Tur hende den nos famia tin nomber. Hasta nos bestianan di cas tin nomber. Lo no ta logico cu Dios tambe tin un nomber? Den Bijbel, Dios tin varios titulo, manera Dios Todopoderoso, Señor Dios, Soberano Señor y Creador. Pero e tin un nomber tambe.—Lesa Salmo 148:13.

Hopi traduccion di Bijbel tin e nomber di Dios na Salmo 83:18. Por ehempel, den e Traduccion di Mundo Nobo di e Santo Scritura, bo ta lesa: “Abo, kende su nomber ta Jehova, abo so ta e Haltisimo riba henter tera.”

Dios kier pa nos uza su nomber. Ora nos ta papia cu hende cu nos ta stima, por ehempel, un bon amigo, nos ta yam’e na su nomber—vooral si el a pidi nos esey, no ta berdad? Dicon no uza anto e nomber di Dios ora nos ta papia cu ne? Ademas, Hesucristo a anima su siguidornan pa uza e nomber di Dios.—Lesa Mateo 6:9; Juan 17:26.

Sinembargo, pa nos bira amigo di Dios, nos mester sa mas di dje y no su nomber so. Por ehempel, con Dios ta? Ta posibel pa hala cerca Dios? Bo por haya contesta riba e preguntanan ey den Bijbel.