“Wak cuidadosamente den e ley perfecto cu ta trece libertad.”​—SANT. 1:25.

1, 2. (a) Con bin hende ta sinti cu cada dia nan tin menos libertad? (b) Ki libertad sirbidornan di Jehova lo disfruta di dje den futuro?

NOS ta bibando den un tempo masha critico, y dia pa dia hende ta bira mas golos, violento y malbado. (2 Tim. 3:1-5) Pesey, gobiernonan ta introduci mas ley, fortifica nan cuerpo policial y instala camara di vigilancia. Den algun pais, ciudadanonan ta pone alarma na nan cas, extra lock y coriente na nan cura pa nan por sinti nan mas safe. Ademas, hopi hende no ta sali anochi mas ni no ta laga nan yiunan hunga pafo nan so​—ni di dia ni anochi. Ta bisto anto cu cada dia cu pasa hende tin menos libertad pa haci loke nan ta desea. Y ta parce cu e situacion aki lo no mehora.

² Hopi tempo pasa, den e hofi di Eden, Satanas a insinua cu hende por disfruta di berdadero libertad si nan ta independiente di Jehova. Esey si tabata un mentira teribel! Dicon? Pasobra mas hende ignora e Palabra di Dios y biba manera nan kier, mas humanidad ta sufri. Y e situacion aki ta afecta Jehova su sirbidornan tambe. Ma nos tin e speransa cu un dia hende lo ta liber di pica y di un curpa cu ta caba na nada y cu nos lo disfruta di loke Bijbel ta yama “e glorioso libertad di e yiunan di Dios.” (Rom. 8:21) De echo, Jehova a cuminsa prepara su sirbidornan caba pa e libertad ey. Con asina?

3. Ki ley Jehova a duna siguidonan di Cristo, y ki preguntanan nos lo contesta den e articulo aki?

³ Pa prepara nos, Jehova a duna nos loke discipel Santiago a yama “e ley perfecto cu ta trece libertad.” (Lesa Santiago 1:25.) Otro versionnan di Bijbel, manera por ehempel The New English Bible, ta traduci e frase aki como “e ley cu ta haci nos liber”, y Beibel Santu ta traducie como “e ley perfecto, e ley di libertad.” Normalmente,  ora hende tende e palabra “ley”, nan ta pensa riba restriccion y no libertad. Kico anto ta “e ley perfecto cu ta trece libertad”? Y con e ta haci nos liber?

E LEY CU TA HACI NOS LIBER

4. Kico ta “e ley perfecto cu ta trece libertad”, y ken ta beneficia di dje?

⁴ “E ley perfecto cu ta trece libertad” no ta e Ley di Moises. Dicon no? Pasobra e proposito di e Ley di Moises tabata pa mustra e Israelitanan cu nan tabata pecador. Ademas, loke e Ley a prefigura a bira realidad den Cristo. (Mat. 5:17; Gal. 3:19) Ta na cua ley Santiago tabata referi anto? Wel, loke e tabatin na mente ta e “ley di Cristo” cu Bijbel ta yama tambe e “ley di fe” y “e ley di un pueblo liber.” (Gal. 6:2; Rom. 3:27; Sant. 2:12) Pues, “e ley perfecto” ta encera tur loke Jehova ta rekeri di nos. Y tanto e cristiannan ungi como e ‘otro carnenan’ ta beneficia di e ley aki.​—Juan 10:16.

5. Dicon e ley di libertad no ta pisa?

⁵ Distinto for di e leynan di hopi pais, “e ley perfecto” no ta complica ni pisa; mas bien, e ta consisti di mandamentonan simpel y principionan basico. (1 Juan 5:3) Hesus a bisa: “Mi yugo ta suave, y mi carga no ta pisa.” (Mat. 11:29, 30) Ademas, ora nos ta sigui “e ley perfecto”, nos no mester di un lista largo di regla of di castigo, pasobra e ley ta basa riba amor y ta graba den nos mente y curason y no riba tabla di piedra manera tabata e caso cu e Ley di Moises.​—Lesa Hebreonan 8:6, 10.

CON “E LEY PERFECTO” TA HACI NOS LIBER?

6, 7. Kico nos por bisa di e leynan di Jehova, y kico e ley di libertad ta permiti nos haci?

⁶ E leynan cu Jehova a stipula pa su criaturanan inteligente ta pa nan mes bon y proteccion. Pensa riba e leynan di naturaleza cu ta goberna universo, manera por ehempel e ley di gravedad. Bo sa tende hende keha y bisa cu e leynan aki ta pisa? Al contrario, nos ta contento cu e leynan ey ta existi, pasobra nos sa cu nan ta pa nos bienestar. Di igual manera, Jehova su normanan moral y spiritual, cu ta ser refleha den “e ley perfecto” di Cristo, ta pa nos beneficio.

⁷ Ademas di proteha nos, e ley di libertad ta permiti nos satisface nos deseonan sin cu nos ta perhudica nos mes of trapa derecho, of kita libertad, di otro hende. Pues, kico ta e clave pa disfruta di berdadero libertad, esta, pa haci loke nos kier? Nos deseonan mester ta bon y na harmonia cu Jehova su boluntad. Si, nos mester siña stima loke Jehova ta stima y odia loke e ta odia. Y e ley di libertad ta yuda nos haci esey.​—Amos 5:15.

8, 9. Con obediencia na e ley di libertad ta beneficia nos? Duna un ehempel.

⁸ Como cu nos ta hende imperfecto, nos tin cu lucha pa domina deseo robes. No obstante, for di awor nos ta disfruta di un cierto grado di libertad segun cu nos ta haci esfuerso pa cumpli cu e ley di libertad. Den ki sentido? Laga nos uza e caso di Jay como ehempel. Jay tabata adicto na tabaco. Ora el a cuminsa studia Bijbel, el a compronde cu su bicio tabata algo desagradabel den bista di Dios y cu e mester a tuma un decision: Sea e ta laga su deseo di carni sigui domin’e of e ta somete su mes na Jehova su normanan. Jay a tuma e decision sabi di sirbi Jehova y a stop di huma aunke esey no tabata facil p’e, pasobra su curpa tabata sigui pidi nicotina. Awor, con el a sintie despues cu el a stop cu e bicio ey? El a bisa: “Mi a sinti mi liber y masha contento.”

⁹ Jay su experencia a siñ’e un les masha importante: E libertad cu mundo ta ofrece, cu ta permiti hende ‘fiha nan mente riba carni’, en realidad ta haci hende esclavo di pica. En cambio, ora nos ta haci esfuerso pa cumpli cu Dios su ley di libertad, nos ‘ta  fiha nos mente riba spirito’ y esey ta haci nos liber; nos lo tin “bida y paz.” (Rom. 8:5, 6) Awor, ta cu ken su forsa Jay por a stop cu su bicio? Wel, el a venc’e cu yudansa di Jehova y no riba su mes forsa. El a bisa: “Regularmente mi tabata studia Bijbel, pidi Dios su spirito santo den oracion y mi a acepta e yudansa amoroso cu e congregacion a ofrece mi.” Mescos cu e provisionnan aki a yuda Jay, nan por yuda nos tur haya berdadero libertad. Laga nos ban wak con.

WAK CUIDADOSAMENTE DEN E PALABRA DI DIOS

10. Kico kiermen “wak cuidadosamente” den e ley di Dios?

¹⁰ Santiago 1:25 ta bisa en parte: ‘Esun cu ta wak cuidadosamente den e ley perfecto cu ta trece libertad y ta persisti den haci esey lo ta feliz.’ E palabra Griego original traduci como “wak cuidadosamente” ta nifica “buig pa investiga algo”, loke ta exigi esfuerso y concentracion. Pues, si nos kier pa e ley di libertad influencia nos mente y curason, nos mester haci nos parti; nos mester haci esfuerso pa studia Bijbel diligentemente y medita profundamente riba loke nos ta lesa.​—1 Tim. 4:15.

11, 12. (a) Con Hesus a mustra cu nos tin cu biba na harmonia cu e berdad? (b) Ki peliger hobennan specialmente mester evita?

¹¹ Loke nos mester haci tambe ta “persisti”, esta, persevera den aplica e Palabra di Dios. Cu otro palabra, nos mester biba na harmonia cu e berdad. Hesus a expresa un pensamento similar ora el a bisa algun hende cu a pone fe den dje: “Si boso keda fiel na mi palabranan, boso realmente ta mi  discipelnan, y boso lo conoce e berdad, y e berdad lo haci boso liber.” (Juan 8:31, 32) Den e caso aki, e verbo “conoce” ta encera tambe compronde ki importancia loke nos sa mester tin den nos bida. Pues, ta ora nos ta haci esfuerso pa biba na harmonia cu e berdad, nos por bisa cu realmente nos “conoce” e berdad. Ta e ora ey nos por bisa corectamente cu “e palabra di Dios” ta “obra” den nos, esta, cu e ta yuda nos refleha e personalidad di nos Tata celestial lo mihor cu nos por.​—1 Tes. 2:13.

¹² Pesey, puntra bo mes: ‘Realmente mi conoce e berdad? Mi ta biba na harmonia cu e berdad? Of ainda mi ta desea e supuesto libertad cu mundo ta ofrece?’ Un ruman muher kende su mayornan a lant’e den e berdad a skirbi: ‘Ora bo lanta den e berdad, bo ta kere cu Jehova ta existi. Pero ami nunca a siña conoc’e di berdad. Nunca mi a siña odia loke e ta odia. Nunca mi a pensa cu loke mi tabata haci tin efecto riba dje. Y ora mi tabatin problema, nunca mi tabata acerc’e den oracion. Semper mi a depende riba mi mes comprondemento. Awor mi sa cu esey tabata ridiculo pasobra mi no tabata sa nada.’ Afortunadamente, e ruman muher aki a realisa despues cu su manera di pensa tabata robes, y el a haci cambionan grandi. El a hasta cuminsa traha como pionero regular.

SPIRITO SANTO POR YUDA HACI BO LIBER

13. Con e spirito santo di Dios ta yuda haci nos liber?

¹³ Na 2 Corintionan 3:17 nos ta lesa: “Caminda e spirito santo di Jehova ta, ey tin libertad.” Awor, con spirito santo ta yuda haci nos liber? Wel, e ta yuda nos cultiva cualidadnan, manera “amor, goso, paz, pasenshi, amabilidad, bondad, fe, suavidad, dominio propio.” (Gal. 5:22, 23) Sin e cualidadnan aki, vooral amor, ningun hende no por ta berdaderamente liber. Y esaki ta bisto den e mundo djawe. Ta interesante pa nota cu despues cu Pablo a menciona e aspectonan di e fruta di spirito, el a bisa: “Contra e tipo di cosnan ey no tin ley.” Kico Pablo tabata kiermen? Wel, cu no tin ningun ley cu por stroba un persona di cultiva y desplega e fruta di Dios su spirito. (Gal. 5:18) Hasta si tabatin un ley asina, lo e no tabatin ningun sentido. Dicon no? Pasobra Jehova su boluntad ta pa nos sigui cultiva e cualidadnan aki mas y mas y desplega nan pa semper.

14. Den ki manera e spirito di mundo ta haci hende esclavo?

¹⁴ En cambio, hende domina pa e spirito di mundo y cu ta satisface nan deseo di carni libremente ta kere cu nan ta liber. (Lesa 2 Pedro 2:18, 19.) Pero en realidad, nan ta esclavo. Dicon? Pasobra tin centenares di regla y ley cu gobernantenan ta stipula pa tene e hendenan aki bou di control. Apostel Pablo a bisa: “No ta pa hende husto ta decreta ley, sino pa esnan sin ley y rebelde, cu ta malbado y pecador, desleal.” (1 Tim. 1:9, 10) Ademas, nan ta esclavo tambe pasobra nan ta ‘haci loke nan carni ta desea’, y nos carni ta un doño cruel. (Efe. 2:1-3) Hendenan asina ta manera insecto cu ta bay den un pochi di honing pa satisface nan mes y ta keda atrapa. Si, e hendenan aki ta sigui nan deseonan robes y ta bira esclavo di pica.​—Sant. 1:14, 15.

E CONGREGACION CRISTIAN TA YUDA HACI BO LIBER

15, 16. Dicon ta importante pa nos asocia cu e congregacion cristian, y con nos ta sinti nos den congregacion?

¹⁵ E congregacion cristian no ta un club cu bo tin cu inscribi pa bira miembro di dje; mas bien, bo ta forma parti di e congregacion cristian pasobra Jehova a hala of atrae bo na e congregacion. (Juan 6:44) Awor, kico a motiva Jehova pa haci esey?  Acaso bo tabata un persona husto cu ta teme Dios? Kisas bo ta pensa: “Esey sigur cu no.” Kico a motiva Dios anto? Wel, el a mira den bo curason cu bo ta un persona dispuesto pa sigui su guia amoroso y obedece su ley di libertad. Y mediante e congregacion cristian, Jehova ta alimenta bo spiritualmente, libra bo for di siñansa falso y di supersticion y ta siña bo con pa imita Cristo su personalidad. (Lesa Efesionan 4:22-24.) Como resultado di esey, bo tin e privilegio di ta entre e unico hendenan na mundo cu realmente por ser yama “un pueblo liber.”​—Sant. 2:12.

¹⁶ Pensa awor riba esaki: Bo ta sinti miedo ora bo ta den compania di hende cu ta stima Jehova di henter nan curason? Bo ta haya bo ta wak rond cada bes? Ora bo ta combersa cu e rumannan na Salon di Reino, bo ta tene bo tas duro pa hende no horta bo? Al contrario, bo ta sinti bo trankil y liber! Ta asina bo ta sinti bo ora bo ta na un actividad di mundo? Probablemente cu no! E libertad cu bo ta disfruta di dje awor den e pueblo di Dios ta djis un ñapa di e libertad cu nos lo disfruta di dje den futuro.

“E GLORIOSO LIBERTAD DI E YIUNAN DI DIOS”

17. Kico e “revelacion di e yiunan di Dios” tin di haber cu berdadero libertad pa humanidad?

¹⁷ Relaciona cu e libertad cu Jehova lo duna su sirbidornan riba tera, apostel Pablo a bisa: “Creacion ta spera cu gran expectativa riba revelacion di e gloria di e yiunan di Dios.” Caba el a bisa: “Creacion mes tambe lo ser libra di sclavitud na un curpa cu ta caba na nada y lo tin e glorioso libertad di e yiunan di Dios.” (Rom. 8:19-21) Aki, “creacion” ta referi na hende cu tin e speransa di biba pa semper riba tera y cu lo beneficia di e “revelacion” di Dios su yiunan ungi cu spirito santo. E revelacion ey lo cuminsa ora e “yiunan” ungi cu ta den cielo yuda Cristo elimina tur maldad for di riba tera y preserva “un multitud grandi” pa drenta e mundo nobo.​—Rev. 7:9, 14.

18. Con humanidad lo haya mas libertad gradualmente, y ki libertad nan lo disfruta di dje finalmente?

¹⁸ Despues di esey, hende lo por disfruta di un libertad masha special. Nan lo ta liber di e influencia di Satanas y su demoñonan. (Rev. 20:1-3) Esta un alivio esey lo ta! Di e tempo ey padilanti, e 144.000 reynan y sacerdotenan lo uza e sacrificio di rescate na beneficio di humanidad te ora tur hende bira completamente liber di e pica di Adam y di imperfeccion. (Rev. 5:9, 10) Finalmente, despues cu humanidad pasa e prueba final, esnan cu keda fiel lo haya e berdadero libertad cu Jehova tabatin na mente pa nan for di principio, esta, “e glorioso libertad di e yiunan di Dios.” Bo por imagina bo esey? Lo bo no tin cu lucha mas pa haci loke ta corecto den bista di Dios. Dicon no? Pasobra bo curpa, mente y curason lo ta perfecto, y lo bo por imita Dios su cualidadnan perfectamente.

19. Kico nos mester sigui haci pa por keda riba e caminda cu ta hiba na berdadero libertad?

¹⁹ Abo kier tin “e glorioso libertad di e yiunan di Dios”? Si ta asina, laga “e ley perfecto cu ta trece libertad” sigui guia bo mente y curason. Si, sigui studia Dios su Palabra diligentemente. Sigui biba na harmonia cu e berdad. Pidi Dios su spirito santo y sigui beneficia plenamente di e congregacion cristian y di e cuminda spiritual cu Jehova ta provee. Y no laga Satanas gaña bo manera el a gaña Eva y pone bo pensa cu Jehova su mandamentonan ta mucho estricto. Anto corda, Diabel ta masha astuto. Pero manera e siguiente articulo lo mustra, nos por venc’e, pasobra “su trikinan no ta desconoci pa nos.”​—2 Cor. 2:11.

[Preguntanan di Estudio]

[Plachi na pagina 14]

Ainda mi ta desea e supuesto libertad cu mundo ta ofrece?

[Plachi na pagina 14]

Mi ta biba na harmonia cu e berdad?