Si un religion en particular a desapunta bo, kisas lo ta dificil pa bo confia un otro religion. Pero bo por ta sigur cu ta existi un religion cu si ta digno di bo confianza. Tempo Hesus tabata riba tera, el a reuni un grupo di fiel siguidor y a siña nan con pa biba di acuerdo cu Dios su normanan. Te ainda bo ta haya berdadero siguidor di Cristo, esta, hende cu di curason ta haci esfuerso pa biba segun normanan cristian. Pero, ken nan ta?

Estelle, menciona anteriormente, a bisa: “Ora m’a cuminsa studia Bijbel cu Testigonan di Jehova, pocopoco pero sigur m’a siña compronde e Palabra di Dios. Den poco tempo m’a compronde e texto di Juan 8:32 cu ta bisa: ‘Boso lo conoce e berdad, y e berdad lo haci boso liber.’”

Ray tambe a bisa: “Ora m’a studia Bijbel cu Testigonan di Jehova, m’a bin compronde cu no ta Dios ta causa sufrimento di humanidad. Mi tabata contento cu m’a siña cu aunke Dios tin bon motibo pa permiti maldad existi te ainda, e ta priminti cu pronto lo e caba cu esaki.”

Ta berdad cu no ta facil pa haci loke ta bon den e mundo degenera aki. Pero e ta posibel si. Hopi hende tin gana di haya yudansa pa compronde y aplica e siñansanan di Bijbel. Pesey, Testigonan di Jehova ta duna curso di Bijbel gratis na miyones di hende rond mundo. Tur siman, un gran cantidad di hende ta haya sa kico Bijbel ta siña realmente. Como resultado di esey, nan ta hala cerca nan Creador y ta logra hiba un bida mas feliz. *

E siguiente biaha cu bo topa Testigonan di Jehova, puntra nan dicon nan ta confia nan religion. Wak si nan siñansanan ta cuadra cu nan echonan. Anto dicidi pa bo mes si ta existi un religion cu ta digno di bo confianza.