1. Ki prospecto emocionante ta spera e “multitud grandi”?

PURBA di imagina tur e cosnan bon cu un gobierno poderoso, encabesa pa un gobernante husto y bondadoso, lo por haci pa su pueblo durante 1.000 aña! Wel, e “multitud grandi” lo disfruta di e cosnan maraviyoso ey. E multitud grandi aki ta e sobrevivientenan di “e tribulacion grandi”, e tribulacion aki lo pone un fin completo na e sistema malbado cu ta existi awe.​—Rev. 7:9, 14.

2. Kico hende a experencia durante e ultimo 6.000 añanan?

² Durante e ultimo 6.000 añanan di historia humano, hende a purba di goberna nan mes, pero esaki a causa masha hopi dolor y sufrimento pa humanidad. Hopi tempo pasa Bijbel a bisa: “Hende a eherce autoridad riba . . . otro hende pa su daño.” (Ecl. 8:9) Kico nos ta mira awe? Fuera di guera y revolucion, tin e problemanan serio di pobreza, maleza, destruccion di medioambiente, cambio di clima, etcetera. Pero mayoria di hende tin e actitud di: ‘No mester preocupa cu nada.’ Funcionarionan gubernamental ta adverti cu si nos no cambia e actitud ey, e resultado lo ta desastroso.

3. Kico lo tuma luga durante e Reinado di Mil Aña?

³ Bou di mando di e Rey Mesianico Hesucristo y su 144.000 cogobernante, e Reino di Dios progresivamente lo dal paso pa corigi tur e daño causa na hende y na nan hogar, esta, planeta Tera. Durante e Reinado di Mil Aña, Jehova Dios su promesa alentador lo keda realisa: “Mi ta crea cielonan nobo y un tera nobo; y e cosnan di antes lo no wordo recorda mas ni bin na memoria.” (Isa. 65:17) Cua ta algun suceso maraviyoso cu lo tuma luga den futuro? Cu yudansa di Dios su Palabra profetico nos por haya un idea di e  cosnan maraviyoso cu lo tuma luga, pero cu ainda “hende no ta mira.”​—2 Cor. 4:18.

4. Dicon nos por bisa cu vivienda ta un problema serio awe?

⁴ Ken no ta desea di tin su propio cas, un luga caminda e cu su famia por sinti nan mes proteha y sigur? Ma den e mundo djawe ta masha dificil pa haya vivienda adecuado. Hende ta biba den casnan tur gelapi, riba otro, den bario margina of den edificio tur sushi y decai. Ta soña so e hendenan ey por soña di tin nan propio cas.

5, 6. (a) Con e profecia di Isaias 65:21 y di Mikeas 4:4 lo cumpli? (b) Con nos por ricibi e bendicion ey?

⁵ Bou di gobernacion di e Reino, e deseo di tur hende di tin nan propio cas lo keda realisa, pasobra Isaias a profetisa: “Nan lo traha cas y biba den nan; tambe nan lo planta cunucunan di wendruif y come nan fruta.” (Isa. 65:21) Sinembargo, hende por spera mas cu simplemente yega na nan propio cas. Awe, hopi hende ta biba den nan propio cas, y algun hasta ta biba den mansion, pero toch nan ta preocupa constantemente cu nan lo por perde nan cas debi na problema financiero of cu ladron of otro criminal lo por kibra drenta den nan cas. Bou di gobernacion di e Reino, nan lo no tin e preocupacionnan ey! Profeta Mikeas a skirbi: “Cada un di nan lo sinta bou di su palo di wendruif y bou di su palo di figo, y ningun hende lo no spanta nan.”​—Mik. 4:4.

⁶ Kico nos mester haci si nos kier mira e speransa maraviyoso ey cumpli? Ta claro cu awe nos tur tin mester di un luga adecuado pa biba aden. Pero kico ta e cos sabi pa haci aworaki? Acaso nos mester hinca nos curpa den debe grandi djis pa haya e cas di nos soño? Of nos mester fiha nos bista riba e promesa di Jehova? Corda cu Hesus a bisa di su mes situacion: “Zoro tin hol y parha di cielo tin neishi, ma e Yiu di hende no tin caminda pa pone su cabes.” (Luc. 9:58) Hesus tabatin e capacidad y poder pa traha of cumpra e mihor cas cu un hende hamas por tabatin. Pero dicon e no a haci esey? Hesus claramente no kier a envolve su mes den nada cu lo a strob’e di pone e Reino na prome luga den su bida. Nos lo por sigui su ehempel y tene nos wowo simpel? Nos lo por haci nos best pa no laga cosnan material bira e parti di mas importante di nos bida y yena nos cu inkietud?​—Mat. 6:33, 34.

7. Originalmente, ki relacion Jehova a ordena cu mester tin entre hende y bestia?

⁷ Durante e proceso di creacion, Jehova a traha hende te na ultimo, como e culminacion di su obranan riba tera. El a bisa su Yiu Primogenito, su Trahador Experto, kico precies tabata su proposito: “Laga nos traha hende segun nos imagen, conforme nos semehansa; y laga nan goberna riba e piscanan di lama y riba e parhanan di cielo y riba e bestianan di cria y riba henter e tera, y riba tur bestia cu ta lastra riba tera.” (Gen. 1:26) Pues, Adam cu Eva, y cu tempo tur hende, a haya e ordo pa cuida e bestianan y eherce dominio riba nan.

8. Con bestia ta comporta nan awendia?

⁸ Di berdad ta posibel pa hende eherce dominio riba tur bestia y keda na paz cu nan? Hopi hende stima nan bestianan di cas, por ehempel, cacho cu pushi. Pero kico di bestia salbahe? Segun un informe: “Cientificonan cu a biba cerca di bestia salbahe y a studia nan a descubri  cu tur mamifero tin sintimento.” Naturalmente, nos sa mira bestia haya miedo of bira agresivo ora nan ta sinti nan menasa. Acaso nan por demostra loke algun hende ta describi como sintimento di cariño? E informe a sigui bisa: “Ta ora mamiferonan ta cria nan yiunan, nan ta revela nan cualidad principal: nan tremendo capacidad di demostra tierno cariño.”

9. Ki cambio nos por spera relaciona cu bestia?

⁹ Pues, nos no mester keda sorprendi ora nos lesa den Bijbel cu lo reina paz entre hende y bestia. (Lesa Isaias 11:6-9; 65:25.) Dicon no? Wel, corda cu ora Noe cu su famia a sali for di e arca despues di Diluvio, Jehova a bisa nan: “E temor pa boso y e teror pa boso lo ta riba tur bestia di tera.” Esey lo a fungi como un proteccion pa e bestianan mes. (Gen. 9:2, 3) Pues, Jehova lo por kita un grado di e temor y teror ey pa asina e relacion entre hende cu bestia por ta manera el a ordena na principio. (Ose. 2:18) Esta un dushi tempo ta spera tur hende cu lo ta na bida riba tera e ora ey!

10. Dicon lagrima ta algo comun den bida di hende?

¹⁰ Ora Salomon a mira “tur e actonan di opresion cu a wordo haci bou di solo”, el a lamenta: “Mi a wak e lagrimanan di esnan oprimi, y . . . no tabatin ni un hende pa consola nan.” (Ecl. 4:1) Awe ta mescos, of hasta pio! Cua di nos no a yega di yora pa un motibo of otro? Ta berdad cu tin biaha e lagrimanan ta di alegria, pero mayoria di biaha, nan ta lagrima di tristeza y dolor.

11. Cua relato di Bijbel ta esun cu mas ta conmove bo?

¹¹ Pensa un rato riba e tantisimo relatonan conmovedor y emocional cu nos ta haya den Bijbel. Ora Sara a muri na edad di 127 aña, “Abraham a bin pa tene rouw pa Sara y pa yor’e.” (Gen. 23:1, 2) Ora Noemi a yama su dos nueranan viuda ayo, “nan a halsa nan bos y a yora.” Anto despues cu el a papia un poco mas cu nan, “nan a halsa nan bos y a yora atrobe.” (Ruth 1:9, 14) Ora Rey Ezekias a bira malo y tabatin sigur cu lo el a bay muri, el a resa na Dios y a cuminsa “yora amargamente.” Evidentemente, esey a conmove Jehova. (2 Rey. 20:1-5) Y ken no ta sintie conmovi ora e lesa e relato caminda apostel Pedro a nenga Hesus? Ora Pedro a tende gay canta, “el a bay pafo y yora amargamente.”​—Mat. 26:75.

12. Con gobernacion di e Reino lo trece berdadero alivio pa humanidad?

¹² Como cu tin asina tanto suceso tragico ta tuma luga​—cosnan grandi y chikito​—humanidad tin gran necesidad di consuelo y alivio. Esey ta loke e Reinado di Mil Aña lo provee pa su subditonan: “[Dios lo] seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas. E cosnan cu tabata pasa antes no t’ey mas.” (Rev. 21:4) Imagina bo, lo no tin tristeza, sclamacion ni dolor mas! Pero esey no ta tur cos. Dios a priminti cu lo e elimina hasta e enemigo di mas grandi di humanidad: morto! Con esey lo sosode?

13. Con morto a afecta hende for di dia cu Adam a peca?

¹³ For di dia cu Adam a peca, morto a reina riba hende manera un rey. El a resulta un enemigo invencibel. Ningun hende pecaminoso no por scapa di dje, y el a causa gran tristeza y dolor. (Rom. 5:12, 14) De echo, miyones di hende ta “den sclavitud henter nan bida pa motibo di nan miedo di muri.”​—Heb. 2:15.

14. Kico lo pasa ora caba cu morto?

 ¹⁴ Bijbel ta papia di un tempo ora cu morto lo ta “e ultimo enemigo” cu lo ser destrui. (1 Cor. 15:26) Tin dos grupo cu ta bin na consideracion pa beneficia di esaki. E prome grupo ta e “multitud grandi” cu ta na bida aworaki y cu lo por keda na bida y drenta e mundo nobo priminti cu e posibilidad di biba pa semper. E di dos grupo ta e miles di miyones di hendenan cu a muri caba y cu lo tin e posibilidad di lanta for di morto. Bo por imagina bo con contento y emociona e multitud grandi lo ta ora nan yama bonbini na e hendenan cu resucita? Un analisis di algun di e relatonan di resureccion cu tin den Bijbel lo por duna nos un idea di esey.​—Lesa Marco 5:38-42; Lucas 7:11-17.

15. Con kisas lo bo reacciona ora bo mira un ser keri cu a lanta for di morto?

¹⁵ Pensa riba e expresion “nan no por a contene nan mes di contento cu nan a bira” y e expresion “nan a cuminsa glorifica Dios.” Si bo tabata presente na e ocasionnan ey, kisas bo tambe lo a sinti asina. No tin duda cu nos lo sinti nos masha contento y emociona ora nos mira nos sernan keri lanta for di morto pa medio di e resureccion. Hesus a bisa: “Lo yega e ora cu tur esnan cu ta den graf lo tende su stem y lo sali afo.” (Juan 5:28, 29) Ningun di nos hamas a mira algo asina tuma luga. Esaki lo ta realmente un di e cosnan di mas maraviyoso cu aworaki “hende no ta mira”, pero cu lo tuma luga!

16. (a) Dicon nos tin cu papia cu entusiasmo tocante e bendicionnan cu nos no ta mira ainda? (b) Kico Pablo a bisa pa anima e cristiannan di Corinto?

¹⁶ Si, un futuro maraviyoso ta spera hende cu  keda fiel na Jehova den e tempo critico aki. Aunke ainda nos no ta mira e bendicionnan ey, toch ta bon pa nos keda pensa riba nan. Esey lo yuda nos concentra riba loke realmente ta importante y lo evita cu e atraccionnan pasahero di e mundo aki ta distrae nos. (Luc. 21:34; 1 Tim. 6:17-19) Tambe nos por papia cu entusiasmo tocante nos maraviyoso speransa pa futuro durante nos adoracion como famia, den combersacion cu nos rumannan den fe y ora nos ta papia cu studiante- y personanan interesa. Esaki lo mantene e speransa ey bibo den nos mente y curason. Ta asina apostel Pablo a anima su rumannan cristian. Cu su palabranan, el a hiba e rumannan ey, na moda di papia, te na conclusion di Cristo Su Reinado di Mil Aña. Purba di imagina e nificacion di e palabranan di Pablo na 1 Corintionan 15:24, 25, 28.​—Les’e.

17, 18. (a) Den ki manera Jehova tabata “tur cos pa tur hende” na principio di historia humano? (b) Con Hesus lo restaura paz y harmonia?

¹⁷ E palabranan “pa Dios por ta tur cos pa tur hende” ta e mihor descripcion cu tin di e manera cu bida lo ta na final di e 1.000 aña. Kico e palabranan ey kiermen? Pensa bek riba e tempo den Eden ora cu e pareha perfecto, Adam cu Eva, tabata forma parti di Jehova su famia universal cu tabata biba den paz y harmonia. Jehova, e Soberano di universo, tabata goberna directamente riba henter su creacion, riba tanto angel como hende. Nan por a comunica cu ne personalmente, ador’e y ser bendiciona p’e. E tabata “tur cos pa tur hende.”

¹⁸ E relacion harmonioso ey a daña ora cu hende, bou di influencia di Satanas, a rebela contra e soberania di Jehova. Pero desde aña 1914, e Reino Mesianico progresivamente a dal paso pa restaura e paz y harmonia ey. (Efe. 1:9, 10) Durante e Reinado di Mil Aña, cosnan maraviyoso cu actualmente “hende no ta mira” lo bira realidad. Kico lo pasa “na final”, esta, na conclusion di Cristo Su Reinado di Mil Aña? Wel, aunke Hesus a “ricibi tur autoridad den cielo y riba tera”, e no ta ambicioso. E no tin intencion di usurpa of kita e puesto di Jehova. Humildemente “lo e entrega e Reino na su Dios y Tata.” Si, semper Hesus lo uza su autoridad y posicion unico “pa gloria di Dios.”​—Mat. 28:18; Flp. 2:9-11.

19, 20. (a) Con tur hende bou di gobernacion di e Reino lo demostra cu nan ta acepta Jehova su derecho di goberna of no? (b) Ki speransa maraviyoso nos tin nos dilanti?

¹⁹ Na e tempo ey, tur hende riba tera lo a alcansa perfeccion bou di gobernacion di e Reino. Nan lo sigui e ehempel di Hesus, anto humildemente y di buena gana, nan lo acepta Jehova su derecho di goberna riba nan. Nan lo tin e oportunidad di demostra cu nan kier haci esey door di pasa e ultimo prueba cu exito. (Rev. 20:7-10) Despues di esaki, Jehova lo elimina tur rebelde pa semper, sea ta hende of angel. Henter e famia universal lo alaba Jehova, kende lo ta “tur cos pa tur hende.” Esta un dushi tempo esey lo ta!​—Lesa Salmo 99:1-3.

²⁰ E cosnan maraviyoso cu pronto e Reino lo realisa ta motiva bo pa enfoca bo atencion y esfuerso riba hacimento di e boluntad di Dios? Bo ta haci esfuerso pa e speransa y consuelo falso cu e mundo di Satanas ta ofrece no distrai bo? Lo bo fortalece bo determinacion pa apoya y defende Jehova su derecho di goberna? Laga bo echonan duna prueba cu esey ta loke bo kier haci pa semper. E ora ey lo bo tin e privilegio di gosa di paz y prosperidad, no pa 1.000 aña so, sino pa semper!