For di tempo mi tabata mucha, mi tabata stima naturaleza. Como famia, nos tabata bay pasa dia den mondinan fascinante y na lagonan bunita cu ta keda den bisindario di mi stad natal Jyväskylä, den curason di Finlandia. Mi stima bestia tambe; como mucha, tur pushi y cacho cu mi a topa mi kier a brasa! Segun cu mi tabata crece, mi a cuminsa haya rabia riba e manera cu hende ta maltrata bestia. Pesey, despues mi a join un organisacion cu ta sali na defensa di derecho di bestia, caminda mi a conoce otro hende cu tin e mesun pensamentonan cu mi.

Nos a hiba un campaña ferviente na fabor di derecho di bestia. Nos tabata reparti informacion y organisa marcha di protesta y tambe manifestacion contra luganan cu ta bende lana di bestia y laboratorionan cu ta haci test riba bestia. Hasta nos a forma un organisacion nobo pa proteha bestia. Pa motibo cu nos a tuma medidanan extremo pa purba promove nos causa, hopi biaha nos tabatin problema cu autoridad. Diferente biaha nan a yega di aresta mi y hiba mi corte.

Ademas di mi preocupacion pa bestia, e problemanan cu tin rond mundo tabatin mi hopi preocupa. Cu tempo, mi a drenta varios organisacion, manera Amnesty International y Greenpeace. Mi a uza tur mi energia pa apoya nan actividadnan. Mi a hiba un lucha na fabor di hende pober, esnan cu tabata muri hamber y otronan cu tabata sufri pa motibo di otro circunstancia.

Pocopoco pero sigur mi a bin realisa cu mi no por cambia e mundo aki. Aunke e organisacionnan ey a logra soluciona algun problema chikito, e problemanan grandi si tabata sigui bira pio. Ta manera cos cu henter e mundo aki ta den gara di e forsanan di maldad y cu ningun hende no tin cunes cu nada. Mi tabata sinti mi gewoon impotente.

E sintimento di no por haci nada, combina cu un gran decepcion, a pone mi cuminsa pensa riba Dios y riba Bijbel. Un tempo mi tabata studia Bijbel cu Testigonan di Jehova. Aunke e Testigonan tabata amabel y a mustra interes personal den mi, mi no tabata prepara pa cambia mi estilo di bida. E biaha aki si tabata diferente.

Mi a coy mi Bijbel y a cuminsa les’e. E tabata un berdadero consuelo pa mi. Mi a haya hopi texto di Bijbel cu ta siña hende con pa trata bestia na un manera drechi. Por ehempel, Proverbionan 12:10 ta bisa cu “un hende husto ta cuida bida di su bestia.” Mi a siña tambe cu no ta Dios ta causa e problemanan di mundo. Mas bien, nos problemanan a bira pio pasobra e gran mayoria no ta sigui su guia. Y ora mi a siña di Jehova su amor y su pasenshi, esey a haci un impresion profundo riba mi.—Salmo 103:8-14.

Den e mesun tempo ey mi a haya un coupon pa pidi e buki Kico Bijbel Ta Siña Realmente? y mi a mand’e. Poco tempo despues un pareha Testigo a bishita mi y a ofrece mi un estudio di Bijbel, locual mi a acepta. Tambe mi a cuminsa asisti na e reunionnan di Testigonan di Jehova na nan Salon di Reino. Como resultado, e berdadnan di Bijbel a cuminsa saca raiz den mi curason.

Bijbel a yuda mi haci hopi cambio den mi bida. Mi a stop di huma y bebe di mas. Mi a traha riba mi apariencia y manera di papia, y mi a cambia mi actitud pa cu autoridad den e mundo aki. (Romanonan 13:1) Tambe mi a stop cu mi bida inmoral, un area den cua mi tabata bastante liberal.

E cambio di mas dificil pa mi tabata pa haya e punto di bista corecto relaciona cu e organisacionnan pa derecho humano y di bestia. Esey no a bin di un dia pa otro. Na principio mi tabata sinti cu si mi stop di traha pa nan, lo mi a traiciona e organisacionnan aki. Pero mi a bin compronde cu e Reino di Dios ta e unico speransa pa humanidad. Mi a dicidi di uza tur mi energia pa apoya e Reino y asina yuda otro hende siña di dje.—Mateo 6:33.

Como activista, semper mi a considera cu hende ta sea bon of malo—y mi tabata cla pa actua contra esnan cu mi tabata mira como malo. Pero Bijbel a yuda mi vence e odio ey contra hende. Mas bien, mi ta purba cultiva amor pa tur hende. (Mateo 5:44) Entre otro, mi ta mustra e amor aki pa medio di mi esfuersonan pa comparti e bon noticia di e Reino di Dios. Mi ta contento pa mira con e obra di bondad aki ta promove paz y felicidad y ta duna hende berdadero speransa.

Como cu mi a laga tur cos den man di Jehova, mi a logra di haya paz mental. Mi ta convenci cu e, como Creador, lo no laga bestia y hende ser maltrata pa semper ni laga nos bunita tera caba na nada. Al contrario, pa medio di su Reino lo e drecha tur e daño cu hende a causa riba e planeta aki. (Isaias 11:1-9) E echo cu no solamente mi sa e berdadnan aki, sino tambe cu mi por yuda otronan pone fe den dje ta duna mi un goso grandi. Mi no ta sinti mas cu mi tin cu cambia mundo.