Un persona humilde no ta arogante ni orguyoso. E no ta sinti cu e ta mas cu otro hende. Un hende imperfecto cu ta humilde mester ta modesto tambe, esta, consciente di su limitacionnan.

Moises no a laga e echo cu e tabatin autoridad susha su cabes. Hopi biaha, ora un hende ricibi autoridad, lo bo ripara hopi lihe si e ta humilde of no. Robert G. Ingersoll, un escritor di siglo 19, a bisa: “Si bo kier sa ken un hende ta realmente, dun’e poder.” Den e sentido ey, Moises a pone un excelente ehempel di humildad. Con asina?

Moises a ricibi hopi autoridad, ya cu Jehova a dun’e e encargo pa guia e nacion di Israel. Pero e poder ey nunca a haci Moises orguyoso. Wak por ehempel e modestia cu el a demostra ora el a trata un pregunta dificil tocante derecho di herencia. (Numbernan 27:1-11) Tabata trata di un asunto di peso, ya cu su contesta lo a establece un base legal pa atende casonan similar den futuro.

Con Moises a reacciona? Acaso el a pensa cu como lider di Israel, e tabata sa precies ki decision e mester a tuma den e asunto aki? E por a confia den su mes habilidadnan, su añanan di experencia of e conocemento profundo cu e tabatin di e manera cu Jehova ta pensa.

Podise un hende orguyoso lo a haci esey, pero no Moises! Bijbel ta bisa: “Moises a hiba [e] caso dilanti di SEÑOR.” (Numbernan 27:5) Imagina bo! Maske Moises tabatin 40 aña caba ta guia e nacion di Israel, toch e no a depende riba su mes, sino riba Jehova. Pues, nos ta mira bon cla cu Moises tabata un homber humilde.

Moises no a pensa cu ta e so mester tin autoridad. El a keda masha contento ora Jehova a permiti otro Israelita tambe bira profeta. (Numbernan 11:24-29) Ora su suegro a sugerie pa e scoge algun homber cu por a yud’e cu su trabou, humildemente el a acepta e conseho. (Exodo 18:13-24) Anto ora Moises tabata hopi grandi caba, aunke e tabata fuerte ainda, el a pidi Jehova pa nombra un sucesor. Ora Jehova a scoge Josue pa reem­plas’e, di curason Moises a apoya e homber mas jong aki, y el a papia seriamente cu e pueblo pa sigui e guia di Josue pa drenta e Tera Priminti. (Numbernan 27:15-18; Deuteronomio 31:3-6; 34:7) Pa Moises, tabata un gran privilegio di por a guia e Israelitanan den nan adoracion na Jehova. Pero, e no a uza su autoridad sin tene cuenta cu e bienestar di otro hende.

Nos lo no kier laga poder, autoridad ni habilidad natural susha nos cabes. Corda: Pa nos por ta util pa Jehova, nos humildad semper ta mas importante cu cualkier habilidad cu nos por tin. (1 Samuel 15:17) Si di berdad nos ta humilde, nos lo haci esfuerso pa aplica Bijbel su conseho sabi: “Confia den SEÑOR cu henter bo curason, y no depende riba bo mes comprondemento.”—Proverbionan 3:5, 6.

E ehempel di Moises ta siña nos tambe pa no pone demasiado enfasis riba nos posicion of autoridad.

Ta bale la pena pa nos imita su ehempel di humildad? Claro cu si! Ora nos ta berdaderamente humilde, nos ta haci bida di e hendenan rond di nos mas facil, y nos ta gana nan cariño. Mas importante ainda, nos ta cay na agrado di Jehova Dios, kende tambe ta demostra e bunita cualidad di “humildad” aki. (Salmo 18:35, NW) “Dios ta opone hende orguyoso, ma e ta duna bondad inmereci na hende humilde.” (1 Pedro 5:5) Esta un bon motibo pa imita e humildad di Moises!