1. Kico ta bin na hende su mente ora nan tende e palabra “esclavo”?

UN ESCRITOR Griego di obra teatral a yega di bisa un 2.500 aña pasa: ‘Niun hende no ta bira esclavo di nan propio boluntad.’ Hopi hende awe ta di acuerdo cu ne. Ora hende tende e palabra “esclavo”, nan ta pensa riba homber- y muhernan cu ta ser obliga pa sirbi otro hende, cu ta ser maltrata y cu ta traha pa beneficia nan doño, kende ta manda riba nan.

2, 3. (a) Con e esclavonan di Cristo ta ser trata? (b) Ki preguntanan e articulo aki lo contesta?

² No obstante, Hesus a bisa cu su discipelnan lo ta esclavo, esta, sirbidornan humilde. Pero nan no ta ser humilia ni maltrata. Al contrario, nan doño ta confia nan, honra nan y respeta nan. Wak por ehempel kico Cristo a bisa di un “esclavo.” Un poco prome cu Su morto, el a bisa cu lo e duna e esclavo “fiel y prudente” ey cierto tareanan importante.​—Mat. 24:45-47.

³ Den un otro relato, Bijbel ta yama e esclavo ey “mayordomo.” (Lesa Lucas 12:42-44.) Mayoria di cristian awe no ta forma parti di e grupo di “e mayordomo fiel” ey. Sinembargo, e Scritura ta mustra cu, den un sentido, tur sirbidor di Dios ta mayordomo. Awor, ki responsabilidad esey ta trece cu ne? Con nos mester mira e responsabilidadnan ey? Pa contesta e preguntanan aki, laga nos analisa e papel cu mayordomonan tabatin den pasado.

4, 5. Ki responsabilidadnan un mayordomo tabatin den tempo biblico? Duna algun ehempel.

⁴ Den tempo biblico, hopi biaha, un mayordomo  tabata un esclavo confiabel cu tabatin e responsabilidad di supervisa e cas of asuntonan di negoshi di su doño. E tabata maneha propiedad y placa di su doño y tabatin autoridad riba e otro sirbidornan. Si, un mayordomo tabatin hopi autoridad. Laga nos tuma por ehempel Eliezer, e mayordomo di Abraham. Abraham tabatin hopi pertenencia y a confi’e cu tur. Y probablemente Abraham a manda e bay Mesopotamia pa scoge un esposa pa su yiu homber Isaak. Esey tabata un responsabilidad grandi.​—Gen. 13:2; 15:2; 24:2-4.

⁵ Jozef, e bisanieto di Abraham, tabata mayordomo di Potifar. (Gen. 39:1, 2, 4) Cu tempo, Jozef tambe tabatin un mayordomo, kende tabata encarga cu e asuntonan di su cas. Ta e mayordomo ey a atende Jozef su dies rumannan y a percura pa nan ora nan a yega Egipto. Y riba ordo di Jozef, el a maniobra asunto cu un copa di plata pa pone Jozef su rumannan na prueba. E ehempelnan aki ta mustra cuanto un doño tabata confia su mayordomo.​—Gen. 43:19-25; 44:1-12.

6. Ki responsabilidadnan ancianonan tin?

⁶ Siglonan despues, apostel Pablo a skirbi cu superintendente-, of ancianonan, ta “mayordomo di Dios.” (Tito 1:7) Ancianonan ta ser nombra pa pastorea “e tou di Dios”, pesey nan ta duna guia y ta dirigi e congregacion cristian. (1 Ped. 5:1, 2) Ta claro cu ancianonan tin diferente responsabilidad den e organisacion di Dios. Por ehempel, mayoria di anciano awe ta sirbi un congregacion so, mientras cu superintendentenan biahero ta sirbi hopi congregacion. Anto e miembronan di Comite di Sucursal ta sirbi e congregacionnan di un of mas pais. No obstante, tur anciano mester cumpli cu nan asignacionnan fielmente; nan tur tin cu “duna cuenta” na Dios.​—Heb. 13:17.

7. Con nos por sa cu, den un sentido, tur cristian ta mayordomo?

⁷ Pero kico di tur e cristiannan fiel cu no ta anciano? Apostel Pedro a skirbi un carta cu ta conta pa tur cristian, bisando: “Te na e grado cu cada un di boso a ricibi un don, uz’e pa sirbi otro como bon mayordomo di e bondad inmereci di Dios cu ta ser expresa na varios manera.” (1 Ped. 1:1; 4:10) Dios, den su bondad inmereci, a duna cada un di nos don, habilidad, capacidad of cierto talentonan cu nos por uza na beneficio di nos rumannan den fe. Pues, tur sirbidor di Dios ta mayordomo. Pesey, e ta confia y ta respeta nos, y nos tin cu haci bon uzo di loke el a duna nos.

8. Menciona un principio importante cu nos tin cu tene na mente.

⁸ Awor, laga nos trata tres principio cu tur mayordomo, of cristian berdadero, mester tene na mente. E prome ta: Nos tur ta pertenece na Dios y mester duna cuenta na dje. Pablo a skirbi: “Boso no ta pertenece na boso mes: Dios a cumpra boso pa un prijs halto.” E prijs aki ta e sanger di Cristo cu el a duna como sacrificio. (1 Cor. 6:19, 20) Pues, como cu nos tur ta pertenece na Jehova, nos tin cu obedece su mandamentonan, y su mandamentonan no ta pisa. (Rom. 14:8; 1 Juan 5:3) Ademas, nos ta esclavo di Cristo tambe. Y mescos cu e mayordomonan den tempo biblico, nos tin hopi libertad. Pero nos no tin libertad absoluto. Nos tin cu sigui instruccion. Pues, maske cuanto privilegio of responsabilidad nos tin den e organisacion di Dios, nos ta keda sirbidor di Dios y di Cristo.

9. Con Hesus a ilustra loke un doño ta spera di su esclavo?

⁹ Awor, kico un doño ta spera di su esclavo? Laga nos wak con Hesus a ilustra esey. Un biaha, el a conta su discipelnan  di un esclavo cu a yega cas despues di un dia largo di trabou. Kico bo ta kere e doño a bisa su esclavo? “Bin aki mesora y sinta come na mesa?” No, el a bisa e esclavo: “Prepara algo pa mi come, bisti un [lantera] y sirbi mi te ora mi caba di come y bebe, y despues abo por come y bebe.” Ki les Hesus kier a siña su discipelnan? El a splica: “Asina tambe, despues cu boso a haci tur loke a manda boso, boso mester bisa: ‘Nos ta esclavo cu no ta sirbi pa nada. Loke nos a haci ta loke nos tabatin deber di haci.’”​—Luc. 17:7-10.

10. Con nos por sa cu Jehova ta aprecia nos esfuerso pa sirbie?

¹⁰ Sin duda, Jehova ta aprecia e esfuerso cu nos ta haci pa sirbie. Bijbel ta sigura nos esey. E ta bisa: “Dios no ta inhusto pa lubida boso trabou y e amor cu boso a mustra pa su nomber.” (Heb. 6:10) Loke Jehova ta rekeri di nos no ta irasonabel ni pisa. Tur loke e ta rekeri ta pa nos mes bon. Pero, corda cu Hesus a bisa cu un esclavo no mester trata di agrada su mes prome. Pues, e punto ta esaki: Ora nos dedica nos mes na Dios, nos ta scoge pa pone su interesnan na prome luga den nos bida. Abo ta di acuerdo cu esey?

11, 12. Como mayordomo, ki cualidad nos mester desplega y kico nos mester evita?

¹¹ E di dos principio ta: Como mayordomo, nos tur ta cumpli cu e mesun rekisitonan di Dios. Ta berdad cu ta algun ruman so tin cierto responsabilidad den e congregacion cristian. Pero den mayoria di caso, nos tur tin e mesun obligacionnan. Por ehempel, como Testigo di Jehova y discipel di Cristo, nos tur tin e obligacion di stima otro. Hesus a bisa cu nos amor pa otro ta identifica nos como cristian berdadero. (Juan 13:35) Pero no ta nos rumannan den fe so nos ta stima. Nos ta haci esfuerso pa mustra amor tambe na personanan cu no ta Testigo. Esaki ta algo cu nos tur por y mester haci.

¹² Jehova kier tambe pa nos tin un bon conducta. Pesey, nos mester evita tur conducta y estilo di bida cu e Palabra di Dios ta condena. Pablo a skirbi: “Ni fornicador, ni adorador di dios falso, ni hende cu ta comete adulterio, ni homber cu ta somete nan mes na actonan innatural, ni homber cu ta drumi cu homber, ni ladron, ni hende golos, ni burache, ni hende cu ta cana zundra, ni hende cu ta chantahia otronan lo no ricibi e Reino di Dios.” (1 Cor. 6:9, 10) Nos tin cu admiti si cu nos mester haci esfuerso pa biba na harmonia cu e normanan husto di Dios. Pero tal esfuerso ta bale la pena, pasobra e ta beneficia nos hopi. Nos lo tin, entre otro, un mihor calidad di bida, un mihor salud, bon relacion cu otro hende y e aprobacion di Dios.​—Lesa Isaias 48:17, 18.

13, 14. Ki responsabilidad tur cristian tin, y con nos mester mira e responsabilidad ey?

¹³ Corda cu un mayordomo mester a traha tambe. Pues, nos tambe tin cu traha. Dios a duna nos un regalo masha precioso: conocemento di e berdad. Y e ta spera cu nos ta comparti e conocemento aki cu otro hende. (Mat. 28:19, 20) Pablo a skirbi: “Laga hende considera nos como sirbidornan cu ta traha bou di Cristo y mayordomonan encarga cu e secretonan sagrado di Dios.” (1 Cor. 4:1) Pablo a reconoce cu e echo cu e tabatin conocemento di e “secretonan sagrado”, of berdadnan biblico, a dun’e un responsabilidad serio y cu e mester a siña esakinan na otro hende na un manera diligente. Esey ta loke su Maestro, Hesucristo, tabata kier pa e haci.​—1 Cor. 9:16.

¹⁴ Ademas, ora nos ta siña otro hende e berdad, nos ta demostra nos amor pa nan. Ta claro cu no ta tur cristian por haci mes  tanto den sirbishi pasobra nos tur no tin e mesun circunstancia. Y Jehova ta compronde esey. Loke ta importante pa Jehova ta cu nos ta haci tur loke nos por. Di e manera ey, nos ta desplega amor sin egoismo pa Dios y pa nos prohimo.

15-17. (a) Dicon ta importante pa un mayordomo ta fiel? (b) Con Hesus a ilustra e consecuencianan di infieldad?

¹⁵ E di tres principio cu nos mester tene na mente ta: Nos mester ta fiel y confiabel. Aunke un mayordomo por tin masha hopi bon cualidad y habilidad, esakinan lo no yud’e cu nada si e ta iresponsabel of desleal na su doño. Pa un mayordomo por ta eficaz y exitoso, e mester ta fiel. Corda cu apostel Pablo a skirbi: “Loke ta ser verwacht di un mayordomo ta pa e ta fiel.”​—1 Cor. 4:2.

¹⁶ Si nos ta fiel, nos lo ser recompensa sigur. Pero si nos ta infiel, nos lo sufri daño. Hesus a ilustra esaki den su parabola di e talentonan. E esclavonan fiel cu a “haci negoshi” cu e placa cu nan doño a duna nan a ser bendiciona ricamente y a ricibi elogio for di nan doño. Pero pa e doño, e esclavo cu a actua iresponsabel tabata un persona “floho y malbado”, un persona “cu no ta sirbi pa nada.” Ademas, a kita e talento cu e tabatin for di dje, y nan a tira e esclavo ey pafo.​—Lesa Mateo 25:14-18, 23, 26, 28-30.

¹⁷ Na un otro ocasion, Hesus a bolbe enfatisa e consecuencianan di infieldad. El a bisa: “Tabatin un homber rico cu tabatin un mayordomo. Nan a acusa e mayordomo aki di ta malgasta e homber su bienesnan. Di manera cu e homber a yama e mayordomo y bis’e: ‘Ta kico e cos cu mi ta tende di bo aki? Duna mi un relato di loke bo a haci como mayordomo, pasobra bo no por  maneha e cas mas.’” (Luc. 16:1, 2) Como cu e mayordomo a malgasta e bienesnan di su doño, el a dicidi di kit’e for di trabou. E relato biblico aki ta siña nos un bon les: Semper nos mester ta fiel na Dios y cumpli cu loke e ta spera di nos.

18. Dicon nos no mester compara nos mes cu otro hende?

¹⁸ Ta bon pa nos puntra nos mes: ‘Ki clase di mayordomo mi ta?’ Pero no ta sabi pa nos compara nos mes cu otro hende. Bijbel ta conseha: “Laga cada un di boso analisa su mes accionnan, anto e ora ey lo e tin motibo pa ta masha contento cu su mes, sin compara su mes cu otro hende.” (Gal. 6:4) En bes di compara nos echo- of obranan cu esnan di otro hende, nos mester enfoca riba loke nos por haci. Esaki ta un proteccion pa nos mes, pasobra e ta evita cu nos ta desanima of bira orguyoso. Anto ora nos ta analisa nos mes, nos mester corda cu circunstancianan sa cambia. Kisas, debi na nos edad, salud of cierto responsabilidadnan, nos no por haci mes tanto cu nos tabata haci antes. Di otro banda, por resulta cu awor nos por haci mas cu antes. Si ta asina, pakico no haci mas den sirbishi na Jehova?

19. Dicon nos no mester desanima si nos no haya cierto privilegio?

¹⁹ Awor, laga nos papia di e privilegionan cu nos tin of cu nos ta desea. Kisas un ruman homber ta desea di sirbi como anciano den congregacion of di duna parti na asamblea of congreso. Ta bon pa traha duro pa cualifica pa privilegionan asina; sinembargo, nos no mester desanima si nos no haya e privilegionan aki na e momento cu nos a spera di haya nan. Pa motibonan cu kisas nos no ta compronde aworaki, nos lo mester warda un poco mas. Corda riba Moises. Na dado momento, el a kere cu e tabata cla pa saca e Israelitanan for di Egipto, pero e mester a warda 40 aña mas. Durante e tempo aki, el a haya chens di traha riba cualidadnan cu e tabatin mester pa dirigi un pueblo cabesura y rebelde.​—Echo. 7:22-25, 30-34.

20. Ki les nos por siña for di e ehempel di Jonatan?

²⁰ Kisas, nunca nos lo ricibi cierto privilegio. Esey ta loke a pasa cu Jonatan. Siendo cu e tabata yiu homber di Saul, e lo mester a bira rey di Israel despues di su tata. Pero Dios a scoge David, kende tabata mas jong cu Jonatan, pa bira rey. Con Jonatan a reacciona? El a acepta e decision cu Dios a tuma, a sostene David y hasta a risca su bida p’e. El a bisa David: “Lo bo bira rei di Israel i ami lo ta na di dos lugá.” (1 Sam. 23:17, BPK) Kico bo por siña for di e ehempel di Jonatan? Jonatan a acepta e situacion, y distinto for di su tata, e no a envidia David. Pues, en bes di envidia e privilegionan cu otronan tin, nos mester haci esfuerso pa asumi nos responsabilidadnan lo mihor cu nos por. Nos por ta sigur cu den e mundo nobo Jehova lo percura pa tur nos deseonan cu ta na harmonia cu su boluntad ser satisface.

21. Con nos mester mira nos trabou di mayordomo?

²¹ Laga nos nunca lubida cu, como mayordomo fiel, nos no ta esclavo di un doño cruel. Al contrario, Jehova ta confia nos y ta honra nos cu un trabou importante cu nunca mas lo ser ripiti: e trabou di predica e bon noticia durante e ultimo dianan di e era aki. Y nos tin hopi libertad pa dicidi con nos por cumpli cu nos responsabilidadnan cabalmente. Pues anto, laga nos ta mayordomonan fiel cu ta balora e privilegio cu nos tin di por sirbi e Haltisimo di henter universo.