CONOCEMENTO por salba bida. Ora Nouhou, un baby di dies luna, a bira malo, su mama kende ta traha den sector di cuido na Niger tabata sa kico pa haci. El a mescla awa, sucu y salo pa su yiu bebe y asina a evita cu e baby ta deshidrata. Segun UNICEF, “debi cu e mama a actua lihe y e yiu a haya cuido na un centro medico, e por a recupera lihe.”

Conocemento biblico tambe por salba bida. Moises, e escritor di e prome buki di Bijbel, a bisa: “Esaki no ta un palabra bashi pa boso; di berdad, esaki ta boso bida. Y pa medio di e palabra aki boso lo prolonga boso dianan.” (Deuteronomio 32:47) Ta berdad cu Bijbel por prolonga un hende su bida? Den ki sentido e ta nos bida?

E prome cinco articulonan den e serie aki ta mustra cu Bijbel ta un buki unico. Dicon? Pasobra su profecianan ta confiabel, e ta un buki historicamente y cientificamente exacto, su bukinan ta completamente na harmonia cu otro y e ta un buki di guia practico. No tin duda, Bijbel ta un buki unico! Pues, si Bijbel ta bisa cu bo por biba mas largo, esta pa semper, no ta bale la pena considera su contenido?

Nos ta anima bo pa studia Bijbel pa bo por haya sa con bo por tin paz mental for di awor y berdadero felicidad den futuro. Testigonan di Jehova ta contento pa studia Bijbel cu bo.