1, 2. Kico e articulo aki lo yuda nos cu ne?

PA HOPI aña caba, Testigonan di Jehova ta reuni na nan congresonan internacional y di districto. A traves di añanan, hopi di nos a yega di asisti na algun of hasta na un gran cantidad di e congresonan aki.

² Miles di aña pasa tambe e pueblo di Dios tabata tene congreso. Den e articulo aki, nos lo analisa e congresonan cu Bijbel ta menciona y mira ki similaridad tin entre esakinan y nos congresonan djawe. Ademas, nos lo enfoca riba e beneficionan di asisti na congreso.​—Sal. 44:1; Rom. 15:4.

3. (a) Kico a sosode na e prome congreso di e pueblo di Jehova cu Bijbel ta menciona? (b) Con e Israelitanan por a sa cu nan mester a bin hunto?

³ E prome congreso cu Bijbel ta menciona a tuma luga na pia di Sero Sinai caminda tur Israelita a reuni pa ricibi instruccion di Jehova. Esey tabata un ocasion masha special den historia di adoracion berdadero. Na e ocasion emocionante ey, Jehova a demostra su poder na e Israelitanan y a duna nan su Ley. Esey tabata un dia cu hamas nan lo a lubida. (Exo. 19:2-9, 16-19; lesa Exodo 20:18; Deuteronomio 4:9, 10.) Desde e dia ey, Israel a bira un pueblo special pa Jehova. Un poco tempo despues, Jehova a establece un sistema pa yama su pueblo bin hunto: El a manda Moises traha dos trompet di plata. Ora “henter e congregacion” mester a reuni “na entrada di e tent di reunion”, nan tabata supla tur dos trompet. (Num. 10:1-4) Bo por imagina bo con anima y entusiasma e Israelitanan tabata na e ocasionnan ey?

4, 5. Dicon e congresonan cu Moises y Josue a organisa tabata importante?

 ⁴ Na final di e 40 añanan cu e Israelitanan tabata den desierto, Moises a organisa un congreso pa henter e nacion. Esaki tabata na un momento crucial ya cu nan tabata a punto di drenta e Tera Priminti. Esey tabata un bon momento pa Moises a recorda su rumannan tur loke Jehova a haci y lo a sigui haci pa nan.​—Deu. 29:1-15; 30:15-20; 31:30.

⁵ Podise ta na e congreso ey Moises a bisa e pueblo cu regularmente lo a bay tin congreso y instruccion spiritual pa e pueblo di Dios. Cada shete aña, durante e Fiesta di Tabernakel, of Cabaña, homber, muher, mucha y stranhero mester a reuni na e luga cu Jehova a scoge ‘pa nan tende y siña teme Jehova y cumpli cu tur e palabranan di e Ley.’ (Lesa Deuteronomio 31:1, 10-12.) Pues, for di principio di e historia di e pueblo di Jehova, tabata bisto cu e tabata kier pa su pueblo reuni regularmente pa siña di su palabra y di su proposito. Despues cu e Israelitanan a conkista e Tera Priminti, Josue tambe a organisa un congreso. E tempo ey, ainda nan tabata rondona di nacionnan pagano. Pues, Josue tabata sa cu nan tabatin mester di animacion pa yuda nan keda leal na Jehova. Anto na e congreso ey, e pueblo a hura cu nan lo sirbi Dios.​—Jos. 23:1, 2; 24:1, 15, 21-24.

6, 7. Dicon nos por bisa cu den temponan recien tambe e pueblo di Jehova tabatin congresonan historico?

⁶ Den temponan mas recien, tambe e pueblo di Jehova tabatin congresonan historico. Na e congresonan aki nan a anuncia cambionan den nan organisacion y den comprondemento di e Scritura. (Prov. 4:18) E prome congreso grandi cu Studiantenan di Bijbel a organisa despues di Prome Guera Mundial tabata na 1919 na Cedar Point, Ohio, Merca; tabatin un asistencia di 7.000 persona. Ta na e congreso ey, nan a anuncia e campaña pa predica e bon noticia rond mundo. Na 1922, na e mesun sitio ey, durante un congreso di nuebe dia, Ruman Joseph F. Rutherford a duna un enorme empuhe na e trabou di predica ora el a urgi su oyentenan atento: “Wak pa boso ta Testigo fiel y berdadero pa Señor. Sigui den e lucha te ora tur rastro di Babilonia ser elimina. Proclama e mensahe tur caminda. Mundo tin cu sa cu Jehova ta Dios y cu Hesucristo ta Rey di reynan y Señor di señornan. Esaki ta e dia di mas importante. Tende! E Rey ta reina! Boso ta su agentenan di publicidad. Pesey, anuncia, anuncia, anuncia e Rey y su reino.” Y tur adorador di Jehova⁠​—tanto esnan cu tabata presente na e congreso ey como otronan rond mundo⁠​—a sigui e conseho ey cu goso.

⁷ Na 1931, na un congreso na Columbus, Ohio, e Studiantenan di Bijbel a keda masha contento di por a acepta e nomber Testigonan di Jehova. Despues na 1935, na Washington, D.C., Ruman Rutherford a splica ken ta esnan cu ta forma e “multitud grandi” cu segun e buki di Revelacion ta “para dilanti di e trono y dilanti di e Lamchi.” (Rev. 7:9-17) Na 1942, durante Segundo Guera Mundial, Nathan H. Knorr a duna un discurso emocionante titula “Paz​—Lo E Ta Duradero?” Durante e discurso aki, el a splica loke e “bestia salbahe color cora bibo” den Revelacion capitulo 17 ta representa. Ademas, el a indica cu despues di e guera lo tabatin hopi di haci den e trabou di predica.

8, 9. Dicon cierto congresonan tabata masha emocionante?

⁸ Na 1946, na e Asamblea Teocratico “Nacionnan Gososo” na Cleveland, Ohio, Ruman Knorr a duna un discurso masha interesante cu e tema: “E Problemanan di Reconstruccion y Expansion.” Un ruman cu tabata presente e dia ey a skirbi con  entusiasma e oyentenan a reacciona. El a bisa: ‘E anochi ey, mi tabatin e privilegio di sinta riba plataforma patras di Ruman Knorr. Segun cu e tabata papia di e trabou di predica cu mester a ser haci y di e plannan pa expande Betel y e fabrica na Brooklyn, esnan presente tabata bati man bes tras bes. Aunke for di plataforma bo no por a mira e cara di e personanan, bo por a sinti e goso si cu tabata reina.’ Na 1950, na un congreso internacional cu a tuma luga na New York City, esnan presente a keda masha contento pa ricibi e Traduccion di Mundo Nobo di e Scritura Griego Cristian. Esaki tabata e prome parti di un Bijbel na idioma moderno cu a pone e nomber di Dios caminda e mester ta den su Palabra.​—Jer. 16:21, NW.

⁹ E congresonan cu a tuma luga den paisnan caminda anteriormente e trabou di predica tabata prohibi of cu e pueblo di Jehova tabata ser persigui tambe tabata masha emocionante. Tuma por ehempel e congreso cu a tuma luga na 1955 na Nuremberg, Alemania. Na e congreso ey tabatin 107.000 Testigo di Jehova presente. Remarcabel ta cu na e mesun sitio ey, Adolf Hitler y su compinchinan tabata reuni anteriormente. Anto Hitler a hura cu lo el a caba cu Testigonan di Jehova na Alemania. Pesey, hopi di esnan presente no por a contene nan lagrimanan di goso! Na 1989, 166.518 delegado a bin Polonia pa asisti na tres congreso “Devocion Piadoso.” Hopi di nan a bin for di loke e tempo ey tabata Union Sovietico y Checoslovakia y for di otro paisnan den Oost Europa. Pa algun di nan, tabata e prome bes cu nan a asisti na un reunion cu a consisti di mas cu 15 of 20 sirbidor di Dios. Anto bo por imagina bo e goso cu tabatin na 1993 na e Congreso Internacional “Siñansa Divino” cu a tuma luga na Kiev, Ucrania? Na e congreso ey, 7.402 hende a batisa. Podise esey ta e cantidad mas grandi di Testigonan di Jehova cu a yega di batisa riba un dia.​—Isa. 60:22; Hag. 2:7.

10. Cua congreso tin un nificacion special pa bo, y dicon?

¹⁰ Kisas tin congresonan di districto of internacional cu tabata masha special pa bo. Bo ta corda cua ta e prome congreso cu bo a asisti na dje of podise esun na cua bo a batisa? Esakinan tabata ocasionnan importante den bo carera spiritual, y nunca bo mester lubida nan. Nan ta recuerdonan masha bunita!​—Sal. 42:4.

11. Na cua fiestanan e Israelitanan mester a asisti tur aña?

¹¹ Jehova tabata kier pa e Israelitanan reuni na Jerusalem pa celebra tres fiesta: Fiesta di Pan sin Zuurdeeg, Fiesta di Simannan (cu despues a haya e nomber Pentecoste) y Fiesta di Cabaña. Relaciona cu e fiestanan aki Dios a bisa: “Tres biaha pa aña tur bo hende hombernan mester presenta dilanti di Señor DIOS.” (Deu. 16:16; Exo. 23:14-17) Hopi homber a compronde cu e fiestanan aki tabata un parti importante di adoracion na Jehova, pesey nan  tabata bay cu henter nan famia.​—1 Sam. 1:1-7; Luc. 2:41, 42.

12, 13. Kico hopi Israelita mester a haci pa asisti na e fiestanan anual?

¹² Pensa riba loke e biahe ey lo a encera pa un famia Israelita. Jose cu Maria, por ehempel, mester a biaha mas o menos 100 kilometer di Nazaret bay Jerusalem. Cuanto tempo lo a dura bo pa haci un biahe asina, canando cu mucha chikito? E relato di Hesus su biahe pa Jerusalem tempo cu e tabata mucha ta indica cu na algun ocasion famia- y conocinan tabata haci e biahenan ey na grupo. Esey lo a encera basta trabou: Nan mester a biaha y prepara cuminda hunto y percura pa tur hende haya un luga di drumi. Sinembargo, no tabata peligroso pa haci un biahe asina, pasobra Hesus, siendo un mucha di 12 aña, tabatin cierto grado di libertad. E biahenan aki lo tabata un experencia inolvidabel, specialmente pa e hobennan.​—Luc. 2:44-46.

¹³ Tempo cu e Israelitanan tabata plama rond mundo, nan tabata bin for di varios pais pa asisti na e fiestanan na Jerusalem. Na Pentecoste di aña 33 di nos era, por ehempel, Hudiu- y proselitonan cu a balora e fiesta aki a bin for di Italia, Libia, Creta, Asia Menor y Mesopotamia.​—Echo. 2:5-11; 20:16.

14. Con e fiestanan anual a beneficia e Israelitanan?

¹⁴ Pa un Israelita fiel, e cos di mas importante y emocionante di e biahenan aki tabata cu e por a adora Jehova hunto cu miles di otro adorador cu tambe ta stima Dios. Ki efecto e fiestanan aki tabatin riba esnan presente? Nos por haya un contesta pa e pregunta aki den e instruccionnan cu Jehova a duna su pueblo relaciona cu e Fiesta di Cabaña. El a bisa nan: “Regociha na bo fiesta, abo, bo yiu homber, bo yiu muher, bo sirbidornan homber y muher y e levita, e stranhero, e huerfano y e viuda, kendenan ta biba den bo stadnan. Celebra pa shete dia un fiesta na SEÑOR bo Dios, na e luga cu SEÑOR scoge, pasobra SEÑOR bo Dios lo bendiciona bo den henter bo cosecha y den tur e trabou di bo mannan, asina cu lo bo ta berdaderamente yen di goso.”​—Deu. 16:14, 15; lesa Mateo 5:3.

15, 16. (a) Ki sacrificio abo tabatin cu haci pa asisti na congreso? (b) Dicon e esfuersonan ey ta bale la pena?

¹⁵ E fiestanan cu Jehova a manda e Israelitanan celebra ta un excelente ehempel pa nos awe. Aunke hopi cos a cambia a traves di siglonan, e rasgonan importante di e congresonan a keda mescos. Den tempo biblico, esnan cu kier a asisti na un congreso mester a haci sacrificio. Esey ta conta pa hopi di nos awe tambe. Pero e beneficionan ta bal e esfuerso. Mescos cu den pasado, e eventonan aki ta rasgonan masha importante di nos adoracion na Jehova. Na congreso, nos ta haya informacion y comprondemento cu ta yuda nos keda cu un bon relacion cu Dios. Congreso ta motiva nos pa aplica loke nos ta siña, ta yuda nos evita problema y ta encurasha nos pa keda enfoca riba meta- y cosnan cu ta anima nos.​—Sal. 122:1-4.

¹⁶ Tur congreso ta duna goso. Un informe di un congreso cu a tuma luga na 1946 ta bisa: ‘Tabata masha emocionante pa mira miles y miles di hende hunto. Mas emocionante ainda tabata pa tende con e orkesta grandi ta uni cu e bosnan gososo di e multitud cu tabata canta cantica di alabanza na Jehova.’ E informe a agrega cu hopi delegado a ofrece nan mes boluntariamente pa yuda den e diferente departamentonan. Nan tabatin e goso di por a sirbi nan compañeronan Testigo. Abo tambe a yega di  experencia e goso ey na congresonan di districto of internacional?​—Sal. 110:3; Isa. 42:10-12.

17. Ki cambionan a bin recientemente den e manera di organisa congreso?

¹⁷ A traves di añanan, a bin algun cambio den e manera cu congresonan ta ser organisa. Por ehempel, algun ruman ta corda cu un tempo congresonan tabata dura ocho dia! Tabatin sesion di mainta, atardi y anochi. Sirbishi di veld tambe tabata un parti regular di e programa. Tabatin biaha cu e programa tabata cuminsa nueb’or di mainta y caba te nueb’or di anochi. Boluntarionan tabata traha duro pa oranan largo pa prepara desayuno, almuerso y cena pa esnan cu a bin congreso. Awor e programanan di congreso ta hopi mas cortico. Y e echo cu famianan mes ta percura pa nan cuminda di antemano ta pone cu nan tin tempo pa presta bon atencion na e alimento spiritual cu ta ser presenta na congreso.

18, 19. Ki rasgonan di congreso bo ta gusta mas, y dicon?

¹⁸ Tin cierto rasgonan di congreso cu semper nos ta anticipa. Por ehempel, mediante discursonan y tambe publicacionnan nobo cu ta ser presenta nos ta haya “cuminda na e debido tempo” cu ta duna nos un mihor comprondemento di profecia y siñansa di Bijbel. (Mat. 24:45) Nos por uza hopi di e publicacionnan nobo aki pa yuda hende sincero compronde berdadnan di Bijbel. Dramanan basa riba Bijbel ta anima tanto hende grandi como hoben pa analisa nan motibonan pa sirbi Jehova y pa resisti e presion cu e mundo malbado aki ta pone riba nos. E discurso di bautismo tambe ta duna nos tur e oportunidad di evalua nos prioridadnan y experencia e goso di mira otro hende simbolisa nan dedicacion na Jehova.

¹⁹ Si, pa miles di aña caba congreso ta un parti di adoracion puro. Nan ta yuda nos sirbi Jehova cu goso y na e manera corecto den e tempo dificil aki. Nan ta motiva nos pa haci mas den sirbishi di Jehova y ta duna nos oportunidad pa cera amistadnan nobo y balora nos hermandad mundial. Ademas, congreso ta un medio importante cu Jehova ta uza pa bendiciona y cuida su pueblo. Pesey, nos cada un mester regla nos asuntonan di tal manera cu nos por asisti na tur congreso y no perde ningun sesion.​—Prov. 10:22.