1. Kico lo yuda nos keda alerta y soporta prueba?

PRONTO sucesonan cu lo shock mundo lo tuma luga. Nos ta sigur di esaki debi na profecia biblico cu ta cumpliendo. Pues, nos tin cu keda alerta. Kico lo yuda nos haci esey? Nos tin cu corda riba e bida eterno cu nos lo haya, sea den cielo of riba tera. Apostel Pablo a urgi nos pa “fiha nos bista . . . riba e cosnan cu hende no ta mira.” Manera e contexto ta mustra, Pablo a skirbi e palabranan aki pa anima e rumannan den su tempo pa fiha nan bista riba e recompensa cu nan lo haya pasobra nan a keda fiel na Dios. Alabes, esaki lo a yuda nan soporta prueba y persecucion.​—2 Cor. 4:8, 9, 16-18; 5:7.

2. (a) Kico nos mester haci pa mantene nos speransa firme? (b) Kico nos lo analisa den e articulo aki y esun siguiente?

² E conseho di Pablo ta siña nos un les importante: Pa mantene nos speransa firme, nos tin cu wak mas aleu di e cosnan cu nos por mira. Nos tin cu fiha nos bista riba sucesonan importante cu aworaki nos no ta mira. (Heb. 11:1; 12:1, 2) Pues, den e articulo aki y esun siguiente, nos lo analisa dies suceso cu lo tuma luga prome cu nos speransa di bida eterno ser realisa.

3. (a) Ki suceso cu mester tuma luga ainda 1 Tesalonicensenan 5:2 y 3 ta describi? (b) Kico e lidernan politico lo haci, y ken kisas lo join nan?

³ Pablo a menciona un di e sucesonan aki den su carta na e Tesalonicensenan. (Lesa 1 Tesalonicensenan 5:2, 3.) El a hala nan atencion na “e dia di Jehova.” Esaki ta referi na e periodo cu lo cuminsa cu destruccion di religion falso y culmina den e guera di Armagedon. Pero net prome cu e dia di Jehova cuminsa, lidernan di mundo lo ta bisando “Paz y  siguridad!” Esaki lo por sosode un biaha so of varios biaha tras di otro. Kisas e nacionnan ta pensa cu nan ta cerca di resolve algun di nan problemanan grandi. Kico di e lidernan religioso? Wel, nan ta parti di mundo, pues ta posibel cu nan tambe lo bisa “Paz y siguridad!” hunto cu e lidernan politico. (Rev. 17:1, 2) Nan lo ta haci mescos e ora ey cu e profetanan falso di Juda di antiguedad cu tabata bisa: “Paz, paz.” Ma Jehova a bisa cu no tin paz.​—Jer. 6:14; 23:16, 17.

4. Kico nos ta compronde, cu hende en general no ta compronde?

⁴ Sin importa ken ta bisa “Paz y siguridad!”, e suceso ey lo indica cu e dia di Jehova ta bay cuminsa. Pesey Pablo por a declara: “Rumannan, boso no ta den scuridad; pues e dia ey no mester coge boso di sorpresa manera luz di dia ta coge ladron di sorpresa, pasobra boso tur ta yiu di luz.” (1 Tes. 5:4, 5) Aunke hende en general no ta compronde loke Bijbel ta bisa tocante e sucesonan cu ta tumando luga awendia, nos si ta compronde. Con e profecia tocante: “Ora nan bisa: ‘Paz y siguridad!’” lo cumpli? Wel, nos tin cu warda y mira. Pesey laga nos ta determina pa “keda lanta y mantene nos sano huicio.”​—1 Tes. 5:6; Sof. 3:8.

5. (a) Con e “tribulacion grandi” lo cuminsa? (b) Ken ta manera un “reina” cu ta kere cu nada malo lo pas’e?

⁵ Kico ta e siguiente suceso cu lo tuma luga? Pablo a bisa: “Ora nan ta bisa: ‘Paz y siguridad!’, e ora ey diripiente destruccion lo bin riba nan instantaneamente.” E prome fase di e ‘destruccion diripiente’ aki ta e atake contra “Babilonia e Grandi”, e imperio mundial di religion falso, conoci tambe como “e prostituta.” (Rev. 17:5, 6, 15) E atake ey, cu lo ta contra tur forma di religion falso, incluso cristiandad, ta cuminsamento di e “tribulacion grandi.” (Mat. 24:21; 2 Tes. 2:8) E suceso aki lo coge hopi hende di sorpresa. Dicon? Pasobra te cu e momento ey, e prostituta lo kere cu e ta “un reina” cu ‘hamas lo mira tristeza.’ Pero diripiente e lo realisa cu e tabata ekiboca. E lo ser destrui basta lihe, comosifuera “riba un dia.”​—Rev. 18:7, 8.

6. Ken lo destrui religion falso?

⁶ E Palabra di Dios ta bisa cu ta un “bestia salbahe” cu “dies cacho” lo ataca e prostituta. Un analisis di e buki di Revelacion ta yuda nos compronde cu e bestia salbahe ta referi na Nacionnan  Uni. “E dies cachonan” ta representa tur e podernan politico actual cu ta apoya e “bestia salbahe color cora bibo.” * (Rev. 17:3, 5, 11, 12) Con destructivo e atake ey lo ta? E nacionnan cu ta miembro di Nacionnan Uni lo plunder e rikesa di e prostituta. Ademas, nan lo revela su berdadero caracter, habrac’e y “kim’e completamente cu candela.” Su destruccion lo ta pa semper.​—Lesa Revelacion 17:16.

7. Kico lo provoca e atake di e “bestia salbahe”?

⁷ Profecia biblico ta indica tambe kico lo provoca e atake aki. Di un manera of otro Jehova lo hinca den curason di lidernan politico pa “cumpli cu Su pensamento”, y esey ta: destrui e prostituta. (Rev. 17:17) Religion ta fomenta guera y ta sigui causa masha problema na mundo; pues, tal bes e nacionnan lo pensa cu ta cumbini nan interesnan nacional si nan destrui e prostituta ey. Anto ora e gobernantenan atac’e, nan lo kere cu nan ta cumpliendo cu nan propio “pensamento.” Pero, en realidad, ta Dios ta uzando nan pa caba cu tur religion falso. Pues, den un buelta sorprendente, un parti di e sistema di Satanas lo ataca un otro parti, y Satanas lo no por haci nada pa evita esey.​—Mat. 12:25, 26.

8. Kico ta e atake di “Gog di tera di Magog”?

⁸ Despues cu e nacionnan destrui religion falso, nan lo ripara cu e sirbidornan di Dios ainda “ta biba trankil” y “sin muraya.” (Eze. 38:11, 14) Kico lo pasa cu e grupo aki di hende cu ta sigui adora Jehova y cu ta comosifuera sin ningun proteccion? Aparentemente, nan lo ser ataca pa “hopi pueblo.” E Palabra di Dios ta describi e suceso ey como e atake di “Gog di tera di Magog.” (Lesa Ezekiel 38:2, 15, 16.) Con nos mester mira e atake ey?

9. (a) Kico ta e preocupacion principal di un cristian? (b) Kico nos mester haci awor pa fortalece nos fe?

⁹ Nos sa cu e pueblo di Dios lo ser ataca, pero esaki no ta pone nos bira demasiado ansha. Nos preocupacion principal no ta nos propio salbacion, sino mas bien, e santificacion di e nomber di Jehova y e vindicacion di su soberania. De echo, Jehova a declara mas cu 60 biaha den e buki di Ezekiel: ‘Boso lo sa cu ami ta Jehova.’ (Eze. 6:7) Pues, nos ta masha interesa pa mira con e parti importante ey di e profecia di Ezekiel lo cumpli. Y nos tin  sigur cu “Jehova sa con pa libra hende devoto na dje for di prueba.” (2 Ped. 2:9) Mientrastanto, nos kier haci tur loke ta na nos alcance pa fortalece nos fe pa asina nos por mantene nos integridad na Jehova, sin importa kico pasa. Con nos por haci esey? Nos mester haci oracion, studia e Palabra di Dios y medita riba dje y comparti e mensahe di Reino cu otro hende. Esey lo haci nos speransa di bida eterno mas firme. Y e speransa aki lo ta manera “un anker” cu ta yuda nos keda fiel na Dios.​—Heb. 6:19; Sal. 25:21.

10, 11. Kico lo marca comienso di Armagedon, y kico lo tuma luga durante e tempo ey?

¹⁰ E atake contra e sirbidornan di Jehova lo provoca ki suceso cu lo shock mundo? Jehova, pa medio di Hesus y e ehercitonan celestial, lo interveni na fabor di Su pueblo. (Rev. 19:11-16) Esaki lo ta “e guera cu lo tuma luga riba e gran dia di Dios, e Todopoderoso”, esta, Armagedon.​—Rev. 16:14, 16.

¹¹ Relaciona cu e guera ey, Jehova a declara pa medio di Ezekiel: “‘Riba tur mi seronan lo mi yama un spada contra Gog’, Señor DIOS ta declara. ‘Spada di cada homber lo ta contra su ruman.’” E hendenan na banda di Satanas lo drenta den panico, bira tur confundi y cuminsa uza nan arma contra otro, solda contra solda. Pero esey no ta tur cos; e destruccion lo bin riba henter e sistema di Satanas. Jehova a bisa: “Lo mi laga yobe riba [Gog], riba su trupanan y riba e hopi pueblonan cu ta hunto cu ne, un awasero pisa, cu hagel, candela y suafel.” (Eze. 38:21, 22) Kico lo ta e resultado di e accion divino aki?

12. Kico e nacionnan lo haya nan obliga di haci?

¹² Sin duda, e nacionnan lo realisa cu ta riba ordo di Jehova nan ta ser destrui. E ora ey e compinchinan di Satanas kisas lo reacciona mescos cu e Egipcionan di antiguedad cu a persigui e Israelitanan te na Lama Cora. Nan a grita den nan desesperacion: “[Jehova] ta bringa pa nan”! (Exo. 14:25) Si, e nacionnan lo haya nan obliga di reconoce ken Jehova ta. (Lesa Ezekiel 38:23.) Cuanto tempo falta pa e serie di sucesonan ey cuminsa?

13. Kico nos sa di e di cinco parti di e imagen cu Daniel a describi?

¹³ Un profecia den e buki di Daniel ta yuda nos compronde den ki periodo nos ta bibando. Daniel a describi un estatua, of imagen den forma di hende, cu tabata consisti di diferente metal. (Dan. 2:28, 31-33) E imagen aki a representa un serie di potencia mundial cu tabatin un gran influencia riba e pueblo di Dios di pasado y di presente. Nan ta Babilonia, Medopersia, Grecia, Roma y e ultimo potencia mundial, esun cu ta existi den nos tempo. Un analisis di e profecia di Daniel ta mustra cu e pianan y e dedenan di pia ta representa e ultimo potencia mundial ey. Durante Prome Guera Mundial, Gran Britania y Merca a forma un alianza special cu otro. Pues, e di cinco parti di e imagen di Daniel ta e Potencia Mundial Angloamericano (Potencia Mundial Combina di Gran Britania y Merca). E pianan ta forma e ultimo parti di e imagen. Esaki ta indica cu lo no lanta ningun otro potencia mundial humano despues di nan. E pianan y e dedenan di pia ta consisti di hero mescla cu klei. Esaki ta representa e condicion zwak di e Potencia Mundial Angloamericano.

14. Cua potencia mundial lo ta esun dominante ora Armagedon cuminsa?

 ¹⁴ E mesun profecia ey ta indica cu un piedra grandi cu a ser corta for di un sero na aña 1914 ta representa e Reino di Dios. E sero ta representa e soberania di Jehova, esta, su derecho di goberna. Anto e piedra cu a ser corta ta biniendo awor stret riba e pianan di e imagen. Na Armagedon, e piedra lo garna e pianan y e resto di e imagen. (Lesa Daniel 2:44, 45.) Pues, e Potencia Mundial Angloamericano lo ta e potencia mundial dominante ora Armagedon cuminsa. Lo ta masha emocionante pa ta testigo di e cumplimento di e profecia aki! * Pero kico Jehova lo bay haci cu Satanas mes?

15. Despues di Armagedon, kico lo pasa cu Satanas y su demoñonan?

¹⁵ Di prome, Satanas lo tin cu para mira con henter su organisacion riba tera ta ser elimina. Despues Satanas mes ta bira e centro di atencion. Apostel Juan ta conta nos kico lo pasa. (Lesa Revelacion 20:1-3.) Hesucristo​—kende ta e ‘angel cu tin e yabi di e abismo’​—lo gara Satanas y su demoñonan, benta nan den abismo y tene nan ey den pa 1.000 aña. (Luc. 8:30, 31; 1 Juan 3:8) Esey lo ta e prome fase di e accion di “herida” e cabes di e colebra. *​—Gen. 3:15.

16. Ora benta Satanas den abismo, kico esey lo nifica p’e?

¹⁶ Kico ta “e abismo” cu e angel ta benta Satanas y e demoñonan aden? E palabra Griego abissos cu Juan a uza ta nifica un profundidad cu bo no por midi y cu no tin final. Tambe nan sa traducie como “e bashi infinito.” Pues, ta Jehova y su angel cu tin e “yabi di e abismo” so por saca Satanas y su demoñonan for di e abismo aki. Satanas lo ta eynan den un estado inactivo comosifuera e ta morto, di manera cu ‘e no por gaña e nacionnan mas.’ Si, Dios lo silencia e “leon cu ta [brul]” ey!​—1 Ped. 5:8.

17, 18. (a) Menciona e sucesonan cu nos a analisa pero cu ainda no a tuma luga. (b) Despues di e sucesonan aki, ki periodo di tempo nos lo disfruta di dje?

¹⁷ Pronto sucesonan importante cu lo shock mundo lo tuma luga. Nos ta ansioso pa mira con e profecia tocante: “Ora nan bisa: ‘Paz y siguridad!’” lo cumpli. Despues nos lo ta testigo di e destruccion di Babilonia e Grandi, e atake di Gog di Magog, e bataya di Armagedon y e bentamento di Satanas y su demoñonan den abismo. Despues di e sucesonan aki, ora cu lo no tin maldad mas riba tera, nos lo cuminsa un capitulo nobo: bida bou di e Reinado di Mil Aña di Cristo! Durante e periodo ey nos lo disfruta di “paz abundante.”​—Sal. 37:10, 11.

¹⁸ Fuera di e cinco sucesonan cu nos a analisa te asina leu, tin mas ‘cos cu hende no ta mira’ cu nos lo kier “fiha nos bista” riba dje. Den e siguiente articulo, nos lo analisa e sucesonan ey.