Bo Por Tin un Bon Relacion cu e Scuchador di Oracion

HOPI hende cu ta kere den Dios no por splica dicon nan ta kere den dje. Nan no por splica tampoco dicon hopi bes religion ta un fuente di problema ni dicon Dios ta permiti sufrimento. E unico cos cu nan por haci ta resa na un Dios cu nan no conoce.

No obstante, nos por tin un bon relacion cu Dios si nos siña conoc’e. Mas bo conoce Dios, mas bo ta stim’e y balor’e. Y bo fe den dje lo crece. De echo, fe berdadero ta basa riba evidencia. (Hebreonan 11:1) Ora bo haya sa e berdad tocante Dios, bo ta siña conoc’e y bo por papia cu ne mescos cu bo ta papia cu un amigo. Ata aki algun experencia di personanan cu tabatin custumber di haci oracion maske nan tabata duda cu Dios ta existi.

▪ Patricia, kende nos a menciona den e prome articulo, a conta: “Un dia, mi tabata hunto cu un grupo di mas o menos dies amigo. Y nan a cuminsa papia tocante religion. Mi a bisa nan cu un Testigo di Jehova a caba di yama na nos cas y cu mi a sali bay pa mi no tende e combersacion cu e tabatin cu mi tata, kende tabata un ateista. Anto un di mi amigonan a bisa mi: ‘Kisas e Testigonan di Jehova tin e berdad.’

Un otro a bisa: ‘Dicon nos no ta bay un di nan reunionnan pa averigua esey?’ Y esey ta loke nos a haci. Aunke nos tabatin nos dudanan, algun di nos a sigui asisti na e reunionnan djis pasobra e Testigonan tabata masha cariñoso.

Pero un diadomingo, mi a tende algo cu a cambia mi pensamento. E orador a splica dicon hende ta sufri. Nunca mi tabata sa cu Dios a crea hende perfecto y cu ta pa motibo di un hende pica y morto a pasa pa henter humanidad. E orador a splica tambe dicon Hesus mester a muri pa hende por haya loke e prome homber a tira afo. * (Romanonan 5:12, 18, 19) Diripiente, mi a compronde tur cos. Y mi a bisa den mi mes, ‘Di berdad tin un Dios cu ta interesa den nos!’ Mi a sigui studia Bijbel y pronto, pa prome biaha den mi bida, mi por a haci oracion na un persona cu ta existi di berdad.”

▪ Allan, menciona tambe den e prome articulo, a conta: “Un dia, Testigonan di Jehova a yama na nos cas y a papia cu mi casa tocante bida pa semper aki riba tera. Y como cu el a haya esaki interesante, el a invita nan paden. Mi no a gusta e cos ey niun tiki. Pesey, mi a yama mi casa bin tende den cushina, y mi a bis’e: ‘Stop di haci coy kens. No laga e hendenan ey gaña bo.’

 El a bisa mi: ‘Wel, abo bay cerca nan y proba cu nan ta gaña.’

Ta claro cu mi no por a proba nada. Pero e Testigonan tabata masha amabel, y nan a duna mi un buki cu ta splica e origen di bida: Si bida a bin di evolucion of creacion. E buki a splica e asunto asina bon y logico cu mi kier a siña mas tocante Dios. Mi a cuminsa studia Bijbel cu e Testigonan, y pronto mi a realisa cu loke Bijbel ta siña ta diferente for di loke mi tabata pensa di religion. Mas mi a siña conoce Jehova, mas specifico mi oracionnan a bira. Mi a pidi Dios yuda mi cambia cierto aspectonan di mi caracter. Y Jehova a contesta mi oracionnan.”

▪ Andrew, kende ta biba na Inglatera, a bisa: “Maske mi tabatin mi mes opinion y masha interes den ciencia, mi tabata kere den evolucion djis pasobra hende tabata bisa cu e ta un teoria cientificamente comproba. Y debi na tur e cosnan malo cu ta sosode, mi no kier a kere den Dios.

Toch, tin biaha mi tabata pensa: ‘Si tin un Dios ey riba, mi kier sa ta dicon tur e  cosnan aki ta sosode: Dicon tin asina tanto crimen y guera?’ Y ora mi tabata den situacion dificil, tin biaha mi tabata resa pidi yudansa, sin sa na ken mi tabata dirigi mi mes.

Un persona a duna mi casa un tratado di Testigonan di Jehova cu tabatin como titulo: E Mundu Aki Lo Sobrebibí? Hopi bes mi tabata haci mi mes e pregunta ey. E tratado a pone mi para keto y puntra mi mes: ‘Ta bale la pena analisa loke Bijbel ta siña?’ Un poco tempo despues, mientras mi tabata cu vakantie, un hende a duna mi e buki E Bijbel​—e Palabra di Dios of e palabra di hende? Ora mi a realisa cu Bijbel ta na harmonia cu ciencia, mi kier a siña mas di Bijbel. Pesey, manera un Testigo di Jehova a ofrece mi un estudio di Bijbel, mi a acepta mesora. Ora mi a compronde kico ta Jehova su proposito pa humanidad, mi a cuminsa mir’e como un persona real, cu ken mi por papia libremente den oracion.”

▪ Jane, un señora cu a lanta como protestant na London, a bisa: “E hipocresia cu mi tabata mira den religion y e tantisimo sufrimento cu tin na mundo a pone mi perde interes den religion. Ademas, mi a stop cu mi estudio universitario y a cuminsa canta y toca guitara pa placa. Ta e tempo ey mi a conoce Pat. El a lanta como catolico pero e tambe a stop di kere den Dios, mescos cu mi.

Nos tabata biba den un cas bandona hunto cu algun otro hoben cu tambe a stop di bay scol y cu tabata interesa den e religionnan di Oriente. Nos tabata discuti te den oranan laat di anochi tocante e proposito di bida. Aunke ami cu Pat no tabata kere den Dios, nos tabata kere si cu mester tabatin un forsa cu a crea tur cos.

Despues cu nos a muda bay parti noord di Inglatera pa busca trabou como musico, nos yiu homber a nace. Un anochi el a bira malo, y mi a haya mi ta haci oracion na e Dios cu mi no tabata kere den dje. Poco tempo despues, ami cu Pat tabatin problema cu otro; pesey, mi a coge nos baby y a bay lag’e. Atrobe mi a resa pidi yudansa por si a caso tabatin un persona ta scucha. Mi no tabata sa, pero Pat tambe a haci oracion.

Mas despues riba e mesun dia ey, dos Testigo di Jehova a bishita Pat y a mustr’e algun conseho practico den Bijbel. Pat a yama mi y a puntra mi si mi ta dispuesto pa studia Bijbel cu Testigonan di Jehova hunto cu ne. No a dura mucho cu nos a compronde cu pa agrada Dios, nos mester casa. Pero siendo cu nos relacion no tabata masha bon, esey a parce un desafio.

Ma nos kier a sa mas tocante cumplimento di profecia biblico, tocante e Reino di Dios y tambe dicon tin asina tanto sufrimento. Gradualmente, nos a compronde cu Dios ta interesa den hende y nos a sinti nos motiva pa haci loke e bisa; pesey, nos a casa. Cu e sabiduria di e Palabra di Dios nos a lanta nos tres yiunan. Nos ta convenci cu Jehova a scucha nos oracionnan.”

Analisa e Evidencianan

Mescos cu miyones di otro hende, e personanan cita den e articulo aki no a laga religion falso gaña nan ma a busca pa sa dicon Dios ta permiti sufrimento. Bo a ripara kico a yuda convence cada un di nan cu Jehova realmente ta scucha oracion? Si, comprondemento exacto di Bijbel.

Abo kier analisa e evidencianan cu Dios ta existi? Testigonan di Jehova gustosamente kier yuda bo haya sa e berdad tocante Jehova y con bo por tin un bon relacion cu ne, “[Esun] cu ta scucha oracion.”​—Salmo 65:2.

[Nota]

[Comentario na pagina 10]

“Ora mi a compronde kico ta Jehova su proposito pa humanidad, mi a cuminsa mir’e como un persona real, cu ken mi por papia libremente den oracion”

[Plachi na pagina 9]

Fe berdadero ta basa riba evidencia, y pa nos por tin un fe asina, nos mester tin deseo pa sa e berdad tocante Dios