“Abo por biba sin Dios? Miyones di hende ta sinti cu nan por.” Esey ta loke tabatin skirbi riba un borchi di propaganda cu un grupo di ateista a sponsor. Aparentemente, nan ta haya cu nan no tin mester di Dios.

Di otro banda, hopi hende cu ta bisa cu nan ta kere den Dios ta demostra net lo contrario cu nan accionnan. Nan ta haci comosifuera Dios no ta existi mes. Salvatore Fisichella, un arsobispo catolico, a bisa di e miembronan di su iglesia: “Awendia, ora un hende wak nos, lo e no kere cu nos ta cristian, pasobra nos ta biba mescos cu hende cu no ta kere den Dios.”

Tin hende ta asina druk cu nan no tin tempo pa pensa riba Dios. Nan ta haya cu e ta mucho leu pa e nifica algo pa nan. Ta ora nan ta den problema of ora nan tin mester di algo so nan ta acudi na dje: Ta comosifuera e ta un cria cu mester ta cla pa sirbi nan ora nan tin mester di dje.

Otronan no ta duna mucho balor na doctrina religioso, of no ta practica loke nan ta siña den nan misa. Por ehempel, 76 porciento di catoliconan na Alemania ta haya cu ta normal pa un homber cu un muher biba hunto prome cu nan casa; esey ta un punto di bista cu ta bay contra loke tanto nan misa como Bijbel ta siña. (1 Corintionan 6:18; Hebreonan 13:4) Naturalmente, no ta catoliconan so ta realisa cu tin un gran diferencia entre loke nan ta siña cu loke nan ta haci. Lidernan di hopi otro religion tambe ta lamenta cu nan miembronan ta comporta nan mes mescos cu ateista.

E ehempelnan aki ta hiba na e pregunta: Di berdad nos tin mester di Dios? E pregunta aki no ta nada nobo. E pregunta aki a lanta na principio di historia di humanidad. Pa nos haya contesta riba e pregunta, laga nos analisa algun cuestion cu Genesis, e prome buki di Bijbel, ta trece padilanti.