E Ta un Buki Manera Tur Otro?

“Henter e Scritura ta inspira di Dios y ta probechoso . . . , pa e sirbidor di Dios por ta plenamente competente, completamente prepara pa tur bon obra.”​—2 TIMOTEO 3:16, 17.

NO TA tur hende ta di acuerdo cu loke e texto ey ta bisa. Kico di abo? Cua di e siguiente declaracionnan ta cuadra mas cu bo punto di bista di Bijbel? E ta . . .

• un excelente obra literario

• un di e varios bukinan sagrado

• un buki di leyenda cu ta contene les moral

• e Palabra di Dios

Pero loke bo ta pensa di Bijbel ta importante? Wak kico Bijbel ta bisa tocante su mes: “Tur loke a ser skirbi anteriormente a ser skirbi pa nos instruccion, pa asina mediante nos perseverancia y e consuelo for di e Scritura nos por tin speransa.” (Romanonan 15:4) Pues, segun Bijbel, su proposito ta pa instrui y consola nos y alabes duna nos speransa.

Awor pensa riba esaki: Si Bijbel ta djis un obra literario of un di e varios bukinan sagrado, lo bo sigui su guia y uz’e pa instrui bo famia, siendo cu su mensahe ta distinto for di loke abo ta kere ta corecto? Of si Bijbel ta djis un coleccion di mito, su promesanan lo por ta un fuente di consuelo y speransa pa bo?

Miyones di hende cu a studia Bijbel ta convenci cu e ta un buki unico, e Palabra di Dios. Con bin? Dicon Bijbel ta distinto for di tur otro buki? E siguiente articulonan lo trata cinco rasgo cu ta mustra cu Bijbel ta un buki unico. Y nos ta anima bo pa analisa nan.