Ken Ta e Scuchador di Oracion?

SI TIN un Persona cu ta scucha oracion, esey mester ta e Creador. Ken otro por lesa nos pensamentonan cu no ta e Creador, esun cu a crea celebro humano? Ken otro por contesta nos oracionnan y brinda nos e yudansa cu nos tin mester? Pero, kisas bo ta puntra bo mes: ‘Ta sabi pa kere cu ta existi un Creador?’

Hopi hende ta di opinion cu pa kere den un Creador, bo mester nenga evidencia di ciencia moderno. Pero e pensamento cu kere den Dios ta na conflicto cu loke ciencia ta siña, no ta cuadra cu realidad.

▪ Segun un encuesta recien cu nan a haci na 21 di e mihor universidadnan na Merca, un tercera parti so di e 1.646 profesornan di ciencia cu a participa na esaki a scoge e opcion cu ta bisa: “Mi no ta kere den Dios.”

Pues, realidad ta cu hopi cientifico ta kere cu Dios ta existi.

Evidencia Cu Tin un Creador

Acaso nos mester djis acepta cu tin un Scuchador di oracion sin cu nos tin prueba di esaki? Claro cu no. E idea cu fe ta encera kere ciegamente den algo cu bo no por proba ta robes. Bijbel ta defini fe como ‘demostracion cla di realidadnan cu nos no ta mira.’ (Hebreonan 11:1) Pensa riba esaki: Nos no por mira ondanan di radio, pero e echo cu nos por scucha hende papia na radio ta proba claramente cu onda ta existi, pasobra ta e ondanan ta transmiti stem. Di igual manera, aunke nos no por mira Esun cu ta scucha oracion, tin prueba cu ta convence nos cu e ta existi.

Ki prueba nos tin cu Dios ta existi? Nos tin cu djis wak rond di nos. Bijbel ta bisa: “Naturalmente, ta hende a traha tur cas, ma esun cu a traha tur cos ta Dios.” (Hebreonan 3:4) Abo ta di acuerdo cu e rasonamento  logico aki? Si bo para keto y pensa riba e orden cu tin den universo, e manera cu bida a cuminsa of riba e diseño di mas complica na mundo, esta, esun di nos celebro, bo ta yega na e conclusion cu mester tin algo superior na nos. *

Pero creacion no por siña nos tur loke nos mester sa tocante Dios. Ora nos ta contempla evidencia di Dios den creacion ta comosifuera nos ta tende pasonan di un persona cu ta acercando un porta. Nos sa cu tin un hende tras di e porta, pero pa haya sa ta ken, nos mester habri e porta. Di mes manera, pa identifica e Persona tras di creacion, nos tin cu habri un porta.

Cua porta? Bijbel. Si, esaki ta e porta cu ta hiba na conocemento tocante Dios. Ora bo habri e porta ey y analisa algun di su profecianan y nan cumplimento, lo bo haya prueba cu Dios ta existi. * Pero lo bo haya sa mas cu esey, pasobra e relatonan encuanto Dios su trato cu hende ta mustra ki clase di persona e Scuchador di oracion ta.

Ki Clase di Persona e Scuchador di Oracion Ta?

Bijbel ta mustra cu e Scuchador di oracion ta un persona real y cu nos por siña conoc’e. Y esey ta logico, pasobra ta un persona real por scucha y compronde nos. Pesey ta un consuelo pa lesa: “Abo cu ta scucha  oracion, cerca bo tur hende ta bin.” (Salmo 65:2) Si, Esun cu ta scucha oracion ta presta atencion ora hende ta resa na dje cu fe. Y e Persona ey tin un nomber. Bijbel ta bisa: “Jehova ta leu for di hende malbado, pero e ta tende oracion di hende husto.”​—Proverbionan 15:29, NW.

Jehova tin sintimento. E ta “e Dios di amor” y “e Dios feliz.” (2 Corintionan 13:11; 1 Timoteo 1:11) Bijbel ta bisa tambe cu Jehova “tabata tristo den su curason” tempo cu tera tabata pesta cu maldad. (Genesis 6:5, 6) Pesey, e idea cu Dios ta pone hende sufri pa test nan no ta berdad. Bijbel ta bisa: “Leu sea di Dios di haci maldad.” (Job 34:10) Pero, kisas bo ta puntra bo mes: ‘Si e Creador ta todopoderoso, dicon e ta permiti sufrimento?’

Jehova a duna nos boluntad liber, y esey ta mustra nos ki clase di persona e ta. Nos ta contento cu nos tin libertad pa scoge con nos kier biba, no ta berdad? Pero lamentablemente, hopi hende ta haci mal uzo di nan libertad y ta causa hopi sufrimento, pa nan mes y pa otro hende. Awor e pregunta ta: Con Dios lo elimina sufrimento sin kita boluntad liber for di hende? Nos lo haya e contesta den e siguiente articulo.

[Nota]

[Cuadro na pagina 5]

Religion Ta Pone Bo Duda?

Lamentablemente, ta religion ta pone cu hopi hende ta duda cu tin un Dios compasivo cu ta scucha oracion. Hasta hende cu tabata devoto a stop di kere den Dios pa motibo cu religion ta involucra nan mes den guera, terorismo y ta tolera abuso di mucha.

Pero con bin religion ta causa asina tanto problema? E contesta ta masha simpel: Hende malbado ta haci maldad den nomber di religion. Bijbel a profetisa cu algun hende lo haci mal uzo di e fe cristian pa comete tur sorto di maldad. Apostel Pablo a bisa superintendentenan cristian: “For di meymey di boso mes lo lanta hombernan cu lo troce e berdad pa pone e discipelnan bay nan tras.”​—Echonan 20:29, 30.

Dios ta aborece religion falso. De echo, su Palabra, Bijbel, ta mustra cu religion falso ta responsabel pa “sanger . . . di tur esnan cu a ser mata riba tera.” (Revelacion 18:24) Religion falso ta culpabel di sanger pasobra nan no a siña hende e berdad tocante Dios, kende su cualidad principal ta amor.​—1 Juan 4:8.

Esun cu ta scucha oracion ta sinti pa esnan cu a bira victima di religion opresivo. Pronto, su amor lo motiv’e pa laga su Yiu husga tur religion falso. Hesus a bisa: “Hopi hende lo bisa mi riba e dia ey: ‘Señor, Señor, nos no a profetisa den bo nomber?’ . . . Sinembargo, lo mi bisa nan publicamente e ora ey: ‘Mi no conoce boso! Bay for di mi, hacidonan di maldad!’”​—Mateo 7:22, 23.