DICON BIJBEL TA DISTINTO? Hopi bes, bukinan di antiguedad a presenta ideanan inconfiabel y hasta peligroso cu ciencia moderno a refuta despues. Awe tambe, autornan tin cu revisa nan bukinan di instruccion pa esakinan cuadra cu descubrimentonan nobo. Pero Bijbel si no ta asina. E ta bisa cu su autor ta e Creador y cu Su Palabra “ta dura pa semper.”​—1 Pedro 1:25.

UN EHEMPEL: Segun e Ley di Moises, e Israelitanan mester a coba buraco “pafo di e campamento” pa haci nan necesidadnan y dera nan sushi. (Deuteronomio 23:12, 13) Si nan a mishi cu cadaver humano, nan mester a laba nan paña y baña. Y si ta cadaver di bestia, nan mester a laba nan paña. (Levitico 11:27, 28; Numbernan 19:14-16) E tempo ey, un hende cu lepra mester a keda isola, of den cuarentena, te ora e sacerdote cu samin’e declara cu e no ta contagioso mas.​—Levitico 13:1-8.

LOKE CIENCIA MEDICO TA REVELA: Te awe, e mihor manera pa combati maleza ta di deshaci di sushi na e manera corecto, laba man y isola hende cu tin maleza contagioso. Si no tin w.c. ni otro sistema sanitario den cercania, e Centro pa Control y Prevencion di Enfermedad (CDC) di Merca ta recomenda pa “deshaci di bo sushi y der’e por lo menos 30 meter for di cualkier fuente di awa.” Segun e Organisacion Mundial di Salud, ora hende ta deshaci di sushi humano na un manera safe, nan ta reduci e cantidad di caso di maleza cu ta causa diarea cu 36 porciento. No mas cu 200 aña pasa, dokternan a descubri cu pa motibo cu nan no tabata laba man despues di a atende cu morto, hopi pashent tabata bira malo. Segun CDC, ainda labamento di man ta “e manera di mas simpel y eficaz pa evita cu maleza ta pasa di un persona pa otro.” Awor kico di isola hende cu lepra of otro maleza? Recientemente, Saudi Medical Journal a bisa: “Den prome fase di un epidemia, e metodo di cuarentena, of isolacion, lo por ta e unico manera pa evita cu maleza contagioso ta sigui plama.”

KICO ABO TA PENSA? Bo ta kere cu tin un otro buki sagrado cu ta cientificamente exacto manera Bijbel? Of Bijbel ta e unico?