Bo Por Kere e Milagernan Cu Tin den Bijbel?

SI UN amigo conta bo un historia asombroso, kico lo determina si lo bo ker’e? No solamente e manera cu e ta conta bo e historia, sino tambe su reputacion, no ta berdad? Si bo amigo semper a papia e berdad y nunca no a gaña bo, esey no ta bon motibo pa ker’e? Sigur cu si.

Esey ta e caso tambe cu e milagernan cu tin den Bijbel. Aunke nos niun no tabata na bida ora e milagernan ey a tuma luga, toch nos por determina si nan ta creibel. Con nos por haci esey? Ban analisa cinco factor cu por duna nos mas motibo pa kere cu e milagernan cu tin den Bijbel di berdad a tuma luga.

Hopi milager a tuma luga na luganan publico. Na algun ocasion, miles di hende, tin biaha hasta miyones, a mira milager tuma luga. (Exodo 14:21-31; 19:16-19) Nan no a tuma luga den secreto, sino na bista publico.

E milagernan a tuma luga na un manera simpel. Nan no a bay compaña cu un show espectacular y efecto special di luz. Mayoria di milager biblico a tuma luga despues di un encuentro casual y riba peticion di un of otro hende. (Marco 5:25-29; Lucas 7:11-16) Pues, esun cu a haci e milager no por a plania pa haci henter un show.

Esnan cu a haci milager no tabata busca fama, gloria y rikesa. Mas bien, nan a haci milager pa duna gloria na Dios. (Juan 11:1-4, 15, 40) Jehova a condena tur intento pa saca ganashi for di e milagernan ey.​—2 Reynan 5:15, 16, 20, 25-27; Echonan 8:18-23.

E diferente milagernan cu tin den Bijbel ta demostra bon cla cu nan no por tabata obra di hende. Por ehempel, pa medio di milager, lama y biento a calma, awa a bira biña, awasero a stop y bolbe cuminsa cay, hende malo a cura y hende ciego a haya nan bista bek. Tur e milagernan aki y hopi mas ta duna prueba cu e poder tras di esakinan mester ta sobrehumano ya cu e por eherce influencia riba tur cos den universo.​—1 Reynan 17:1-7; 18:41-45; Mateo 8:24-27; Lucas 17:11-19; Juan 2:1-11; 9:1-7.

E enemigonan di Hesus cu a mira e milagernan no a nenga cu esakinan a sosode. Ora Hesus a resucita su amigo Lazaro, su enemigonan religioso no a nenga cu Lazaro tabata morto. Nan no por a tribi di bisa esey ya cu Lazaro tabatin cuater dia den graf. (Juan 11:45-48; 12:9-11) Siglonan despues di Hesus su morto, e escritornan di e Talmud Hudiu tampoco a nenga cu Hesus tabatin poder pa haci milager. Unico cos cu nan a cuestiona tabata e fuente di tal poder. Mescos tambe, ora e discipelnan di Hesus a haya nan dilanti di e corte Hudiu, e lidernan religioso no a puntra nan: “Boso a haci un milager?” No, mas bien, nan a puntra nan: “Cu ki autoridad of den nomber di ken boso a haci e cos aki?”​—Echonan 4:1-13.

Kico di abo? Bo por kere loke Bijbel ta bisa tocante milager? For di loke nos a caba di considera, ta bisto cu nos por kere e relatonan den Bijbel relaciona cu milager. Y tin mas motibo pa kere e relatonan ey. Por ehempel, ora Bijbel ta papia di cierto suceso, e ta duna detaye specifico: e tempo, luga y nomber di e personanan envolvi. Hasta hende cu ta critica Bijbel ta keda asombra di con exacto su detayenan historico ta. Cientos di profecia cu tin den Bijbel a cumpli te den e minimo detaye. Ademas, den Bijbel tin hopi conseho tocante con hende por biba bon cu otro y esakinan a yuda hende di tur edad y clase social. E tipo di consehonan aki bo no por haya ningun otro caminda.

Si ainda bo ta sinti cu bo no por kere tur loke Bijbel ta trece padilanti, dicon bo no ta tuma tempo pa analis’e mas a fondo? Mas bo siña di Bijbel, mas bo confianza den dje lo crece. ( Juan 17:17) Lo bo realisa cu bo por kere loke e ta bisa tocante e milagernan cu a tuma luga den pasado. Unabes bo kere e milagernan ey, lo bo tin mas motibo pa kere tambe loke Bijbel ta bisa cu lo sosode den futuro.

[Plachi na pagina 5]

Hesus su enemigonan no a nenga cu Lazaro tabata morto