‘Mi ta haci un apelacion na boso pa mantene e union di spirito.’​—EFE. 4:1, 3.

1, 2. Kico ta Jehova su proposito pa tera y pa hende?

FAMIA. Kico ta bin na bo mente ora bo tende e palabra ey? Amor? Felicidad? Hende cu ta traha hunto pa logra un meta comun? Un ambiente trankil den cua muchanan ta lanta, siña y caminda tur hende por comparti nan ideanan? Probablemente, e cosnan aki lo bin na bo mente si bo a lanta den un famia amoroso. Ta Jehova a origina famia. (Efe. 3:14, 15) Y su proposito tabata pa tur su criaturanan, tanto esnan den cielo como esnan riba tera, ta un famia uni, cu ta confia otro y cu ta sinti nan safe.

² Pero debi cu Adam cu Eva a peca, hende no por a forma parti mas di Jehova su famia universal. No obstante, Jehova su proposito no a cambia. Lo e percura pa tera bira un paradijs yena cu descendiente di Adam cu Eva. (Gen. 1:28; Isa. 45:18) Ya caba el a haci tur preparacion pa e proposito ey cumpli. E buki biblico di Efesionan, cu tin union como tema principal, ta menciona algun di e cosnan cu Jehova a haci y ta haciendo pa cumpli cu su proposito. Pesey, laga nos analisa algun versiculo di e buki aki y mira con nos por coopera cu Jehova su proposito pa uni tur su criaturanan como un solo famia.

LOKE JEHOVA TA HACIENDO

3. Con Jehova a cuminsa maneha cosnan segun Efesionan 1:10, y na ki tempo e prome fase a cuminsa?

³ Tur loke Jehova haci ta pa cumpli cu su proposito. Bijbel ta bisa cu “durante culminacion di e tempo stipula”, Dios lo a cuminsa “maneha cosnan”, esta, prepara su criaturanan, tanto esnan den cielo como esnan riba tera, pa nan por ta un famia uni. (Lesa Efesionan 1:8-10.) E preparacion aki ta consisti di dos  fase. Durante e prome fase, Jehova ta prepara e unginan pa biba den cielo, caminda nan lo sigui traha bou di direccion di Hesucristo. E preparacion aki a cuminsa na Pentecoste di aña 33 di nos era ora Jehova a cuminsa reuni esnan cu lo goberna cu Cristo den cielo. (Echo. 2:1-4) Mediante Cristo su sacrificio di rescate, Jehova ta declara e unginan husto y digno di ricibi bida. Y e unginan ta acepta mesora cu nan a ser adopta como “yiu di Dios.”​—Rom. 3:23, 24; 5:1; 8:15-17.

4, 5. Kico e di dos fase di Jehova su preparacion ta encera?

⁴ Durante e di dos fase, Dios lo prepara tur hende cu lo biba den Paradijs aki riba tera; e hendenan aki lo ta subdito di e Reino Mesianico. Anto e “multitud grandi” lo ta e prome grupo cu lo biba den Paradijs. (Rev. 7:9, 13-17; 21:1-5) Durante e Reinado di Mil Aña, miles di miyones di hende lo ser resucita pa uni cu nan. (Rev. 20:12, 13) Bo por imagina bo cuanto oportunidad nos lo tin e ora ey pa demostra cu nos ta uni? Na fin di e mil aña, e “cosnan riba tera”, esta e multitud grandi y tur e personanan cu a resucita, lo pasa un prueba final. Y tur esnan cu keda fiel lo ser adopta como “yiunan di Dios” pa biba riba tera.​—Rom. 8:21; Rev. 20:7, 8.

⁵ Pues, manera nos a mira, Dios ta preparando e unginan pa biba den cielo y e otro carnenan pa biba den Paradijs aki riba tera. Pero, con cada un di nos por coopera cu Jehova?

“MANTENE E UNION DI SPIRITO”

6. Con Bijbel ta mustra cu cristiannan mester reuni?

⁶ Bijbel ta bisa cu cristiannan mester reuni. (1 Cor. 14:23; Heb. 10:24, 25) Pero pa nos por ta berdaderamente uni, nos tin cu haci mas cu djis pasa un rato hunto na un luga specifico, manera hende ta haci na un plasa of stadion. Nos mester aplica instruccion cu nos ta haya di Jehova y laga su spirito santo haci nos un mihor persona.

7. Con nos por “mantene e union di spirito”?

⁷ Aunke Jehova a declara su sirbidornan husto—esnan ungi como yiu y e otro carnenan como amigo​—a base di e sacrificio di rescate di Cristo, tanten cu nos ta biba den e mundo malbado aki, lo tin desacuerdo entre rumannan. (Rom. 5:9; Sant. 2:23) Si esey no tabata asina, Bijbel lo no a anima nos pa sigui ‘soporta otro.’ Pero kico nos mester haci pa ta uni cu nos rumannan? Nos mester haci esfuerso pa ta ‘humilde y suave.’ Apostel Pablo a urgi nos pa traha duro “pa mantene e union di spirito den e vinculo di paz.” (Lesa Efesionan 4:1-3.) Y pa nos por haci esey, nos mester laga Dios su spirito santo obra den nos bida y yuda nos produci e fruta di spirito. Dicon? Pasobra contrario na obra di carni cu ta causa desunion, fruta di spirito ta yuda nos resolve cualkier problema cu nos por tin cu otro hende.

8. Den ki sentido obra di carni ta causa desunion?

⁸ Laga nos wak con “obranan di carni” ta causa desunion. (Lesa Galationan 5:19-21.) Fornicacion, por ehempel, ta separa un persona for di Jehova y for di e congregacion cristian. Adulterio ta separa yiunan for di nan mayornan y personanan inocente for di nan casa. Impureza tambe ta causa desunion. Mescos cu dos obheto no por pega bon na otro si un di nan ta sushi, un persona cu no ta moralmente of fisicamente limpi no por tin un bon relacion cu Dios ni cu su sernan keri. Hende cu conducta sinberguensa tambe ta mustra un falta di respet pa Dios su leynan husto.  Tur e otro obranan di carni tambe ta separa hende for di otro y for di Dios. Pesey mes Jehova ta odia e cosnan ey.

9. Ki preguntanan nos por haci nos mes pa wak si nos ta “haciendo esfuerso sincero pa mantene e union di spirito”?

⁹ Cada un di nos ta haci bon di puntra nos mes: ‘Mi ta haciendo tur mi esfuerso pa mantene paz y union den congregacion? Con mi ta reacciona si surgi un problema entre ami cu un otro persona? Mi ta core conta yen di hende e asunto pa nan tuma parti pa mi? Mi ta spera pa e ancianonan resolve e problema pa mi ya mi mes no tin cu bay haci paz cu e persona? Si mi sa cu un hende tin algo contra mi, mi ta evita contacto cu ne pa mi no tin nodo di papia cu ne tocante e asunto?’ Si nos no ta haci esfuerso pa mantene paz y union, nos por bisa cu nos ta coopera cu Jehova su proposito pa uni tur persona bou di e liderato di Cristo?

10, 11. (a) Dicon ta importante pa nos ta na paz cu nos rumannan? (b) Kico nos por haci pa mantene paz y ricibi Jehova su bendicion?

¹⁰ Hesus a bisa: “Si bo trece bo ofrenda na altar, y eynan bo corda cu bo ruman tin algo contra bo, laga bo ofrenda eynan, dilanti di altar, y bay. Haci paz cu bo ruman prome, y despues, ora bo bin bek, duna bo ofrenda. Sea lihe pa drecha asunto.” (Mat. 5:23-25) Discipel Santiago a bisa cu “hende cu ta haci paz lo sembra caminda tin paz y lo cosecha e fruta di husticia.” (Sant. 3:17, 18) Pues anto, si bo no ta na paz cu otro hende, bo no por sigui haci loke ta corecto.

¹¹ Nos por ilustra esey di e manera aki: Den algun pais cu a ser asota pa guera, mas cu un tercera parti di e tera no por ser cultiva pa motibo di e minanan cu tin den tera. Dicon? Pasobra manera un mina explota, cunukeronan ta bandona e sitio, y esey ta haci e situacion dificil: Hende ta keda sin trabou y stadnan ta keda sin cuminda. Di igual manera, lo ta dificil pa nos mehora nos cualidadnan cristian si nos tin un caracter manera mina cu ta stroba nos di ta na paz cu nos rumannan. Pero si nos ta lihe pa pordona y ta haci bon na otro hende, nos lo ta na paz cu nan y Jehova lo bendiciona nos.

12. Con ancianonan por yuda nos pa ta uni?

¹² E ‘regalonan den forma di hende’, esta, ancianonan, tambe ta yuda nos keda uni den congregacion. Si, nan t’ey pa yuda nos “alcansa e union di fe.” (Efe. 4:8, 13) Con nan ta haci esey? Ora nan ta traha hunto cu nos den sirbishi y ta duna nos conseho basa riba e Palabra di Dios,  nan ta yuda nos mehora nos personalidad cristian. (Efe. 4:22-24) Anto ora ancianonan ta duna bo conseho, bo ta mira esey como un manera cu Jehova ta prepara bo pa biba den su mundo nobo? Y ancianonan, boso ta haci esfuerso pa reahusta boso rumannan cu e meta ey na mente?​—Gal. 6:1.

“BIRA BONDADOSO CU OTRO”

13. Kico lo por ta e resultado si nos no haci caso di e conseho na Efesionan 4:25-32?

¹³ Efesionan 4:25-29 ta papia specificamente di e clase di conducta cu nos mester evita. E textonan aki ta mustra bon cla cu nos no mester ta hende floho, hende cu ta gusta rabia, cu ta gaña y cu ta expresa palabranan putri. Mas bien, nos palabranan mester edifica otro. Si nos no ta sigui e consehonan aki, nos ta haci Dios su spirito santo tristo y ta stroba esaki di promove union. (Efe. 4:30) Ademas, pa nos por tin paz y union, nos mester haci caso tambe di e siguiente conseho di Pablo: “Kita tur tipo di amargura malicioso, rabia, furia, gritamento y papiamento di cos ofensivo for di boso, y tambe tur loke ta perhudicial. Pero bira bondadoso cu otro, mustra tierno compasion, pordona otro libremente mescos cu Dios tambe a pordona boso libremente pa medio di Cristo.”​—Efe. 4:31, 32.

14. (a) Dicon Bijbel ta anima nos pa “bira bondadoso”? (b) Kico lo yuda nos ta bondadoso?

¹⁴ E echo cu Bijbel ta anima nos pa “bira bondadoso” ta mustra cu no ta tur ora nos ta bondadoso y cu nos tin cu mehora. Nos mester siña tene cuenta cu sintimento di otro hende y pone nan interes prome cu esun di nos. (Flp. 2:4) Tin biaha, nos kier bisa algo pa pone otronan hari of pa duna e impresion cu nos ta inteligente. Pero esaki ta bondadoso? Si nos pensa prome cu nos papia, nos lo “bira bondadoso.”

SIÑA STIMA Y RESPETA BO FAMIA

15. Con esposonan tin cu imita Cristo segun Efesionan 5:28?

¹⁵ Apostel Pablo a compara e relacion entre Cristo y e congregacion cristian cu e relacion entre un esposo y esposa. Cristo su ehempel ta laga nos compronde cu un esposo mester guia, stima y cuida su esposa y cu e esposa mester ta sumiso na su esposo. (Efe. 5:22-33) Awor, kico Pablo tabata kiermen cu e expresion di e “manera” aki ora el a bisa: “Di e manera aki, esposonan mester stima nan esposa manera nan mes curpa”? (Efe. 5:28) Wel, e palabranan cu Pablo a expresa prome ta describi e manera cu Cristo a trata e congregacion. El a bisa cu Cristo a stima e congregacion y a entrega su bida p’e y a purific’e cu “baño di awa pa medio di e palabra.” Pues, esposonan tin cu trata nan esposa manera Cristo a trata e congregacion, y esaki ta encera cu nan tin e responsabilidad di alimenta nan famia spiritualmente. Haciendo esey, nan ta coopera cu Jehova su proposito pa uni tur criatura como un solo famia bou di e liderato di Cristo.

16. Kico lo ta e resultado ora mayornan ta cumpli cu e responsabilidad cu Jehova a duna nan?

¹⁶ Mayornan mester corda cu nan tin un responsabilidad cu Jehova a duna nan; nan tin cu cuida nan yiunan. Pero lamentablemente, den e mundo djawe, hopi hende ta “sin cariño.” (2 Tim. 3:1, 3) Por ehempel, tin hopi tata cu no ta cumpli cu nan responsabilidad, y esaki ta perhudica y haci nan yiunan tristo. Pero Pablo a conseha tatanan cristian: “No irita boso yiunan, ma sigui lanta nan den e disciplina di Jehova y inculca su manera di pensa den nan.” (Efe. 6:4) Pues, ta mayornan tin cu siña nan yiunan stima hende y  respeta autoridad. Y mayornan cu ta haci esey ta coopera cu Jehova su proposito pa uni tur hende. Dicon nos ta bisa asina? Pasobra ora mayornan ta percura pa un ambiente di amor y cariño den famia, ta controla nan rabia y ta evita di grita y zundra nan yiunan, nan ta siña nan yiunan mustra amor na otro hende y respeta autoridad. Di e manera ey, nan ta prepara nan yiunan pa biba den Dios su mundo nobo.

17. Kico nos mester haci pa resisti Diabel?

¹⁷ Nos tin cu corda cu Diabel, e prome persona cu a kita paz universal, lo sigui haci tur loke ta na su alcance pa stop nos di haci Dios su boluntad. Y hopi hende den mundo ta haciendo loke Diabel kier, pasobra hopi ta divorcia, biba hunto sin casa y acepta matrimonio homosexual. Pero nos si no ta imita conducta cu pa mundo ta normal. Nos ta imita Cristo. (Efe. 4:17-21) Ademas, Bijbel ta urgi nos pa “bisti e armadura completo cu Dios ta duna” pa asina nos por resisti Diabel y su demoñonan cu exito.​—Lesa Efesionan 6:10-13.

“SIGUI CANA DEN AMOR”

18. Kico ta e clave pa union?

¹⁸ E clave pa union ta amor. Como cu nos ta stima Jehova, Hesucristo y nos prohimo, nos ta determina “pa mantene e union di spirito den e vinculo di paz.” (Efe. 4:3-6) Hesus a haci oracion tocante e clase di amor ey, bisando: “Mi no ta pidi bo pa esakinan so, ma tambe pa esnan cu pone fe den mi pa medio di nan palabra; pa nan tur por ta un, mescos cu abo, Tata, ta den union cu mi y ami ta den union cu bo, pa nan tambe por ta den union cu nos. . . . Y mi a haci bo nomber conoci na nan y lo mi sigui hacie conoci, pa nan por demostra e amor cu bo a stima mi cu ne y pa mi por ta den union cu nan.”​—Juan 17:20, 21, 26.

19. Kico bo ta determina pa haci?

¹⁹ Pesey, si debi na imperfeccion nos tin un caracter cu ta dificil pa cambia, laga amor motiva nos pa haci oracion mescos cu e salmista, kende a pidi Dios: “Uni mi curason pa teme bo nomber.” (Sal. 86:11) Y laga nos ta determina pa resisti Diabel su esfuerso pa aleha nos for di nos Tata amoroso y di nos rumannan. Si, laga nos traha duro pa “imita Dios, como yiunan stima, y sigui cana den amor”, tanto den famia, den sirbishi como den congregacion.​—Efe. 5:1, 2.

[Preguntanan di Estudio]

[Pachi na pagina 29]

E ta laga su ofrenda na altar y ta bay haci paz cu su ruman

[Plachi na pagina 31]

Mayornan, siña boso yiunan mustra respet