“Maske guera lanta contra mi, toch lo mi tin confianza.”​—SAL. 27:3.

1. Ki preguntanan Salmo 27 lo yuda nos contesta?

DICON nos ta sigui haci mas den e trabou di predica a pesar cu situacion di mundo ta birando pio? Dicon nos ta uza nos tempo y energia cu smaak den e trabou di predica siendo cu tin hopi problema economico serio awe? Con bin nos ta mira futuro cu confianza siendo cu hopi hende tin miedo di futuro? E cantica na Salmo 27 cu Rey David a compone lo yuda nos contesta e preguntanan aki.

2. Ki efecto miedo por tin riba un persona, pero ki confianza nos tin?

² David a cuminsa su salmo cu e siguiente palabranan: “SEÑOR ta mi luz y mi salbacion; di ken lo mi tin temor? SEÑOR ta e fortaleza di mi bida; di ken lo mi tin miedo?” (Sal. 27:1) Miedo por pone un persona sintie asina debil cu e no por haci nada. Sinembargo, un persona cu ta teme Jehova no ta laga miedo strob’e. (1 Ped. 3:14) Si, ora nos ta haci Jehova nos fortaleza, nos “lo biba trankil, sin miedo di maldad.” (Pro. 1:33; 3:25) Con bin?

‘JEHOVA TA MI LUZ Y MI SALBACION’

3. Den ki sentido Jehova ta nos luz, pero kico nos mes mester haci?

³ E metafora ‘Jehova ta mi luz’ ta hala atencion na e echo cu Jehova ta siña nos e berdad y ta saca nos for di scuridad spiritual. (Sal. 27:1) Luz literal por yuda nos mira cualkier peliger of obstaculo den nos caminda, pero e no ta kit’e. Ta nos mes tin cu actua na un manera sabi den e situacion. Di mes manera, Jehova ta yuda nos compronde nificacion di sucesonan di mundo. Ademas, e ta spierta nos di e peligernan di e mundo malbado aki. Y el a percura pa nos tin su  Palabra, Bijbel, cu ta contene principionan cu semper ta duna bon resultado. Pero, ta nos mester aplica loke nos ta siña. Anto ora nos ta haci esey, nos lo bira sabi mescos cu e salmista kende a bisa cu Dios su mandamento a hacie ‘mas sabi cu su enemigonan y tur su maestronan.’​—Sal. 119:98, 99, 130.

4. (a) Dicon David a bisa cu conviccion: ‘Jehova ta mi salbacion’? (b) Na ki tempo specialmente Jehova lo salba su sirbidornan djawe?

⁴ David su palabranan na Salmo 27:1 ta mustra cu e no a lubida con Jehova a yega di salb’e, of libr’e, na diferente ocasion. Por ehempel, Jehova a yega di libr’e “for di gara di leon y for di gara di beer.” Ademas, Jehova a yud’e derota e gigante Goliat. Despues, Jehova a scap’e tur e biahanan cu Rey Saul a purba mat’e cu lansa. (1 Sam. 17:37, 49, 50; 18:11, 12; 19:10) Pesey no ta nada straño cu David a bisa cu conviccion: ‘Jehova ta mi salbacion’! Y mescos cu Jehova a yega di salba David, lo e salba su sirbidornan djawe tambe. Na ki tempo lo e haci esey? Durante “e tribulacion grandi.”​—Rev. 7:14; 2 Ped. 2:9.

CORDA CON JEHOVA A YUDA BO

5, 6. (a) Dicon nos recuerdonan ta duna nos curashi? (b) Dicon ta bon pa medita riba e echo cu Jehova a yuda su pueblo den pasado?

⁵ Lesa Salmo 27:2 y 3. E textonan aki ta hala nos atencion na algo masha importante cu por yuda nos haya curashi. Nan ta mustra cu David a corda e momentonan cu Jehova a scapa su bida. (1 Sam. 17:34-37) Anto e recuerdonan ey sigur lo a dun’e curashi pa enfrenta hasta su pio enemigonan. Abo tambe ta haya curashi ora bo corda con Jehova a yuda bo? Por ehempel, bo no a yega di haci oracion intenso tocante un problema cu tabata molestia bo? Y Jehova no a duna bo sabiduria y forsa pa trata cu e problema ey? Kisas bo ta corda con Jehova a kita cierto obstaculonan cu tabata stroba bo di sirbie cu goso of con el a duna bo cierto privilegionan den su sirbishi. (1 Cor. 16:9) Ki efecto e recuerdonan aki tin riba bo? Nan no ta duna bo mas confianza cu Jehova por yuda bo trata cu situacionnan hasta mas dificil of yuda bo persevera bou di prueba severo?​—Rom. 5:3-5.

⁶ Awor, kico si un gobernante poderoso trama pa caba cu e organisacion di  Testigonan di Jehova? Den nos tempo, hopi hende a purba di haci esey, pero nan no a logra. Ademas, ta bon pa nos corda cu Jehova a yuda su pueblo den pasado, pasobra esey lo duna nos curashi pa enfrenta sea loke sea bin den futuro.​—Dan. 3:28.

AMOR PA ADORACION BERDADERO

7, 8. (a) Kico David a pidi Jehova segun Salmo 27:4? (b) Kico ta Jehova su gran tempel spiritual, y con hende ta ador’e eynan?

⁷ Un otro cos cu ta yuda nos cultiva curashi ta amor pa adoracion berdadero. (Lesa Salmo 27:4.) Den tempo di David, “e cas di SEÑOR” tabata e tabernakel. Y David a haci preparacion pa su yiu homber Salomon traha un bunita tempel pa Jehova. Pero, siglonan despues, Hesus a bisa cu lo a bin e tempo cu hende no mester bay na tempel mas pa adora Jehova. (Juan 4:21-23) Jehova lo a percura un otro areglo pa nos rindi adoracion cu e ta acepta. Pa nos adoracion ta aceptabel p’e, nos mester tin fe den e sacrificio di rescate di Hesus. Na Hebreonan capitulo 8 te cu 10, apostel Pablo a indica cu e areglo aki ta e gran tempel spiritual. Ademas, el a splica cu e tempel ey a cuminsa funciona na Hesus su bautismo cu a tuma luga na aña 29 di nos era ora el a presenta pa haci Jehova su boluntad. (Heb. 10:10) Awor, con nos ta adora Dios na e tempel aki? Nos ta haci esey ora nos ta haci oracion “cu curason sincero y pleno fe”, ta proclama nos speransa sin vacila, ta asisti na nos reunionnan di congregacion y ta tene nos Adoracion Como Famia. (Heb. 10:22-25) Y amor pa adoracion berdadero lo fortalece nos pa sigui haci e cosnan ey den e ultimo dianan critico aki.

⁸ Rond mundo, Jehova su fiel sirbidornan ta aumenta nan participacion den sirbishi, siña otro idioma y ta muda bay otro luga caminda tin mas necesidad di predicador di Reino. Di e manera ey, nan ta demostra cu nan tin e mesun deseo cu e salmista kende a pidi Jehova un solo cos, esta, ‘p’e contempla e bunitesa di SEÑOR y medita den su tempel.’ Si, Jehova su fiel sirbidornan kier pa Jehova bendiciona nan, y nan kier sigui rindi sirbishi sagrado na dje ni maske kico pasa.​—Lesa Salmo 27:6.

CONFIA DEN DIOS SU YUDANSA

9, 10. Kico Jehova ta priminti nos na Salmo 27:10?

⁹ David su palabranan ta mustra cuanto el a confia den Jehova su yudansa; el a bisa: “Maske mi tata y mi mama bandona mi, SEÑOR lo recoge mi.” (Sal. 27:10) Ora nos lesa 1 Samuel capitulo 22, nos por conclui cu David su mayornan no a bandon’e. Sinembargo, awe tin hopi hende cu ta ser rechasa pa nan mes famia. Y hopi di e hendenan aki a haya yudansa amoroso y proteccion den e congregacion cristian.

¹⁰ Awor, siendo cu Jehova ta cla pa sostene su sirbidornan ora otronan bandona nan, lo e no yuda nan trata tambe cu cualkier otro dificultad? Por ehempel, si nos ta preocupa tocante con pa percura materialmente pa nos famia, nos no mester tin confianza cu Jehova lo yuda nos? (Heb. 13:5, 6) Jehova ta compronde nos situacion y ta consciente di nos necesidadnan.

11. Ki efecto nos confianza den Jehova tin riba otro hende? Ilustra.

¹¹ Tuma por ehempel e caso di Victoria, un studiante di Bijbel na Liberia. Segun cu e tabata progresa cu e meta pa batisa, e homber cu e tabata biba cu ne a bandona e y su tres yiunan. Maske Victoria a keda sin luga di biba y sin entrada, el  a sigui haci progreso spiritual te el a batisa. Algun tempo despues, su yiu muher di 13 aña a haya un cartera yen di cen. Pa no cay den tentacion, nan a dicidi cu nan no ta ni conta e placa. Mesora nan a busca contacto cu e doño di e cartera, kende tabata un solda. El a bisa nan cu si tur hende tabata honesto manera Testigonan di Jehova, mundo lo tabata mihor y lo tabatin mas paz. Uzando Bijbel, Victoria a mustra e solda Jehova su promesa di un mundo nobo. E solda a keda asina impresiona cu Victoria su fieldad cu el a dun’e un cantidad considerabel di e placa cu tabatin den e cartera. Si, Testigonan di Jehova ta personanan honesto pasobra nan tin pleno confianza cu Jehova lo percura pa nan. Y rond mundo nan ta conoci como hende honesto.

12. Kico nos ta demostra ora nos sigui sirbi Jehova aunke nos sufri perdida material? Ilustra.

¹² Awor, laga nos wak e ehempel di Thomas, un publicador no batisa na Sierra Leone. El a traha casi un aña como maestro na un scol secundario sin por a cobra su salario pasobra nan mester a caba di atende su solicitud. Bo por imagina bo con e tabata sintie? Finalmente, pa e por a haya su cen, e mester a papia cu e director di scol. Y e director, kende tabata un pastoor, a bis’e cu debi cu e creencianan di Testigonan di Jehova ta bay contra di esnan di e instituto, e no por sigui traha na e scol y alabes ser un Testigo. Pues, e mester a scoge. Thomas a dicidi di kita for di trabou y perde su salario di un aña largo. Despues di esey, el a haya un trabou di drecha radio y telefon celular. Tin hopi ehempel mas cu ta mustra cu ora nos ta confia den Jehova, nos no mester tin miedo cu nos lo keda desampara. Como cu Jehova a crea tur cos y semper ta proteha su pueblo, nos sa cu e lo cuida nos.

13. Con e trabou di predica ta progresando den paisnan cu menos recurso?

¹³ Publicadornan di Reino cu ta biba den paisnan pober hopi biaha ta masha activo den e trabou di predica. Con bin? Un sucursal a skirbi: “Hopi di e personanan cu ta acepta un estudio di Bijbel ta sin trabou y pesey nan tin mas tempo pa studia durante dia. E rumannan tambe tin mas tempo pa predica. Ademas, hende cu ta biba den un situacion deplorabel no mester ser convenci cu nos ta bibando den e ultimo dianan; nan mes ta experencia esey.” Un misionero cu ta sirbi pa mas cu 12 aña den un pais caminda cada publicador tin un averahe di mas cu tres estudio di Bijbel a skirbi: ‘Mayoria di publicador ta hiba un bida simpel cu poco distraccion. Pesey, nan tin mas tempo pa bay sirbishi y pa studia Bijbel cu hende.’

14. Den ki manera Dios por proteha e multitud grandi?

 ¹⁴ Jehova a priminti cu lo e yuda, proteha y libra su pueblo como grupo, tanto fisicamente como spiritualmente, y nos tin confianza cu lo e cumpli cu su promesa. (Sal. 37:28; 91:1-3) Bijbel ta bisa cu lo tin un multitud grandi cu lo sobrevivi “e tribulacion grandi.” (Rev. 7:9, 14) Pues, ningun hende lo no por extermina Dios su pueblo durante e ultimo dianan aki pasobra Dios lo proteha e multitud ey. Un otro manera cu Jehova ta proteha e multitud grandi ta den sentido spiritual. E ta duna nan tur loke nan tin mester pa por soporta prueba y keda cu un bon relacion cu ne. Y durante Armagedon tambe Jehova lo proteha su pueblo.

“SIÑA MI BO CAMINDA, O SEÑOR”

15, 16. Ki bendicion nos ta ricibi ora nos ta haci loke Dios ta bisa? Ilustra.

¹⁵ Pa nos por keda cu curashi, nos mester sigui laga Jehova instrui nos. David a roga Jehova: “Siña mi bo caminda, o SEÑOR, y guia mi den un berea di rectitud, pa motibo di mi enemigonan.” (Sal. 27:11) Si nos tambe kier pa Jehova siña nos, nos mester presta bon atencion na loke Bijbel ta bisa y na e guia di Jehova su organisacion. Y nos mester ta cla pa aplica loke nos ta siña. Por ehempel, hopi ruman a haci caso di e conseho sabi pa simplifica nan bida y a elimina debe innecesario. Pesey, e crisis economico recien no a afecta nan dje hopi ey. Nan no tin e preocupacion di tin cu paga cos material cu nan no por afford; nan ta liber pa haci mas den sirbishi. Pesey ta bon pa cada un di nos puntra nos mes: ‘Mi ta cla pa aplica loke mi ta lesa den Bijbel y den e publicacionnan di e esclavo fiel y prudente, hasta si esey ta nifica cu mi tin cu haci sacrificio?’​—Mat. 24:45.

¹⁶ Ora nos ta laga Jehova instrui nos y guia nos den e caminda corecto, nos no tin ningun motibo pa sinti miedo. Un biaha, un pionero regular na Merca a solicita pa un puesto na su trabou cu lo a permiti e y su famia sigui den e trabou di tempo completo. Su supervisor a bis’e cu nunca lo e haya e puesto ey sin un estudio universitario. Si esaki a sosode cu abo, lo bo a lamenta cu bo a keda sin sigui un estudio avansa pa drenta sirbishi di tempo completo? Dos siman despues, e supervisor a perde su trabou y un otro manager a puntra e ruman kico ta su metanan. Di biaha el a bisa su manager cu e y su casa ta Testigo di Jehova y cu nan ta traha den sirbishi di tempo completo y cu nan kier sigui haci esey. Prome cu e ruman por a caba di papia, e manager a bis’e: “Mi a ripara cu bo ta diferente! Tempo cu mi tata tabata muriendo, dos di boso rumannan tabata bin lesa Bijbel cu ne tur dia. Y mi a priminti mi mes cu si algun dia mi haya oportunidad di yuda un Testigo di Jehova, lo mi hacie.” E siguiente mainta, e ruman a haya e mesun trabou cu e ex-supervisor a nenga di dun’e. Si, ora nos pone interesnan di Reino na prome luga den nos bida, Jehova ta cumpli cu su promesa di duna nos tur loke nos tin mester.​—Mat. 6:33.

NOS MESTER TIN FE Y SPERANSA

17. Kico lo yuda nos enfrenta futuro cu confianza?

¹⁷ Despues, David a enfatisa e importancia di tin fe y speransa. El a bisa cu lo el a desespera ‘si e no a kere cu lo e mira e bondad di SEÑOR.’ (Sal. 27:13) En berdad, kico lo a para di nos si Dios no a duna nos speransa y si nos no tabata sa e cosnan cu Salmo 27 ta papia di dje? Pesey, laga nos sigui pidi Jehova forsa y p’e proteha nos y salba nos na Armagedon.​—Lesa Salmo 27:14.

[Preguntanan di Estudio]

[Plachi na pagina 23]

David a haya curashi ora el a corda con Jehova a salb’e

[Plachi na pagina 25]

Nos ta mira problema economico como un oportunidad pa haci mas den sirbishi?