Bo ta corda e dia cu bo yiu a nace? Sin duda lo bo tabata masha ansioso pa carg’e. Pero, pa mayornan manera Carlo y Mia, e goso ey ta bin acompaña cu ansiedad ora nan tende cu nan yiu tin un maleza of deficiencia.

Bo tin un yiu cu tin un deficiencia? Si esey ta e caso, kisas bo ta puntra bo mes con lo bo por trata cu e situacion ey. No perde animo! Mayornan cu ta den e mesun situacion cu bo a logra trata cu e problema ey cu exito. Laga nos considera tres dificultad cu bo por haya bo cu ne y con e conseho sabi di Bijbel por yuda bo enfrenta esakinan.

Por lo general, mayornan ta sinti nan hopi kibra ora nan tende cu nan yiu tin un maleza. Por ehempel, Juliana, un mama cu ta biba na Mexico, a bisa:  “Ora dokter a bisa mi cu nos yiu, Santiago, tin paralisis celebral, mi no por a kere. Mi a sinti comosifuera henter mi mundo a basha den otro.” Tin otro mayor ta pensa mescos cu un mama Italiano cu yama Villana, kende a bisa: “Mi a dicidi di haya un yiu maske esey tin su risiconan pa un hende muher di mi edad. Awor, ora mi yiu ta malo debi na su deficiencia, esta, Down syndroom, mi ta sinti mi culpabel.”

Si bo ta sinti bo hopi kibra of culpabel, bo tin cu realisa cu e reaccion ey ta normal. Originalmente, no tabata Dios su proposito pa hende bira malo. (Genesis 1:27, 28) E no a crea mayornan cu e capacidad pa djis acepta loke no ta normal. Pesey, no ta facil pa acepta cu bo yiu tin un deficiencia, y ta normal cu bo ta sinti bo tristo. Ta tuma tempo pa bo controla bo emocionnan y adapta bo mes na e situacion nobo.

Kico bo tin cu haci si bo ta culpa bo mes pa e deficiencia di bo yiu? Corda cu hende no ta compronde completamente ki efecto ley di genetica, e ambiente cu un yiu a lanta aden y otro factornan tin riba un yiu su salud. Di otro banda, kisas bo ta haya gana di tira falta riba bo casa. No haci esey! Ta mihor bo coopera cu bo casa y enfoca riba e cuido cu bo yiu tin mester.—Eclesiastes 4:9, 10.

SUGERENCIA: Busca mas informacion tocante e maleza di bo yiu. Bijbel ta bisa: “Cu sabiduria un cas ta wordo traha y cu comprondemento e ta wordo estableci.”—Proverbionan 24:3.

Bo por siña hopi for di profesionalnan medico y literatura confiabel. Bo por compara e proceso di siña tocante e maleza di bo yiu cu siñamento di un otro idioma. Na principio lo e ta dificil, pero bo por logra siñ’e.

Carlo y Mia, cu nos a menciona den e introduccion, a busca informacion cerca nan dokter y un organisacion cu ta specialisa riba e deficiencia di nan yiu. Nan a bisa: “Esey a yuda nos compronde no solamente e problemanan cu nos por a verwacht, sino tambe e cosnan ‘positivo’ di Down syndroom. Nos a compronde cu den hopi aspecto nos yiu por hiba un bida normal. Esaki tabata un gran animacion pa nos.”

Kisas bo ta sinti cu e cuido di bo yiu cu ta malo ta caba cu tur bo energia. Jenney, un mama cu ta biba na Nueva Zelandia, a bisa: “Pa un par di aña despues cu mi a haya sa cu mi yiu tin spina bifida (lomba habri), cualkier trabou extra na cas tabata laga mi keda morto cansa y cu gana di yora.”

Un otro dificultad ta cu kisas bo ta sinti cu bo ta bo so. Ben, kende tin un yiu homber cu tin distrofia muscular y e syndroom di Asperger (un tipo di autismo), a bisa: “Mayoria di hende lo no compronde nunca con nos bida ta realmente.” Kisas bo tin gana di papia cu un hende tocante bo situacion. Sinembargo, mayoria di bo amigonan tin yiu cu ta bon di salud. Pesey, lo bo no sinti bo comodo pa papia cu nan tocante bo problema.

SUGERENCIA: Pidi yudansa, y acepta yudansa di otro hende. Juliana, kende nos a menciona mas prome, a bisa: “Tin biaha ami cu mi casa tin berguensa di pidi yudansa.” Pero, el a sigui bisa: “Nos a siña cu nos tin mester di yudansa di otro hende. Ora otro hende yuda nos, nos no ta sinti cu nos ta nos so.” Si un bon amigo of miembro di famia ofrece pa sinta cu bo yiu na un actividad social of un reunion di congregacion, keda agradecido y acepta e yudansa. Bijbel ta bisa: “Un amigo ta stima tur ora bay, y un ruman ta naci pa tempo di adversidad.”—Proverbionan 17:17.

Ta bon tambe pa bo cuida bo mes salud. Mescos cu un ambulance mester bay yena su tanki regularmente pa por sigui hiba pashent hospital, asina bo tin cu wak pa bo haya energia atrobe mediante bon nutricion, ehercicio y sosiego pa bo por sigui duna bo yiu e cuido cu e merece. Javier, kende tin un yiu homber cu tin un deficiencia, a bisa: “Mi yiu no por cana, pesey mi ta haya cu mi tin cu come bon pasobra ta ami ta hib’e tur caminda. Mi pianan ta su pianan.”

Con bo por saca tempo pa cuida bo salud? Algun mayor ta cuida nan yiu beurt pa beurt. Di e manera ey un mayor por sosega y atende su otro asuntonan personal. Kisas bo tin cu dedica menos tempo na actividadnan cu no ta asina importante y uza e tempo ey pa cuida bo salud. No ta facil pa mantene ekilibrio, pero manera Mayuri, un mama di India, a bisa: “Cu tempo bo ta custumbra cu esey.”

 Papia cu un amigo di confianza. Hasta un amigo cu no tin yiu cu ta malo por ta un animacion pa bo. Ademas, bo por haci oracion na Jehova. Bo no ta kere cu oracion por yuda bo? Yazmin, kende tin dos yiu cu fibrosis kistica (ta causa problema respiratorio y digestivo), a bisa: “Tabatin momento cu mi a haya mi cu asina tanto stress cu mi a pensa cu lo mi no por a wanta mas.” Pero el a agrega: “Mi ta haci oracion na Jehova pa mi haya alivio y fortaleza. Despues di esey mi ta sinti cu mi por sigui.”—Salmo 145:18.

Maleza di un yiu por tin efecto riba loke e famia ta come, unda nan ta bay y cuanto tempo mayornan ta dedica na cada yiu. Debi na esey, e otro yiunan por sinti cu nan no ta haya suficiente atencion di nan mayornan. Ademas, mayornan por ta asina ocupa pa percura pa e yiu cu ta malo cu esey ta afecta nan matrimonio. Lionel, un tata cu ta biba na Liberia, a bisa: “Tin biaha mi esposa ta bisa cu ta e tin cu haci casi tur cos y cu mi no ta interesa den nos yiu homber. Mi ta sinti cu e no ta respeta mi, y pesey tin biaha mi no ta trat’e bon.”

SUGERENCIA: Pa bo yiunan por mira cu bo tin atencion pa nan tur, plania actividadnan cu nan ta gusta. Jenney, kende nos a menciona mas prome, a bisa: “Tin biaha nos ta haci algo special pa nos yiu homber mayo, kisas gewoon bay come hunto na su restaurant preferi.”

Pa proteha bo matrimonio, papia cu bo casa y haci oracion hunto cu ne. Aseem, un tata cu ta biba na India, kende su yiu ta sufri di epilepsia, a bisa: “Aunke ami cu mi esposa tin biaha ta sinti nos mes cansa y desanima, nos ta aparta tempo pa sinta un rato pa papia cu otro y haci oracion hunto. Tur mainta, prome cu nos yiunan lanta for di soño, nos ta tuma tempo pa considera un texto di Bijbel hunto.” Tin otro pareha casa ta combersa cu otro prome cu nan bay drumi. Boso combersacionnan priva y oracionnan sincero lo fortalece boso matrimonio durante periodonan di hopi stress. (Proverbionan 15:22) Manera un pareha casa a bisa, “algun di e momentonan di mas dushi di nos bida casa tabata durante e dianan di mas dificil.”

Bijbel ta priminti cu pronto Dios lo elimina tur maleza y deficiencia cu ta afecta grandi y chikito. (Revelacion 21:3, 4) Riba e dia ey, “ningun habitante lo no bisa: ‘Mi ta malo.’” *—Isaias 33:24.

Mientrastanto, bo esfuerso como mayor di un yiu cu tin un deficiencia por duna bon resultado. Carlo y Mia, kendenan nos a menciona anteriormente, a bisa: “No desanima ora cos no ta bay manera bo ta desea. Tin hopi cos bon y maraviyoso tocante bo yiu cu bo por enfoca riba dje.”