Bo a yega di bira victima di discriminacion? Nan a yega di nenga bo un servicio of tratamento, keda sin duna bo un trabou of trata bo cu menosprecio debi na bo color, rasa of posicion social? Si ta asina, tin bon noticia pa bo: Maske hende tin custumber di trata otro hende di e forma ey, Dios si no ta haci esey. Cu hopi conviccion, apostel Pedro, kende tabata un cristian, a bisa: “Dios no ta haci distincion di persona.”—Lesa Echonan 10:34, 35.

Pedro a expresa e palabranan ey ora e tabata na cas di Cornelio, un homber cu no tabata hudiu. Pedro, kende a nace hudiu, a biba den tempo cu e hudiunan tabata considera hende cu no ta hudiu como impuro y no tabata atende cu nan. Con bin Pedro tabata na cas di Cornelio anto? E contesta ta simpel, ta Jehova Dios a mand’e eynan. Pedro a haya un vision den cua Dios a bis’e: “Stop di yama contamina loke Dios a haci limpi.” Sin cu Pedro tabata sa, un dia prome, Cornelio tambe a haya un vision, den cua un angel a bis’e pa manda yama Pedro. (Echonan 10:1-15) Ora Pedro a compronde cu Jehova su man tabata den e asunto aki, e no por a keda keto.

Pesey, Pedro a bisa: “Awor mi ta compronde di berdad cu Dios no ta haci distincion di persona.” (Echonan 10:34) Relaciona cu e palabra Griego cu a ser uza pa e expresion “haci distincion di persona”, un comentarista di Bijbel a bisa: “E ta referi na un hues cu ta wak cara di un acusado y ta dicta sentencia. E no ta dicta e sentencia a base di evidencia sino a base di e apariencia di e acusado.” Dios si no ta asina, e no ta faborece un hende riba un otro debi na su rasa, nacionalidad, posicion social of cualkier otro factor externo.

Mas bien, Jehova ta wak nos curason. (1 Samuel 16:7; Proverbionan 21:2) Pedro a sigui bisa cu Dios “ta acepta tur hende di tur nacion cu ta tem’e y cu ta haci loke ta corecto.” (Echonan 10:35) Teme Dios ta nifica cu nos ta respet’e, honr’e y confi’e, y cu nos no ta haci nada cu no tin su aprobacion. Haci loke ta corecto ta encera haci di buena gana loke ta bon den bista di Dios. Jehova ta keda contento cu un hende cu ta haci loke ta corecto motiva pa e respet profundo cu e tin p’e.—Deuteronomio 10:12, 13.

Si bo a yega di bira victima di discriminacion of prehuicio, loke Pedro a bisa tocante Dios por ta un animacion pa bo. Jehova ta halando hende di tur nacion cerca dje pa nan sirbie. (Juan 6:44; Echonan 17:26, 27) E ta scucha y contesta oracion di su adoradornan sin importa nan rasa, nacionalidad of posicion social. (1 Reynan 8:41-43) Nos por tin sigur cu ora Jehova ta wak for di cielo, ta un rasa so e ta mira: e rasa humano. Bo no ta sinti bo motiva pa siña conoce e Dios imparcial aki mas mihor?