“Scapa for di e trampa di Diabel.”​—2 TIM. 2:26.

1, 2. Cua trampanan di Diabel nos lo trata den e articulo aki?

DIABEL ta busca tur manera pa coge sirbidornan di Jehova den trampa. Pero su intencion no necesariamente ta pa caba cu nan manera un jaagdo cu ta mata bestia. Su meta principal ta pa gara su victimanan bibo pa e haci cu nan manera e kier.​—Lesa 2 Timoteo 2:24-26.

² Un jaagdo por uza varios trampa pa gara un bestia bibo. Podise e ta trata di laga e bestia sali for di su luga di sconde pa e por gar’e cu un las. Of kisas e ta pone un trampa pa coge e bestia di sorpresa. Satanas ta uza trampanan similar pa gara sirbidornan di Jehova. Si nos no kier cay den su gara, nos mester ta alerta y haci caso di e spiertamentonan cu ta yuda nos identifica su trampanan. Den e articulo aki nos lo trata tres trampa cu Diabel tin exito cu ne. Nan ta: (1) e custumber di papia sin pensa, (2) miedo di hende y presion di otronan y (3) sintimento di culpa innecesario. Nos lo mira tambe con nos por evita e trampanan aki. E siguiente articulo lo trata dos trampa mas cu Satanas ta uza.

NO PAPIA SIN PENSA

3, 4. Kico por sosode si nos no controla nos lenga? Duna un ehempel.

³ Por lo general, bestia ta safe den mondi. Pesey, pa saca algun bestia for di mondi​—nan luga di sconde​—un jaagdo kisas ta cende parti di e mondi na candela di manera cu e por gara e bestianan cu ta purba di scapa. Den sentido figurativo, Diabel ta uza e mesun strategia ey: E kier cende e congregacion cristian na candela pa asina pone algun miembro di congregacion core sali for di nan refugio sigur y cay den su gara. Awor con nos por ta colaborando cu ne, cu otro palabra, ta den su gara, sin cu nos sa?

 ⁴ Discipel Santiago a compara nos lenga cu candela. (Lesa Santiago 3:6-8.) Pesey, si nos no controla nos lenga, nos por cende nos congregacion na candela. Con esey por sosode? Ata aki un ehempel: Na reunion di congregacion, nan ta anuncia cu un ruman muher a bira pionero regular. Despues di reunion, dos ruman muher ta comenta riba e anuncio. Un di nan ta bisa cu e ta contento cu e ruman a bira pionero y cu e ta desea pa tur cos bay bon cu e ruman. Pero e otro ta cuestiona e motibonan di e ruman y ta insinua cu el a bira pionero djis pa e ta importante. Cua di e publicadornan aki lo bo kier como amiga? No ta dificil pa saca afo cua di nan lo por cende e congregacion na candela.

5. Kico nos mester haci pa no uza nos lenga manera candela?

⁵ Awor, con nos por evita di uza nos lenga manera candela? Hesus a bisa: “Loke curason ta yen di dje, boca ta papia.” (Mat. 12:34) Pues, e prome cos cu nos tin cu haci ta samina nos curason. Nos ta haci esfuerso pa evita sintimentonan negativo cu por pone nos papia malo di otro hende? Supone cu bo a tende cu un ruman homber ta haciendo su best pa progresa den congregacion. Bo ta pensa mesora cu e ta trahando duro pa haci Jehova su curason contento, of bo ta pensa cu e ta hacie pa puro egoismo? Si mayoria di biaha bo ta reacciona na un manera sarcastico, corda cu Diabel tambe a cuestiona e motibonan di Dios su fiel sirbidor Job. (Job 1:9-11) Pesey, en bes di cuestiona e motibonan di nos rumannan, ta bon pa nos para keto y puntra nos mes ta dicon nos ta pensa malo di nan. Realmente nos tin bon motibo pa critica nos rumannan? Of ta e spirito di mundo cu ta reina durante e ultimo dianan aki ta influencia nos?​—2 Tim. 3:1-4.

6, 7. (a) Kico ta algun motibo cu nos lo por tin pa critica otro hende? (b) Con nos mester reacciona ora hende insulta nos?

⁶ Ki otro motibo nos lo por tin pa critica otro hende? Kisas, nos kier sobresali riba otronan. Pesey, podise nos ta critica nan pa duna e impresion cu nos ta mihor cu nan. Of podise esey ta un manera pa nos sconde e echo cu nos no a cumpli cu loke nos mester a haci. Sea cu ta orguyo, envidia of insiguridad ta pone cu nos ta critica otro hende, esaki semper tin un resultado negativo.

⁷ Kisas nos ta pensa cu nos tin bon motibo pa critica un persona. Podise el a yega di papia malo di nos. Si ta asina mes, paga malo cu malo no ta e solucion pasobra esey lo ta mescos cu basha gasolin riba candela. Ta pio so e situacion lo bira, net loke  Diabel kier. (2 Tim. 2:26) Na luga di haci esey, nos mester haci loke Dios kier. Pues, nos tin cu imita Hesus. Ora nan tabata insulta Hesus, “e no a insulta bek”; mas bien, el a “laga su mes na encargo di esun cu ta husga cu husticia.” (1 Ped. 2:21-23) Hesus tabatin confianza cu Jehova lo a resolve e asunto, na Su manera y na e debido tempo. Nos tambe mester tin e mesun confianza ey. Ora nos ta papia cosnan edificante, nos ta yuda mantene “paz” y “union” den congregacion.​—Lesa Efesionan 4:1-3.

NO LAGA MIEDO DI HENDE NI PRESION DI OTRONAN SER UN TRAMPA PA BO

8, 9. Dicon Pilato a laga mata Hesus?

⁸ Ora un bestia cay den trampa, e no tin libertad mas pa bay unda cu e kier. Di mes manera, si un persona sucumbi na miedo y presion, e ta perde un grado di su libertad. (Lesa Proverbionan 29:25.) Laga nos trata dos ehempel di hende cu a sucumbi na presion y miedo di hende, y wak kico nos por siña for di nan experencia.

⁹ E gobernador Romano Poncio Pilato tabata sa cu Hesus tabata inocente, y aparentemente e no tabata kier hacie daño. De echo, el a bisa cu Hesus “no a haci nada cu merece morto.” Toch, el a conden’e na morto. Dicon? Pasobra Pilato a sucumbi na presion di e multitud. (Luc. 23:15, 21-25) Nan tabata grita: “Si bo laga e homber aki den libertad, bo no ta amigo di Cesar.” Asina nan a pone presion riba dje pa e haci loke nan tabata kier. (Juan 19:12) Podise Pilato tabatin miedo di perde su puesto of hasta su bida, pesey e no laga Cristo den libertad. Pues, el a sucumbi na presion di e multitud y a haci precies loke Diabel tabata kier.

10. Kico a pone cu Pedro a nenga Cristo?

¹⁰ Apostel Pedro tabata un di Hesus su mihor amigonan. El a declara publicamente cu Hesus tabata e Mesias. (Mat. 16:16) Ora algun discipel di Hesus a bandon’e pasobra nan no a compronde algo cu el a bisa, Pedro si a keda leal na dje. (Juan 6:66-69) Y ora Hesus su enemigonan a bin arest’e, Pedro a uza spada pa defende su Maestro. (Juan 18:10, 11) Pero, mas despues, miedo di hende a pone Pedro hasta nenga cu e conoce Hesucristo. Pa un rato, e apostel aki a cay den trampa di Satanas; el a laga miedo di hende strob’e di actua cu curashi y keda leal na Hesus.​—Mat. 26:74, 75.

11. Ki clase di presion nos mester resisti?

¹¹ Como cristian, nos mester resisti e presion pa haci loke ta desagrada Dios. Podise nos doño di trabou of otro hende ta presiona nos pa ta deshonesto of pa comete inmoralidad sexual. Na scol, hobennan ta haya nan cu presion di otronan pa spiek, wak pornografia, huma, uza droga, bebe alcohol of comete inmoralidad sexual. Con nos por evita cu miedo di hende of presion pa haci loke ta desagrada Jehova ta bira un trampa pa nos?

12. Ki les nos por siña for di e ehempel di Pilato y di Pedro?

¹² Kico nos por a siña for di e ehempel di Pilato y di Pedro? Pilato no tabata sa hopi di Hesucristo, pero e tabata sa si cu Hesus tabata inocente y cu e no tabata cualkier persona. Pero falta di humildad y amor pa e Dios berdadero a pone cu Pilato a bira victima facil di Diabel. Di otro banda, Pedro tabatin tanto conocemento exacto como amor pa Dios. Pero na algun ocasion Pedro no tabata modesto, e tabatin miedo di hende y a sucumbi na presion. Prome cu nan a aresta Hesus, Pedro a broma: “Hasta si tur e otronan trompica, ami si lo no trompica.” (Mar. 14:29) Pedro lo tabata mihor prepara pa e pruebanan cu el a confronta despues si el a confia den Jehova mescos cu e salmista kende a canta: “SEÑOR ta cu mi; lo mi no tin miedo; kico hende por haci mi?” (Sal. 118:6) Riba Hesus su ultimo anochi riba tera, el a bay cu Pedro y  dos otro apostel den e hofi di Getsemani y a bisa nan pa keda alerta. Pero, en bes di keda vigila, Pedro y su compañeronan a pega soño. Hesus a lanta nan y a bisa nan: “Keda vigila y haci oracion pa boso no cay den tentacion.” (Mar. 14:38) Pero Pedro a bolbe pega soño, y mas despues el a laga miedo y presion di hende domin’e.

13. Con nos por resisti presion pa haci loke ta malo?

¹³ E ehempel di Pilato y di Pedro por siña nos un otro les importante: Pa nos por resisti presion y no sucumbi na miedo di hende, nos mester di conocemento exacto di e berdad, humildad, modestia, amor y temor di Jehova. Si nos fe ta basa riba conocemento exacto, nos lo tin curashi pa papia cu conviccion di nos creencianan. Esaki lo yuda nos resisti presion y vence miedo di hende. Ta claro cu nunca nos no mester tin demasiado confianza den nos mes. Mas bien, nos mester reconoce humildemente cu nos mester di Dios su forsa pa por resisti presion; nos mester resa pidi Jehova su spirito santo y laga nos amor pa Dios motiva nos pa tene su nomber na halto y cumpli cu su rekisitonan. Es mas, nos mester prepara nos mes pa resisti cualkier tentacion cu nos por haya nos cu ne. Mayornan, por ehempel, mester haci oracion cu nan yiunan y prepara nan pa nan por sa con pa reacciona ora nan pareunan presiona nan pa haci loke ta malo.​—2 Cor. 13:7. *

NO LAGA SINTIMENTO DI CULPA SIGUI TORMENTA BO

14. Con Satanas kier pa nos pensa di nos erornan di pasado?

¹⁴ Tin biaha, jaagdonan ta mara un troncon pisa of un baranca na un liña y colg’e na un palo cu ta riba e caminda cu e bestianan cu nan kier coge den trampa ta frecuenta. E jaagdo ta pone e resto di e liña abou caminda e bestianan tin cu pasa di manera cu si un di nan mishi cu e liña, e troncon of baranca ta cay riba dje y plach’e. Nos por compara sintimento di culpa innecesario cu e troncon of piedra pisa cu ta placha un bestia. Pesey, si constantemente nos ta laga erornan di pasado tormenta nos, nos por sinti nos “masha kibra.” (Lesa Salmo 38:3-5, 8.) Ta Satanas kier pa nos pensa cu nos erornan ta asina grave cu Jehova lo no mustra misericordia na nos y cu nos no por cumpli cu Su mandamentonan.

15, 16. Con nos por evita cu nos erornan di pasado ta sigui tormenta nos?

¹⁵ Con nos por evita di cay den e trampa aki cu ta kibra nos asina tanto? Wel, si bo a comete un pica grave, haci esfuerso mesora pa bo drecha bo relacion cu Jehova. Acerca e ancianonan pa yudansa. (Sant. 5:14-16) Haci loke bo por pa corigi bo eror. (2 Cor. 7:11) Si bo haya disciplina, no desanima, pasobra disciplina ta un prueba di Jehova su amor pa bo. (Heb. 12:6) Haci bo maximo esfuerso pa nunca mas bo comete e pica ey. Pues, evita tur loke a hiba na esey. Unabes cu bo a arepenti y ta haciendo esfuerso atrobe pa haci loke ta agrada Dios, bo por tin fe cu pa medio di e sacrificio di rescate di Hesus bo picanan a ser pordona y lubida.​—1 Juan 4:9, 14.

¹⁶ No obstante, algun ruman ta sigui sinti nan malo pa motibo di picanan pa cual nan a haya pordon caba. Si esey ta bo caso, corda cu Jehova a pordona Pedro y e otro apostelnan pa e echo cu nan a bandona su Yiu stima na e momento cu mas e tabatin mester di nan. Hasta un homber cu a ser expulsa for di e congregacion di Corinto pa motibo di inmoralidad grosero pero cu despues a arepenti a haya pordon di Jehova.  (1 Cor. 5:1-5; 2 Cor. 2:6-8) Si, den e Palabra di Dios, nos ta lesa di diferente persona cu a comete pica grave pero cu a ricibi pordon di Dios despues cu nan a arepenti.​—2 Cro. 33:2, 10-13; 1 Cor. 6:9-11.

17. Kico e rescate por haci pa nos?

¹⁷ Si bo a arepenti di curason y ta acepta Jehova su misericordia, lo e pordona y lubida bo erornan di pasado. Nunca pensa cu e sacrificio di rescate di Hesus no ta suficiente pa Jehova pordona bo picanan. Si bo ta pensa asina, bo a cay den un di e trampanan di Satanas. Ni maske kico Diabel kier pa bo kere, e sacrificio di rescate ta suficiente pa cubri pica di tur esnan cu a peca y cu a arepenti. (Pro. 24:16) Fe den e sacrificio di rescate por libra bo di e peso cu sintimento di culpa innecesario ta pone riba hende y duna bo e forsa pa sirbi Dios cu henter bo curason, mente y alma.​—Mat. 22:37.

E TRAMPANAN DI SATANAS NO TA DESCONOCI PA NOS

18. Con nos por evita di cay den trampa di Diabel?

¹⁸ Pa Satanas, no ta importante den cua trampa nos cay, basta e tin nos den su gara pa nos haci loke e kier. Pero como cu su trampanan no ta desconoci pa nos, nos no tin nodo di bira su victima. (2 Cor. 2:10, 11) Anto si nos ta resa pidi Dios sabiduria pa sa con pa trata cu prueba, nos lo no cay den Satanas su trampanan. Discipel Santiago a skirbi: “Si un di boso falta sabiduria, lag’e sigui pidi Dios, y lo e dun’e esaki, pasobra e ta duna tur hende generosamente, sin tira na nan cara.” (Sant. 1:5) Pa nos por haya e sabiduria ey, nos mester obra na harmonia cu nos oracion, studia Bijbel regularmente y biba na harmonia cu principionan biblico. E publicacionnan cu e esclavo fiel y prudente a percura pa nos ta siña nos identifica e trampanan di Diabel y yuda nos evita esakinan.

19, 20. Dicon nos mester odia loke ta malo?

¹⁹ Oracion y estudio di Bijbel ta yuda nos stima loke ta bon. Pero ta importante tambe pa nos siña odia loke ta malo. (Sal. 97:10) Ademas, si nos ta medita riba e consecuencianan di deseo egoista, nos lo no cumpli cu e deseonan ey. (Sant. 1:14, 15) Ora nos siña odia loke ta malo y di berdad ta stima loke ta bon, e as cu Satanas ta pone den su trampanan ta duna nos asco y lo no atrae nos.

²⁰ Nos ta masha gradicido cu Jehova ta yuda nos pa nos no cay den trampa di Satanas. Jehova ta uza su spirito santo, Bijbel y su organisacion pa libra nos “di e Malbado.” (Mat. 6:13) Den e siguiente articulo, nos lo siña con pa evita dos trampa mas cu Diabel ta uza pa gara sirbidornan di Dios.

[Nota]

[Preguntanan di Estudio]

[Plachi na pagina 24]

Ora nos ta papia sin pensa, nos por causa problema den congregacion

[Plachi na pagina 27]

Libra bo di e peso di sintimento di culpa innecesario