RAHAB tabata loer for di su bentana segun cu e prome rayonan di solo a sali na Jerico. Un ehercito invasor a lanta un campamento eyfo; tabata e soldaatnan di Israel. Ora nan a cuminsa marcha un biaha mas rond di e stad, nan a lanta un nubia di stof nan tras y a supla nan cachonan cu a keda resona.

Rahab tabata biba na Jerico; e tabata conoce tur e cayanan, casnan, plasanan druk y centronan comercial di e stad aki. Tambe e tabata conoce su habitantenan bon. E por a sinti cu dia pa dia nan tabata haya mas miedo segun cu e Israelitanan tabata efectua un rito straño: Nan tabata marcha rond di e stad un biaha pa dia. Ora e zonido di cacho tabata resona den e cayanan y plenchinan di Jerico, Rahab si no a sinti e miedo y angustia cu e hendenan di e stad tabata sinti.

Rahab tabata wak door di bentana ora e ehercito a cuminsa marcha mainta trempan riba e di shete dia. Meymey di e soldaatnan Israelita, el a mira nan sacerdotenan supla cacho y carga e arca sagrado cu a representa e presencia di nan Dios, Jehova. Nos por imagina con Rahab tabatin un cabuya cora teni, colga na su bentana, cu tabata na e parti pafo di e muraya di Jerico. E cabuya ey a recorda Rahab di e speransa cu e tabatin pa e cu su famia sobrevivi e destruccion di e stad. Acaso Rahab tabata un traidor? Pa Jehova, sigur cu no! Jehova a mir’e como un muher cu tabatin un fe remarcabel. Laga nos bay bek na cuminsamento di e relato di Rahab y mira kico nos por siña for di dje.

Rahab tabata un prostituta. E detaye ey a shock algun comentarista di Bijbel asina tanto cu nan a prefera di kere cu Rahab tabata simplemente e encargado di un posada. Pero Bijbel no ta sconde e berdad. (Josue 2:1; Hebreonan 11:31; Santiago 2:25) Den e comunidad di Canaan, probablemente e hendenan tabata tolera e profesion di Rahab. Pero, no ta semper un cultura ta influencia un hende su consenshi, esta, e sentido interior di loke ta bon y loke ta malo, cu Jehova a duna nos tur. (Romanonan 2:14, 15) Ta pesey kisas Rahab mes lo tabatin berguensa di su profesion. Podise, mescos cu hopi hende awe cu ta den e mesun situacion, el a sinti cu e no tabatin salida, y cu e no tabatin otro alternativa pa cuida su famia.

Rahab sigur a anhela un mihor bida. Den su tera natal tabatin hopi violencia y tur tipo di degradacion, incluso incesto y bestialidad. (Levitico 18:3, 6, 21-24) Religion a causa gran parti di e practicanan repugnante ey. Den e tempelnan nan tabata fomenta ritonan di prostitucion, y e adoracion di dios falso manera Baal y Molek a inclui kimamento di yiu bibo den sacrificio di candela.

Jehova no a cera wowo pa loke tabata pasa na Canaan. Ta pa motibo di e barbaridadnan ey mes, Jehova a bisa: “E tera ta impuro, y lo mi trece castigo riba dje pa su eror y e tera lo saca su habitantenan afo.” (Levitico 18:25, NW) Kico e “castigo” ey a encera? Jehova a duna Israel e promesa aki: “SEÑOR bo Dios lo saca e nacionnan aki for di bo  dilanti.” (Deuteronomio 7:22) Hopi siglo prome, el a priminti cu lo e duna e descendientenan di Abraham e tera aki, y “Dios ... no por gaña.”—Tito 1:2; Genesis 12:7.

Sinembargo, Jehova a decreta tambe cu algun pueblo di e tera lo mester a disparce completamente. (Deuteronomio 7:1, 2) Como e “Hues di henter mundo”, el a mira kico nan tabatin den nan curason y tabata sa con perverso nan tabata. (Genesis 18:25; 1 Cronicanan 28:9) Con e bida di Rahab lo tabata den un di e stadnan condena ey? Nos por imagina nos con lo e mester a sinti su mes ora el a tende di e Israelitanan. El a haya sa cu e Dios di Israel a guia su pueblo—un nacion di catibo oprimi—na un victoria aplastante riba e ehercito di Egipto, e potencia militar di mas grandi den e mundo di e tempo ey. Y awor e mesun nacion ey, Israel, tabata a punto di ataca Jerico. Pero e hendenan di e stad ey a sigui den nan maldad. Nos por compronde dicon Bijbel ta bisa cu e compatriotanan di Rahab tabata ‘desobediente.’—Hebreonan 11:31.

Rahab si tabata diferente. Den transcurso di añanan, lo e mester a pensa riba e informenan cu el a tende tocante Israel y nan Dios, Jehova. Ki diferente Jehova tabata di e diosnan Cananeo! E tabata un Dios cu a lucha pa su pueblo, en bes di oprimi nan; el a eleva e normanan moral di su sirbidornan, en bes di rebaha nan. E Dios aki a duna balor na hende muher y no a mira nan como obheto sexual cu otronan por a cumpra, bende y degrada den ritonan perverso. Ora Rahab a haya sa cu e Israelitanan a yega Riu Jordan y cu nan a prepara un atake, e lo mester a sinti miedo pa loke esey lo por a nifica pa su pueblo. Jehova a tuma nota di e muher aki? El a mira algo bon den dje?

Awe, tin hopi hende manera Rahab. Nan ta sinti nan atrapa den un estilo di bida cu ta caba cu nan dignidad y goso den bida; nan ta sinti un bashi y sin balor propio. E storia di Rahab ta un consuelo pa nos tur pasobra e ta laga nos mira cu Dios ta tuma nota di tur hende. Maske con indigno nos por sinti nos mes, “e [si] no ta masha leu for di cada un di nos.” (Echonan 17:27) E ta hopi cerca di nos, cla y ansioso pa duna speransa na tur esnan cu ta pone nan fe den dje. Esey a conta pa Rahab tambe?

Riba un dia, poco prome cu e Israelitanan a marcha rond di Jerico, dos hende straño a yega na porta di Rahab. E dos hombernan kier a pasa sin cu ningun hende a tuma nota di nan, pero como cu e habitantenan di e stad tabata den tension, nan lo tabata alerta pa cualkier posibel spion di Israel. Rahab tambe tabata alerta; e lo a mira di biaha ken nan tabata. No tabata nada straño p’e ricibi hende desconoci na su porta, pero e dos hombernan aki tabata interesa solamente den un luga di keda, no den e servicionan di un prostituta.

En realidad, nan tabata spion di e campamento di Israel. Josue, nan comandante, a manda nan  bay wak kico tabata e puntonan fuerte y e puntonan debil di Jerico. Esey tabata e prome stad di Canaan cu e Israelitanan mester a invadi, y kisas esun di mas poderoso di nan tur. Josue kier a sa kico tabata spera e cu su hombernan. E spionnan sigur no a yega e cas di Rahab pa casualidad. Na un luga asina, esta na cas di un prostituta, otronan lo no a ripara facilmente cu nan tabata hende straño. Kisas nan a spera tambe di haya cualkier informacion util for di combersacion di hende cu tabata papia sin pensa.

Bijbel ta bisa cu Rahab “a ricibi e mensaheronan hospitalariamente.” (Santiago 2:25) El a tuma nan den su cas, y si e tabata sospecha ken nan tabata y pakico nan tabata eynan, toch el a laga nan keda. Podise e tabatin gana di haya sa mas tocante nan Dios, Jehova.

Pero diripiente algun mensahero di e rey di Jerico a yega. Rumor tabata core cu tabatin spion di Israel den cas di Rahab. Kico Rahab lo a haci? Si el a proteha e dos enemigonan aki, esey lo no a pone su mes y henter su famia na peliger? E hendenan di Jerico lo no a mata nan? Di otro banda, Rahab entretanto tabata sa bon bon ken e hombernan aki tabata. Si e tabata sa caba cu e Dios di Israel tabata hopi mas mihor cu su diosnan, esaki lo no tabata un bon oportunidad p’e tuma parti pa Jehova?

Rahab no tabatin mucho tempo pa pensa, pero e tabata ingenioso y a actua lihe. El a sconde e spionnan entre un boshi di taki di mata di lino cu tabata seca riba dak di su cas. Anto el a bisa e mensaheronan di e rey: “Si, e hombernan a bin cerca mi, ma mi no tabata sa di unda nan tabata. Y a sosode cu ora a bira scur y a yega tempo pa cera porta di stad, e hombernan a sali bay; mi no sa unda e hombernan a bay. Bay lihe nan tras, y boso lo alcansa nan.” (Josue 2:4, 5) Rahab lo a keda observa cara di e mensaheronan di e rey. Acaso nan a ripara cu e tabatin miedo?

Rahab a nek nan! E hombernan di e rey a sali na careda den direccion di Riu Jordan, na e area caminda hende por a crusa e riu. (Josue 2:7) Rahab lo mester a sinti un alivio. Cu un strategia simpel, el a logra despista e asesinonan ey cu no tabatin derecho di sa e berdad, y asina el a scapa bida di e sirbidornan inocente di Jehova.

Rahab a core bay bek riba dak p’e bisa e dos spionnan kico el a haci. Tambe el a revela un dato crucial: Su pueblo a perde animo y tabata morto spanta di e invasornan. Esey si tabata bon noticia pa e spionnan! Nan lo a keda hopi contento di tende esey. E Cananeonan malbado ey a haya miedo di e poder di Jehova, e Dios di Israel. E ora ey Rahab a revela algo mucho mas importante pa nos. El a bisa: ‘Jehova boso Dios ta Dios ariba den  cielo y abou na tera.’ (Josue 2:11) E informenan tocante Jehova cu a yega na su horea tabata suficiente pa sigur’e cu e Dios di Israel a merece su confianza. Pesey el a pone fe den Jehova.

No tabatin duda den mente di Rahab cu Jehova lo a duna su pueblo victoria. Pesey el a roga e spionnan pa tene misericordia di nan y spaar bida di e cu su famia. E spionnan a bay di acuerdo, pero nan a bis’e cu e mester a warda e secreto ey y cu e mester a colga un cabuya cora for di su bentana den e muraya di e stad. Di e manera ey, e soldaatnan lo por a proteha e cu su famia.—Josue 2:12-14, 18.

E caso di Rahab ta siña nos un berdad fundamental tocante fe. Manera Bijbel ta indica, “fe ta bin despues cu un hende tende e palabra.” (Romanonan 10:17) Rahab a tende informenan confiabel tocante e poder y husticia di Jehova Dios, y pesey el a pone fe y confianza den dje. Awe nos tin mucho mas conocemento di Jehova. Anos ta busca pa sa mas di dje y ta laga loke nos siña den su Palabra motiva nos pa pone fe den dje?

E dos spionnan a sigui Rahab su conseho pa baha bay abou via di un cabuya colga for di su bentana, y despues nan a core bay den direccion di e seronan. Ey, na parti noord di Jerico, tabatin hopi cueba caminda nan por a sconde te ora tabata safe pa bolbe bek na e campamento Israelita cu e bon noticia cu Rahab a duna nan.

Mas despues, e pueblo di Jerico sigur lo a tembla di miedo ora nan a tende con Jehova a haci un milager pa stop Riu Jordan di core, pa permiti Israel crusa riba e fondo seco di e riu. (Josue 3:14-17) Pero pa Rahab, e noticia ey tabata un prueba mas cu el a haci bon di pone confianza den Jehova.

Anto a bin e dianan largo cu Israel a marcha rond di Jerico: seis dia, un rond pa dia. E di shete dia si tabata diferente. Manera e introduccion di e articulo aki a trece padilanti, e marcha a cuminsa ora solo a sali, y despues cu e ehercito a marcha un biaha rond di e stad, el a sigui marcha rond di Jerico varios biaha mas. (Josue 6:15) Kico e Israelitanan tabata haciendo?

Finalmente, ora e ehercito a caba di dal e di shete rond riba e di shete dia, el a para keto. E Israelitanan a stop di supla e cachonan. A reina un silencio. Paden di e stad lo mester tabatin un tension enorme. Anto, diripiente, riba indicacion di Josue, e soldaatnan di Israel a laga nan stem resona pa prome biaha y a dal un grito masha duro. Acaso e guardianan cu tabata riba e muraya di Jerico a pensa cu esaki tabata un otro tipo di atake? No a dura hopi pa nan a haya sa esey. E muraya masivo a cuminsa tembla bou di nan pia. El a sacudi, scheur y despues basha abou completamente. Pero segun cu e nubia di stof tabata baha, tabata bisto cu parti di e muraya a keda intacto. E cas di Rahab a keda para su so como un testimonio di su fe. Imagina bo con lo el a sinti su mes ora el a mira con Jehova a proteh’e. * Su famia a scapa!—Josue 6:10, 16, 20, 21.

E pueblo di Jehova tambe a respeta Rahab pa motibo di su fe. Ora nan a mira cu su cas a keda para su so entre e ruinanan di e muraya, nan tabata sa cu Jehova tabata cu e muher aki. Rahab cu su famia a sobrevivi e ehecucion cu a bin riba e stad malbado ey. Despues di e bataya, e Israelitanan a permiti Rahab biba den cercania di nan campamento. Cu tempo, el a bira parti di e pueblo Hudiu. El a casa cu un homber cu tabata yama Salmon, y nan yiu homber, Boaz, a crece bira un homber cu un fe extraordinario. Boaz a casa cu Ruth, e Moabita. * (Ruth 4:13, 22) Rey David y despues, e Mesias mes, Hesucristo, a bin di e famia sobresaliente ey.—Josue 6:22-25; Mateo 1:5, 6, 16.

E storia di Rahab ta demostra cu pa Jehova ningun hende no ta insignificante. E ta mira nos tur y ta examina nos curason. Y ora e mira maske ta un chispa di fe manera esun cu Rahab tabatin, su curason ta yena di alegria. Rahab su fe a motiv’e pa tuma accion. Manera Bijbel ta bisa, Dios a ‘declar’e husto pa medio di obra.’ (Santiago 2:25) Sin duda, su fe ta digno pa nos imita!