1, 2. Na ken Pedro a referi ora el a uza e expresion “esnan scogi”, y dicon el a yama nan “habitante temporal”?

MAS o menos 30 aña despues cu Hesus a bay cielo, apostel Pedro a dirigi un carta na e “habitantenan temporal plama na Ponto, Galacia, Capadocia, Asia y Bitinia, esta, [na] esnan scogi.” (1 Ped. 1:1) Pedro a uza e expresion “esnan scogi” pa referi na personanan cu, mescos cu ne, a ser ungi cu spirito santo y cu a “nace di nobo pa un speransa bibo”, esta, pa goberna hunto cu Cristo den cielo. (Lesa 1 Pedro 1:3, 4.) Pero dicon mas despues el a yama e personanan scogi aki “stranhero y habitante temporal”? (1 Ped. 2:11) Y dicon e contesta riba e pregunta aki mester interesa nos tur awe, siendo cu ta masha poco Testigo di Jehova ta bisa cu nan ta ungi, of scogi?

² E expresion “habitante temporal” tabata un bon descripcion pa e cristiannan ungi den prome siglo. Dicon? Pasobra nan lo no a keda riba tera pa semper, y esey ta conta tambe pa e resto di e grupo aki cu ta na bida awe. Apostel Pablo, kende tambe ta un miembro di e “tou chikito” di cristiannan ungi, a splica: “Nos ciudadania ta den cielo, y ta for di eynan nos ta spera ansiosamente riba un salbador, esta, Señor Hesucristo.” (Luc. 12:32; Flp. 3:20) Como cu e “ciudadania” di cristiannan ungi ta den cielo, ora nan muri, nan ta bandona tera y ta haya bida inmortal den cielo. (Lesa Filipensenan 1:21-23.) Pues, literalmente nan ta “habitante temporal” di e mundo aki, cu ta bou di control di Satanas.

3. Ki pregunta ta surgi encuanto e ‘otro carnenan’?

³ Awor kico di e ‘otro carnenan’? (Juan 10:16) Bijbel ta siña cu nan tin e speransa di bira habitante  permanente riba tera. Si, nan lo biba pa semper riba tera. Pero dicon nos por bisa cu nan tambe por ser considera como habitante temporal?

4. Kico lidernan di mundo no por logra?

⁴ Tanten cu Jehova ta permiti Satanas su sistema malbado sigui existi, tur hende, incluso cristiannan berdadero, lo sigui sufri di e consecuencianan di Satanas su rebelion contra Jehova. Na Romanonan 8:22, nos ta lesa: “Nos sa cu te cu awor henter creacion hunto ta sigui keha y ta keda den dolor.” Maske cuanto esfuerso sincero lidernan di mundo, cientificonan of hende cu placa ta haci pa caba cu sufrimento, nan no por logra esey.

5. Ki decision miyones di hende a tuma desde 1914, y dicon?

⁵ Desde 1914, miyones di hende a scoge boluntariamente pa bira subdito di Cristo Hesus, kende Jehova a nombra como Rey. Nan no kier ta parti di e sistema di cos malbado di Satanas, pesey nan no ta apoya su mundo. Mas bien, nan ta uza nan bida y tur loke nan tin pa apoya e Reino di Dios.​—Rom. 14:7, 8.

6. Den ki sentido nos por bisa cu tur Testigo di Jehova ta stranhero?

⁶ Si, Testigonan di Jehova ta ciudadanonan ehemplar cu ta biba den mas cu 200 pais. Pero unda cu nan ta biba, den cierto sentido nan ta stranhero, of habitante temporal. Dicon? Wel, nan no ta mete den politica of problemanan social di nan pais; nan ta keda neutral. For di awor nan ta considera nan mes como ciudadano di e mundo nobo cu Dios lo trece. Nan ta contento cu nan estadia temporal den e mundo imperfecto aki lo no dura hopi tempo.

7. Na ki tempo sirbidornan di Dios por bira habitante permanente, y na unda?

⁷ Pronto Cristo lo eherce su autoridad pa destrui Satanas su sistema di cos malbado. Anto Cristo su gobierno perfecto lo elimina pica y sufrimento for di riba tera. Lo e elimina tur lastro, tanto visibel como invisibel, di e rebelion contra  Jehova su derecho di goberna. E ora ey, Dios su sirbidornan leal por bira habitante permanente di Paradijs riba tera. (Lesa Revelacion 21:1-5.) Creacion lo ta completamente “libra di sclavitud na un curpa cu ta caba na nada y lo tin e glorioso libertad di e yiunan di Dios.”​—Rom. 8:21.

8, 9. Splica kico Pedro tabata kiermen ora el a bisa pa cristiannan ‘abstene di deseonan carnal.’

⁸ Pedro a splica con cristiannan tin cu comporta nan mes ora el a bisa mas despues den su carta: “Rumannan stima, mi ta haci un yamada urgente riba boso como stranhero y habitante temporal den e mundo aki: sigui abstene boso mes di deseonan carnal cu ta bringa contra e alma.” (1 Ped. 2:11) Na prome instante, e conseho ey tabata pa cristiannan ungi, pero e ta conta pa Hesus su otro carnenan tambe.

⁹ Tin deseonan cu riba nan mes no ta malo si nos satisface nan manera e Creador ta manda. Eigenlijk, nan ta haci bida hasta mas dushi. Algun ehempel di esakinan ta e deseo di come of bebe algo dushi, di participa den actividadnan placentero of di disfruta di compania agradabel. Hasta e deseo di disfruta di relacion sexual cu bo casa ta un deseo normal cu tin su luga. (1 Cor. 7:3-5) Pero Pedro a papia di “deseonan carnal cu ta bringa contra e alma.” Esakinan ta deseonan robes; pesey algun traduccion di Bijbel ta papia di “pashonnan baho” (BPK) of “deseonan pecaminoso” (New International Version). Pues anto, nos tin cu abstene nos mes di cualkier deseo cu ta na conflicto cu Jehova su boluntad y cu por daña nos relacion cu ne. Si nos no haci esey, nos ta core riesgo di perde nos alma, of bida.

10. Menciona algun trampa cu Satanas ta uza pa pone cristiannan bira parti di mundo.

¹⁰ Satanas kier pa nos lubida cu nos ta “habitante temporal” den e mundo aki. Y pa logra su meta, e ta uza varios trampa, manera materialismo, inmoralidad, patriotismo, e deseo pa prominencia of pa ta na prome luga den tur cos. Pero si nos ta determina pa abstene nos mes di e deseonan carnal robes aki, nos ta demostra bon cla cu nos no kier ta parti di e mundo malbado di Satanas. Asina nos ta duna prueba cu nos ta habitante temporal. Si, loke nos ta desea sinceramente ta pa bira habitante permanente di Dios su mundo nobo, unda husticia lo reina. Pesey, nos ta traha duro pa logra esey.

11, 12. Con algun hende sa trata stranhero, y kico hende sa bisa di Testigonan di Jehova?

¹¹ Na versiculo 12, Pedro a sigui splica con cristiannan tin cu comporta nan mes como “habitante temporal”; el a bisa: “Mantene un conducta excelente meymey di hende di e nacionnan, pa ora nan ta acusa boso di ta malhechor, nan por mira boso obranan excelente cu nan mes wowo y, como resultado di esey, glorifica Dios riba e dia cu e bin pa haci su inspeccion.” Un habitante temporal ta un stranhero, of un persona cu temporalmente ta biba den un pais cu no ta di dje. Tin biaha, hende ta critica nan of hasta ta pensa cu nan ta mal hende djis pasobra nan ta diferente. Podise nan manera di papia, bisti, di haci cosnan of hasta nan apariencia por ta un poco diferente for di e hendenan di e pais. Pero nan bon obranan, esta, nan conducta excelente, ta demostra cu comentarionan negativo asina no ta na su luga.

 ¹² Mescos tambe, cristiannan berdadero ta distinto for di hopi otro hende den cierto cosnan tal como nan recreo y manera di papia. Ademas, hopi hende ta reconoce nan na nan manera di bisti. E diferencianan aki por pone algun hende, cu ta mal informa, papia malo di cristiannan berdadero. Sinembargo, tin otro hende si cu ta elogia nan pa nan excelente conducta.

13, 14. Con “sabiduria ta demostra pa medio di su obranan cu e ta husto”? Duna algun ehempel.

¹³ Si, un excelente conducta por contraresta critica inhustifica. Laga nos tuma Hesus como ehempel: E tabata e unico hende cu a obedece Dios perfectamente den tur cos; toch algun hende a acus’e falsamente; nan a yam’e “un homber haragan y bicia na biña, amigo di cobrado di belasting y pecador.” Pero su conducta excelente a demostra cu e no tabata un malhechor. Hesus a bisa: “Sabiduria ta demostra pa medio di su obranan cu e ta husto.” (Mat. 11:19) Esey ta e caso awe tambe. Ata aki un ehempel: Algun bisiña di Betel na Selters, Alemania, ta pensa cu e cristiannan cu ta traha eynan ta masha straño. Pero e alcalde di e pueblo a defende e Testigonan y a bisa: “Ta berdad cu e Testigonan cu ta sirbi eynan tin nan propio estilo di bida, pero nan no ta molestia ningun hende.”

¹⁴ Un otro ehempel tin di haber cu Testigonan di Jehova na Moscu, Rusia. Hende a acusa nan di varios cos malo. Por ehempel, nan tabata bisa cu e Testigonan ta nenga tratamento medico, ta kibra famia y ta pone hende comete suicidio. Pero na juni 2010, Corte Europeo di Derechonan Humano na Strasburgo, Francia, a dicta lo siguiente: ‘Corte ta haya cu e echo cu [Moscu] a stroba e Testigonan di eherce nan derecho di rindi adoracion y tene nan reunionnan libremente no ta hustifica. E cortenan na Rusia no por a proba cu e Testigonan di Jehova ta culpabel di e cosnan cu ta acusa nan di dje. Nan a uza leynan estricto di Moscu na un manera inhusto contra e Testigonan. Pues, e sancion cu Rusia a pone tabata demasiado severo.’

15. Ki principio biblico tur cristian berdadero ta sigui?

¹⁵ Testigonan na Moscu y na tur otro caminda ta cumpli cu un rekisito mas pa cristiannan cu Pedro a menciona. El a skirbi: “Pa causa di Señor, somete boso na tur autoridad estableci pa hende: sea na un rey como superior of na gobernadornan.” (1 Ped. 2:13, 14) Pues, aunke cristiannan berdadero no ta parti di e mundo malbado di Satanas, nan ta dispuesto pa somete nan na autoridadnan gubernamental, pero, manera Pablo a  indica, basta nan leynan no ta na conflicto cu esnan di Jehova.​—Lesa Romanonan 13:1, 5-7.

16, 17. (a) Kico ta demostra cu nos no ta contra gobierno? (b) Kico algun politico sa admiti?

¹⁶ E echo cu Testigonan di Jehova ta comporta nan mes como “habitante temporal” den e sistema actual no ta pasobra nan kier opone gobierno of critica otro hende. Nan ta compronde cu cada hende por tin nan mes idea encuanto politica y e manera pa soluciona problemanan den comunidad. Pesey, distinto for di otro gruponan religioso, Testigonan di Jehova no ta mete den politica. Nunca nan ta trata di dicta kico autoridadnan tin cu haci. Pesey, hamas nan lo stroba orden publico, rebela contra gobierno of instiga otro hende pa haci esey.

¹⁷ Mas bien, di acuerdo cu e conseho di Pedro pa “honra rey”, cristiannan berdadero ta obedece gobernantenan, demostrando asina cu nan ta respeta nan funcion. (1 Ped. 2:17) Y gobernantenan sa admiti cu nan no tin motibo valido pa preocupa cu Testigonan di Jehova por forma un peliger pa comunidad. Por ehempel, Steffen Reiche, un politico Aleman, ex-minister di e estado di Brandenburg kende despues tabata un miembro di parlamento Aleman, a bisa cu ‘Testigonan di Jehova a comporta nan mes masha bon durante e persecucion Nazi. Nan a para firme a pesar di persecucion y a trata nan compañeronan di prizon cu bondad. El a bisa cu e bon cualidadnan aki ta masha importante pa un pais manera Alemania, specialmente awor cu mas y mas hende ta trata otronan malo djis pasobra nan ta di un otro pais of pasobra nan tin un otro creencia religioso of opinion politico.’

18. (a) Dicon ta masha normal cu nos ta stima “henter e hermandad”? (b) Kico hende sa bisa di Testigonan di Jehova?

¹⁸ Apostel Pedro a skirbi: “Honra tur sorto di hende, stima henter e hermandad, teme Dios.” (1 Ped. 2:17) Testigonan di Jehova ta teme Dios den e sentido cu nan no kier haci nada cu ta desagrad’e. E tipo di respet aki ta motiva nan pa haci su boluntad. Nan ta contento cu nan ta forma parti di un organisacion mundial di ruman homber y ruman muher cu ta sirbi Jehova. Pesey, ta masha normal cu nan ta “stima henter e hermandad.” Pero como cu den e mundo egoista aki no ta usual cu hende ta stima otro, e amor entre Testigonan di Jehova por sorprende un persona cu no ta Testigo. Tuma por ehempel un tour guide cu tabata traha pa un agencia di biahe Mericano. Na 2009, el a keda asombra ora el a mira e amor cu e Testigonan na Alemania tabatin pa nan rumannan cu a bin di otro pais pa asisti na e congreso internacional. Ora el a mira con e Testigonan na Alemania tabata yuda nan rumannan, el a keda encanta y a bisa cu den tur e añanan cu e ta sirbi como tour guide, ta prome biaha cu el a mira algo asina. Abo a yega di tende hende expresa nan mes asina despues cu nan a observa un grupo di Testigo di Jehova na congreso?

19. Kico mester ta nos determinacion, y dicon?

¹⁹ Manera e articulo aki a mustra, tin hopi manera cu Testigonan di Jehova ta demostra cu nan realmente ta “habitante temporal” den e mundo di Satanas aki. Y cu goso nan ta determina pa sigui haci esey. Nan tin e speransa firme y bon funda cu pronto nan lo bira habitante permanente di Dios su mundo nobo, unda husticia lo reina. Abo tambe ta anhela pa biba den e mundo nobo ey?