“Comporta boso na un manera digno di e bon noticia.”​—FLP. 1:27.

1, 2. Dicon e conseho cu Pablo a duna e congregacion na Filipo tabatin un nificacion special?

APOSTEL Pablo a encurasha e congregacion di Filipo pa nan “comporta [nan mes] na un manera digno di e bon noticia.” (Lesa Filipensenan 1:27.) E verbo Griego cu Pablo a uza pa e expresion “comporta boso” por nifica tambe “comporta boso manera ciudadano.” E expresion aki tabatin un nificacion special pa e congregacion di Filipo. Dicon? Ta parce cu e stad Filipo tabata un di e poco stadnan cu a haya ciudadania Romano. Tanto e Filipensenan como e Romanonan tabata masha orguyoso di nan ciudadania, pasobra asina nan por a disfruta di e proteccion cu ley Romano tabata brinda y di otro beneficionan cu masha poco hende tabatin.

² Pero e rumannan di e congregacion di Filipo tabatin un motibo mas importante pa ta orguyoso. Pablo a recorda nan cu, como cristian ungi, nan ciudadania ta “den cielo.” (Flp. 3:20) Nan tabata ciudadano di e Reino di Dios y no djis di un imperio humano. Como tal, nan tabata disfruta di proteccion y beneficionan cu ningun otro gobierno por a brinda.​—Efe. 2:19-22.

3. (a) Ken tin e oportunidad di bira ciudadano di e Reino di Dios? (b) Kico nos lo analisa den e articulo aki?

³ Pablo su conseho pa “comporta boso” manera ciudadano tabata principalmente pa e personanan cu lo goberna cu Cristo den cielo. (Flp. 3:20) Pero e conseho aki ta conta tambe pa tur hende cu kier biba riba tera como ciudadano di e Reino di Dios. Dicon? Pasobra nos tur ta sirbi e mesun Rey, Jehova, kende tin e mesun rekisitonan pa tur su sirbidornan. (Efe. 4:4-6) Awe, hende ta haci masha esfuerso pa bira ciudadano di un pais prospero. Pero, e privilegio pa bira ciudadano di e Reino di Dios ta di mucho mas balor. Pa nos por haya  un mihor idea ki un gran privilegio esey ta, laga nos considera algun similaridad cu tin entre e rekisitonan pa bira ciudadano di un gobierno humano y esnan pa bira ciudadano di e Reino di Dios. Nos lo analisa tres rekisito cu nos mester cumpli cu ne pa nos por keda ciudadano di e Reino.

ALGUN REKISITO PA BIRA CIUDADANO

4. Kico e idioma puro ta, y ki ora un persona por bisa cu e ta papia e idioma puro?

⁴ Siña e idioma. Algun gobierno ta exigi pa e hendenan cu kier bira ciudadano di nan pais siña e idioma di e pais. Pero tin hende ta siña domina e idioma di un pais basta aña despues cu nan a bira ciudadano di e pais ey. Kisas nan ta siña e reglanan di gramatica masha lihe, pero ta tuma mas tempo pa siña pronuncia cierto palabranan corectamente. Di mes manera, e Reino di Dios ta rekeri pa su ciudadanonan siña loke Bijbel ta yama e “idioma puro.” (Lesa Sofonias 3:9. *) Ki idioma esey ta? E idioma puro ta e berdad cu Bijbel ta siña nos tocante Dios y su propositonan. Papia e idioma puro ta nifica biba segun e ley- y principionan di Dios. Kisas, ta masha lihe nos a siña e siñansanan basico di Bijbel pa nos por a batisa y bira ciudadano di e Reino di Dios. Pero hasta despues di nos bautismo, ainda nos tin cu sigui haci esfuerso pa siña papia e idioma puro mas y mas mihor. Con asina? Nos mester sigui haci esfuerso pa aplica siñansa biblico lo mihor cu nos por.

5. Dicon nos mester siña tur loke nos por di e historia di Dios su organisacion?

⁵ Studia historia di e gobierno. Un persona cu kier bira ciudadano di un pais probablemente tin cu sa tambe historia di gobernacion di e pais. Di mes manera, si un hende kier bira ciudadano di e Reino di Dios, e mester siña tur loke e por tocante e Reino. Tuma por ehempel e yiunan di Core, kendenan a sirbi na Israel. Nan ehempel ta digno di imita, pasobra nan tabata stima Jerusalem y su luga di adoracion. Ademas, nan tabata gusta conta e historia di e stad ey, no pasobra Jerusalem tabata un stad bunita, pero pa loke e stad ey y e luga di adoracion a representa. E tabata “e stad di e gran Rey”, Jehova, caminda hende tabata bin pa siña e Ley di Jehova y ador’e. Y ta e hendenan ey cu tabata cay bou di e gobernacion di Jehova, e Rey di Jerusalem, tabata disfruta di Su misericordia. (Lesa Salmo 48:1, 2, 9, 12, 13.) Awor  kico di abo? Abo tin deseo di studia y conta otro hende e historia di Jehova su organisacion, mescos cu e yiunan di Core a haci den nan tempo? Mas bo siña tocante Jehova su organisacion y di e manera cu e ta yuda su pueblo, mas real su Reino ta bira pa bo y mas deseo lo bo haya pa predica e bon noticia di Reino.​—Jer. 9:24; Luc. 4:43.

6. Dicon ta comprendibel cu Jehova kier pa nos siña y obedece e ley- y principionan di e Reino?

⁶ Siña conoce e leynan. Gobiernonan humano ta exigi pa e ciudadanonan di nan pais siña y obedece nan leynan. Ta di compronde anto cu Jehova tambe ta spera cu tur ciudadano di su Reino ta siña y obedece su ley- y principionan. (Isa. 2:3; Juan 15:10; 1 Juan 5:3) Hopi biaha, e leynan cu hende ta bin cu ne ta deficiente y inhusto. Pero “e ley di SEÑOR ta perfecto.” (Sal. 19:7) Abo tin “delicia” den e ley di Dios y ta lesa su Palabra tur dia? (Sal. 1:1, 2) E unico manera cu nos por siña conoce e leynan di Dios ta di studia su Palabra. Y niun hende no por haci esey pa nos.

CIUDADANONAN DI E REINO DI DIOS TA STIMA DIOS SU LEYNAN

7. Dicon ciudadanonan di e Reino di Dios ta diferente?

⁷ Pa nos por keda ciudadano di e Reino, nos mester conoce y stima Dios su leynan. Hopi hende ta bisa cu nan ta di acuerdo cu e ley- y reglanan di e pais unda nan ta biba. Pero ora un ley no ta cumbini nan, y no tin ningun hende ta wak, nan no ta cumpli cu ne. Hopi bes, nan ta sigui ley djis pa ‘complace hende.’ (Col. 3:22) Pero ciudadanonan di e Reino di Dios ta biba segun un norma mas eleva: Nan ta cla pa obedece Dios su leynan, hasta si niun hende no ta wak. Dicon? Pasobra nan ta stima e Dunador di ley.​—Isa. 33:22; lesa Lucas 10:27.

8, 9. Con bo por sa si di berdad bo ta stima e leynan di Dios?

⁸ Awor, con bo por sa si di berdad bo ta stima e leynan di Dios? Wel, para keto un rato y pensa riba e manera cu bo ta reacciona ora bo haya conseho riba algo cu tin di haber cu gusto personal. Tuma por ehempel bo manera di bisti y peña. Kisas, prome cu bo a bira ciudadano di e Reino di Dios, bo manera di bisti tabata slons of provocativo. Pero segun cu bo amor pa Dios a crece, bo a siña bisti na un manera cu ta duna gloria na dje. (1 Tim. 2:9, 10; 1 Ped. 3:3, 4) Podise bo ta haya cu awor si bo ta bisti na un manera decente. Pero kico si un anciano bisa bo cu hopi ruman den congregacion tin problema cu bo manera di bisti? Con lo bo reacciona? Lo bo bin cu excuus? Lo bo rabia of nenga di haci cambio? Un di e leynan di mas importante cu ciudadanonan di e Reino mester obedece ta bisa cu nos mester imita Cristo. (1 Ped. 2:21) Y apostel Pablo a bisa cu ni “Cristo no a agrada su mes.” Pesey, Pablo su conseho ta pa ‘cada un di nos agrada nos prohimo pa su bon y pa fortalec’e.’ (Rom. 15:2, 3) Un cristian maduro semper ta dispuesto pa mantene paz den congregacion y ta evita di haci cos cu por molestia consenshi di otro hende.​—Rom. 14:19-21.

⁹ Awor, pensa un rato riba bo actitud encuanto sex y matrimonio. Hende cu no ta ciudadano di e Reino di Dios kisas no ta mira nada malo den homosexualidad, pornografia, adulterio of divorcio. Pero ciudadanonan di e Reino a siña pensa di antemano riba e consecuencianan cu nan echonan por tin pa nan mes y otro hende. Ta berdad cu algun di nan tabata hiba un bida inmoral prome cu nan a bira ciudadano di e Reino. Pero awor, nan ta mira sex y matrimonio como regalo di Dios y ta balora Jehova su normanan eleva. Nan sa cu personanan cu ta desobedece Jehova su  leynan encuanto sex y matrimonio no por bira ciudadano di e Reino di Dios. (1 Cor. 6:9-11) Y nan ta consciente tambe cu nan curason por gaña nan. (Jer. 17:9) Pesey nan ta aprecia tur spiertamento specifico cu nan ta haya pa yuda nan sigui cumpli cu e leynan di Dios.

CIUDADANONAN DI E REINO DI DIOS TA APRECIA SPIERTAMENTO

10, 11. Di kico e Reino di Dios ta spierta nos, y con nos ta sinti ora nos haya e spiertamentonan aki?

¹⁰ Tin biaha, gobiernonan ta spierta nan ciudadanonan encuanto cierto cuminda of medicina. Ta claro cu no ta tur cuminda of medicina ta malo, pero si un cierto producto ta forma peliger pa e ciudadanonan, e gobierno su obligacion ta di spierta nan pa proteha nan. Di mes manera, e Reino di Dios ta spierta su ciudadanonan di cierto peligernan cu por daña nan relacion cu Dios. Internet, por ehempel, ta un medio practico pa hende comunica cu otro y educa y entretene nan mes. Jehova su organisacion tambe ta haci bon uzo di Internet. Sinembargo, tin hopi website cu ta forma un peliger pa hende cu kier keda moralmente y spiritualmente limpi. Websitenan cu ta promove pornografia, por ehempel, ta sumamente peligroso. Pa decadanan caba, e esclavo fiel ta spierta nos tocante e sorto di websitenan aki. Y nos ta masha contento cu e spiertamentonan aki.

¹¹ Tin un otro sorto di website cu a bira masha popular ultimamente: rednan social. Si nos uza nan cu cautela, nan por ta masha practico. Pero, nan por ta perhudicial tambe. E sitenan aki facilmente por pone nos den contacto cu mal compania. (1 Cor. 15:33) Pesey, no ta nada straño cu Jehova su organisacion ta spierta nos na un manera balansa encuanto e uzo di e websitenan aki. Abo a lesa tur e articulonan cu e esclavo fiel a publica recientemente tocante uzo di red social? Telefon celular tambe por ta masha util si nos uz’e na un manera sabi. Bo a lesa articulonan cu ta contene informacion importante encuanto uzo di telefon celular? Lo no ta sabi pa haci uzo di red social of telefon celular sin lesa e informacionnan aki prome. * Dicon? Pasobra esey lo ta mescos cu uza un remedi fuerte sin lesa su instruccion prome.

12. Dicon ta un bobedad pa no haci caso di spiertamento?

¹² Esnan cu no ta haci caso di e spiertamentonan di e esclavo fiel sin duda lo causa sufrimento pa nan mes y pa nan sernan keri. Por ehempel, algun a bira adicto na pornografia of ta comete inmoralidad sexual y ta gaña nan mes cu Jehova no ta mira loke nan ta haci. Ta un gran bobedad pa pensa cu nos por sconde pa Jehova! (Pro. 15:3; lesa Hebreonan 4:13.) Pero Jehova ta un Dios misericordioso, y pesey e ta urgi su representantenan riba tera pa yuda esnan cu comete pica. (Gal. 6:1) Sinembargo, mescos cu gobernantenan humano lo no permiti hende cu comete cierto actonan ilegal keda ciudadano di nan pais, Jehova tampoco lo no permiti hende cu ta viola su leynan y cu no ta arepenti sigui ta ciudadano di su Reino. * (1 Cor. 5:11-13)  Pero hende cu arepenti y stop di haci loke ta malo por tin un bon relacion atrobe cu Jehova y keda ciudadano di e Reino. (2 Cor. 2:5-8) Ki un gran privilegio nos tin di sirbi un Rey asina amoroso!

CIUDADANONAN DI E REINO DI DIOS TA BALORA EDUCACION

13. Con ciudadanonan di e Reino di Dios ta demostra cu nan ta balora educacion?

¹³ Hopi gobierno ta haci masha esfuerso pa educa nan ciudadanonan. Nan ta percura scolnan pa hende por haya educacion basico y siña ofishi. Ciudadanonan di e Reino di Dios ta contento cu tin e scolnan aki y ta haci bon uzo di nan pa siña lesa, skirbi y siña un ofishi pa nan por sostene nan mes financieramente. Pero pa nan, e educacion cu nan ta haya como ciudadano di e Reino ta mucho mas valioso. E congregacion cristian ta anima nos pa siña lesa y skirbi. Mayornan ta ser anima pa lesa pa nan yiunan. Tur luna, e esclavo fiel ta publica E Toren di Vigilancia, La Atalaya y ¡Despertad! cu ta contene hopi informacion biblico. Si bo lesa un par di pagina pa dia, lo bo por keda al dia cu e educacion cu Jehova ta percura.

14. (a) Ki entrenamento nos ta ricibi? (b) Cua sugerencia pa e Adoracion Como Famia bo a pone na practica?

¹⁴ Tur siman, ciudadanonan di e Reino ta ricibi entrenamento na nan reunionnan di congregacion. E Scol di Ministerio Teocratico, por ehempel, tin mas cu seis decada ta yuda studiantenan di Bijbel bira maestro eficaz di e Palabra di Dios. Abo ta inscribi den e scol aki? Ademas, e ultimo añanan, e esclavo fiel a enfatisa e importancia di tene un anochi di Adoracion Como Famia tur siman. Esaki ta yuda uni famianan mas. Bo a logra aplica e sugerencianan publica den nos literatura? *

15. Kico ta un di e privilegionan di mas grandi cu nos tin?

¹⁵ Ora di eleccion, hopi ciudadano ta haci esfuerso pa haya hende pa sostene nan partido politico. Algun ta hasta bay di cas pa cas en busca di e hendenan aki. Rond mundo, ciudadanonan di e Reino di Dios ta haci nan maximo esfuerso pa sostene e Reino, dunando testimonio riba caya y predicando di cas pa cas. Manera e articulo anterior a bisa, E Toren di Vigilancia, cu tin e proposito di anuncia e Reino di Jehova, ta e revista mas distribui na mundo. Ta un gran honor pa conta otro hende tocante e Reino di Dios. Abo ta un predicador celoso di e bon noticia di e Reino di Dios?​—Mat. 28:19, 20.

16. Con bo por demostra cu bo ta un bon ciudadano di e Reino di Dios?

¹⁶ Pronto e Reino di Dios lo ta e unico gobierno cu lo goberna tera. E tempo ey, ta e leynan di e Reino di Dios so lo guia hende. Abo lo t’ey? Si esey ta bo deseo, for di awor bo tin cu demostra cu bo ta un bon ciudadano di e Reino di Dios. Con? Laga tur e decisionnan cu bo tuma ta decisionnan cu ta duna gloria na Jehova Dios.​—1 Cor. 10:31.

[Nota]

[Preguntanan di Estudio]

[Comentario na pagina 21]

Bo ta haci caso di e spiertamentonan cu e esclavo fiel ta duna tocante Internet?

[Plachi na pagina 19]

Bo tin e mesun amor pa adoracion puro y su historia cu e yiunan di Core tabatin?

[Plachi na pagina 22]

Bo anochi di Adoracion Como Famia por yuda abo y bo sernan keri bira bon ciudadano di e Reino di Dios