JONATHAN, un Mericano cu mayornan Koreano, a bira victima di prehuicio racial tempo cu e tabata mucha. Ora el a bira grandi, el a busca un luga pa bay biba caminda hende lo no discrimin’e debi na su rasa of apariencia. Pesey, despues cu el a bira dokter, el a muda bay un pueblo den e parti noord di Alaska, Merca, caminda su apariencia fisico no tabata mucho diferente for di mayoria di su pashentnan. El a carga speransa cu eynan si lo e scapa di prehuicio.

Pero, el a perde tur speransa ora e tabata yuda un pashent, un hende muher di 25 aña di edad, cu tabata den coma. Ora e persona aki a sali for di coma y a mira Jonathan, el a uza un palabra masha ofensivo cu a revela su desprecio pa Koreano. E suceso aki a pone Jonathan realisa cu tur su esfuerso pa scapa di discriminacion tabata envano.

Loke Jonathan a pasa aden ta enfatisa un realidad masha tristo: Unda cu bo bay na mundo tin prehuicio. Ta parce cu caminda tin hende, tin prehuicio.

 A pesar cu prehuicio ta plama tur caminda, toch, mayoria di hende ta lihe pa conden’e. Esta un contradiccion! Con un cos cu mayoria di hende tin rabia riba dje por ta asina comun? Aparentemente, hopi hende cu ta condena prehuicio no ta ripara cu nan mes tin e problema ey. Kico di abo? Bo tin e problema ey?

Sea cu nos ta realisa esey of no, ta dificil pa detecta si nos tin cierto midi di prehuicio. Dicon? Bijbel ta bisa: “No tin nada mas engañoso ku kurason humano.” (Jeremias 17:9, BPK) Pesey, nos por gaña nos mes pensando cu nos ta tolera tur clase di hende. Of kisas nos ta hustifica nos mes pensando cu nos tin motibo valido pa mustra desconfianza den cierto grupo di hende.

Ta dificil pa haya sa si nos tin prehuicio. Imagina bo e siguiente situacion: Bo ta canando bo so riba caya anochi laat. Dos homber hoben cu bo no conoce ta biniendo den bo direccion. Nan tin curpa grandi y ta parce cu un di nan tin algo den su man.

Bo ta pensa cu e hombernan ey lo haci bo daño? Kisas loke bo a yega di pasa aden a siña bo cu bo mester ta cauteloso. Pero, esey ta un motibo valido pa conclui cu e hombernan ey ta peligroso? Awor, ban un tiki mas profundo: Di ki rasa of grupo etnico bo ta pensa cu e hombernan ey ta? Bo contesta riba e pregunta ey kisas lo sorprende bo. E por indica cu te na cierto grado prehuicio a saca raiz den bo curason.

Si nos ta sincero, nos tin cu admiti cu den fondo di nos curason nos tur tin cierto midi di prehuicio. Bijbel ta bisa cu hende hopi bes ta husga otro segun nan “apariencia.” (1 Samuel 16:7) Nos tur tin e tendencia aki y hopi biaha cu consecuencianan desastroso. Pesey, nos por puntra nos mes: Ta posibel pa vence of elimina prehuicio for di nos bida? Lo yega e dia cu lo no tin prehuicio mas na mundo?