Pronto Tur Sufrimento Lo Caba!
Imagina bo mes den un mundo liber di sufrimento—un mundo sin crimen, guera, maleza y desaster natural. Imagina bo mes ta lanta tur mainta sin tin cu preocupa cu discriminacion, opresion of insiguridad economico. E ta zona mucho bunita pa kere? Ta berdad cu no tin niun hende of organisacion humano cu por crea e condicionnan ey. Pero Dios a priminti di caba cu tur causa di sufrimento humano, incluso esnan cu nos a trata den e articulo anterior. Tuma nota di e siguiente promesanan cu Bijbel, e Palabra di Dios, ta trece dilanti:
UN GOBIERNO HUSTO LO TA NA MANDO
“E Dios di cielo lo lanta un reino cu nunca lo no wordo destrui, y e reino ey lo no pasa pa ningun otro pueblo; e lo garna y pone un fin na tur e reinonan aki, ma e mes lo dura pa semper.”—Daniel 2:44.
E Reino di Dios ta un gobierno celestial. Hesucristo, esun scogi pa goberna, lo reemplasa gobierno humano y lo percura pa e boluntad di Dios tuma luga no solamente den cielo, sino tambe riba tera. (Mateo 6:9, 10) E gobierno aki lo no ser reemplasa pa ningun gobierno humano pasobra e ta “e Reino eterno di nos Señor y Salbador Hesucristo.” Esey ta garantisa paz duradero.—2 Pedro 1:11.
LO NO TIN RELIGION FALSO MAS
“Satanas mes ta sigui disfrasa su mes na un angel di luz. Pesey, no ta nada extraordinario cu su sirbidornan tambe ta sigui disfrasa nan mes na sirbidor di husticia. Ma nan fin lo ta conforme nan obranan.”—2 Corintionan 11:14, 15.
E Reino di Dios lo expone religion falso como un obra di Satanas y lo elimina esaki for di tera. Esey lo pone fin tambe na prehuicio religioso y dramamento di sanger. Asina, tur hende cu ta stima e “Dios bibo y berdadero” por ador’e den “un fe” y “cu spirito y cu berdad.” E resultado lo ta berdadero paz y union!—1 Tesalonicensenan 1:9; Efesionan 4:5; Juan 4:23.
HENDE LO NO TA IMPERFECTO MAS
“Dios mes lo ta hunto cu nan. Y lo e seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas. E cosnan cu tabata pasa antes no t’ey mas.”—Revelacion 21:3, 4.
Jehova Dios lo haci esaki posibel pa medio di su Yiu, Hesus, kende a duna su bida pa henter humanidad. (Juan 3:16) Bou di e guia di Hesus, hende lo bira perfecto. Nan lo no sufri mas pasobra “Dios mes lo ta hunto cu nan” y lo e kita “tur lagrima for di nan wowo.” Pronto imperfeccion humano y sufrimento lo pasa pa olvido; “e hustonan lo hereda e tera, y lo biba den dje pa semper.”—Salmo 37:29.
LO NO TIN SPIRITO MALBADO MAS
“[Hesucristo] a gara e dragon, e colebra original, cu ta Diabel y Satanas, y a mar’e pa 1.000 aña. Y el a bent’e den e abismo, ser’e aden y pone un seyo ariba, di manera cu e no por a gaña e nacionnan mas.”—Revelacion 20:2, 3.
Tur influencia satanico lo disparce ora Cristo mara Satanas y e demoñonan y tira nan den “e abismo”, un condicion di inactividad completo. Nan lo no por influencia hende mas. Bida den un mundo liber di e influencia di Satanas y di e spiritonan malbado lo ta un gran alivio!
“E ULTIMO DIANAN” LO YEGA NA NAN FIN
“E ultimo dianan” lo culmina den loke Hesus a yama e “tribulacion grandi.” El a bisa: “E tempo ey lo tin un tribulacion grandi manera no a yega di sosode nunca, for di principio di mundo te awor, y cu lo no sosode nunca mas tampoco.”—Mateo 24:21.
E tribulacion lo ta algo grandi den sentido cu algun calamidad nunca bisto lo tuma luga. Nan lo culmina den “e guera cu lo tuma luga riba e gran dia di Dios, e Todopoderoso”, mihor conoci como “Armagedon.”—Revelacion 16:14, 16, nota na pia di pagina.
Hende cu ta stima husticia ta anhela pa e mundo malbado aki yega na su fin. Laga nos wak algun di e bendicionnan cu nan lo haya bou di e Reino di Dios.
DIOS TIN MAS COS NA CAMINDA!
“Un multitud grandi” lo sobrevivi pa drenta un mundo nobo pacifico: E Palabra di Dios ta indica cu “un multitud grandi” di hende, cu lo ta incontabel, lo “sobrevivi e tribulacion grandi” y drenta den un mundo nobo caminda husticia lo reina. (Revelacion 7:9, 10, 14; 2 Pedro 3:13) Nan ta reconoce cu nan salbacion ta bin di Hesucristo, “e Lamchi di Dios cu ta kita pica di mundo.”—Juan 1:29.
Dios su programa di educacion lo trece hopi bendicion: Den e mundo nobo, ‘tera lo ta yen di e conocemento di Jehova.’ (Isaias 11:9) E educacion aki di parti di Dios lo siña nos pa biba na paz y harmonia cu hende y tambe cu naturaleza. Dios ta priminti: “Ami ta SEÑOR bo Dios, kende ta siña bo, pa bo prospera, kende ta guia bo den e caminda cu bo mester cana.”—Isaias 48:17.
Nos sernan keri lo lanta for di morto: Tempo Hesus tabata riba tera, el a lanta su amigo Lazaro for di morto. (Juan 11:1, 5, 38-44) Cu esey el a duna un prueba chikito di loke lo e haci riba un escala mucho mas grandi como rey di e Reino di Dios.—Juan 5:28, 29.
Paz y husticia lo reina pa semper: Bou di mando di Cristo, maldad lo pasa pa historia. Con nos por sa esey? Pasobra Hesus por lesa curason di hende, y lo e uza e capacidad ey pa distingui hende husto for di esnan malbado. Lo e no permiti ningun hende cu no kier cambia su mal proceder biba den Dios su mundo nobo.—Salmo 37:9, 10; Isaias 11:3, 4; 65:20; Mateo 9:4.
Loke nos a considera aki ta djis algun di e hopi profecianan di Bijbel cu ta tira luz riba e futuro briyante cu nos tin nos dilanti. Ora e Reino di Dios ta goberna riba tera, pa semper lo tin “paz abundante.” (Salmo 37:11, 29) Tur loke ta causa dolor y sufrimento pa humanidad aworaki lo disparce. Nos por ta sigur di esey pasobra Dios a duna nos su palabra: “Tende! Mi ta traha tur cos nobo ... E palabranan aki ta digno di confianza y berdad.”—Revelacion 21:5.
