E articulo aki ta trata algun pregunta cu kisas bo tin y ta mustra bo unda pa haya e contestanan den bo Bijbel. Si bo ta desea, Testigonan di Jehova gustosamente lo trata e preguntanan aki cu bo.

1. Dicon Dios a duna su mes un nomber?

Hende gusta pa bo yama nan na nan nomber y no “meneer”, “yoncuman”, “señora” of “juffrouw.” Nomber ta yuda distingui un persona for di otro. Ta berdad cu Bijbel ta uza cierto titulonan pa referi na Dios, manera por ehempel “Señor Dios”, “Dios Todopoderoso” y “Creador.” (Genesis 15:2; 17:1; Eclesiastes 12:1) No obstante, Dios a duna su mes un nomber pa asina nos por tin un amistad intimo cu ne. Y e nomber ey ta Jehova.​—Lesa Exodo 3:14, 15. *

E nomber Jehova ta aparece casi 7.000 biaha den e manuscritonan Hebreo di antiguedad. Ma hopi traductor di Bijbel a reemplasa e nomber di Dios pa titulonan, manera “Dios” of “Señor.” Pero e echo cu Dios su nomber ta aparece hopi biaha den Bijbel ta mustra cu Dios kier pa hende sa su nomber.​—Lesa Isaias 12:4.

2. Dicon ta importante pa conoce e nomber di Dios?

Segun Bijbel, conoce e nomber di Dios ta encera mas cu djis sa kico e nomber ta. E ta encera tambe tin un bon relacion cu Dios. E nomber Jehova ta nifica: “E Ta Causa pa Bira.” Esaki ta un garantia cu Jehova lo haci loke sea ta necesario pa cumpli cu su proposito. Pues, conoce Dios su nomber ta encera cu bo tin pleno confianza cu Dios lo cumpli cu su promesanan. (Salmo 9:10) Anto fe ta motiva hende cu conoce Dios y cu ta uza su nomber pa confia den dje y pone su adoracion na prome luga den nan bida. Y Jehova Dios, na su turno, lo proteha hende asina.​—Lesa Salmo 91:14.

  3. Dicon Dios kier pa hende conoce su nomber?

Dios kier pa hende conoce su nomber pasobra esey ta beneficia nan. Nan por bira su amigo y por tin e speransa di biba pa semper. Pesey no ta nada straño cu Dios kier pa nos haci su nomber conoci.​—Lesa Juan 17:3; Romanonan 10:13, 14.

Hesus a haci Dios su nomber conoci. Con? El a siña hende ki clase di Dios Jehova ta, kico ta su mandamentonan y su promesanan. Awe, Hesus su discipelnan ta sigui haci Dios su nomber conoci na hende di tur nacion. Nan ta haci esey como un pueblo uni ‘cu ta carga Dios su nomber.’​—Lesa Echonan 15:14; Juan 17:26.

4. Con Dios lo glorifica su nomber?

Jehova Dios lo glorifica su nomber pasobra su nomber a ser difama. Por ehempel, algun hende ta bisa cu no ta Dios a crea tur loke tin bida y ta pesey nos no mester obedec’e. Otronan ta bisa cu Dios no ta interesa den hende y cu ta e ta responsabel pa e sufrimento cu tin na mundo. Pero hende lo sigui difama e nomber di Dios pa semper? No! Pronto, Dios lo destrui tur esnan cu ta deshonra su nomber.​—Lesa Salmo 83:17, 18.

Jehova lo glorifica su nomber ora su Reino pone un fin na tur gobernacion humano y trece paz y siguridad pa humanidad. (Daniel 2:44) Si, pronto tur hende lo sa cu Jehova ta e Dios berdadero.​—Lesa Ezekiel 36:23; Mateo 6:9.

Awor, kico abo mester haci? Hala cerca Dios. Con bo por haci esey? Bo mester studia su Palabra y asocia cu personanan cu ta stim’e. Ora Jehova glorifica su nomber, lo e corda ken ta su sirbidornan fiel y recompensa nan.​—Malakias 3:16.

Pa mas informacion, wak capitulo 1 di e buki aki, Kico Bijbel Ta Siña Realmente? ,publica pa Testigonan di Jehova.

[Nota]

[Plachi na pagina 10]

E nomber di Dios den un manuscrito Hebreo di antiguedad