 1914, ora cu e dia di Señor a cuminsa, Gran Britania tabatin e imperio di mas grandi den historia y Merca a bira e potencia industrial di mas grandi riba tera. * Durante Prome Guera Mundial, Merca a bira un socio intimo di Gran Britania. Ta e ora ey nan a bira e Poder Mundial Combina di Gran Britania y Merca (of, e Poder Mundial Angloamericano). E poder mundial aki tabata e di shete cabes. Con e cabes aki a trata e simia di e muher?

6. Con e di shete cabes a trata e pueblo di Dios?

⁶ Poco despues cu e dia di Señor a cuminsa, e di shete cabes a lansa un atake contra e pueblo di Dios, esta, contra e resto di e rumannan di Cristo cu tabata riba tera. (Mat. 25:40) Hesus a indica cu durante su presencia un resto di e simia di e muher lo tabata activo riba tera. (Mat. 24:45-47; Gal. 3:26-29) E Poder Mundial Combina di Gran Britania y Merca a bringa contra e santonan ey. (Rev. 13:3, 7) Durante Prome Guera Mundial, e poder combina ey a oprimi e pueblo di Dios, prohibi algun di nan publicacionnan y encarcela algun representante di e esclavo fiel. E di shete cabes di e bestia salbahe casi a mata, of para, e trabou di predica pa un tempo. Jehova a revela e suceso dramatico aki na Juan den un vision. Tambe el a bisa Juan cu e parti secundario di e simia lo a rebiba y cuminsa predica cu entusiasmo atrobe. (Rev. 11:3, 7-11) E historia di e sirbidornan di Jehova di e tempo aki ta confirma cu e sucesonan ey a tuma luga.

E PODER MUNDIAL COMBINA DI GRAN BRITANIA Y MERCA Y E PIANAN DI HERO CU KLEI

7. Ki parti di e imagen inmenso ta coresponde cu e di shete cabes di e bestia salbahe?

⁷ Ki parti di e imagen inmenso ta coresponde cu e di shete cabes di e bestia salbahe? Gran Britania​—y indirectamente tambe Merca​—a sali for di e Imperio Romano. Pero kico di e pianan di e imagen? Daniel ta describi nan como un mescla di hero cu klei. (Lesa Daniel 2:41-43.) E descripcion aki di e pianan ta coresponde cu e tempo ora cu e di shete cabes, esta, e Poder Mundial Combina di Gran Britania y Merca, lo a bira prominente. Mescos cu un cos traha di hero mescla cu klei ta mas zwak cu un cos traha di hero solido, asina tambe e Poder Mundial Combina di Gran Britania y Merca ta mas zwak cu esun for di cua el a sali. Dicon nos por bisa esey?

8, 9. (a) Con e di shete poder mundial a mustra cu e tabata fuerte manera hero? (b) Kico e klei di e pianan di e imagen ta representa?

⁸ Tabatin biaha cu e di shete cabes di e bestia tabata fuerte manera hero. Por ehempel, el a demostra su poder ganando e Prome Guera Mundial. Durante Segundo Guera Mundial tambe e poder manera hero di e di shete cabes tabata bisto. * Despues di e guera ey, e di shete cabes na varios ocasion a sigui demostra su caracteristicanan di hero. Pero, for di den principio e hero ey tabata mescla cu klei.

⁹ Pa hopi tempo e sirbidornan di Jehova a trata di compronde kico e pianan di e imagen a representa. Daniel 2:41 ta describi e mescla di hero cu klei como “un reino.” Pues, e klei ta representa cierto elemento den e Poder Mundial Combina di Gran Britania y Merca, si, elementonan cu ta hacie mas zwak cu e Imperio Romano cu a ser describi como e pianan di hero solido. Segun e profecia, e klei ta referi na “e simia di hende”, esta, na hende comun y coriente. (Dan. 2:43) E pueblo comun a zwak e poder mundial combina aki ora cu nan a exigi nan derechonan via di campañanan di derecho civil, sindicatonan laboral y movementonan di independencia. Nan a debilita e poder mundial aki su capacidad di actua cu forsa di hero. Ademas, hende den e arena politico tin ideanan totalmente diferente for di otro. Y resultadonan preta di eleccion, cu no ta resulta den un gran mayoria, ta zwak e poder di hasta lidernan popular, di manera cu nan no ta haya un mandato cla pa implementa nan promesanan. Daniel a profetisa: “Un parti di e reino lo ta fuerte y un parti lo ta fragil.”​—Dan. 2:42; 2 Tim. 3:1-3.

10, 11. (a) Kico lo pasa den futuro cu “e pianan”? (b) Kico nos por compronde tocante e dedenan di pia?

¹⁰ Awe, den siglo 21, Gran Britania y Merca ainda ta socio intimo di otro. Hopi bes nan ta coopera cu otro den asuntonan mundial importante. E profecianan tocante e imagen inmenso y e bestia salbahe ta confirma cu ningun otro poder mundial lo no reemplasa e Poder Mundial Combina di Gran Britania y Merca. A pesar cu e ta mas zwak cu Roma, cu tabata e pianan di hero, lo e no caba na nada di su mes.

¹¹ Kico di e cantidad di dede di pia di e imagen? Nan tin un nificacion special? Den e otro visionnan Daniel a menciona cantidad specifico. Por ehempel, hopi di e bestianan tabatin un cantidad specifico di cacho. E cantidadnan ey ta importante. Pero Daniel no a bisa cuanto dede di pia e imagen tin. Pues, ta parce cu e cantidad di dede di pia no ta importante, mescos cu e cantidad di brasa, man, dede of pia di e imagen no ta importante. Loke si Daniel a bisa specificamente ta cu e dedenan di pia tabata traha di hero cu klei. For di su descripcion nos por compronde cu e Poder Mundial Combina di Gran Britania cu Merca ta esun cu lo ta dominando ora cu e “piedra”, cu ta representa e Reino di Dios, dal e pianan di e imagen.​—Dan. 2:45.

E COMBINACION GRAN BRITANIA Y MERCA Y E BESTIA SALBAHE DI DOS CACHO

12, 13. Kico e bestia salbahe di dos cacho ta representa, y kico e ta haci?

¹² A pesar cu e Poder Mundial Combina di Gran Britania y Merca ta un mescla di hero cu klei, e visionnan cu Hesus a duna Juan ta mustra cu e potencia aki lo a sigui hunga un papel clave durante e ultimo dianan. Con asina? Den un vision Juan a mira un bestia salbahe cu tabatin dos cacho y cu a papia manera un dragon. Kico e bestia straño aki a representa? E tin dos cacho, pues e ta representa dos gobierno cu ta socio di otro. Esaki ta indica cu Juan a bolbe mira e Poder Mundial Combina di Gran Britania y Merca, pero e biaha aki den un capacidad special.​—Lesa Revelacion 13:11-15.

¹³ E bestia salbahe aki a “bisa” e hendenan pa traha un imagen di e bestia salbahe cu tabatin shete cabes y dies cacho. Juan a skirbi cu e imagen di e bestia lo a aparece, disparce y bolbe presenta atrobe. Esey ta precies loke a sosode cu un organisacion cu a lanta despues di Prome Guera Mundial. Gran Britania y Merca a urgi e otro nacionnan pa join e organisacion aki cu supuestamente lo a uni e reinonan di mundo y papia pa nan. * E organisacion aki tabata yama Liga di Nacionnan. El a disparce ora cu Segundo Guera Mundial a cuminsa. Durante e guera ey, e pueblo di Dios a anuncia cu segun e profecia di Revelacion, e imagen di e bestia salbahe lo a bolbe aparece. Anto esey ta exactamente loke a sosode, pero e biaha aki el a aparece bou di e nomber Nacionnan Uni.​—Rev. 17:8.

14. Den ki sentido e imagen di e bestia salbahe ta “un di ocho rey”?

¹⁴ Juan a describi e imagen di e bestia salbahe como “un di ocho rey.” Den ki sentido esey ta? E no ta aparece como e di ocho cabes di e bestia salbahe original. E ta simplemente un imagen di e bestia ey. E poder cu e tin ta bin di e nacionnan cu ta miembro di Nacionnan Uni, specialmente di su apoyado principal, e Poder Mundial Combina di Gran Britania y Merca. (Rev. 17:10, 11) Pero e ta ricibi autoridad pa actua como rey pa cumpli cu un tarea specifico, si, un tarea cu ta start un serie di suceso cu lo cambia historia.

E IMAGEN DI E BESTIA SALBAHE TA “HABRACA” E PROSTITUTA

15, 16. Kico e prostituta ta simbolisa, y kico a pasa cu e apoyo cu e tabatin?

¹⁵ Juan a mira tambe den vision un prostituta sinta riba un bestia salbahe color cora bibo. E bestia aki a representa e mesun cos cu e imagen di e bestia salbahe. E prostituta tabatin e nomber “Babilonia e Grandi.” (Rev. 17:1-6) E muher aki aptamente ta representa tur religion falso, di cua esnan principal ta e iglesianan di cristiandad. Organisacionnan religioso publicamente a apoya e imagen di e bestia y a purba di dirigie.

¹⁶ Pero durante e dia di Señor, Babilonia e Grandi a mira con “e awanan” cu e ta sinta ariba a seca drasticamente; es decir, e hendenan no ta apoy’e mas manera antes. (Rev. 16:12; 17:15) Por ehempel, tempo cu e imagen di e bestia a aparece pa prome biaha, e iglesianan di cristiandad, un parti importante di Babilonia e Grandi, tabata domina e mundo occidental. Awe, hopi hende no tin respet mas pa e iglesianan aki ni pa nan pastoornan. De echo, hopi hende ta kere cu ta religion ta contribui na conflicto den mundo of hasta ta caus’e. Tin un grupo di intelectual masha critico y militante cu mas y mas ta exigi pa pone un fin na e influencia cu religion tin riba sociedad.

17. Kico lo pasa denter di poco cu religion falso, y dicon?

¹⁷ Pero religion falso lo no perde su poder gradualmente y despues disparce. E prostituta lo keda un forsa potente y lo trata di pone reynan haci loke e kier, te ora Dios hinca un idea den curason di esnan na poder. (Lesa Revelacion 17:16, 17.) Denter di poco Jehova lo pone e elementonan politico di e mundo di Satanas, representa pa Nacionnan Uni, ataca religion falso. Nan lo destrui su influencia y tur su rikesa. Un par di decada pasa esey lo a parce algo masha improbabel. Pero awe, e prostituta aki ta tambaliando riba lomba di e bestia color cora bibo. Asina mes, lo e no slip baha for di lomba di e bestia. Lo e dal abou diripiente y na un manera violento.​—Rev. 18:7, 8, 15-19.

E BESTIANAN TA YEGA NA NAN FIN

18. (a) Kico e bestia salbahe lo haci, y cu ki resultado? (b) Segun Daniel 2:44, e Reino di Dios lo destrui cua reinonan? (Wak e cuadro na pagina 19.)

¹⁸ Despues cu e bestia salbahe, esta, Satanas su organisacion politico riba tera, destrui religion falso, lo e ser instiga pa ataca e Reino di Dios. E reynan di e tera no por yega te den cielo cerca e Reino, pues nan lo baha nan rabia riba e hendenan riba tera cu ta apoya e Reino ey. Esaki ta hiba na un bataya final contra Dios. (Rev. 16:13-16; 17:12-14) Daniel a describi un resultado inevitabel di e bataya final ey. (Lesa Daniel 2:44.) E bestia salbahe menciona na Revelacion 13:1, su imagen y e bestia salbahe di dos cacho lo ser destrui.

19. Di kico nos por ta sigur, y awor ta e momento pa haci kico?

¹⁹ Nos ta bibando den tempo di e di shete cabes di e bestia di Revelacion capitulo 13. E bestia ey lo no haya mas cabes prome cu su destruccion. E Poder Mundial Combina di Gran Britania y Merca lo ta e poder mundial dominante ora cu lo caba cu religion falso. E profecianan di Daniel y di Juan a cumpli te den e detayenan di mas chikito. Nos por ta sigur cu e destruccion di religion falso y e bataya di Armagedon lo cuminsa pronto. Jehova Dios a revela e detayenan aki di antemano. Nos lo haci caso di e spiertamentonan profetico aki? (2 Ped. 1:19) Awor ta e momento pa scoge e banda di Jehova y apoya su Reino.​—Rev. 14:6, 7.

[Nota]

[Preguntanan di Estudio]

 [Cuadro na pagina 19]

NA KEN “TUR E REINONAN AKI” TA REFERI?

E profecia na Daniel 2:44 ta declara cu e Reino di Dios “lo garna y pone un fin na tur e reinonan aki.” E profecia ey ta referi solamente na e reinonan cu e varios partinan di e imagen a representa.

Kico di tur otro gobierno di mundo? Wel, e profecia na Revelacion cu ta trata e mesun topico ta revela e cuadro completo. E ta mustra cu “e reynan di henter e tera” lo reuni contra Jehova riba “e gran dia di Dios, e Todopoderoso.” (Rev. 16:14; 19:19-21) Pues, no ta solamente e reinonan di e imagen, pero tur otro gobierno di mundo lo ser destrui na Armagedon.