Di Berdad Ta Existi Milager?​—Tres Obhecion Comun

PROME OBHECION: Milager ta bay contra ley di naturaleza. Loke nos ta compronde di ley di naturaleza ta basa riba loke cientificonan a observa den e mundo rond di nos. Sinembargo, e leynan ey ta mescos cu regla di gramatica di idioma​—semper por tin excepcion riba un regla. De echo, kisas nos no ta compronde e leynan ey mucho bon. ( Job 38:4) Un cientifico por dedica henter su bida na estudio di un cierto ley di naturaleza. Pero si e topa, na moda di papia, un excepcion riba e ley ey, e ta hay’e ta bay investiga e ley completamente di nobo pa e por comprond’e mihor. Manera un dicho Ingles ta bisa, “dia bo topa un solo zwaan preto, henter e teoria cu tur zwaan ta blanco ta basha den otro.”

Tin biaha, hende ta forma un opinion riba algo sin cu nan tin tur detaye. Esaki ta bisto den un cuenta chistoso cu e filosofo John Locke (1632-1704) a conta di un embahador Hulandes y e rey di Siam. E embahador a bisa e rey cu na Hulanda, den cierto temporada, un olifanti por cana riba awa. E rey no por a kere esey y a pensa cu ta gaña e embahador ta gañ’e. Pero loke a pasa ta cu e embahador a menciona algo cu e rey no a yega di mira. E rey no tabata sa cu ora awa bira ijs, esaki por wanta peso di un olifanti. Pa e rey, esaki a parce imposibel, pasobra e no tabata sa di e detaye ey.

Tuma nota di algun logro moderno cu un par di decada pasa a parce imposibel:

● Un avion por transporta mas cu 800 pasahero di New York pa Singapur, bulando nonstop cu un velocidad di 900 kilometer pa ora.

● Cu yudansa di computer cu tin camara, un hende cu ta biba na un continente por combersa “cara cara” cu un persona cu ta biba na un otro continente.

● Hende por pone miles di cantica riba un aparato mas chikito cu un caha di suafel.

● Ciruhanonan por haci transplante di curason y otro organonan di curpa.

Na ki conclusion logico nos por yega a base di e ehempelnan aki? Si hende por logra haci cosnan cu apenas algun aña pasa tabata parce imposibel, e Creador di universo y di tur loke tin den dje sigur por haci cosnan asombroso cu ainda nos no ta compronde completamente ni no por imita aworaki. *​—Genesis 18:14; Mateo 19:26.

DI DOS OBHECION: Bijbel ta papia di milager djis pa hende haya mas fe. Bijbel no ta bisa cu nos tin cu kere den tur milager. Al contrario, e ta spierta nos pa no core kere den milager. Por ehempel, na 2 Tesalonicensenan 2:9 y 10 nos ta haya e siguiente spiertamento: “Presencia di e homber di maldad ta segun e actividad di Satanas, compaña pa tur tipo di obra poderoso, señal y milager engañoso, inhusticia y tur sorto di engaño.”

Hesucristo tambe a spierta cu hopi hende lo a pretende di ta su siguidor. Algun di nan hasta lo a puntr’e: “Señor, Señor! N’ ta den bo nòmber nos a profetisá, saka demoño i hasi hopi milager?” (Mateo 7:22, BPK ) Ma Hesus a bisa cu lo e no considera e hendenan ey como su siguidor. (Mateo 7:23) Ta bisto anto cu pa Hesus no ta tur milager ta bin di Dios.

Ademas, Dios no ta spera cu su sirbidornan ta basa nan fe simplemente riba milager. Mas bien, nan fe mester ta basa firmemente riba evidencia.​—Hebreonan 11:1.

Laga nos papia awor di un milager di Bijbel cu ta bon conoci, esta, e resureccion di Hesucristo. Hopi aña despues di e suceso ey, algun  cristian na Corinto a cuminsa duda cu si di berdad Hesus a resucita. Con apostel Pablo a yuda e cristiannan ey? El a djis bisa nan: “Boso tin mester di mas fe”? No. El a hala nan atencion riba e pruebanan palpabel cu nan tabatin. Pablo a bisa “cu nan a dera [Hesus], cu el a ser lanta for di morto riba e di tres dia, segun e Scritura, cu el a aparece na Cefas y despues na e 12 apostelnan. Despues di esey el a aparece na mas cu 500 ruman pareu; algun di nan a bay sosega, ma mayoria di nan t’ey hunto cu nos ainda.”​—1 Corintionan 15:4-8.

A haci un diferencia si e cristiannan di Corinto a kere den e milager ey? Pablo a agrega: “Si Cristo no a ser lanta, siguramente nos predicacion ta envano, y nos fe tambe ta envano.” (1 Corintionan 15:14) Pa Pablo, esaki tabata un asunto serio, sea cu e milager di e resureccion di Hesus a tuma luga of no. Y Pablo tabata sa cu el a tuma luga pasobra cientos di testigo ocular di e suceso ey ainda tabata na bida. Y nan lo a prefera di muri en bes di nenga loke nan a mira.​—1 Corintionan 15:17-19.

DI TRES OBHECION: Milager ta fenomeno natural cu hende sin scol ta interpreta robes. Algun academico ta purba di splica cu e milagernan den Bijbel ta simplemente fenomenonan natural cu a tuma luga sin intervencion divino. Nan ta pensa cu asina ey ta mas facil pa hende kere den e relatonan aki. Aunke ta berdad cu algun milager tabatin di haber cu fenomeno natural—manera temblor, plaga y avalancha di lodo—toch tin un punto si cu e hendenan ey ta pasa por alto. Nan ta ignora e factor tempo, esta, e momento exacto cu, segun e Scritura, e milager a tuma luga.

Por ehempel, algun hende ta pretende cu ora e prome plaga a asota Egipto y pone Riu Nijl bira sanger, en realidad ta tera cora a basha den e riu hunto cu algun organismo cora (zweepdiertjes) cu na Ingles yama flagellates. Pero ripara cu e relato biblico ta bisa cu e riu a bira sanger, y no lodo cora. Un analisis cuidadoso di Exodo 7:14-21 ta mustra cu e milager ey a tuma luga na momento cu Moises a manda Aaron dal su bara riba Riu Nijl. Pues hasta si ta un fenomeno natural a pone e riu bira cora, e echo cu esey a tuma luga na momento cu Aaron a dal e riu riba su mes ta algo milagroso.

Un otro ehempel cu ta resalta e importancia di e factor tempo, es decir, e momento exacto cu un milager ta sosode, ta loke a pasa cu e Israelitanan ora nan tabata cla pa drenta e Tera Priminti. Riu Jordan tabata blokia nan paso, y pa colmo, e riu a desborda. Bijbel ta bisa: “Ora cu esnan cu tabata carga e arca a drenta Jordan, y e pianan di e sacerdotenan cu tabata carga e arca a muha den e awa na canto . . . , e awanan cu tabata core for di ariba a keda para y a lanta na un monton, un distancia grandi for di Adam, e stad cu ta keda banda di Zaretan.” (Josue 3:15, 16) Ta un temblor of avalancha di lodo a causa esaki? E relato no ta bisa. Pero e momento exacto cu e suceso ey a tuma luga ta hacie milagroso. El a sosode exactamente na e momento cu Jehova a bisa cu e lo a tuma luga.​—Josue 3:7, 8, 13.

Pues, ta existi milager? Bijbel ta mustra cu si. De echo, e ta laga nos compronde cu milager no ta djis un fenomeno natural. Awor, ta logico pa bisa cu milager no ta existi djis pasobra nan no ta sosode tur dia?

[Nota]