Ki tipo di regalo lo bo aprecia mas hopi? Sin duda, mayoria di nos lo ta contento cu un obsekio di un hende cu ta duna pa motibo di su amor y no pa motibo di obligacion. Ora un hende duna nos un regalo, su motivacion ta importante. Y esey ta mas importante ainda pa Dios. Tuma nota di e palabranan inspira aki di apostel Pablo registra na 2 Corintionan 9:7.

Dicon Pablo a skirbi e palabranan ey? E kier a anima e cristiannan Corintio pa apoya e esfuersonan cu tabata ser haci pa yuda nan rumannan den necesidad na Judea. E tabata trata di obliga e Corintionan pa duna? Di ningun manera. Mas bien, el a skirbi: “Laga cada hende haci manera el a dicidi den su curason, no di mala gana, ni forsa, pasobra Dios ta stima hende cu ta duna cu alegria.” Laga nos analisa e conseho aki un tiki mas di cerca.

“Manera el a dicidi den su curason.” Pablo a bisa cu un cristian berdadero ta duna pasobra el a dicidi “den su curason” pa haci esey. Na mes momento, un cristian ta pensa tambe riba e necesidadnan di su rumannan den fe. Segun un experto, e palabra Griego traduci como “dicidi” ta duna e idea di “pensa adelanta.” Pues un cristian ta pensa riba e necesidadnan di su rumannan den fe y ta puntra su mes kico e por haci pa cubri e necesidadnan ey.—1 Juan 3:17.

“No di mala gana, ni forsa.” Pablo a describi dos actitud cu cristiannan mester evita ora nan ta duna: di mala gana y forsa. E expresion Griego “di mala gana” literalmente ta nifica “pa motibo di tristeza.” Un obra di referencia ta splica cu un hende cu ta duna di mala gana ta duna cu un curason tristo ora e pensa cu e tin cu saca placa. Un hende cu ta duna forsa ta duna pasobra e ta sinti cu e ta bou di presion pa haci esaki. Abo lo kier ricibi un regalo di un hende cu ta duna di mala gana of forsa?

“Dios ta stima hende cu ta duna cu alegria.” Si un cristian dicidi di duna, e mester haci esaki cu alegria of cu goso, segun Pablo. En berdad, nos ta sinti goso ora nos ta duna cu e motibo corecto. (Echonan 20:35) Ta dificil pa sconde nos goso ora nos ta duna cu alegria. De echo, e palabra “alegria” por describi tanto loke e hende cu ta duna ta sinti di paden como loke e ta expresa. Un hende cu ta duna cu alegria ta conmove nos. Ademas, e ta alegra Dios su curason tambe. Un otro traduccion ta bisa: “Dios ta stima hende cu ta gusta duna.”—Contemporary English Version.

E palabranan inspira aki di apostel Pablo ta un principio pa guia cristiannan na momento di duna. Sea cu nos ta duna di nos tempo, energia of cosnan material, laga nos haci esaki di buena gana. Ta un placer pa nos ta generoso cu otro hende, specialmente cu esnan cu tin necesidad. E manera di duna aki no solamente ta haci nos feliz, sino tambe ta agrada Dios, kende ta “stima hende cu ta duna cu alegria.”