1. Ki pregunta algun fiel sirbidor di Jehova sa haci?

UN RUMAN muher cu durante varios decada a persevera fielmente bou di prueba a yega di puntra: “Lo mi ta na bida ora e fin yega?” Tin mas ruman cu tin hopi tempo ta sirbi Jehova cu tambe sa puntra nan mes esey. Si, nos ta anhela pa e tempo yega ora cu Dios lo haci tur cos nobo y kita tur nos problemanan. (Rev. 21:5) Y aunke nos tin hopi motibo pa kere cu e fin di e mundo di Satanas ta masha cerca, tin biaha por ta dificil pa warda cu pasenshi riba e dia ey.

2. Ki preguntanan relaciona cu pasenshi nos lo trata den e articulo aki?

² No obstante, Bijbel ta mustra cu nos mester tin pasenshi. Mescos cu e sirbidornan di Dios cu a biba prome cu nos, nos lo ricibi loke Dios a priminti basta nos tin un fe fuerte y ta warda cu pasenshi riba e tempo cu e a stipula pa cumpli cu su promesanan. (Lesa Hebreonan 6:11, 12.) Jehova tambe tin pasenshi. Si e tabata kier, e por a pone un fin na maldad caba, pero e ta warda pa e tempo oportuno yega. (Rom. 9:20-24) Dicon e tin asina tanto pasenshi? Con Hesus a imita e pasenshi di su Tata, poniendo asina un ehempel pa nos? Dicon ta bon pa nos siña warda cu pasenshi y asina imita Jehova? E contestanan pa e preguntanan aki por yuda nos cultiva pasenshi y un fe fuerte aunke den nos bista por parce cu Jehova ta tardando.

3, 4. (a) Dicon Jehova ta demostra pasenshi? (b) Con Jehova a reacciona riba e rebelion den Eden?

³ Den henter universo, no tin ningun persona cu tin mas autoridad cu Jehova. Pues, e no tin nodo di warda pa caba cu e problemanan cu nos ta confronta.  Pero e tin bon motibo pa demostra pasenshi. Con asina? Wel, e rebelion cu a tuma luga den hofi di Eden a lanta preguntanan cu ta di interes pa tanto criaturanan celestial como pa hende riba tera. Pa e preguntanan aki por ser contesta debidamente mester a laga tempo pasa. Anto Jehova sa esey; ta pesey e ta demostra pasenshi. Nos por ta sigur cu esaki ta pa nos mes bon pasobra Jehova sa bon kico tur persona riba tera y den cielo ta pensa y haci.​—Heb. 4:13.

⁴ Jehova su proposito tabata pa tera yena cu descendientenan di Adam cu Eva. Ora Satanas a gaña Eva y Adam a desobedece Jehova Dios, E no a cambia su proposito. E no a drenta panico, core tuma decision pura y deshaci di e proposito cu e tabatin pa hende. Al contrario, el a bin cu un otro manera pa e cumpli cu su proposito pa hende y pa planeta Tera. (Isa. 55:11) Pa cumpli cu su proposito y proba cu su gobernacion ta esun mihor, Jehova a demostra dominio propio y pasenshi extraordinario. Si, el a warda hasta miles di aña pa cumpli cu algun aspecto di su proposito na e mihor manera.

5. Con Jehova su pasenshi ta beneficia hende?

⁵ Un otro motibo pakico Jehova ta warda cu pasenshi ta pa mas hende haya bida eterno. Actualmente, Jehova ta haciendo preparacion pa salba “un multitud grandi.” (Rev. 7:9, 14; 14:6) Mediante e trabou di predica, e ta invita hende pa siña tocante su Reino y Su normanan husto. E mensahe di Reino ta “bon noticia” pa hende. (Mat. 24:14) De echo, no tin mihor noticia cu esey! Tur persona cu Jehova hala na su organisacion ta bira parti di un congregacion mundial di berdadero amigo cu ta stima loke ta bon. (Juan 6:44-47) Jehova ta yuda e personanan aki pa nan por haya su aprobacion. Ademas, Jehova a scoge algun hende pa forma parti di su gobierno celestial. Anto ora e personanan devoto aki ricibi nan posicion den cielo, nan lo yuda hende obediente alcansa perfeccion y haya bida eterno. Ta claro anto cu aunke Jehova ta wardando cu pasenshi, e ta trahando pa cumpli cu su promesanan. Y tur esaki ta pa nos beneficio.

6. (a) Con Jehova a demostra pasenshi den tempo di Noe? (b) Con Jehova ta demostra pasenshi den nos tempo?

⁶ Jehova tin pasenshi hasta ora otronan ta haci cosnan teribel cu ta ofend’e. Tuma por ehempel e manera cu el a trata cu e maldad cu tabata reina prome cu Diluvio. Tera tabata yen di inmoralidad y violencia, y Jehova “tabata tristo den su curason” debi cu hende a degenera asina tanto. (Gen. 6:2-8) Y como cu e no tabata bay tolera e situacion ey pa semper, el a tuma e decision pa trece un diluvio pa destrui hende desobediente. Anto mientras cu Jehova “tabata warda cu pasenshi den e dianan di Noe”, E tabata haci e preparacionnan necesario pa scapa Noe y su famia. (1 Ped. 3:20) Na e debido tempo, Jehova a bisa Noe loke el a dicidi y a duna Noe instruccion pa construi un arca. (Gen. 6:14-22) Ademas, Noe mester a spierta e otro hendenan cu un destruccion tabata na caminda; e tabata “un predicador di husticia.” (2 Ped. 2:5) Hesus a bisa cu nos tempo ta similar na esun di Noe. Y Jehova a dicidi ki dia lo e pone un fin na e mundo malbado aki tambe, pero niun hende no sa “e dia y ora” cu esey lo sosode. (Mat. 24:36) Dios a duna nos tambe e asignacion pa spierta hende y mustra nan con nan por scapa.

7. Jehova ta tardando pa cumpli cu su promesanan? Splica.

⁷ E echo cu Jehova tin pasenshi no ta nifica cu e ta djis sinta warda tempo pasa. Nunca nos mester pensa cu e no tin  atencion pa nos of cu e no ta interesa den nos. Pero tin biaha, ta facil pa pensa asina ora nos ta birando grandi of ta sufri den e sistema malbado aki. Nos por bira desanima of cuminsa pensa cu Dios ta tarda pa cumpli cu su promesanan. (Heb. 10:36) Nunca lubida cu e tin bon motibo pa demostra pasenshi y cu e ta uza e tempo aki na beneficio di su sirbidornan leal. (2 Ped. 2:3; 3:9) Laga nos wak awor con Hesus a imita e pasenshi di su Tata.

8. Bou di ki circunstancia Hesus a demostra pasenshi?

⁸ Hesus tin miles di aña ta haci e boluntad di Dios cu goso. Ora Satanas a rebela den hofi di Eden, Jehova a tuma e decision pa manda su Yiu unigenito na tera como e Mesias. Pensa riba loke esaki a nifica pa Hesus: Cu pasenshi, e mester a warda miles di aña prome cu e por a bin na tera. (Lesa Galationan 4:4.) Pero, e no a sinta warda man crusa; mas bien, e tabata ocupa cu e trabou cu su Tata a dun’e. Y ora el a bin na tera, e tabata sa cu Satanas lo a causa su morto manera Jehova a profetisa. (Gen. 3:15; Mat. 16:21) Cu pasenshi, el a somete su mes na e boluntad di Dios aunke esaki a nifica cu e mester a muri un morto masha doloroso. Si, Hesus tabata dispuesto pa sufri aunke e tabata Yiu di Dios. Asina el a demostra lealtad perfecto y no a enfoca riba su mes. Esey ta un bon ehempel pa nos imita!​—Heb. 5:8, 9.

9, 10. (a) Kico Hesus ta haci segun cu e ta warda cu pasenshi riba Jehova? (b) Con nos por imita Hesus?

⁹ Despues cu Hesus a haya resureccion, el a ricibi autoridad tanto den cielo como riba tera. (Mat. 28:18) E ta uza e autoridad ey pa cumpli cu e proposito di Jehova segun e orario cu Jehova a establece. Pesey, el a warda cu pasenshi na man drechi di Jehova te na 1914 ora Dios a pone su enemigonan como banki pa su pia. (Sal. 110:1, 2; Heb. 10:12, 13) Y pronto lo e destrui e mundo malbado di Satanas. Mientrastanto, cu pasenshi e ta yuda hende y guia nan na e “awa di bida.”​—Rev. 7:17.

¹⁰ Bo ta mira con bo por imita e pasenshi di Hesus? Sin duda, Hesus tabata ansioso pa haci loke su Tata a pidie; no obstante, el a warda te ora e tempo cu Jehova a stipula a yega. Segun cu nos ta spera riba e destruccion di Satanas su mundo malbado, nos tambe mester tin pasenshi. Si, nos mester warda cu pasenshi riba Dios y no stop di warda pasobra nos a desanima. Awor, con nos por cultiva e clase di pasenshi ey?

11. (a) Ki relacion tin entre fe y pasenshi? (b) Dicon nos tin motibo valido pa tin un fe fuerte?

¹¹ Prome cu Hesus a bin na tera, e profetanan y otro sirbidornan fiel di Dios a pone un bon ehempel pa nos: Nan a demostra con hasta hende imperfecto por persevera cu pasenshi. Tabatin un relacion estrecho entre nan fe y nan pasenshi. (Lesa Santiago 5:10, 11.) Si nan no tabatin fe, esta, a kere di berdad den Jehova su promesanan, nan lo no a warda cu pasenshi riba cumplimento di esakinan. Bes tras bes, nan a enfrenta pruebanan di fe dificil y spantoso, cu e confianza cu Dios lo a cumpli cu loke el a priminti. (Heb. 11:13, 35-40) Awe, nos tin mas motibo ainda pa tin un fe solido, pasobra Hesus ta sirbi como “e Representante Principal di nos fe.” (Heb. 12:2) Con asina? El a cumpli cu hopi profecia y a yuda nos compronde Dios su proposito mihor.

12. Kico nos tin cu haci pa fortalece nos fe?

¹² Kico nos por haci pa fortalece nos fe y, di e manera ey, haya mas pasenshi? Ta masha importante pa nos sigui e consehonan  di Dios. Por ehempel, medita riba e conseho cu nos ta haya na Mateo 6:33. Dicon bo mester pone e Reino na prome luga den bo bida? Bo por haci mas esfuerso pa sigui e conseho aki? Kisas esaki ta encera cu bo tin cu dedica mas tempo den sirbishi of haci algun cambio den bo estilo di bida. Corda con Jehova a bendiciona bo esfuersonan te cu awor. Podise el a yuda bo haya un estudio di Bijbel nobo of a yuda bo haya “e paz di Dios cu ta surpasa tur comprondemento.” (Lesa Filipensenan 4:7.) Ora bo enfoca riba e beneficionan cu bo a ricibi debi cu bo a sigui Jehova su instruccionnan, bo ta compronde mihor dicon ta bon pa bo tin pasenshi.​—Sal. 34:8.

13. Ilustra con fe ta yuda nos haya mas pasenshi.

¹³ E relacion entre edifica fe y haya pasenshi ta similar na e ciclo natural di sembra, cultiva y cosecha. Cada bes cu un cunukero haya un bon cosecha, e ta haya mas confianza pa sembra e siguiente temporada. Ta claro cu e sa cu e tin cu warda cu pasenshi pa e por cosecha. Pero esey no ta strob’e di planta; kisas e ta planta un tereno hasta mas grandi cu e temporada anterior. Y e tin confianza cu lo e haya cosecha. Di mes manera, si nos ta sigui siña di Jehova su instruccionnan, ta cumpli cu nan y saca beneficio, nos lo haya mas fe y confianza den Jehova. Asina ta bira mas facil pa nos warda cu pasenshi riba e bendicionnan cu lo bin sigur.​—Lesa Santiago 5:7, 8.

14, 15. Ki punto di bista nos mester tin di sufrimento humano?

¹⁴ Kico otro por yuda nos haya mas pasenshi? Nos mester haci esfuerso pa mira mundo y nos circunstancianan personal desde e punto di bista di Jehova. Por ehempel, pensa riba e manera cu e ta mira sufrimento humano. E tin hopi tempo ta mira hende sufri, y esaki ta hacie dolor.  Pero e no ta laga e dolor ey strob’e di haci loke ta bon. El a manda su yiu unigenito “pa destrui e obranan di Diabel” y pa den futuro elimina tur daño cu Satanas a causa hende. (1 Juan 3:8) Pues pa Jehova, hende su sufrimento ta algo temporal, mientras cu e solucion cu e ta trece ta pa semper. Pues, si nos kier imita Jehova, nos no mester permiti e cosnan malo cu ta tuma luga bou di e gobernacion di Satanas debilita nos fe ni pone nos perde pasenshi pasobra e fin no a yega ainda. Mas bien, laga nos sigui pone fe den e cosnan cu lo dura pa semper. Jehova a stipula e tempo cu lo e caba cu maldad, y lo e tuma accion na su debido tempo.​—Isa. 46:13; Nah. 1:9.

¹⁵ Durante e ultimo dianan dificil di e era aki, nos por haya nos cu situacionnan dificil cu por pone nos fe na prueba. Podise nos of nos sernan keri por bira victima di violencia of sufri pa un of otro motibo. E cosnan aki no mester pone nos reacciona rabia; en bes di esey, nos mester ta dicidido pa confia completamente den Jehova. Pero como cu nos ta imperfecto, esey no ta facil. No obstante, nos mester corda con Hesus a reacciona ora e tabata bou di prueba.​—Lesa Mateo 26:39.

16. Kico nos no mester haci durante e ultimo dianan aki?

¹⁶ Algo cu por stroba nos di imita e pasenshi di Jehova ta e actitud di ‘ban wak kico ta bay pasa.’ Dicon? Pasobra un hende cu tin e actitud ey no tin masha confianza cu e fin ta cerca, y kisas e ta prepara su mes pa por si acaso cosnan no sosode manera Jehova a priminti. Kisas e ta pensa: ‘Mi ta bay wak si Jehova ta cumpli cu su palabra.’ Y e por cuminsa busca prominencia of siguridad economico den e mundo aki en bes di pone e Reino di Dios na prome luga den su bida. Of, e por cuminsa confia den educacion avansa pa por logra un bida comodo awor. Esey no ta un prueba di falta di fe? Corda cu Pablo a urgi nos pa imita hendenan fiel cu “pa medio di fe y pasenshi” a ricibi e promesanan di Dios. (Heb. 6:12) Jehova lo no permiti e era malbado aki dura mas di loke ta necesario. Si, lo e no tarda. (Hab. 2:3) Mientrastanto, nos mester keda alerta, participa diligentemente den e trabou di predica e bon noticia y no djis sirbi Jehova pa obligacion. Di e manera ey, nos por haya satisfaccion incomparabel for di awor.​—Luc. 21:36.

17, 18. (a) Ki oportunidad nos tin awor mientras nos ta warda cu pasenshi? (b) Con nos pasenshi ta ser recompensa?

¹⁷ Sea cu nos tin un par di luna of varios decada ta sirbi Jehova, nos kier sirbie pa semper. Y si nos tin pasenshi, nos lo persevera te na fin di e era aki, sin importa cuanto nos tin cu warda. Jehova ta dunando nos awe e oportunidad di demostra cu nos ta confia plenamente den su decisionnan y cu nos lo keda fiel na dje maske nos tin cu soporta maldad pa causa di su nomber. (1 Ped. 4:13, 14) Ademas, e ta duna nos e formacion, of preparacion, cu nos tin mester pa nos por warda cu pasenshi te na fin y ser salba.​—1 Ped. 5:10.

¹⁸ Hesus tin autoridad tanto den cielo como riba tera. Ta pesey, nada no por strob’e di proteha bo. Ta abo so por strob’e. (Juan 10:28, 29) Nos no tin ningun motibo pa tin miedo di futuro ni di morto. Ken cu persevera te na fin lo ser salba. Pesey, nos mester tene cuidou pa e mundo no influencia nos y pone nos stop di confia den Jehova. En bes di esey, mientras cu Jehova ta demostra pasenshi, nos mester ta determina pa fortalece nos fe y uza nos tempo na un manera sabi.​—Mat. 24:13; lesa 2 Pedro 3:17, 18.