1. Kico Hesus a bisa tocante huramento, y dicon?

POR lo general, cristiannan no tin nodi hura. Dicon no? Pasobra nan ta obedece Hesus, kende a bisa: “Laga boso ‘si’ ta si.” Loke Hesus tabata kiermen ta cu un persona mester papia berdad y cumpli cu su palabra. Pero prome cu Hesus a bisa nan esey, el a urgi nan: “No hura mes.” El a bisa pa “no hura” pasobra hopi hende tin e custumber di hura siendo cu nan no tin ningun intencion di cumpli cu loke nan ta priminti. E echo cu un persona tin cu haci “mas”, esta, constantemente reforsa su palabranan cu huramento en bes di djis bisa si of no por ta un indicacion cu e persona aki no ta confiabel y cu e ta bou di influencia di “e Malbado.”​—Lesa Mateo 5:33-37.

2. Splica dicon no ta semper malo pa hura.

² Awor, nos por conclui for di e palabranan di Hesus cu semper ta malo pa hura? No. Manera nos a siña den e articulo anterior, Jehova Dios mes y tambe su sirbidor Abraham, un homber husto, a hura na ocasionnan importante. Ademas, pa resolve cierto problemanan, e Ley di Dios tabata rekeri pa un persona hura. (Exo. 22:10, 11; Num. 5:21, 22) Awe kisas un cristian tin cu hura ora di testigua den corte. Of, kisas​—na masha poco ocasion​—un cristian ta sinti cu e tin cu hura pa proba cu lo e cumpli cu su palabra of cu e ta papiando e berdad. Por ehempel, ora e sumo sacerdote a manda Hesus hura dilanti di Sanedrin hudiu cu lo e papia berdad, e no a bay contra y a papia e berdad. (Mat. 26:63, 64) Pero, Hesus no tabatin nodo di hura pasobra semper el a papia e berdad. No obstante, pa enfatisa cu su mensahe ta veridico, hopi biaha el a uza e expresion: “Di berdad berdad mi ta bisa boso.” ( Juan 1:51; 13:16, 20, 21, 38) Pesey, laga nos wak awor kico mas nos por siña for di e ehempel di Hesus, di Pablo y di otro sirbidornan cu a laga nan si ta si.

3. Kico Hesus a priminti su Tata celestial den oracion, y con su Tata a reacciona?

³ “Wak! Mi a bin . . . pa haci bo boluntad, o Dios.” (Heb. 10:7) Cu e palabranan aki, Hesus a priminti su Tata celestial cu e lo haci su boluntad. Si, el a priminti cu lo e cumpli cu tur loke e Scritura a profetisa encuanto e Simia priminti, incluso permiti Satanas “herida su hilchi di pia.” (Gen. 3:15) Niun otro hende no a yega di ofrece nan mes pa asumi un responsabilidad asina grandi. Y desde cielo, Jehova a expresa cu e tin pleno confianza den su Yiu, sin cu Hesus mester a hura cu lo el a cumpli cu su palabra.​—Luc. 3:21, 22.

4. Kico Hesus tabata dispuesto pa haci pa laga su si ta si?

⁴ Hesus semper a laga su si ta si. E no a laga nada distra’e ni strob’e di cumpli cu e trabou cu su Tata a dun’e, esta, di predica e bon noticia di Reino y di haci tur hende cu Dios a hala cerca dje discipel. ( Juan 6:44) Hesus a cumpli cu su promesa, pasobra Bijbel ta bisa: “Maske cuanto promesa tin di Dios, nan tur a bira Si pa medio di dje.” (2 Cor. 1:20) Si, Hesus ta un excelente ehempel den cumpli cu loke el a priminti Dios. Laga nos trata awor e ehempel di un persona cu a haci su maximo esfuerso pa imita Hesus.

5. Dicon apostel Pablo ta un bon ehempel pa nos?

⁵ “Kico mi tin cu haci, Señor?” (Echo. 22:10) Di e manera aki, Pablo, e tempo ey conoci como Saulo, a reacciona ora Señor Hesus a aparece na dje den un vision. El a compronde cu Hesus tabata kier pa e stop di persigui e cristiannan. Saulo a sinti duele di loke e tabata haci; el a batisa y a acepta e asignacion special pa proclama e bon noticia tocante Hesus na e nacionnan. For di e tempo ey padilanti, te na fin di su bida aki riba tera, Pablo a sigui yama Hesus su “Señor” y a obedec’e. (Echo. 22:6-16; 2 Cor. 4:5; 2 Tim. 4:8) Pablo no tabata manera e hendenan cu Hesus a bisa: “Pakico anto boso ta yama mi: ‘Señor! Señor!’, ma boso no ta haci loke mi ta bisa?” (Luc. 6:46) Si, Hesus ta spera cu tur hende cu acept’e como nan Señor ta cumpli cu nan palabra, mescos cu apostel Pablo a haci.

6, 7. (a) Dicon Pablo no a bishita e congregacion na Corinto manera el a plania na prome instante? (b) Dicon no tabata corecto cu algun ruman a acus’e di ta inconfiabel? (c) Con nos mester trata esnan nombra pa dirigi e congregacion?

 ⁶ Pablo a haci e trabou di predica diligentemente: El a plama e mensahe di Reino den henter Asia Menor y Europa. El a establece hopi congregacion y a bolbe bishita nan. Na algun ocasion, el a sinti cu e mester a hura pa proba cu loke el a skirbi tabata berdad. (Gal. 1:20) Por ehempel, ora algun hende den Corinto a acus’e di ta inconfiabel, Pablo a bisa nan: “Mescos cu Dios ta confiabel, asina tambe loke nos ta bisa boso no ta Si y na mes momento No.” (2 Cor. 1:18) Ora Pablo a skirbi e palabranan aki, ya el a bandona Efeso y tabata na Macedonia rumbo pa Corinto. Originalmente, Pablo su intencion tabata pa bolbe bishita e rumannan na Corinto prome cu e bay Macedonia. (2 Cor. 1:15, 16) Pero tin biaha, superintendentenan biahero tin cu cambia nan plannan. Nan no ta haci e cambionan aki pa motibonan egoista of pa cosnan cu no ta importante, ma pa motibo di emergencia. Den caso di Pablo, e motibo pakico e no a bay Corinto di biaha tabata pa bienestar di e rumannan. Con asina?

⁷ Ora Pablo tabata na Efeso, el a tende cu tabatin problema den e congregacion di Corinto. E rumannan tabata tolera inmoralidad y tabatin desacuerdo entre nan. (1 Cor. 1:11; 5:1) Pa yuda resolve e problemanan, Pablo a duna conseho fuerte den su prome carta na e Corintionan. Despues, en bes di nabega for di Efeso stret pa Corinto, Pablo a dicidi di duna e rumannan tempo pa aplica su conseho pa, ora e yega, su bishita por ta mas animante pa nan. Pablo a laga e rumannan na Corinto compronde bon cla cu e tabatin bon motibo pa cambia su plannan. Den su di dos carta, el a skirbi nan: “Mi ta yama Dios como testigo y ta hura pa mi bida cu ta pa spaar boso di mas tristeza mi no a bin Corinto ainda.” (2 Cor. 1:23) Laga nos nunca ta manera e hendenan cu a critica Pablo. Nos mester tin respet profundo pa esnan nombra pa dirigi e congregacion. Pablo a cumpli cu loke el a priminti. Nos mester imita su ehempel, mescos cu el a imita Cristo.​—1 Cor. 11:1; Heb. 13:7.

8. Ki ehempel Rebeca a pone pa nos?

⁸ “Mi kier bay.” (Gen. 24:58) Asina Rebeca a contesta su mama y su ruman homber ora nan a puntr’e si e kier a bandona nan e dia ey y haci un biahe di mas cu 800 kilometer hunto cu un stranhero pa bira esposa di Abraham su yiu homber Isaak. (Gen. 24:50-58) Sin duda, Rebeca su si tabata si. El a bira un bon casa pa Isaak y a sirbi Dios fielmente. Pa resto di su bida el a biba den tent como stranhero den e Tera Priminti. Y Dios a recompens’e pa su fieldad; el a bira antepasado di e Simia priminti, cu ta Hesucristo.​—Heb. 11:9, 13.

9. Con Ruth a laga su no ta no?

⁹ “Nò, nos ta bay bo pueblo ku bo.” (Ruth 1:10, BPK) Esaki ta loke e viudanan Moabita Ruth y Orfa tabata bisa nan suegra Noemi bes tras bes ora e tabata roga nan pa nan bay nan pueblo bek. Noemi, kende tambe tabata viuda, a sali for di Moab y tabata riba caminda pa bay Betlehem bek. Finalmente, riba insistencia di Noemi, Orfa a dicidi di bay bek, pero Ruth si a laga su no ta no. (Lesa Ruth 1:16, 17.) El a keda leal na Noemi aunke cu esey lo a nifica cu nunca mas lo el a mira su famia. Ademas, e mester a bandona e religion falso di Moab. Si, el a sirbi Jehova fielmente pa resto di su bida, y Jehova a recompens’e. E tabata un di e cinco hende muhernan cu Mateo a menciona den e genealogia di Cristo.​—Mat. 1:1, 3, 5, 6, 16.

10. Dicon Isaias ta un bon ehempel pa nos?

¹⁰ “At’ami aki! Manda ami!” (Isa. 6:8) Isaias a expresa e palabranan aki pasobra den un glorioso vision, el a tende Jehova, kende tabata sinta riba Su trono, puntra: “Ken lo mi manda y ken lo bay pa nos?” Jehova tabata busca un persona pa fungi como vocero pa hiba Su mensahe na Su pueblo desobediente. Ora Isaias a bisa: “At’ami aki! Manda ami!” ta comosifuera el a priminti cu e lo haci e trabou cu Jehova a dun’e. Y el a cumpli cu su palabra: Su si tabata si. Pa mas cu 46 aña, el a sirbi Dios fielmente como profeta. El a profetisa cu Dios lo a castiga Su pueblo desobediente y cu despues lo el a reestablece adoracion berdadero.

11. (a) Dicon ta importante pa nos cumpli cu nos palabra? (b) Menciona algun persona cu no a cumpli cu nan palabra.

¹¹ Dicon Jehova a laga registra e ehempelnan aki den su Palabra? Y dicon nos mester laga nos si ta si? Bijbel ta bisa bon cla cu un hende “cu no ta cumpli cu [su] palabra . . . merece morto.” (Rom. 1:31, 32) Farao di Egipto, Rey Sedekias di Juda y Ananias cu Safira ta personanan cu no a cumpli cu nan palabra. Y manera Bijbel ta mustra, cos no a bay bon cu nan. Nan ta sirbi como un spiertamento pa nos.​—Exo. 9:27, 28, 34, 35; Eze. 17:13-15, 19, 20; Echo. 5:1-10.

12. Kico lo yuda nos cumpli cu nos palabra?

¹² Den “e ultimo dianan” aki, nos ta rondona pa hende “desleal”, kendenan “tin apariencia di ta devoto na Dios, ma cu no ta demostra e devocion ey den nan bida.” (2 Tim. 3:1-5) Nos tin cu evita e clase di hendenan ey mas tanto posibel pasobra nan ta mal compania. Mas bien, nos mester asocia regularmente cu hende cu semper ta haci esfuerso pa laga nan si ta si.​—Heb. 10:24, 25.

13. Na ki ocasion un siguidor di Hesucristo ta bisa e si di mas importante?

¹³ E promesa di mas importante cu un hende por haci tin di haber cu su dedicacion na Dios. Ora un persona kier bira discipel di Hesus, e ta haya tres oportunidad pa declara cu realmente e kier cumpli cu e rekisitonan di Dios. (Mat. 16:24) Esun prome ta ora e persona kier bira un publicador cu no ta batisa. Na e ocasion aki, dos anciano ta reuni cu e persona y ta puntr’e: “Di berdad bo kier ta un Testigo di Jehova?” Despues, ora e persona progresa spiritualmente y kier batisa, e ancianonan cu reuni cu ne ta puntr’e: “Abo a dedica bo mes na Jehova den oracion?” Y finalmente, riba dia di bautismo, e orador ta puntra e candidatonan: “A base di e sacrificio di Hesucristo, bo a arepenti di bo picanan y a dedica bo mes na Jehova pa haci su boluntad?” E ora ey, tur hende presente ta tende nan contesta si, primintiendo asina cu nan lo sirbi Dios pa semper.

14. Con nos mester analisa nos mes regularmente?

¹⁴ Sea cu bo ta recien batisa of tin hopi aña ta sirbi Dios, regularmente bo mester haci bo mes preguntanan manera: ‘Mi ta imita Hesucristo y ta laga mi si di mas importante keda si? Ainda mi ta obedece Hesus y ta duna prioridad na e trabou di predica y di haci discipel?’​—Lesa 2 Corintionan 13:5.

15. Den ki aspectonan di bida ta importante pa nos si ta si?

¹⁵ Pa nos por cumpli cu e promesa cu nos a haci ora nos a dedica nos mes na Jehova, nos mester ta fiel den otro asuntonan importante tambe. Por ehempel: Si bo ta casa, sigui cumpli cu e voto matrimonial di stima y cuida bo casa. Bo a firma un contract di negoshi of a yena un formulario pa participa den cierto privilegio di sirbishi? Cumpli cu loke bo a priminti. Bo a acepta un invitacion pa bay come na cas di un persona cu tin menos recurso? No keda sin bay djis pasobra bo a haya un otro invitacion cu por parce mihor. Of kico si bo a priminti un persona cu bo a topa den sirbishi di cas pa cas cu lo bo bolbe bek? Si, haci tur bo esfuerso pa bo si ta si y Jehova lo bendiciona bo sirbishi.​—Lesa Lucas 16:10.

16. Kico nos mester haci ora nos realisa cu nos no a cumpli cu nos palabra?

¹⁶ Bijbel ta bisa cu como hende imperfecto, “nos tur ta trompica hopi biaha”, vooral den e manera cu nos ta uza nos lenga. (Sant. 3:2) Kico nos mester haci ora nos realisa cu nos no a cumpli cu nos palabra? Segun e Ley cu Dios a duna Israel, un persona cu a “papia sin pensa” por a haya misericordia. (Lev. 5:4-7, 11) Awe tambe tin un provision amoroso pa un cristian cu keda sin cumpli cu su palabra. Si nos confesa nos pica na Jehova, e lo mustra misericordia y pordona nos pa medio di nos Sumo Sacerdote, Hesucristo. (1 Juan 2:1, 2) Sinembargo, pa nos por tin Dios su aprobacion, nos mester demostra cu nos a arepenti di berdad y evita e custumber di priminti algo sin cumpli cu nos palabra. Ademas, nos tin cu haci esfuerso pa drecha cualkier daño cu nos por a causa debi cu nos a keda sin cumpli cu nos palabra. (Prov. 6:2, 3) Claro cu ta mihor pa semper pensa bon prome cu nos haci un promesa cu nos no por cumpli cu ne.​—Lesa Eclesiastes 5:2.

17, 18. Ki futuro maraviyoso ta spera tur esnan cu ta haci esfuerso pa laga nan si ta si?

¹⁷ Adoradornan di Jehova cu ta traha duro pa laga nan si ta si pronto lo disfruta di un futuro maraviyoso. Pa e 144.000 unginan, esey lo nifica bida inmortal den cielo, caminda ‘nan lo reina como rey hunto cu [Hesus] pa 1.000 aña.’ (Rev. 20:6) Pero pa miyones di hende, kendenan lo beneficia di e reinado ey, esey lo nifica bida den Paradijs aki riba tera. Bou di Cristo su gobernacion, hende lo bira perfecto, tanto fisicamente como mentalmente.​—Rev. 21:3-5.

¹⁸ Na fin di Hesus su Reinado di Mil Aña, lo tin e prueba final. Esnan cu keda fiel durante e prueba ey lo biba pa semper den Paradijs, unda hende lo no tin motibo mas pa duda den otro su palabra. (Rev. 20:7-10) Tur si lo ta si, y tur no lo ta no. Dicon? Pasobra tur hende cu ta na bida e tempo ey lo ta perfecto y lo imita nos amoroso Tata celestial, Jehova, kende no por “gaña.”​—Heb. 6:18.