“Para firme contra e trampanan di Diabel.”​—EFE. 6:11.

1, 2. (a) Dicon Satanas no tin compasion cu cristiannan ungi ni cu e ‘otro carnenan’? (b) Cua dos trampa di Satanas nos lo analisa den e articulo aki?

SATANAS E DIABEL no tin compasion cu hende, y pio cu sirbidornan di Jehova. De echo, e tin un guera contra e cristiannan ungi cu ainda ta riba tera. (Rev. 12:17) Pero cu curashi e cristiannan aki ta sigui dirigi e trabou di predica e Reino y ta laga hende sa cu ta Satanas ta goberna e mundo aki. Diabel ta odia e ‘otro carnenan’ tambe, kendenan ta sostene e unginan y tin e speransa di haya bida eterno. (Juan 10:16) Satanas si no tin e speransa di biba pa semper mas, pesey mes e ta yen di rabia. Pues, sea cu nos ta ungi of miembro di e otro carnenan, Satanas no tin nos bienestar na pecho. Mas bien, e kier haci nos su victima.​—1 Ped. 5:8.

² Y pa logra su meta, e ta pone varios trampa pa nos. Tin algun persona cu el ‘a ciega nan mente’ pa nan no acepta e bon noticia y asina reconoce su trampanan. Pero lamentablemente, hasta algun hende cu a acepta e bon noticia ta cay den trampa di Diabel. (2 Cor. 4:3, 4) E articulo anterior a mustra con nos por evita tres trampa di Satanas. Nan ta: (1) e custumber di papia sin pensa, (2) miedo di hende y presion di otronan y (3) sintimento di culpa innecesario. Laga nos wak awor con nos por para firme contra dos otro trampa di Satanas​—materialismo y adulterio.

MATERIALISMO​—UN TRAMPA CU TA STIK HENDE

3, 4. Dicon inkietud di e era aki por hiba na materialismo?

³ Den un di su ilustracionnan, Hesus a papia di simia cu a ser sembra den sumpiña. El a splica cu un hende kisas ta tende e palabra, “ma e inkietud di e era aki y e poder engañoso di rikesa ta stik e palabra, y e [hende ey] no ta duna fruta.” (Mat. 13:22) Si, materialismo ta un trampa di nos enemigo, Satanas.

⁴ Ripara cu ta un combinacion di dos factor ta stik e palabra. Un di nan ta “e inkietud di e era aki.” Den ‘e ultimo dianan critico y dificil pa trata cu ne’ aki, hende tin hopi inkietud. (2 Tim. 3:1) Costo di bida ta subi, hopi hende ta sin trabou y kisas ta dificil pa bo percura pa bo pan di cada dia. Of podise bo ta preocupa tocante futuro y ta puntra bo mes: ‘Lo mi tin suficiente entrada ora mi baha cu pensioen?’ E inkietudnan aki ta pone algun hende core tras di placa, pensando cu placa lo duna nan un sentido di siguridad.

5. Dicon e ‘poder di rikesa’ ta engañoso?

⁵ E otro factor cu Hesus a menciona ta “e poder engañoso di rikesa.” E factor aki hunto cu inkietud por stik e palabra. Ta berdad cu Bijbel ta bisa cu “placa ta proteccion.” (Ecl. 7:12) Pero no ta sabi pa core tras di placa. Hopi hende a realisa cu mas nan lucha pa bira rico, mas nan keda atrapa den e trampa di materialismo. Algun a hasta bira esclavo di rikesa.​—Mat. 6:24.

6, 7. (a) Ki ora bo trabou por bira un trampa di materialismo? (b) Kico un cristian mester tene cuenta cu ne ora e haya oferta pa traha overtime?

⁶ E deseo pa bira rico por lanta den nos sin cu nos ta realisa esey. Supone cu bo doño di trabou ta acerca bo y bisa bo: “Mi tin bon noticia pa bo! Nos compania a caba di cera un contract pa un trabou grandi. Esaki ta nifica cu e siguiente lunanan, nos tin cu traha hopi overtime. Pero mi ta garantisa bo cu e pago lo ta masha bon mes. Pues, ta bale la pena!” Con lo bo reacciona riba e oferta ey? Ta berdad cu bo tin cu percura materialmente pa bo famia. Pero corda cu esey no ta bo unico responsabilidad. (1 Tim. 5:8) Tin varios otro cos cu bo mester tene cuenta cu ne. Por ehempel, cuanto overtime bo mester traha? Bo trabou lo stroba bo di sirbi Jehova? Lo e stroba bo por ehempel di asisti na bo reunionnan di congregacion y di tene bo Adoracion Como Famia?

⁷ Ora di tuma decision, kico mester ta mas importante? Gana poco placa extra of bo relacion cu Jehova? Lo bo stop di pone e Reino na prome luga pa bo gana mas placa? Bo ta mira con facil bo por cay den e trampa di materialismo si bo ta neglisha bo relacion cu Jehova, esta, bo spiritualidad, y esun di bo famia? Si actualmente bo ta den un situacion asina, con bo por para firme y evita cu materialismo ta bira un trampa pa bo?​—Lesa 1 Timoteo 6:9, 10.

8. Ki ehempelnan biblico por yuda nos analisa nos estilo di bida?

⁸ Pa evita cu deseo pa cos material ta stik bo, analisa bo estilo di bida regularmente. Nunca bira manera Esau, kende a desprecia cosnan spiritual. (Gen. 25:34; Heb. 12:16) No sea tampoco manera e homber rico cu Hesus a anima pa bende su propiedadnan, duna e placa na hende pober y siguie. En bes di haci esey, e homber a “bay tur tristo, pasobra e tabatin hopi propiedad.” (Mat. 19:21, 22) Su rikesa tabatin e asina ciega cu el a perde un privilegio masha grandi, esta, e oportunidad di sigui e homber di mas importante cu a yega di biba riba tera. Pesey, nos mester tene cuidou pa nos no perde e privilegio di ser discipel di Hesucristo.

9, 10. Kico ta Bijbel su punto di bista di cos material?

⁹ Si nos no kier cay den e trampa di materialismo, nos tin cu sigui e conseho di Hesus, cu ta bisa: “No sea nunca ansha y puntra: ‘Kico nos lo come?’ of: ‘Kico nos lo bebe?’ of: ‘Kico nos lo bisti?’ Pasobra tur e cosnan aki ta loke e nacionnan ta core tras di dje. Ma boso Tata celestial sa cu boso tin mester di tur e cosnan aki.”​—Mat. 6:31, 32; Luc. 21:34, 35.

¹⁰ Pa nos no bira victima di e poder engañoso di rikesa, nos mester tin e mesun pensamento cu Agur, un escritor di Bijbel. El a bisa: “No duna mi ni pobreza ni rikesa​—duna mi solamente mi pan di cada dia.” (Pro. 30:8) Ta bisto anto cu Agur a reconoce e balor di placa y cu e tabata consciente di e poder engañoso di rikesa. Di igual manera, nos mester realisa cu e inkietud di e era aki y e poder engañoso di rikesa por ruina nos spiritualidad. Si nos ta preocupa indebidamente cu cos material, esey por caba cu nos energia, pone nos perde tempo y keda cu poco of sin niun motivacion pa sigui tras di interesnan di Reino. Pesey, sea determina pa nunca laga Satanas gara nos den su trampa di materialismo.​—Lesa Hebreonan 13:5.

ADULTERIO​—UN TRAMPA BON SCONDI

11, 12. Con un cristian por cay den e trampa di adulterio na trabou?

¹¹ Jaagdonan cu kier gara un bestia grandi tin biaha ta coba un buraco caminda nan sa cu e bestia ta pasa hopi biaha. Generalmente, nan ta tapa e buraco cu palo y tira tera riba dje. Satanas tin un trampa similar: inmoralidad sexual. Esey ta un di e trampanan cu e tin mas exito cu ne. (Pro. 22:14; 23:27) Algun cristian a cay den e trampa aki pasobra nan a hinca nan mes den situacionnan cu facilmente ta hiba na inmoralidad. Por ehempel, algun di nan a comete adulterio pasobra nan tabatin un relacion inapropia cu un persona cu no ta nan casa.

¹² Tin biaha, relacion romantico inapropia ta cuminsa na trabou. Segun un estudio, mas cu cincuenta porciento di hende muher y casi tres di cada cuater homber cu comete adulterio a haci esaki cu un colega di trabou. Abo sa haya bo constantemente den contacto cu e sexo opuesto na bo trabou? Si ta asina, ki clase di relacion bo tin cu nan? Bo ta mantene cierto distancia pa mustra cu ta un relacion di trabou so bo kier tin y nada mas? Ata aki algun ehempel: Un ruman muher ta combersa regularmente cu un homber cu e ta traha cu ne. E ta cera asina tanto cu ne cu e ta hasta cuminsa cont’e su problemanan matrimonial. Un ruman homber ta bira bon amigo cu un mucha muher na su trabou. Pensando riba e mucha muher ey, e ta bisa: “E si ta balora mi opinion y ta scucha atentamente ora mi ta papia cu ne. E ta respeta mi. Mare mi casa tabata asina!” Bo ta mira e peliger cu e cristiannan aki ta den? Nan a hinca nan mes den un situacion cu facilmente por hiba na adulterio.

13. Con un relacion romantico inapropia por desaroya den congregacion?

¹³ Un relacion romantico inapropia por desaroya den congregacion tambe. Wak por ehempel kico a pasa cu Daniel y su casa Sara. * Nan tur dos tabata pionero regular. Daniel a admiti cu e tabata un anciano cu nunca ta bisa no; semper e tabata cla pa acepta tur asignacion cu e haya den congregacion. Ademas, e tabatin cinco estudio di Bijbel. Tres di nan a batisa. E ruman hombernan recien batisa aki tabatin mester di basta yudansa. Pero debi cu Daniel tabata ocupa cu varios asignacion teocratico, hopi bes ta Sara tabata yuda nan. A bira un custumber cu e tabata yuda nan tambe cu nan problemanan emocional. Di otro banda, ora Sara tabatin mester di atencion, nan tambe tabata dun’e. E situacion aki a bira un trampa fatal. Daniel a bisa: ‘Debi cu mi casa pa lunanan largo a uza tur su energia pa yuda otro hende, e mes a bira spiritualmente y emocionalmente debil. Esaki y e echo cu mi no tabatin tempo p’e a pone cu el a comete adulterio cu un di e hombernan cu mi a studia cu ne. Mi tabata asina ocupa cu mi privilegionan den congregacion cu mi no a realisa mes cu mi esposa a bira spiritualmente debil.’ Con bo por evita un tragedia asina?

14, 15. Con cristiannan casa por evita di cay den e trampa di adulterio?

¹⁴ Pa evita di cay den e trampa di adulterio, nos mester pensa profundamente riba e nificacion di compromiso matrimonial. Hesus a bisa: “No laga ningun hende separa loke Dios a uni bou di un yugo.” (Mat. 19:6) Nunca pensa cu bo responsabilidadnan den congregacion ta mas importante cu bo casa. Es mas, si constantemente bo ta laga bo casa su so pa bo atende cosnan di menos importancia, esey por afecta boso relacion, y esaki na su turno por hiba na tentacion y posiblemente na pica serio.

¹⁵ Awor kico si bo ta un anciano? Ta claro cu bo mester cuida e tou. Apostel Pedro a skirbi: “Pastorea e tou di Dios cu ta bou di boso cuido, no obliga, sino di buena gana; no pa amor pa ganashi deshonesto, sino cu entusiasmo.” (1 Ped. 5:2) Si, un anciano no mester neglisha e miembronan di congregacion. Sinembargo, bo responsabilidad como wardado no mester bay a costo di bo responsabilidad como esposo. No tin ningun sentido pa dedica tur bo atencion pa fortalece e congregacion mientras cu bo casa mes ta birando debil. Daniel, e ruman cu nos a menciona anteriormente, a bisa: ‘Nunca nos mester ta asina ocupa cu nos ta neglisha nos famia.’

16, 17. (a) Kico ta algun cos practico cu cristiannan casa por haci na trabou pa laga otronan sa cu nan no ta interesa den un relacion romantico? (b) Menciona un articulo cu e esclavo fiel a publica cu por yuda cristiannan keda leu di e trampa di adulterio.

¹⁶ Tanto E Toren di Vigilancia como ¡Despertad! a publica diferente articulo cu ta contene bon conseho cu ta yuda nos evita di cay den e trampa di adulterio. Por ehempel, E Toren di Vigilancia di 15 di september 2006 a duna e siguiente conseho: ‘Ora bo ta na trabou of na otro luga, evita situacionnan cu por pone bo bira intimo cu un persona cu no ta bo casa. Por ehempel, si bo ta traha overtime den estrecho compania di un persona di e sexo opuesto, esaki por hiba na tentacion. Pero como un persona casa, bo manera di papia y bo comportacion mester mustra bon cla cu bo no ta disponibel pa ningun relacion romantico. Es mas, siendo un persona devoto na Dios, bo no mester flirt ni bisti na un manera inmodera pa hala atencion na bo mes. Ta bon pa pone potretnan di bo casa y di bo yiunan na bo trabou. Nan ta sirbi como recordatorio, tanto pa bo mes como pa otro hende, cu bo famia ta importante pa bo. Sea determina pa nunca stimula​—ni sikiera tolera​—proposicion romantico.’

¹⁷ E ¡Despertad! di april 2009 a publica un articulo titula “Kico Fieldad den Matrimonio Ta Encera Realmente?” E articulo ta mustra cu hende cu tin fantasianan sexual cu hende cu no ta nan casa tin mas chens di comete adulterio. (Sant. 1:14, 15) Si bo ta casa, ta sabi pa de bes en cuando repasa articulonan asina hunto cu bo casa. Ta Jehova a institui matrimonio, y e ta algo sagrado. Pues, ora bo ta traha tempo pa papia cu bo casa tocante boso matrimonio, bo ta demostra cu bo ta balora cosnan sagrado.​—Gen. 2:21-24.

18, 19. (a) Kico ta e consecuencianan di adulterio? (b) Kico ta e beneficionan di keda fiel na bo casa?

¹⁸ Awor, kico si bo haya bo cu e tentacion pa cuminsa un relacion romantico inapropia? Medita riba e daño cu fornicacion y adulterio ta causa. (Pro. 7:22, 23; Gal. 6:7) Personanan cu ta comete inmoralidad sexual ta desagrada Jehova, ta haci daño na nan casa y na nan mes. (Lesa Malakias 2:13, 14.) Pensa tambe riba e bendicionnan cu lo bo ricibi si bo keda moralmente limpi: Bo por tin speransa di biba pa semper den futuro, y for di aworaki, bo por disfruta di un mihor bida y un bon consenshi.​—Lesa Proverbionan 3:1, 2.

¹⁹ E salmista a canta: “Esnan cu ta stima [Dios su] ley tin gran paz, y nada no ta haci nan trompica.” (Sal. 119:165) Pues, stima e berdad y ‘paga bon tino pa e manera cu bo ta cana den e tempo malo aki no ta manera hende imprudente sino manera hende sabi.’ (Efe. 5:15, 16) Corda cu aunke Satanas ta pone hopi trampa pa e por gara Dios su adoradornan berdadero, nos no tin nodo di cay den su trampanan. Jehova a percura tur loke nos mester pa por “para firme” y “paga tur e flechanan cendi di e Malbado”!​—Efe. 6:11, 16.

[Nota]

[Preguntanan di Estudio]

 [Plachi na pagina 29]

Materialismo por stik hende den sentido spiritual. No laga esey pasa cu bo

 [Plachi na pagina 32]

Si bo ta flirt of ta permiti hende flirt cu bo, esey por hiba na adulterio