Mi a nace na Maundsville, un pueblo keto canto di Ohio River parti noord di West Virginia, Merca. Mi ta e di dos den mi cuater rumannan, di cua tres ta mucha homber. Pues casi nunca tabata laf na cas. Mi mayornan tabata hendenan trahador y honesto cu tabatin gran interes den nan prohimo. Nos no tabata hende cu tin masha moda, pero semper nos tabatin lo necesario. Como Testigonan di Jehova, mi mayornan a haci esfuerso pa lanta nos cu principionan di Bijbel.

Pero ora mi a bira teenager, mi curason a cuminsa desvia for di e cosnan cu mi a siña. Mi a cuminsa puntra mi mes si en berdad e principionan di Bijbel por a duna mi berdadero proposito of satisfaccion den bida. Mi a pensa cu e unico cos cu por haci un hende berdaderamente feliz ta si e ta liber pa haci tur loke e kier. Un poco tempo despues, mi a stop di asisti na e reunionnan cristian. Dos di mi rumannan tambe a bira mes rebelde cu mi. Nos mayornan a purba tur manera pa yuda nos, pero nos a nenga nan yudansa.

Mi no a realisa mes cu e supuesto libertad cu mi a anhela lo a hiba mi den gara di adiccion. Un dia, riba caminda pa cas for di scol, un amigo a ofrece mi un sigaria. Mi a tum’e. For di e dia ey padilanti mi a cuminsa bisa si na hopi practica robes. Cu tempo, mi a cuminsa uza droga, bebe di mas y hiba un bida inmoral. Algun aña despues, mi a cuminsa experimenta cu droganan mas fuerte te cu mi a bira adicto na hopi di nan. Segun cu mi tabata bira mas bicia na e cosnan aki, mi a cuminsa bende droga pa mi por a sigui cu mi estilo di bida.

Maske cuanto mi a purba di ignora mi consenshi, tur ora e tabata recorda mi cu mi manera di biba tabata robes. Pero mi a pensa cu ya e daño tabata haci caba y cu no tabatin manera pa bira bek. Aunke na e fiestanan y conciertonan cu mi tabata bay mi tabata rondona pa hende, toch hopi bes mi tabata sinti mi so y deprimi. Tin biaha, mi tabata pensa riba mi mayornan, con decente y bon hende nan ta, y mi tabata puntra mi mes con bin mi a desvia asina tanto.

Aunke mi no tabata kere cu mi por cambia, otronan si no a perde speransa. Na aña 2000, mi mayornan a invita mi na un congreso di districto di Testigonan di Jehova. Mi no tabatin mucho gana, pero mi a bay toch. Pa mi sorpresa, mi dos otro rumannan cu a bandona e berdad tambe a bay.

Na e congreso mi a realisa cu un aña prome mi tabata na e mesun sitio aki pero pa un concierto di rock. E contraste cu mi a mira a dal mi duro. Dia di e concierto, e luga tabata yen di sushi y tur na huma di sigaria. Hopi di esnan cu a bay e concierto no tabata amabel y e mensahe di e canticanan tabata laga hende sinti nan deprimi. Pero na e congreso, mi tabata meymey di hende berdaderamente feliz—hende cu pa hopi aña mi no a mira, pero cu a duna mi un caluroso bonbini. E luga tabata limpi y e mensahe na e ocasion aki tabata duna speransa. Ora mi a mira e efecto positivo cu e berdad di Bijbel tin riba hende, mi a puntra mi mes dicon mi a rechas’e.—Isaias 48:17, 18.

Mesora despues di e congreso mi a dicidi di cuminsa bay e reunionnan cristian atrobe. Mi rumannan, despues di loke nan a tende na e congreso, tambe a dicidi di cuminsa bay e reunionnan bek. Nos tur tres a acepta un estudio di Bijbel.

Un texto di Bijbel cu sigur a anima mi ta Santiago 4:8, cu ta bisa: “Hala cerca Dios, y lo e hala cerca boso.” Mi a realisa cu si mi kier hala cerca Dios, mi tin cu drecha mi bida. Entre otro, mi tabatin cu stop di huma, uza droga y bebe di mas.—2 Corintionan 7:1.

Mi a kibra tur laso cu mi amigonan bieu y na nan luga mi a busca amigo nobo entre sirbidornan di Jehova. E anciano cristian cu tabata duna mi estudio di Bijbel tabata un gran yudansa pa mi. E tabata bel mi regularmente y tabata pasa wak con ta bay cu mi. Te awe e ta un di mi mihor amigonan.

Den e lente di aña 2001, ami cu mi dos rumannan a dedica nos bida na Dios pa medio di bautismo bou di awa. Imagina bo con contento mi mayornan y mi ruman homber mas jong, cu si tabata den e berdad, a keda ora cu porfin henter e famia a uni den adoracion berdadero!

Antes mi tabata kere cu Bijbel su principionan ta mucho restrictivo, pero awor mi ta mira nan como un proteccion masha valioso. Bijbel a duna mi e forsa pa stop di uza y bende droga y bira un persona mas util pa comunidad.

Mi tin e privilegio di ta parti di un hermandad mundial di sirbidor di Jehova. E personanan aki di berdad ta stima otro y nan ta sirbi Dios den un forma uni. (Juan 13:34, 35) E hermandad aki a trece un bendicion hopi special pa mi—mi casa, Adrianne, kende mi ta stima y aprecia masha hopi mes. Ta un goso grandi di por sirbi nos Creador hunto.

En bes di core tras di deseonan egoista, awor mi ta sirbi boluntariamente como un predicador di tempo completo. Asina mi por yuda hende sa con nan tambe por beneficia di e Palabra di Dios. E trabou aki ta duna mi un gran felicidad. Mi por bisa cu tur conviccion cu Bijbel a cambia mi bida. Por fin mi a haya berdadero libertad.