1. Kico algun persona ta pensa di stranhero, pero dicon e pensamento ey no ta corecto?

MANERA e articulo anterior a mustra, tin hende cu no ta gusta stranhero; nan ta hasta menosprecia e personanan aki, pasobra nan ta pensa cu stranhero ta hende inferior. Pero esey ta un muestra di falta di respet, pasobra ningun hende no ta mas cu otro. E foyeto The Races of Mankind ta bisa: “Hende di tur rasa ta ruman, manera Bijbel ta siña.” Ta berdad cu dos ruman por ta masha distinto for di otro, pero esey no ta kita cu nan ta ruman.

2, 3. Con Jehova ta mira stranhero?

² Awendia bo ta haya stranhero den tur pais. Con nos mester trata nan? Pa contesta e pregunta ey, laga nos wak con e pueblo di Dios di pasado, esta e Israelitanan, tabatin cu trata hende di otro nacion cu tabata biba entre nan. Aunke ta e nacion di Israel tabatin un relacion special cu Jehova Dios, e Ley a exigi pa nan trata hende di otro nacion cu respet y honestidad. Ta asina nos tambe mester trata stranheronan awe. Pues cristiannan berdadero no mester haci distincion di persona ni trata hende cu prehuicio. Dicon no? Apostel Pedro a bisa: ‘Dios no ta haci distincion di persona; e ta acepta tur hende di tur nacion cu ta tem’e y cu ta haci loke ta corecto.’​—Echo. 10:34, 35.

³ E stranheronan cu tabata biba entre e Israelitanan a beneficia di e echo aki. Dicon? Pasobra Jehova a acepta nan tambe como su adoradornan. Añanan despues, apostel Pablo a indica esaki ora el a rasona tocante Jehova, puntrando: “E ta Dios di Hudiu so? E no ta Dios di hende di e nacionnan tambe?”  El a contesta: “Si, di hende di e nacionnan tambe.”​—Rom. 3:29; Joel 2:32.

4. Dicon nos por bisa cu no tin stranhero den “e Israel di Dios”?

⁴ Despues cu e pueblo di Israel a perde nan relacion special cu Jehova, Jehova a cera un pacto nobo cu e congregacion di cristian ungi. E congregacion aki a reemplasa e nacion di Israel y a bira “e Israel di Dios.” (Gal. 6:16) Y manera Pablo a bisa, den e nacion nobo aki “no tin ni Griego ni Hudiu, ni circuncida ni incircuncida, ni stranhero, Skita, esclavo of hende liber, sino cu Cristo ta tur cos y den tur.” (Col. 3:11) Den e sentido ey, no tin ningun stranhero den e congregacion cristian.

5, 6. (a) Dicon Isaias 61:5 y 6 por lanta pregunta cerca algun persona? (b) Ken ta “e sacerdotenan” di Jehova y e “stranheronan” cu Isaias ta papia di dje? (c) Ki trabou e dos gruponan aki tin en comun?

⁵ Pero capitulo 61 di e buki di Isaias, cu ta contene un profecia relaciona cu e congregacion cristian, por lanta pregunta cerca algun persona. Dicon? Wel, na versiculo 6 por ehempel, e ta menciona esnan cu lo sirbi como “sacerdotenan” di Jehova. Pero na versiculo 5, e ta bisa cu lo tin “stranheronan” cu lo coopera y traha hunto cu e “sacerdotenan” ey. Dicon e versiculo aki ta papia di ‘stranhero’?

⁶ “E sacerdotenan” ey ta e cristiannan ungi; nan ta esnan cu tin parti den “e prome resureccion” y cu lo sirbi como ‘sacerdote di Dios y di Cristo y cu lo reina como rey hunto cu ne pa e 1.000 añanan.’ (Rev. 20:6) Pero, tin hopi otro cristian fiel cu tin speransa di biba pa semper riba tera. Nan ta traha den estrecho cooperacion cu esnan cu lo sirbi den cielo. Pero siendo cu nan no ta parti di “e Israel di Dios”, nan ta stranhero den e sentido figurativo. No obstante, cu goso nan ta apoya “e sacerdotenan” di Jehova y ta traha hunto cu nan como ‘cunukero’ y ‘cuidado di cunucu di wendruif’ den e trabou di cosecha. Si, nan ta yuda e cristiannan ungi honra Jehova mediante e trabou di predica y di siña hende e berdad. Pues, tanto e cristiannan ungi como e ‘otro carnenan’ ta busca hende sincero, y cu amor nan ta yuda e hendenan aki sirbi Dios pa semper.​—Juan 10:16.

7. Den ki sentido cristiannan berdadero awe ta mescos cu Abraham y otro hombernan fiel di pasado?

⁷ Manera nos a siña den e articulo anterior, cristiannan berdadero ta manera stranhero pasobra nan ta habitante temporal den e mundo malbado di Satanas. Den e sentido aki, nan ta mescos cu Abraham y otro hombernan fiel di pasado cu a biba como “stranhero y habitante temporal den e tera.” (Heb. 11:13) Sea cu nos tin speransa di biba den cielo of riba tera, nos tin e privilegio di disfruta di un amistad cu Jehova mescos cu Abraham tabatin. Santiago a bisa cu “‘Abraham a pone fe den Jehova, y pa e motibo ey Dios a consider’e un homber husto’, y el a ser yama ‘amigo di Jehova.’”​—Sant. 2:23.

8. Kico Jehova a priminti Abraham, y kico Abraham a pensa di e promesa aki?

⁸ Dios a priminti cu mediante Abraham y su descendientenan, tur famia riba tera​—y no un nacion so​—lo ser bendiciona. (Lesa Genesis 22:15-18.) Aunke cumplimento di e promesa aki tabata leu den futuro, Abraham tabatin confianza cu lo e cumpli. Shen aña largo, Abraham y su famia a muda di un luga pa otro. Durante tur e tempo ey, Abraham a sigui mantene su amistad cu Jehova.

9, 10. (a) Den ki maneranan nos por imita Abraham su ehempel? (b) Ki invitacion nos por haci na otro hende?

⁹ Maske Abraham no tabata sa cuanto tempo e tabatin cu warda pa su speransa por ser realisa, semper el a keda stima Jehova y sirbie fielmente. El a keda enfoca riba su speransa y no a establece su mes como un habitante permanente den ningun pais. (Heb. 11:14, 15) Si nos ta sabi, nos ta sigui e ehempel di Abraham. Nos ta hiba un bida simpel y no ta preocupa demasiado cu cosnan material, posicion social ni cu carera den mundo. Dicon no? Pasobra no tin sentido pa hiba un bida cu pa hopi hende ta normal den e mundo aki cu pronto lo ser destrui. Ademas, pakico pega nos mes na algo pasahero? Mescos cu Abraham, nos ta enfoca riba algo mucho mas mihor. Nos ta warda cu pasenshi te ora nos speransa bira realidad.​—Lesa Romanonan 8:25.

¹⁰ Ainda Jehova ta invita hende di tur nacion pa nan tambe por disfruta di e bendicionnan cu e lo percura mediante e simia di Abraham. Pesey, e cristiannan ungi, “e sacerdotenan” di Jehova, y e otro carnenan, esta, e “stranheronan”, ta extende e invitacion aki na hende rond mundo den mas cu 600 idioma.

11. Kico Salomon a anima hende di tur nacion pa haci?

¹¹ Na inauguracion di e tempel na aña 1026 prome cu nos era, Salomon a haci un oracion cu ta yuda nos compronde cu hende di tur nacion por alaba Jehova. Rindiendo alabanza na Jehova, nan tambe por disfruta di loke Jehova a priminti Abraham. Salomon a pidi Jehova: “Tambe tocante di e stranhero cu no ta di bo pueblo Israel, ora cu e bin for di un tera leu pa causa di bo nomber (pasobra nan lo tende di bo gran nomber y bo man poderoso y di bo brasa extendi), ora cu e bin haci oracion den direccion di e cas aki, tende abo den cielo, bo luga di biba, y haci conforme tur loke e stranhero pidi bo, pa tur e pueblonan di tera por conoce bo nomber, pa tin temor pa bo manera bo pueblo Israel.”​—1 Rey. 8:41-43.

12. Dicon Testigonan di Jehova ta manera stranhero?

¹² Un stranhero ta un persona cu ta di  bishita of cu ta biba den un pais cu no ta di dje. Den cierto sentido, Testigonan di Jehova ta mescos cu stranhero. Aunke bo ta haya nan den hopi pais rond mundo, nan lealtad ta bay primeramente na e gobierno celestial, e Reino di Dios cu Cristo na cabes. Pesey, nan no ta mete den asuntonan politico maske otro hende ta pensa cu nan mester haci esey.

13. (a) Con nos por stop di mira hende como stranhero? (b) Jehova tabata kier pa tin stranhero riba tera? Splica.

¹³ Hopi bes, bo por reconoce un stranhero na su idioma, su custumbernan, su apariencia y hasta na su manera di bisti. Pero e cosnan cu hende tin en comun ta mucho mas importante cu e diferencianan ey. En realidad, ta ora nos cuminsa concentra riba e diferencianan entre nos y otro hende, nos ta cuminsa mira nan como stranhero. Pues, si nos siña pasa por alto di e diferencianan real ey of esnan imaginario, niun hende no ta stranhero pa nos mas. Pensa riba esaki tambe: Si mundo tabatin un solo gobierno of tur hende tabata biba na un pais, lo no tabatin stranhero. Ta for di principio Jehova su proposito tabata pa tur hende ta uni como un solo famia bou di un solo gobierno, esta, su gobierno. Pero esey lo por ta posibel? Hende rond mundo lo por stop di considera otro como stranhero?

14, 15. Como grupo, kico Testigo di Jehova a logra haci?

¹⁴ Nos ta bibando den un mundo cu tin yen di hende egoista cu ta pensa cu nan nacion ta mihor cu esun di otronan. Pesey, ta un alivio pa sa cu tin hende cu si ta balora hende di tur nacion. Ta berdad cu no ta facil pa vence prehuicio. E fundador di e canal di television CNN, kende a traha cu hopi hende talentoso procedente di varios nacion, a bisa: “Traha hunto cu hende di otro pais tabata un experencia increibel. Cu tempo mi a cuminsa mira nan como habitante di e planeta mescos cu ami ta, y no como stranhero. Mi a cuminsa mira e palabra ‘stranhero’ como un palabra ofensivo; pesey, mi a pone un regla na CNN: No tin mag di uza e palabra ey den aire ni den oficina. En bes di esey, mester uza e palabra ‘internacional.’”

¹⁵ Testigo di Jehova ta e unico grupo rond mundo cu realmente ta haci esfuerso pa pensa mescos cu Dios. Como cu nan ta siña mira hende manera Jehova ta mira nan, nan ta cambia nan manera di pensa y nan actitud pa cu otro hende. Pesey, nan no ta odia hende di otro nacion ni ta desconfia nan; mas bien, nan ta aprecia e variedad  di caracteristica y habilidad cu tin entre hende di varios nacion. E echo cu Testigonan di Jehova por haci esaki ta un gran cos, no ta berdad? Abo a realisa con e manera di mira hende aki ta yuda bo den bo trato cu otro hende?

16, 17. Kico e cumplimento di Revelacion 16:16 y di Daniel 2:44 por nifica pa bo personalmente?

¹⁶ Pronto tur e nacionnan lo enfrenta Hesucristo y su ehercito celestial den e guera final contra Dios su gobernacion. Bijbel ta bisa cu ‘na Hebreo e guera aki yama Armagedon.’ (Rev. 16:14, 16; 19:11-16) Mas cu 2.500 aña pasa, Daniel a ser inspira pa profetisa loke lo pasa cu e gobiernonan. El a bisa: “Y den e dianan di e reynan ey e Dios di cielo lo lanta un reino cu nunca lo no wordo destrui, y e reino ey lo no pasa pa ningun otro pueblo; e lo garna y pone un fin na tur e reinonan aki, ma e mes lo dura pa semper.”​—Dan. 2:44.

¹⁷ Bo por imagina kico cumplimento di e profecia aki lo nifica pa bo personalmente? Ningun di e divisionnan cu hende a pone entre e diferente nacionnan lo no existi mas. Pues, lo no tin stranhero mas. Tur e diferencianan den apariencia of cualkier otro caracteristica di hende lo ta simplemente un evidencia di e variedad cu tin den Dios su creacion. E speransa maraviyoso aki mester motiva nos tur pa sigui alaba y honra nos Creador, Jehova Dios, lo mihor cu nos por.

18. Ki desaroyonan recien ta mustra cu hende por stop di considera otro como stranhero?

¹⁸ Ta irealistico pa kere cu lo por bin un cambio asina mundialmente? No. Al contrario, e ta un cambio realistico. For di aworaki caba no tin ‘stranhero’ entre Testigonan di Jehova; e nacionalidad di nos rumannan no ta e cos di mas importante pa nos. Por ehempel, recientemente, e Cuerpo Gobernante a asigna algun sucursal cu e supervision di e trabou di predica den paisnan cu anteriormente tabata cay bou di otro sucursal. Nan a haci esaki pa reduci gasto y personal pa asina cumpli cu e trabou di predica e bon noticia di Reino na un manera mas eficaz. (Mat. 24:14) Nan no a laga barera nacional stroba nan di tuma e decisionnan aki a menos cu ley di e respectivo paisnan a impedi esey. Esey ta un otro prueba cu Hesucristo, kende Jehova a corona como Rey, ta yuda hende vence tur barera y cu pronto lo e “completa su victoria.”​—Rev. 6:2.

19. Kico e idioma puro di e berdad ta haci posibel?

¹⁹ Testigo di Jehova ta bin di tur nacion, y pesey nan ta papia diferente idioma. Pero nan ta haci esfuerso pa keda uni mediante e idioma puro di e berdad. Esaki ta crea un union cu ta imposibel pa kibra. (Lesa Sofonias 3:9.) Nan ta un famia internacional. Y aunke nan ta biba den e mundo malbado aki, nan no ta parti di dje. E famia uni aki ta djis un ñapa di e mundo nobo caminda lo no tin stranhero mas. E tempo ey, tur hende cu ta na bida, sin ningun excepcion, lo ta contento pa admiti cu loke e publicacion cu nos a cita anteriormente a bisa ta berdad, esta, cu “hende di tur rasa ta ruman, manera Bijbel ta siña.”​—The Races of Mankind.