“Amor pa Dios ta nifica cu nos ta cumpli cu su mandamentonan; sinembargo, su mandamentonan no ta pisa.”​—1 JUAN 5:3.

1. Con Jehova ta trata cu su libertad, y ki libertad el a duna Adam cu Eva?

JEHOVA ta e unico Persona cu tin libertad absoluto. Toch, e no ta haci mal uzo di su libertad. E no a opta pa e so tin libertad y cu ta e so tin cu dicidi tur loke su sirbidornan tin cu haci. Al contrario, el a duna nan boluntad liber, loke ta permiti nan tuma decision y cumpli cu nan deseonan. Tuma por ehempel Adam cu Eva. Ta un cos so Jehova a prohibi nan; el a bisa nan pa no come di “e palo di conocemento di bon y malo.” (Gen. 2:17) Pues, Adam cu Eva tabata liber pa cumpli cu Dios su proposito sin cu nan mester a sigui un cantidad di regla.

2. Dicon nos prome mayornan a perde e libertad cu Dios a duna nan?

² Dicon Jehova a duna Adam cu Eva asina tanto libertad? Wel, el a crea nan segun su imagen y a duna nan un consenshi di manera cu nan amor p’e lo a motiva nan pa obedec’e como nan Creador. (Gen. 1:27; Rom. 2:15) Pero lamentablemente, Adam cu Eva no a atesora e libertad cu nan magnifico Creador a duna nan. En bes di esey, nan a scoge pa e supuesto libertad cu Satanas a ofrece nan, esta, independencia di Dios. Pero, nos prome mayornan no a haya mas libertad; mas bien, nan y nan descendientenan a bira esclavo di pica, loke a hiba na sufrimento y morto.​—Rom. 5:12.

3, 4. Con Satanas kier pa nos mira Jehova su normanan?

³ Si Satanas por a logra convence dos hende perfecto y un cantidad di angel pa rechasa Jehova su soberania, e por engaña nos tambe. Y Satanas su trikinan no a cambia: E kier pa nos kere cu Dios su normanan ta pisa y cu nan ta stroba nos di disfruta di bida. (1 Juan 5:3) Pesey, si nos ta anda regularmente cu hende cu ta pensa asina, nos por cuminsa pensa mescos cu nan.  Wak kico a pasa cu un ruman muher cu awor tin 24 aña di edad. Mal compania a pone cu el a comete inmoralidad sexual. El a bisa: “Mi tabatin miedo di ta diferente for di mi pareunan.” Abo tambe a yega di haya bo cu presion di pareu?

⁴ Ta tristo pa bisa, pero hasta den e congregacion cristian bo por haya bo cu mal compania. Un hoben Testigo a bisa: ‘Mi mes conoce algun hoben cu tabata enamora di hende cu no ta Testigo. Dado momento mi a realisa cu mas mi anda cu nan, mas mi ta bira manera nan. Spiritualmente, mi a cuminsa bay atras. Mi no tabata disfruta mas di e reunionnan y casi mi no tabata sali mas den sirbishi. E ora ey, mi a realisa cu mi mester a stop di anda cu nan, y mi a hacie!’ Abo ta consciente di e influencia cu bo amistadnan por tin riba bo? Laga nos wak con un ehempel biblico ta mustra nos esey.​—Rom. 15:4.

EL A HORTA NAN CURASON

5, 6. Con Absalon a gaña e hendenan, y su plan tabatin exito?

⁵ Bijbel ta contene hopi ehempel di personanan cu tabatin mal influencia riba otronan. Un di e personanan ey tabata Absalon, yiu homber di Rey David. Absalon tabata un homber cu bon tipo. Cu tempo, el a bira ambicioso mescos cu Satanas. El a cuminsa cudisha e puesto di su tata y tabata kier su trono, algo cu e no tabatin derecho riba dje. * Den un intento astuto pa kita e trono for di su tata, Absalon tabata priminti e yiunan di Israel yen di cos y haci comosifuera e tabata masha interesa den nan. Na fini manera, e tabata laga nan kere cu su tata no tabata interesa den nan. Si, mescos cu Satanas a haci den e hofi di Eden, Absalon a laga hende kere cu e tabata un benefactor, es decir, esun bon cu lo yuda hende, y na mes momento e tabata papia mentira flagrante contra su tata.​—2 Sam. 15:1-5.

⁶ Awor, Absalon su plan malicioso tabatin exito? Den cierto sentido si, pasobra Bijbel ta bisa cu “Absalon a horta curason di e hombernan di Israel.” (2 Sam. 15:6) Pero finalmente, su rebelion a fracasa. Su arogancia a cost’e su bida y bida di e miles di hendenan cu a bay su tras.​—2 Sam. 18:7, 14-17.

7. Kico nos por siña for di e relato di Absalon? (Wak e plachi na pagina 19.)

⁷ Con bin Absalon por a gaña e Israelitanan ey asina facil? Kisas nan tabatin gana di haya loke el a priminti nan. Of podise e echo cu e tabatin bon tipo a ciega nan. Sea loke sea e motibo, nos por ta sigur di esaki: Nan no tabata leal na Jehova ni na su rey nombra. Awe tambe Satanas ta uza hende manera Absalon pa horta curason di sirbidornan di Jehova. Podise nan ta bisa: ‘Jehova su normanan ta mucho streng. Wak tur e hendenan cu no ta sirbi Jehova; nan si ta disfruta di bida.’ Abo ta realisa cu e cosnan ey ta mentira y ta keda leal na Dios? Bo ta convenci cu ta “e ley perfecto” di Jehova, esta e ley di Cristo, so por haci hende berdaderamente liber? (Sant. 1:25) Si ta asina, demostra cu bo ta stima e ley ey y uza bo libertad na un manera cu ta agrada Jehova.​—Lesa 1 Pedro 2:16.

8. Menciona algun ehempel cu ta mustra cu desobediencia na Jehova no ta hiba na felicidad.

⁸ Satanas ta mik specialmente riba hobennan. Un ruman homber cu awor tin 30 y pico aña di edad ta corda: ‘Tempo mi tabata teenager, mi tabata sinti cu Jehova su normanan tabata stroba mi en bes di proteha mi.’ Esey a pone cu el a comete inmoralidad sexual. Pero esey no a hacie feliz. El a bisa: “Añanan largo, mi consenshi a keda molestia mi y mi tabatin duele di loke mi a haci.” Un ruman muher cu tambe a comete inmoralidad sexual tempo cu e tabata  teenager a bisa cu despues el a sintie masha malo y tabata sinti cu e no ta bal nada. El a sigui bisa: “Hasta awor, 19 aña despues, mal recuerdo ta keda molestia mi.” Un otro ruman muher a bisa: ‘Loke tabata duel mi hopi ta e dolor cu mi conducta a causa mi sernan keri.’ El a sigui bisa: “Un bida sin aprobacion di Jehova ta masha duro.” Pero Satanas no kier pa nos pensa riba e consecuencianan di pica.

9. (a) Ki preguntanan por yuda nos analisa nos punto di bista tocante Jehova y di su mandamento- y principionan? (b) Dicon ta importante pa conoce Dios bon?

⁹ Lamentablemente, hopi hoben den e berdad y hasta rumannan adulto mester a dal nan dede pa siña cu desobediencia na Dios ta trece hopi dolor y sufrimento! (Gal. 6:7, 8) Pesey, puntra bo mes: ‘Mi ta reconoce e trampanan di Satanas? Mi ta considera Jehova como mi mihor Amigo, esun cu kier mi bon y cu semper ta papia berdad? Mi ta realmente convenci cu Jehova nunca lo nenga mi algo cu ta bon pa mi y cu lo haci mi berdaderamente feliz?’ (Lesa Isaias 48:17, 18.) Pa bo por contesta e preguntanan aki cu un si sincero, bo mester conoce Jehova bon. Bo mester ta convenci cu e mandamento- y principionan cu nos ta haya den Bijbel ta demostra cu Jehova ta stima nos y cu e no a pone nan pa kita nos libertad.​—Sal. 25:14.

PIDI DIOS SABIDURIA Y UN CURASON OBEDIENTE

10. Dicon nos mester haci esfuerso pa imita e actitud cu Rey Salomon tabatin durante su hubentud?

¹⁰ Tempo cu Salomon tabata hoben,  humildemente el a haci oracion na Jehova y a bis’e: “Mi ta un mucha chikito; mi no sa con pa sali ni con pa drenta.” Y el a pidi Jehova pa dun’e sabiduria y “un curason obediente” (NW). (1 Rey. 3:7-9, 12) Anto Jehova a contesta Salomon su oracion sincero. Pesey, si abo tambe pidi Jehova e mesun cosnan ey, sin duda lo e scucha bo, sea cu bo ta hoben of adulto. Ta claro cu Jehova lo no duna bo sabiduria y comprondemento milagrosamente. Pa bo haya e sabiduria di Jehova, bo tin cu studia su Palabra diligentemente, pidie den oracion pa su spirito santo y sigui e guia y instruccion cu bo ta haya mediante e congregacion cristian. (Sant. 1:5) Di e manera ey, Jehova ta haci hasta su sirbidornan jong mas sabi cu tur e hendenan cu no ta haci caso di su consehonan; si, e ta haci nan mas sabi cu “hende sabi y intelectual” di e mundo aki.​—Luc. 10:21; lesa Salmo 119:98-100.

11-13. (a) Ki les importante nos por siña for di Salmo 26:4, Proverbionan 13:20 y 1 Corintionan 15:33? (b) Con bo por aplica e principionan biblico aki den bo bida?

¹¹ Laga nos analisa awor algun texto biblico cu ta siña nos e importancia di scoge bon amigo. E analisis aki lo yuda nos mira e balor di studia Bijbel y medita riba loke nos ta studia pa nos por conoce Jehova bon. E textonan ta Salmo 26:4 cu ta bisa: “Mi no ta sinta hunto cu hombernan gañado, tampoco lo mi no anda cu hipocritanan”; Proverbionan 13:20 cu ta bisa: “Esun cu anda cu hende sabi lo ta sabi, ma un compañero di hende bobo lo sufri daño” y 1 Corintionan 15:33 cu ta bisa cu “mal compania ta daña bon custumber.”

¹² Ki les importante nos por siña for di e textonan aki? (1) Jehova kier pa nos wak bon ken nos ta scoge como amigo. E kier proteha nos, tanto moralmente como spiritualmente. (2) Nos amigonan por tin un gran influencia riba nos, sea bon of malo. Esey ta e realidad. E palabranan den e textonan cu nos a caba di menciona ta indica cu Jehova kier touch nos curason. Nan no ta bisa: “Bo mester haci esaki of bo no mester haci esaya.” Nan no ta regla; mas bien, nan ta declara realidad di bida. Ta comosifuera Jehova ta bisando nos: ‘Esaki ta e realidad. Kico lo bo haci? Kico bo curason ta bisa?’

¹³ Finalmente, como cu e tres textonan biblico aki ta declara realidad di bida, nan ta conta pa tur hende y ta practico te dia djawe. Puntra bo mes: Unda lo mi por haya mi cu hende ‘hipocrita’? Con mi por evita di cera amistad cu hende asina? (Pro. 3:32; 6:12) Ken ta e ‘hendenan sabi’ cu Jehova kier pa mi anda cu ne? Y ken ta e ‘bobonan’ cu e kier pa mi evita? (Sal. 111:10; 112:1; Pro. 1:7) Cua “bon custumber” lo mi perde si mi anda den mal compania? Ta den mundo so mi por haya mi cu mal compania? (2 Ped. 2:1-3) Con lo bo contesta e preguntanan aki?

14. Con nos por mehora nos Adoracion Como Famia?

¹⁴ Di e mesun manera cu nos a caba di rasona riba e textonan ey, abo tambe por analisa otro textonan biblico cu ta revela e manera cu Dios ta pensa tocante cierto topiconan cu ta concerni abo y bo famia. * Y mayornan, ta masha importante pa boso trata e topiconan aki durante boso anochi di Adoracion Como Famia. Ora boso ta haci esey, corda cu e meta ta pa yuda cada miembro di famia compronde cu Jehova su ley- y principionan ta un expresion di su amor pa nos. (Sal. 119:72) Si, ora famianan ta studia Bijbel di e manera ey hunto,  nan relacion cu Jehova y cu otro lo bira mas fuerte.

15. Con bo por sa cu realmente bo ta desaroyando un curason sabi y obediente?

¹⁵ Awor, con bo por sa cu realmente bo ta desaroyando un curason sabi y obediente? Un manera ta di compara bo manera di pensa cu esun di Dios su sirbidornan fiel di pasado. Tuma por ehempel Rey David, kende a bisa: “Pa haci bo boluntad, o mi Dios, ta un delicia pa mi; bo ley ta den mi curason.” (Sal. 40:8) Y e escritor di Salmo 119 a bisa: “O cuanto mi ta stima bo ley! E ta mi meditacion henter dia.” (Sal. 119:97) Ma no ta di un dia pa otro hende ta haya un amor asina pa Jehova su leynan. Mas bien, esey ta resultado di estudio profundo di Bijbel, meditacion y oracion. Ademas, bo amor pa Jehova ta crece tambe ora bo mes experencia cu obediencia na su leynan ta resulta den hopi bendicion.​—Sal. 34:8.

LUCHA PA E LIBERTAD CU DIOS TA DUNA!

16. Kico nos mester keda corda si nos kier gana e bataya pa disfruta di berdadero libertad?

¹⁶ A traves di historia, hende tabata dispuesto pa bringa den gueranan cruel pa logra libertad. Como cristian, nos mester ta mas dispuesto ainda pa lucha pa e libertad cu Dios ta duna. Corda cu no ta contra Satanas y e pensamentonan malbado di e mundo aki so nos tin cu lucha. Nos tin cu lucha tambe contra nos mes imperfeccion y nos curason engañoso. (Jer. 17:9; Efe. 2:3) Pero cu Jehova su yudansa, nos por gana e bataya. Es mas, cada bes cu bo logra un victoria​—sea ta grandi of chikito​—bo ta logra por lo menos dos cos bon. Prome, bo ta haci Jehova su curason contento. (Pro. 27:11) Di dos, cada bes cu bo experencia cu obediencia na “e ley perfecto cu ta trece libertad” ta beneficia bo, bo ta bira hasta mas determina pa keda riba ‘e caminda smal’ cu ta hiba na bida eterno. Anto den futuro, lo bo disfruta di e gran libertad cu Jehova ta priminti tur esnan cu keda leal na dje.​—Sant. 1:25; Mat. 7:13, 14.

17. Dicon nos no mester desanima ora nos comete un eror, y con Jehova ta yuda nos?

¹⁷ Ta claro cu de bes en cuando, nos tur ta comete eror. (Ecl. 7:20) Ora esey sosode, no desanima ni pensa cu bo no ta bal nada. Si na moda di papia bo cay, lanta y sigui padilanti, hasta si esey ta nifica cu bo tin cu busca yudansa cerca e ancianonan. Discipel Santiago a bisa cu nan “oracion haci cu fe lo cura esun cu ta malo, y Jehova lo lant’e.” Ademas, el a bisa cu “si [un persona] a comete pica, lo e ser pordona.” (Sant. 5:15) Pues, no lubida nunca cu Jehova ta un Dios misericordioso y cu ta e a hala bo of atrae bo na e congregacion cristian pasobra el a mira algo bon den bo. (Lesa Salmo 103:8, 9.) Pesey, tanten cu bo ta sirbi Jehova di henter bo curason y ta keda leal na dje, lo e no bandona bo.​—1 Cro. 28:9.

18. Kico nos mester haci pa haya Jehova su proteccion?

¹⁸ Riba su ultimo anochi aki riba tera, Hesus a haci oracion cu su 11 fiel apostelnan. Den su oracion, el a haci e peticion inolvidabel aki na Jehova: “Proteha nan pa motibo di e Malbado.” (Juan 17:15) E oracion cu Hesus a haci pa su apostelnan ta conta pa su siguidonan djawe tambe. Pues, nos por ta sigur cu Jehova lo contesta e oracion ey y proteha nos durante e tempo dificil aki. Bijbel ta bisa cu Jehova “ta un escudo pa esnan cu ta cana den integridad . . . y ta preserva [“proteha”, NW] e caminda di su santonan.” (Pro. 2:7, 8) Aunke no ta semper facil pa cana den e caminda di integridad, esey ta e unico caminda cu ta hiba na bida eterno y berdadero libertad. (Rom. 8:21) Pesey, no laga ningun hende gaña bo y pone bo desvia for di e caminda ey!

[Nota]

[Preguntanan di Estudio]

[Plachi na pagina 19]

Con nos por identifica e Absalonnan di awendia y proteha nos mes contra nan?