E articulo aki ta trata algun pregunta cu kisas bo tin y ta mustra bo unda pa haya e contestanan den bo Bijbel. Si bo ta desea, Testigonan di Jehova gustosamente lo trata e preguntanan aki cu bo.

1. Kico ta un angel?

Un angel ta un criatura cu ta biba den cielo. Nan forma di bida ta mas eleva cu esun di hende. E Dios berdadero, kende tambe ta un spirito, a crea angel prome cu el a crea tera. (Job 38:4, 7; Mateo 18:10) Jehova tin miyones di angel fiel.​—Lesa Salmo 103:20, 21; Daniel 7:9, 10.

2. Angelnan ta yuda hende?

Den tempo biblico, angelnan a yuda e homber husto Lot. E tabata biba den un stad yen di mal hende cu Dios tabata bay destrui. Dos angel a bisa Lot y su famia pa huy for di e stad. Algun hende no a tuma e spiertamento ey na serio. Pero Lot y su yiu muhernan si a haci caso di e angelnan cu Dios a manda, y nan a sobrevivi.​—Lesa Genesis 19:1, 13-17, 26.

Segun Bijbel, awendia tambe angelnan ta yuda hende. Con asina? Nan ta dirigi esnan cu fielmente ta cumpli cu e trabou di predica e bon noticia di e Reino di Dios. (Mateo 24:14) E mensahe cu nos ta predica ta encera un spiertamento tambe. E spiertamento aki ta mes serio cu esun cu Lot a haya. Dicon? Pasobra ta Dios ta spierta nos mediante su angelnan.​—Lesa Revelacion 1:1; 14:6, 7.

Un otro manera cu Dios ta uza su angelnan ta pa fortalece nos durante prueba. El a uza un angel pa fortalece Hesus tambe.​—Lesa Lucas 22:41-43.

Pronto Dios lo uza su angelnan pa elimina tur hende malbado, kendenan ta causa sufrimento. Esaki lo ta un alivio pa humanidad!​—Lesa 2 Tesalonicensenan 1:6-8.

  3. Ki influencia e demoñonan tin?

Mescos cu hopi hende aki riba tera ta desobedece Dios, asina tambe hopi angel a yega di rebela contra Dios. (2 Pedro 2:4) Angel desobediente ta ser yama demoño. Esun principal ta Satanas, e Diabel. Satanas y su demoñonan ta gaña henter mundo.​—Lesa Revelacion 12:9.

Satanas ta uza e sistema comercial corupto aki, gobierno y religion falso pa influencia hende y aparta nan for di Dios. Pues, ta Satanas ta responsabel pa e inhusticia, violencia y sufrimento cu tin na mundo.​—Lesa 1 Juan 5:19.

4. Con demoño ta gaña hende?

Satanas kier laga hende kere cu ora un persona muri e ta bira spirito y cu e por comunica cu hende bibo. Pero Bijbel ta siña cu hende morto no por haci nada. (Eclesiastes 9:5) Pesey pa gaña hende, hopi bes e demoñonan ta imita stem di sernan keri cu a muri. (Isaias 8:19) Ademas, nan ta uza medio spiritista, mirado di destino, adivinadonan y astrologonan pa gaña hende. E Palabra di Dios ta spierta nos pa keda leu di tal practicanan. Pesey, nos mester deshaci di tur loke tin di haber cu demoño y spiritismo.​—Lesa Deuteronomio 18:10, 11; Echonan 19:19.

Si nos ta stima Jehova, nos no tin nodo di tin miedo di demoño. Pasobra si nos ta studia Dios su Palabra y ta haci loke e ta bisa, nos por opone Diabel y hala cerca Dios, esta, tin un bon relacion cu ne. Y corda cu Jehova ta mas poderoso cu e demoñonan, y den momentonan dificil, e por fortalece nos pa medio di su angelnan.​—Lesa Salmo 34:7; Santiago 4:7, 8.

Pa mas informacion, wak capitulo 10 di e buki aki, Kico Bijbel Ta Siña Realmente?, publica pa Testigonan di Jehova.