Siña Conoce e Palabra di Dios
Dios Lo Percura un Gobierno pa Goberna Henter Mundo?
E articulo aki ta trata algun pregunta cu kisas bo tin y ta mustra bo unda pa haya e contestanan den bo Bijbel. Si bo ta desea, Testigonan di Jehova gustosamente lo trata e preguntanan aki cu bo.
1. Dicon humanidad mester di un gobierno pa goberna henter mundo?
Hopi di e problemanan cu tin awe ta afecta hende rond mundo. Den algun pais, mayoria di hende ta pober y ta ser oprimi. Den otro paisnan, ta parce cu hopi hende tin mas di loke nan tin mester. Pues, ta un gobierno mundial so lo por distribui e recursonan di tera na un manera husto y balansa.—Lesa Eclesiastes 4:1; 8:9.
2. Ken Dios por confia cu e gobernacion di henter mundo?
Hopi hende no ta kere den e idea di un solo gobernante pa henter mundo pasobra no tin niun homber ni muher cu lo por haci e trabou ey bon. Ademas, no tin niun persona na mundo cu lo cay na agrado di tur hende. Acaso tin hende imperfecto cu lo por goberna sin cu poder influenci’e of hacie corupto? E solo idea cu un tirano lo por goberna mundo ta duna hende miedo.—Lesa Proverbionan 29:2; Jeremias 10:23.
Jehova Dios a scoge su Yiu, Hesucristo, pa goberna humanidad pa semper. (Lucas 1:32, 33) Hesus a biba riba tera, pues e sa kico hende ta pasa aden. Ora e tabata na tera, el a cura hende malo, siña hende humilde y dedica tempo na mucha. (Marco 1:40-42; 6:34; 10:13-16) Pues, Hesus ta e Gobernante ideal.—Lesa Juan 1:14.
3. E idea di un gobierno mundial ta algo realistico?
Dios a scoge su Yiu pa goberna tera desde cielo. (Daniel 7:13, 14) Si, mescos cu un gobernante humano no mester ta presente den tur stad cu e ta goberna, Hesus no mester ta na tera pa e por goberna humanidad.—Lesa Mateo 8:5-9, 13.
Ta tur hende lo acepta Hesus como nan Gobernante? No. Solamente esnan cu ta stima loke ta bon lo acept’e. Y esnan cu rechasa e Gobernante husto y amoroso cu Jehova a scoge lo ser destrui.—Lesa Mateo 25:31-33, 46.
4. Kico e Gobernante di mundo lo logra?
Mescos cu un wardador di carne ta reuni su carnenan, Hesus ta reuniendo hende humilde procedente di tur nacion y ta siña nan tocante nos amoroso Dios. (Juan 10:16; 13:34) E hendenan aki ta apoya Hesus y su gobierno fielmente. (Salmo 72:8; Mateo 4:19, 20) Rond mundo Hesus su fiel siguidornan ta proclama unanimamente cu Hesus ta Rey.—Lesa Mateo 24:14.
Pronto, Hesus lo dal paso decisivo pa libra humanidad di gobernacion corupto. El a scoge algun siguidor fiel di dje pa reina hunto cu ne den cielo. (Daniel 2:44; 7:27) Bou di Hesus su gobernacion, tera lo ta yen di conocemento di Jehova y nos planeta lo bira un paradijs, manera tabata e caso na principio di historia humano.—Lesa Isaias 11:3, 9; Mateo 19:28.
You May Also Like
E TOREN DI VIGILANCIA
