Dicon e Scuchador di Oracion Ta Permiti Sufrimento?
Dicon e Scuchador di Oracion Ta Permiti Sufrimento?
ALGUN hende ta haci oracion, pero nan ta duda cu Dios ta existi. Dicon nan ta duda? Podise ta pa motibo di e sufrimento cu tin na mundo. Abo a yega di puntra bo mes dicon Dios ta permiti sufrimento?
Acaso el a crea hende pa nan ta imperfecto y sufri? Lo ta dificil pa respeta un dios cu kier pa hende sufri, no ta berdad? Pensa riba esaki: Supone bo ta admirando un auto nobo nobo, y diripiente bo ta ripara cu e auto tin un deuk. Lo bo asumi cu ta e fabricante a diseña e auto asina? Claro cu no! Mas bien, lo bo pensa cu e auto tabata bon bon ora el a sali di fabrica y cu ta algo otro of un persona a ocasiona e daño.
Awor, na ki conclusion nos ta yega ora nos ta admira e orden y diseño maraviyoso cu tin den naturaleza y alabes ta mira e caos y corupcion cu tin na mundo? Bijbel ta bisa cu Dios a crea e prome pareha humano perfecto pero cu ta nan mes falta cu nan a bira imperfecto. (Deuteronomio 32:4, 5) E bon noticia ta cu Dios a priminti cu lo e drecha e daño aki y cu lo e haci sigur cu hende obediente lo bira perfecto. Pero, dicon e ta warda asina tanto pa haci esey?
Dicon Asina Tanto Tempo?
E contesta pa e pregunta aki tin di haber cu e cuestion tocante ken tin derecho di goberna humanidad. Nunca tabata Jehova su proposito pa hende goberna nan mes. Nan mester obedece e como nan Rey. Bijbel ta bisa: “No ta keda na hende pa dirigi su pasonan.” (Jeremias 10:23) Pero lamentablemente, Adam cu Eva a scoge pa rebela contra e gobernacion di Dios, y e acto di maldad ey a pone cu nan a bira pecador. (1 Juan 3:4) Nan a bira imperfecto y a causa daño na nan mes y na nan yiunan.
Pa miles di aña, Jehova a permiti hende goberna nan mes. Y historia a mustra cu hende no tin e capacidad pa haci esey: Tur gobierno humano ta causa sufrimento. Niun di nan no por caba cu guera, crimen, inhusticia of maleza.
Con Dios Lo Drecha e Daño?
Bijbel ta priminti cu pronto Dios lo trece un mundo nobo, caminda husticia lo reina. (2 Pedro 3:13) Pero ta solamente hende cu ta scoge pa demostra amor na otro y na Dios por biba den e mundo ey.—Deuteronomio 30:15, 16, 19, 20.
Bijbel ta bisa tambe cu durante “e dia di huicio” cu ta acercando rapidamente, Dios lo caba cu sufrimento y cu esnan cu ta causa esaki. (2 Pedro 3:7) Despues, Hesucristo, e Rey cu Dios a nombra, lo goberna riba humanidad obediente. (Daniel 7:13, 14) Kico e gobierno ey lo logra? Bijbel ta bisa: “E humildenan lo hereda e tera, y lo deleita nan mes den paz abundante.”—Salmo 37:11.
Como Rey celestial, Hesus lo elimina maleza, biehes, morto y tur otro daño causa pa e rebelion contra Jehova, “e fuente di bida.” (Salmo 36:9) Hesus lo cura tur hende cu acepta su gobernacion amoroso. Bou di su gobernacion, e siguiente promesanan biblico lo bira realidad:
▪ “Ningun habitante lo no bisa: ‘Mi ta malo’; e pueblo cu ta biba ayanan lo wordo pordona pa nan inikidad.”—Isaias 33:24.
▪ Dios lo “seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas. E cosnan cu tabata pasa antes no t’ey mas.”—Revelacion 21:4.
No ta un consuelo pa sa cu pronto Dios lo cumpli cu su promesa y caba cu sufrimento? Pues, e echo cu e ta permiti sufrimento awor, no mester pone nos pensa cu e no ta scucha nos oracionnan.
Dios ta existi, y e ta scucha bo. E ta tende hasta bo expresionnan di dolor y tristeza. Y e ta ansioso pa e dia yega cu bo por disfruta di un bida liber di tur duda y dolor.
