1. Ki diferencia tin entre e promesanan di Dios y esnan di hende?

TA IMPOSIBEL pa Jehova “gaña.” (Heb. 6:18) Hende si nos no por confia tur ora, pasobra nan ta imperfecto. Na contraste, Bijbel ta bisa cu “Dios no ta hende, cu e lo gaña.” (Lesa Numbernan 23:19.) Dios semper ta cumpli cu loke el a priminti di haci pa hende. Por ehempel, na comienso di cada dia, of periodo, di creacion, Dios a bisa kico lo el a crea riba e dia ey, y semper el a cumpli cu su palabra. Pesey, na final di e di seis dia di creacion, “Dios a mira tur loke el a traha, y ata, tur cos tabata masha bon.”​—Gen. 1:6, 7, 30, 31.

2. Kico Dios su dia di sosiego ta, y dicon el a santifica e dia ey?

² Despues cu Jehova Dios a tira un bista riba tur su creacion, el a anuncia comienso di e di shete dia. Mescos cu e otro dianan di creacion, esaki no tabata un dia literal di 24 ora, ma un periodo largo di tempo durante cua Dios ta sosega den e sentido cu el a stop di crea cos riba nos planeta. (Gen. 2:2) Y su dia di sosiego no a termina ainda. (Heb. 4:9, 10) Bijbel no ta bisa ki dia exactamente e dia ey a cuminsa. Pero nos sa cu tabata algun tempo despues cu Jehova a crea Eva, Adam su esposa, un 6.000 aña pasa. Pronto, Hesucristo lo cuminsa reina pa mil aña. Ta durante e reinado ey, Dios su proposito pa tera lo ser realisa completamente: Tera lo bira un paradijs caminda hende perfecto lo biba pa semper. (Gen. 1:27, 28; Rev. 20:6) Nos por tin un futuro briyante asina di berdad? Sigur cu si! Dicon? Pasobra “Dios a bendiciona e di shete dia y a santific’e.” Esaki ta un garantia cu, ni maske kico sosode, Dios su proposito lo cumpli sigur na fin di su dia di sosiego.​—Gen. 2:3.

3. (a) Ki rebelion a tuma luga despues cu Dios su dia di sosiego a cuminsa? (b) Con Jehova a mustra cu lo e resolve e problema aki?

 ³ Sinembargo, despues cu Dios su dia di sosiego a cuminsa, a bin problema. Satanas, kende tabata un yiu angelical di Dios, a lanta contra Dios. El a lansa e prome mentira, gañando Eva y a pon’e desobedece Jehova. (1 Tim. 2:14) Eva, na su turno, a pone cu su esposo tambe a join e rebelion. (Gen. 3:1-6) E rebelion aki tabata e cos di mas teribel cu a yega di tuma luga. Satanas a insinua cu Jehova no ta papia berdad. Pero ni na e momento ey, Jehova no a haya cu tabata necesario pa hura cu su proposito pa tera lo cumpli sigur. En bes di esey, el a haci un promesa cu hende lo a compronde despues. Si, el a gewoon bisa con lo e resolve e problema. El a priminti: “Lo mi pone enemistad entre abo [Satanas] y e muher, y entre bo simia y su simia; e [esta, e Simia priminti] lo herida bo cabes, y abo lo herida su hilchi di pia.”​—Gen. 3:15; Rev. 12:9.

4, 5. Kico Abraham a haci uzo di dje de bes en cuando?

⁴ Prome cu e rebelion cu a tuma luga den hofi di Eden, probablemente hende no tabatin nodo di hura cu nan ta papia berdad. Dicon no? Pasobra criaturanan perfecto, kendenan ta stima Dios y ta imit’e, no tin nodo di hura; semper nan ta papia berdad y ta confia otro plenamente. Pero cos a cambia ora hende a peca y bira imperfecto. Cu tempo, gañamento a bira un cos normal pa hende. Pesey a bira necesario pa​—ora ta trata di asuntonan importante​—hende hura cu nan lo a papia berdad. Y segun nan ley, si un hende no a cumpli cu loke nan a hura, e mester a ser castiga.

⁵ Por lo menos tres biaha, e patriarca Abraham a haci uzo di e echo cu hende por a hura. (Gen. 21:22-24; 24:2-4, 9) Un ocasion cu el a haci esey tabata despues cu el a derota rey di Elam y su aliadonan. Bijbel ta conta cu e rey di Salem y e rey di Sodoma a bay topa Abraham. Fuera di e echo cu e tabata Rey di Salem, Melkisedek tabata “sacerdote di e Dios Haltisimo” tambe. Como tal, el a bendiciona Abraham y a alaba Dios pasobra El a yuda Abraham vence su enemigonan. (Gen. 14:17-20) Y ora e rey di Sodoma kier a recompensa Abraham pasobra el a libra su pueblo for di man di ehercitonan invasor, Abraham a bisa: “Mi [ta] hura na SEÑOR, e Dios Haltisimo, Creador di cielo y di tera, cu lo mi no tuma ni un pida hilo ni strep di sandalia ni nada di bo, pa bo no bisa: ‘Mi a haci Abram rico.’”​—Gen. 14:21-23.

6. (a) Ki ehempel Abraham a pone pa nos? (b) Con Abraham su obediencia ta beneficia nos?

⁶ Pa hende pecaminoso por confia den Jehova su promesanan, e tambe a yega di hura. Den e casonan ey, Jehova tabata uza expresionnan manera: “‘Manera mi ta biba’, Señor DIOS ta declara.” (Eze. 17:16) Bijbel ta haci mencion di mas cu 40 huramento cu Jehova Dios a yega di haci. Kisas e ehempel mas conoci ta loke Jehova a hura na Abraham. A traves di un periodo di varios aña, Jehova a haci diferente promesa na Abraham. For di e promesanan aki, Abraham por a compronde cu e Simia priminti lo a bin for di su descendientenan, pa medio di su yiu homber Isaak. (Gen. 12:1-3, 7; 13:14-17; 15:5, 18; 21:12) Despues di a haci e promesanan aki, Jehova a manda Abraham sacrifica su yiu stima. Abraham tabata cla pa obedec’e y a tuma e pasonan necesario aunke esaki tabata algo masha dificil p’e. Pero ora Abraham  tabata a punto di sacrifica Isaak, Jehova Dios a manda un angel pa stop e, y na e ocasion ey, Jehova a hura, bisando: “Pa mi mes mi ta hura . . . cu pasobra bo a haci e cos aki y no a nenga bo yiu, bo unico yiu, di berdad lo mi bendiciona bo grandemente, y lo mi multiplica bo descendientenan grandemente manera e streanan di e cielonan y manera e santo cu tin canto di lama; y bo descendientenan lo posee e porta di nan enemigonan. Y [“pa medio di bo Simia”, NW] tur e nacionnan di e tera lo ta bendiciona, pasobra bo a obedece mi bos.”​—Gen. 22:1-3, 9-12, 15-18.

7, 8. (a) Dicon Dios a hura na Abraham? (b) Con Cristo su ‘otro carnenan’ lo beneficia di loke Dios a hura?

⁷ Dicon Dios a hura na Abraham cu Su promesanan lo a cumpli sigur? El a haci esey pa encurasha esnan cu lo a bira coheredero cu Cristo​—esta, esnan cu ta forma e parti secundario di e “simia” priminti​—y pa fortalece nan fe. (Lesa Hebreonan 6:13-18; Gal. 3:29, nota) Ta manera apostel Pablo a splica: ‘Jehova a agrega un huramento na su palabra pa asina​—pa medio di e dos cosnan incambiabel aki [esta, su promesa y su huramento] den cua ta imposibel pa Dios gaña​—nan por ricibi un gran estimulo cu ta yuda nan haya un gara firme riba e speransa poni nan dilanti.’

⁸ Pero no ta cristiannan ungi so ta beneficia di loke Dios a hura na Abraham. Jehova a hura cu pa medio di e simia, of descendiente, di Abraham, hende di “tur e nacionnan di e tera lo ta bendiciona.” (Gen. 22:18) Cristo su ‘otro carnenan’ obediente, esta, personanan cu tin e speransa di biba pa semper den Paradijs riba tera, tambe ta entre esnan cu lo ta bendiciona. (Juan 10:16) Pues, sea cu bo tin e speransa di biba pa semper den cielo of riba tera, haci tur bo esfuerso pa bo tin “un gara firme” riba bo speransa. Con bo por haci esey? Kedando obediente na Dios den tur cos.​—Lesa Hebreonan 6:11, 12.

9. Kico Dios a hura ora e descendientenan di Abraham tabata esclavo na Egipto?

⁹ Siglonan despues, Jehova a bolbe hura cu e lo cumpli cu e promesanan cu el a haci na Abraham ora el a manda Moises papia cu e descendientenan di Abraham cu tabata esclavo na Egipto. (Exo. 6:6-8) Profeta Ezekiel ta laga nos compronde esaki pasobra el a bisa cu relaciona cu e ocasion ey Jehova a declara: “Riba e dia cu mi a scoge Israel . . . mi a haci un huramento  na nan pa saca nan for di tera di Egipto hiba na un tera cu mi a scoge pa nan, cu tin lechi y miel na abundancia.”​—Eze. 20:5, 6.

10. Ki promesa Dios a haci na e nacion di Israel despues cu el a libra nan for di Egipto?

¹⁰ Despues cu Jehova a libra Israel for di Egipto, el a bolbe haci un promesa solem na nan. El a bisa nan: “Si di berdad boso kier obedece mi bos y warda mi alianza, e ora ey boso lo ta un tesoro peculiar riba tur pueblo, pasobra henter tera ta di mi; y boso lo ta pa mi un reino di sacerdotenan y un nacion santo.” (Exo. 19:5, 6) Di e manera ey, Dios a ofrece e nacion di Israel un gran privilegio. Esey a nifica cu si nan a obedece Jehova, hende di e nacion ey por a bira parti di un reino di sacerdote cu lo a bendiciona e resto di humanidad. Mas despues, Jehova a splica cu na e ocasion ey tambe el “a haci un huramento.”​—Eze. 16:8.

11. Con Israel a reacciona ora Dios a duna nan e oportunidad di bira su pueblo special?

¹¹ Jehova no a obliga Israel pa hura cu nan lo a obedec’e ni e no a forsa nan pa cuminsa un relacion special cu ne. No, ta di nan mes boluntad nan a bisa: “Tur loke SEÑOR a bisa, nos lo haci!” (Exo. 19:8) Tres dia despues, Jehova Dios a bisa Israel kico e tabata spera di nan como su nacion scogi. Pa di prome, nan mester a cumpli cu e Dies Mandamento cu el a duna nan. Ademas, nan mester a cumpli cu e otro mandamentonan cu tin registra na Exodo capitulo 20:22 te cu 23:33. Con Israel a reacciona? “Henter e pueblo a contesta unanimamente y a bisa: ‘Tur e palabranan cu SEÑOR a papia nos lo haci!’” (Exo. 24:3) Despues, Moises a skirbi e leynan den “e buki di alianza” y a lesa nan na bos halto pa henter e nacion por a tende atrobe. Despues di esey, pa di tres biaha e pueblo a hura: “Tur loke SEÑOR a bisa, nos lo haci, y nos lo ta obedecido!”​—Exo. 24:4, 7, 8.

12. Kico Jehova y e nacion di Israel a haci despues cu nan a cera un pacto cu otro?

¹² Mesora Jehova a cuminsa cumpli cu su parti di e pacto di Ley. El a duna nan instruccion pa traha un tent di adoracion; el a scoge sacerdotenan pa sirbi na e tent aki y pa yuda hende pecador haya un bon relacion cu ne. Sinembargo, Israel si a lubida masha lihe loke nan a priminti y tabata haci ‘e Santo di Israel dolor.’ (Sal. 78:41, NW) Por ehempel, ora Moises tabata riba e Sero di Sinai pa ricibi mas instruccion di Jehova, e Israelitanan a bira impaciente y a cuminsa perde fe den Dios. Nan a pensa cu Moises a bandona nan. Pesey nan a traha un bishe di oro y a bisa: “Esaki ta bo dios, o Israel, cu a saca bo for di tera di Egipto.” (Exo. 32:1, 4) Despues nan a tene un supuesto “fiesta na SEÑOR”: Nan a cuminsa buig y haci sacrificio na e imagen cu nan a traha. Ora Jehova a mira kico nan tabata haci, el a bisa Moises: “Masha lihe nan a bandona e caminda cu mi a ordena nan.” (Exo. 32:5, 6, 8) For di e tempo ey padilanti, Israel a hura hopi cos mas na Dios, pero lamentablemente nan no tabata cumpli cu loke nan a priminti.​—Num. 30:2.

13. Kico Jehova a hura na Rey David, y kico e promesa ey tin di haber cu e Simia priminti?

¹³ Durante reinado di Rey David, Jehova a haci dos huramento mas cu lo beneficia tur hende cu obedec’e. Prome, el a hura na David cu su trono lo permanece pa semper. (Sal. 89:35, 36; 132:11, 12) Esaki ta nifica cu e Simia priminti lo a hereda e trono di David y cu lo  el a ser yama “Yiu di David.” (Mat. 1:1; 21:9) David humildemente a yama e Simia priminti “Señor” pasobra Cristo lo a bay ocupa un posicion mas halto cu esun di dje.​—Mat. 22:42-44.

14. Kico Jehova a hura relaciona cu e Simia priminti, y con nos ta beneficia di e promesa aki?

¹⁴ E di dos huramento: Jehova a inspira David pa profetisa cu e Rey aki lo a sirbi tambe como Sumo Sacerdote pa humanidad. Esaki tabata algo masha special, pasobra segun e Ley cu Jehova a duna Israel, sacerdotenan mester tabata di e tribu di Levi y reynan mester tabata di e tribu di Juda. Pues e tempo ey, un persona no por a sirbi como rey y alabes como sacerdote. Pero relaciona cu e futuro Rey ey, David a profetisa: “SEÑOR ta bisa mi Señor: ‘Sinta na mi man drechi, te ora mi haci bo enemigonan un banki pa bo pianan.’ SEÑOR a hura, y lo no arepenti: ‘Bo ta un sacerdote pa semper, segun e ordo di Melkisedek.’” (Sal. 110:1, 4) Si, manera David a profetisa, actualmente Hesucristo, e Simia priminti, ta goberna den cielo. Ademas, e ta sirbi como Sumo Sacerdote di humanidad, yudando hende cu arepenti cultiva un bon relacion cu Dios.​—Lesa Hebreonan 7:21, 25, 26.

15, 16. (a) Cua dos nacion di Israel Bijbel ta menciona, y cua di nan tin Dios su bendicion awe? (b) Ki mandamento tocante huramento Hesus a duna su siguidornan?

¹⁵ Cu tempo, e nacion di Israel a perde Jehova su aprobacion y e gran oportunidad di bira ‘un reino di sacerdote.’ Dicon? Pasobra nan a rechasa Hesucristo. Anteriormente, Hesus a bisa e lidernan religioso hudiu: “Lo kita e Reino di Dios for di boso y dun’e na un nacion cu ta duna fruta pa e Reino.” (Mat. 21:43) E nacion nobo ey a bin na existencia na Pentecoste di aña 33 di nos era ora cu Dios a drama su spirito santo riba rond di 120 discipel di Hesucristo, kendenan tabata reuni na Jerusalem. Nan tabata e prome miembronan di e nacion nobo aki cu a bira conoci como “e Israel di Dios.” Y no a dura hopi cu miles di hende mas, procedente di varios nacion, a bin forma parti di e Israel di Dios.​—Gal. 6:16.

¹⁶ Distinto for di e nacion literal di Israel, e nacion nobo aki si ta obedece Dios fielmente; nan si ta produci bon fruta pa e Reino. Un di e mandamentonan cu e miembronan di e nacion ey ta cumpli cu ne tin di haber cu huramento. Tempo cu Hesus tabata na tera, hende tabata hura pa cosnan insignificante of cu no tabata ni berdad. (Mat. 23:16-22) Pesey, Hesus a siña su siguidornan: “No hura mes . . . Simplemente, laga boso ‘si’ ta si, y boso ‘no’, no; pasobra tur loke ta mas cu esey ta bin di e Malbado.”​—Mat. 5:34, 37.

17. Ki preguntanan e siguiente articulo di estudio lo contesta?

¹⁷ Awor, loke Hesus a bisa su siguidornan ta nifica cu semper ta malo pa hura? Mas importante ainda, kico e tabata kiermen cu laga bo si ta si? E siguiente articulo di estudio lo contesta e preguntanan aki. Mientrastanto, laga nos sigui medita riba e Palabra di Dios y permiti esaki motiva nos pa obedece Jehova semper. E ora ey, e, na su turno, lo bendiciona nos, manera el a priminti y a hasta hura cu lo e haci.