Bijbel ta contene algun relato di hende poderoso cu a abusa di hende debil. Un ehempel di esey ta e caso di Nabot. * Acab, un rey di Israel di siglo 10 prome cu Cristo, a permiti su casa Jezabel laga mata Nabot y su yiunan pa asina e por a haya Nabot su cunucu di wendruif. (1 Reynan 21:1-16; 2 Reynan 9:26) Pakico Dios a permiti e mal uzo di poder aki?

Laga nos para keto na un motibo importante: Dios no por gaña. (Tito 1:2) Kico esaki tin di haber cu mal uzo di poder? Wel, na principio, Dios a spierta sernan humano cu si nan rebela contra dje, esey lo hiba na morto. Dicho echo, pasobra for di dia cu nan a rebela den e hofi di Eden, nan no por a scapa for di e castigo di morto. De echo, e prome morto cu a cay—ora Cain a mata su ruman Abel—tabata resultado di mal uzo di poder.—Genesis 2:16, 17; 4:8.

Bijbel ta bisa cu for di e tempo ey padilanti “hende a eherce autoridad riba un otro hende pa su daño.” (Eclesiastes 8:9) E palabranan ey a cumpli? Sigur cu si. Por ehempel, Jehova a spierta su pueblo, e nacion di Israel, cu nan reynan lo a oprimi nan y pone nan sclama na dje pa yudansa. (1 Samuel 8:11-18) Hasta e rey sabi Salomon a oprimi e pueblo door di cobra demasiado belasting. (1 Reynan 11:43; 12:3, 4) Y reynan malbado, manera Acab, tabata hopi mas cruel ainda. Awor, puntra bo mes: Si Dios a evita e cosnan aki di sosode, lo e no a contradeci su mes palabranan?

Corda tambe cu Satanas ta pretende cu hende ta sirbi Dios pa motibonan egoista. (Job 1:9, 10; 2:4) Si Dios a proteha su sirbidornan contra tur forma di mal uzo di poder, lo e no ta dunando Satanas rason? Y si Dios a preveni tur forma di opresion, lo e no ta responsabel pa un mentira mas grandi ainda, esta, cu hende por goberna nan mes sin Dios? Pero Bijbel ta bisa net lo contrario: Hende simplemente no ta capaz pa goberna nan mes. (Jeremias 10:23) Nos mester di e Reino di Dios; e ta e unico gobierno cu por caba cu inhusticia.

Pero esey ta nifica cu Dios no ta haciendo nada pa caba cu opresion? No. Tin dos cos cu e ta haciendo caba: Na prome luga, e ta saca na cla actonan di mal uzo di poder. Por ehempel, su Palabra ta revela tur detaye di e complot cu Jezabel a traha contra Nabot. Tambe Bijbel ta mustra cu tras di e actonan malbado ey tin un gobernador poderoso cu ta purba di sconde su identidad. (Juan 14:30; 2 Corintionan 11:14) Segun Bijbel, esey ta Satanas e Diabel. Door di saca maldad y opresion y su berdadero fuente na cla, Dios ta yuda nos keda leu for di maldad. Di e manera ey, e ta proteha nos futuro eterno.

Na di dos luga, Dios ta garantisa nos cu lo e caba cu mal uzo di poder. E manera cu el a desenmascara, husga y castiga Acab cu Jezabel, y tambe hopi otro hende malbado, ta duna nos e siguransa cu un dia lo e castiga tur hende cu ta haci malo. (Salmo 52:1-5) Tambe Dios ta duna nos speransa confiabel cu pronto lo e elimina e mal efectonan di maldad y opresion pa esnan cu ta stim’e. * Pues, lo yega e dia cu e homber fiel Nabot y su yiunan lo biba pa semper den paradijs riba tera, caminda lo no tin inhusticia mas.—Salmo 37:34.