Tin un Scuchador di Oracion?

“Antes, mi tabata duda cu Dios ta existi. Pero toch tabatin biaha cu mi tabata haci oracion. Aunke mi no tabatin sigur cu tin un persona ta scucha mi, den mi curason mi tabata desea esey. Mi tabata infeliz y sin ningun proposito den bida. Mi tabatin miedo di kere den Dios pasobra mi tabata pensa cu ta hende debil so ta kere den Dios.”​—PATRICIA, * IRLANDA.

ABO ta pensa mescos cu Patricia? Bo ta haci oracion aunke bo ta duda cu Dios ta existi? Si ta asina, bo no ta e unico.

▪ Un encuesta cu nan a realisa bou di 2.200 Britanico a mustra cu ta 22 porciento di e personanan aki so ta kere cu ta existi un Creador cu ta scucha oracion. Sinembargo, 55 porciento a admiti cu nan sa haci oracion de bes en cuando.

▪ Un encuesta cu nan a haci bou di 10.000 persona procedente di cuater continente a mustra cu casi 30 porciento di esnan cu ta considera nan mes ateista ta haci oracion.

Dicon Hende Ta Duda?

Un homber di Inglatera cu yama Allan ta splica dicon antes e tabata bisa cu e no ta kere den Dios: “Mi tabata pensa cu hende a bin cu religion djis pa tene otro bou di control y pa gana placa. Ademas, mi tabata bisa: ‘Si Dios ta existi, lo no tabatin asina tanto inhusticia.’ Asina mes, tabatin biaha cu mi tabata sinta na un luga trankil y papia cu ‘algo.’ Mi tabata puntra mi mes, ‘Kico ta e proposito di bida?’”

Naturalmente, tin varios motibo pakico hende ta duda cu tin un persona cu ta contesta oracion. Den hopi caso, hende ta duda debi cu nan no a haya contesta pa preguntanan, manera:

▪ Tin un Creador?

▪ Dicon religion ta causa asina tanto problema?

▪ Dicon Dios ta permiti sufrimento?

Si bo tabata sa contesta pa e preguntanan aki, lo bo a haci oracion cu mas conviccion?

[Nota]