“Hopi hende lo core pariba pabou, y [“berdadero”, NW] conocemento lo aumenta.”​—DAN. 12:4.

1, 2. (a) Con nos por sa cu Hesus “ta cu” su discipelnan awe y cu lo e “ta cu” nan den futuro? (b) Segun Daniel 12:4, kico lo ta e resultado ora hende studia e Palabra di Dios diligentemente?

BO POR imagina bo con bo bida lo ta den Paradijs? Tur mainta, bo ta lanta fit, yen di animo y sin ningun dolor. Bo no tin ningun problema mas cu salud. Tur bo sentidonan ta funciona perfectamente: Bo no tin niun problema cu bista, oido, olfato, tacto ni cu bo sentido di smaak. Bo ta yen di energia; bo ta gusta bo trabou; bo tin hopi amigo y bo no tin ningun preocupacion mas. Tur esaki ta bendicionnan cu lo bo por disfruta di dje bou di e Reino di Dios. Si, Cristo Hesus, e Rey nombra, lo bendiciona humanidad y lo percura pa tur hende siña tocante Jehova.

² Y Jehova, na su turno, lo yuda su fiel sirbidornan segun cu nan ta siña hende rond mundo tocante dje. De echo, tanto Jehova como su Yiu Hesucristo semper a yuda nos den e trabou di predica. Prome cu Hesus a regresa cielo, el a bisa su fiel discipelnan: “Mi ta cu boso.” Cu e palabranan aki, Hesus a priminti cu lo e sigui yuda su discipelnan. (Lesa Mateo 28:19, 20.) Awor, pa fortalece nos fe den e promesa aki, laga nos trata un profecia cu Daniel a skirbi mas cu 2.500 aña pasa, tempo cu e tabata na Babilonia. Daniel a profetisa cu den nos tempo ‘hopi hende lo core pariba pabou y cu berdadero conocemento lo aumenta.’ (Dan. 12:4) Nos ta compronde cu e expresion “core pariba pabou” den e versiculo aki ta nifica studia diligentemente. Pues, e profecia ta indica cu hende cu ta studia e Scritura diligentemente lo haya berdadero conocemento, esta, conocemento exacto di e Palabra di Dios. Ademas, e profecia ta bisa cu ‘berdadero conocemento lo aumenta.’ Pues, personanan cu haya e conocemento aki lo acept’e y comparti esaki cu otro hende.  Y ta rond mundo hende lo siña e berdadnan aki. Awor, laga nos analisa con e profecia aki a cumpli. Esaki lo fortalece nos fe cu Hesus en berdad ta cu su discipelnan awe y cu Jehova lo cumpli cu tur su promesanan pa futuro.

CRISTIANNAN SINCERO TA HAYA BERDADERO “CONOCEMENTO”

3. Kico a pasa despues cu e apostelnan a muri?

³ Di antemano apostel Pablo a bisa cu “lo lanta hombernan cu lo troce e berdad.” Y e apostasia aki a cuminsa despues di e morto di e apostelnan y a plama manera candela. (Echo. 20:28-30; 2 Tes. 2:1-3) Pa cientos di aña, ni hende cu a yama nan mes cristian no tabatin ‘berdadero conocemento’ di e Scritura. Lidernan religioso tabata pretende cu nan ta kere den e Scritura, pero en realidad nan tabata siña hende “siñansa di demoño”, mentiranan cu ta deshonra Dios. (1 Tim. 4:1) Por ehempel, nan tabata siña hende cu Dios ta parti di un Trinidad, cu alma no ta muri y cu tin alma cu lo kima eternamente den fierno di candela. Pesey, hopi hende no tabata sa e berdad tocante Dios.

4. Con un grupo di cristian den decada 1870 a cuminsa busca e berdad?

⁴ Pero cos a cambia den decada 1870, esta, un 40 aña prome cu “e ultimo dianan” a cuminsa. Durante e tempo ey, un grupo chikito di cristian na Pennsylvania, Merca, tabata bin hunto pa analisa Bijbel diligentemente pa haya ‘berdadero conocemento.’ (2 Tim. 3:1) Nan a yama nan mes Studiantenan di Bijbel. E personanan aki tabata hende humilde cu sinceramente tabata kier haci Dios su boluntad. Nan no tabata e ‘hendenan sabi y intelectual’ di kendenan Hesus a bisa cu berdadero conocemento lo a keda scondi pa nan. (Mat. 11:25) E Studiantenan di Bijbel tabata haci oracion pidi Dios su guia, y nan tabata lesa y analisa e Scritura cuidadosamente y medita profundamente riba loke nan a lesa. Nan tabata compara diferente parti di Beibel cu otro y analisa loke otro hende a skirbi tocante esakinan. Gradualmente, nan a descubri berdadnan cu pa hopi siglo tabata scondi.

5. Cu ki proposito a publica e serie di tratado titula The Old Theology (Teologia di Antaño)?

⁵ E Studiantenan di Bijbel tabata masha contento cu loke nan a siña. Pero nan no a laga e conocemento aki haci nan orguyoso ni nan no a haci comosifuera ta algo nobo nan tabata proclama. (1 Cor. 8:1) Al contrario, nan a publica un serie di tratado titula The Old Theology (Teologia di Antaño). Nan meta tabata pa yuda lectornan compronde berdadnan biblico cu semper tabata registra den Bijbel. E prome tratadonan a yuda hende haya conocemento di Bijbel di manera cu nan por a rechasa “tur tradicion falso” y acepta e “teologia di antaño”, esta, siñansa berdadero cu Hesus y e apostelnan a proclama.​—The Old Theology, num. 1, april 1889, pag. 32.

6, 7. (a) Ki berdadnan Testigonan di Jehova a haya sa desde decada 1870? (b) Kico abo ta contento di a siña?

⁶ No tin duda, desde decada 1870, e Studiantenan di Bijbel, awor Testigonan di Jehova, a haya sa hopi berdad maraviyoso. * No ta trata aki di berdadnan monotono y di nivel academico cu teologonan mester debati riba dje. Nan ta berdadnan fascinante cu ta yuda hende mehora nan calidad di bida y cu ta duna goso y speransa. Nan ta yuda nos conoce nos Dios amoroso, Jehova, y haya sa kico ta su boluntad. Nan ta revela ken Hesus ta, pakico el a bin na tera y muri y kico e ta haciendo awor. Es mas, e  berdadnan precioso aki ta yuda nos compronde dicon Dios ta permiti maldad, dicon nos ta muri, con nos mester haci oracion y kico nos mester haci pa nos por ta berdaderamente feliz.

⁷ Awor nos por compronde profecianan biblico cu pa siglonan tabata “scondi” y cu ta cumpliendo den tempo di fin. (Dan. 12:9) Hopi di e profecianan aki ta registra den e Evangelionan y den e buki di Revelacion. Por ehempel, Jehova a yuda nos haya sa di sucesonan cu nos no por a mira cu nos propio wowonan, manera por ehempel, e coronacion di Hesus, e guera cu tabatin den cielo y cu Satanas a ser benta abou na tera. (Rev. 12:7-12) Ademas, Jehova ta yuda nos compronde nificacion di cosnan cu nos por mira, manera por ehempel guera, temblor, maleza, scarsedad di cuminda y e maldad cu ta haci nos tempo “critico, dificil pa trata cu ne.”​—2 Tim. 3:1-5; Luc. 21:10, 11.

8. Ken nos ta gradici pa e cosnan cu nos a mira y tende?

⁸ Hesus a bisa su discipelnan: “Feliz ta e wowonan cu ta mira loke boso ta mira. Pasobra mi ta bisa boso: Hopi profeta y rey a desea di mira loke boso ta mirando, ma nan no a mira nan, y di tende loke boso ta tendiendo, ma nan no a tende nan.” (Luc. 10:23, 24) Si, di berdad nos ta feliz pasobra Jehova Dios a laga nos mira y compronde e cosnan aki. Ademas, nos ta gradicido cu e ta uza “e ayudante”, esta, su spirito santo, pa yuda nos “compronde e berdad plenamente.” (Lesa Juan 16:7, 13.) Pesey, laga nos semper balora e berdad precioso aki y compartie cu otro hende.

“HOPI” HENDE TA ACEPTA ‘BERDADERO CONOCEMENTO’

9. Ki anuncio a sali den e Toren di Vigilancia di april 1881?

⁹ Na april 1881, un dos aña despues cu e prome edicion di e revista Toren di Vigilancia a ser publica, e revista aki a presenta un articulo cu e tema: “Tin Mester di 1.000 Predicador.” E articulo a anima ‘tur hende cu por a dedica mitar of mas di nan tempo exclusivamente na e trabou di Señor pa bira colporteur’, esta, pionero. E personanan aki mester a bay tur caminda cu nan tabata por pa busca cristiannan sincero, esta, hende cu tabata stima Dios pero cu no tabatin conocemento exacto, y siña nan e berdad tocante Dios y su Palabra.

10. Con hende a reacciona na e yamada pa predicador di tempo completo?

¹⁰ E anuncio di e Studiantenan di Bijbel a indica cu nan a compronde cu e trabou di predica ta masha importante y cu tur cristian berdadero mester cumpli cu esaki. Pero e echo cu nan tabata busca 1.000 predicador a demostra cu nan tabata masha optimista, pasobra, e tempo ey, ta un shen hende so tabata asisti na nan reunionnan. Sinembargo, hopi hende cu a lesa un tratado of revista a realisa cu nan a haya e berdad y tabata cla pa acepta e invitacion. Por ehempel, na aña 1882, un persona na London, Inglatera, kende a lesa un edicion di e Toren di Vigilancia y un foyeto cu e Studiantenan di Bijbel a publica, a skirbi: “Por fabor, siña mi con y kico pa predica pa mi por cumpli cu e trabou bendiciona aki cu ta e boluntad di Dios.”

11, 12. (a) Ki meta e pioneronan tabatin? (b) Con e pioneronan tabata forma “klas”, of congregacion, nobo?

¹¹ Na aña 1885, tabatin mas o menos 300 Studiante di Bijbel sirbiendo como pionero. E sirbidornan di tempo completo aki tabatin e mesun meta cu nos tin awe: haci hende discipel di Hesucristo. Sinembargo, nan manera di haci discipel tabata diferente for di esun di nos. Generalmente, nos ta studia Bijbel cu un persona alabes. Y e ora ey, nos ta invita e  studiante di Bijbel pa asisti na e reunionnan di congregacion. Pero antes, e pioneronan tabata laga buki cerca e personanan y despues tabata invita tur esnan interesa pa bin hunto pa studia Bijbel cu nan. Pues, en bes di studia individualmente cu e personanan, nan tabata forma congregacion, cu e tempo ey nan tabata yama “klas.”

¹² Na 1907, por ehempel, un grupo di pionero a bay un cierto stad pa busca tur persona cu tabatin algun buki di e coleccion di Aurora di Milenio (cu tabata yama tambe Estudio di e Scritura). E Toren di Vigilancia a bisa cu nan ‘a reuni e hendenan interesa aki pa un reunion den cas di un di esnan interesa. Henter un diadomingo, un pionero a papia cu nan tocante e Plan Divino di Epocanan. E siguiente diadomingo, el a encurasha tur esnan presente pa sigui bin reunion tur diadomingo.’ Pero na aña 1911, e rumannan a introduci un otro metodo pa haci discipel. Cincuentiocho superintendente biahero a bishita diferente luga na Merca y na Canada pa duna discurso publico. E rumannan aki tabata tuma nomber y adres di personanan interesa cu a bin scucha e discursonan aki. Despues, nan tabata parti e personanan aki den “klas”, of grupo, nobo cu a cuminsa reuni na diferente cas. Na 1914, tabatin 1.200 congregacion di Studiantenan di Bijbel rond mundo.

13. Dicon bo ta haya e resultadonan di e trabou di predica asombroso?

¹³ Awe, tin mas o menos 895.800 ruman ta sirbi como pionero regular den 109.400 congregacion rond mundo. Actualmente, tin casi ocho miyon hende cu a acepta e berdad y cu ta biba na harmonia cu ‘berdadero conocemento.’ (Lesa Isaias 60:22.) * Esaki ta un logro asombroso, mirando e echo cu Hesus a profetisa cu hopi “hende lo odia” su discipelnan. Ademas, el a bisa cu su siguidornan lo ser persigui, encarcela y hasta mata. (Luc. 21:12-17) Ta berdad cu Satanas y su demoñonan y hopi hende ta purba stop e trabou di predica. Pero a pesar di esey, Jehova su pueblo ta sigui cosecha bon resultado den e trabou di haci discipel. Awe, nan ta predica den “henter e tera habita”: den selvanan tropical te na luganan mas friu, den sero, den desierto, den stad y na luganan caminda tin masha poco hende ta biba. (Mat. 24:14) Sin Jehova su yudansa nan lo no por a haci tur e trabou aki.

‘BERDADERO CONOCEMENTO TA AUMENTA’

14. Con nos literatura a contribui na aumento di ‘berdadero conocemento’?

¹⁴ ‘Berdadero conocemento’ ta sigui aumenta pasobra tin hopi publicador di e  bon noticia. Nos literatura tambe ta contribui na e aumento aki. Na juli 1879, e Studiantenan di Bijbel a publica e prome edicion di e revista aki, cu e tempo ey tabata yama E Toren di Vigilancia di Sion y Anunciante di e Presencia di Cristo. Nan a paga un compania pa imprimi casi 6.000 ehemplar di e edicion ey na Ingles. Charles Taze Russell, kende tabatin 27 aña di edad e tempo ey, a ser scogi como editor di e revista aki. E y cinco otro Studiante di Bijbel experencia tabata skirbi e articulonan. Awe, E Toren di Vigilancia ta ser publica den 195 idioma. Y e ta e revista mas distribui na mundo, cu un circulacion di 42.182.000 di cada edicion. Na di dos luga ta e revista ¡Despertad! cu ta ser publica den 84 idioma y cu tin un circulacion di 41.042.000. Ademas, un 100 miyon buki y Bijbel ta ser imprimi tur aña.

15. Con e imprenta di nos literatura ta ser financia?

¹⁵ E inmenso trabou aki ta ser financia pa medio di donacion boluntario. (Lesa Mateo 10:8.) Esaki ta laga expertonan den e ramo di imprenta babuca, pasobra nan sa cuanto e mashinnan, papel, inkt y otro material di imprenta ta costa. Un ruman homber cu ta cumpra material pa e imprentanan di Betel a bisa: “Empresarionan cu bishita nos imprentanan ta keda masha asombra cu nos por produci asina tanto literatura cu mashinnan asina moderno pa medio di donacion boluntario. Ademas, nan ta keda asombra cu tin asina tanto trahador jong y feliz na Betel.”

CONOCEMENTO DI DIOS LO YENA TERA

16. Cu ki proposito ‘berdadero conocemento’ ta aumenta?

¹⁶ ‘Berdadero conocemento’ ta aumenta pa un bon proposito. Dios su boluntad ta pa “tur sorto di hende ser salba y yega na un conocemento exacto di e berdad.” (1 Tim. 2:3, 4) Si, Jehova kier pa hende haya sa e berdad pa nan por ador’e na e manera corecto y ricibi su bendicion. Y pa medio di e trabou di predica, Jehova a percura pa hende haya ‘berdadero conocemento.’ Di e manera ey, el a reuni primeramente e grupo fiel di rumannan ungi. Awor, for di “tur nacion, tribu, pueblo y idioma”, e ta reuniendo “un multitud grandi” cu tin e speransa di biba pa semper riba tera.​—Rev. 7:9.

17. Kico e aumento di adorador berdadero ta indica?

¹⁷ E aumento di adorador berdadero durante e ultimo 130 añanan aki ta prueba concreto cu Dios y su Rey nombra, Hesucristo, ta cu Jehova su sirbidornan riba tera. Den ki sentido? Wel, nan ta guia, proteha, organisa y educa nan. Asina Jehova ta cumpli cu su promesa di yuda hopi hende haya e berdad. Pues, nos por tin sigur cu lo e cumpli tambe cu su promesanan pa futuro. Si, “tera lo ta yen di e conocemento di SEÑOR, manera awa ta tapa lama.” (Isa. 11:9) Bo por imagina bo tur e bendicionnan cu humanidad lo ricibi e tempo ey?

[Nota]

[Preguntanan di Estudio]

[Plachi na pagina 14]

E Studiantenan di Bijbel tabata hende humilde cu sinceramente tabata kier haci Dios su boluntad

[Plachi na pagina 15]

Jehova ta balora boso esfuerso pa plama ‘berdadero conocemento’ di Dios