Un siglo pasa, miyones di hoben a bandona e siguridad di nan cas y a bay guera. Nan a bay yen di entusiasmo, motiva pa un sintimento fuerte di patriotismo. Na 1914, un boluntario Mericano a skirbi: “Mi ta feliz y ansioso pa e dianan maraviyoso cu ta bay bin.”

Pero pronto despues nan entusiasmo a cambia pa amargura. Niun hende no a anticipa cu e ehercitonan grandi ey lo a keda lucha pa añanan largo den e areanan tur na lodo di Belgica y Francia. E tempo aya, hende a yama e conflicto ey “e Gran Guera.” Awe e ta conoci como e Prome Guera Mundial.

Prome Guera Mundial sigur tabata grandi pa loke ta e cantidad di morto cu a cay. Segun algun calculo, rond di 10 miyon hende a perde nan bida y 20 miyon hende a keda mancaron. E guera tabata resultado tambe di fayonan grandi. Politiconan Europeo no por a evita cu e tensionnan internacional a escala den un conflicto mundial. Kisas, mas importante ainda ta e echo cu e “Gran Guera” a laga cicatriz grandi atras. Te awe nos ta sinti e efectonan di e manera cu el a cambia mundo.

Prome Guera Mundial tabata resultado di mal calculacion. E buki The Fall of the Dynasties—The Collapse of the Old Order 1905-1922 ta splica cu lidernan Europeo “no por a imagina nan cu e decisionnan cu nan a tuma den e zomer di 1914 lo a resulta den un desaster mundial.”

Djis un par di siman despues di e asesinato di e arkiduke Austriaco, tur e potencianan Europeo a haya nan den un guera cu nan no a desea. Algun dia despues cu e guera a cuminsa, nan a puntra e canciyer Aleman con bin esaki por a sosode. El a contesta: “Mare mi tabata sa!”

E lidernan cu a tuma e decisionnan fatal aki cu a hiba na e guera no tabatin niun idea di kico lo por tabata e consecuencianan. Pero no a dura mucho pa e soldaatnan cu a bay guera ripara den kico nan a hinca nan curpa. Nan a realisa cu nan lidernan politico a laga nan na caya, cu nan lidernan religioso a gaña nan y cu nan generalnan a traiciona nan. Con asina?

E lidernan politico a priminti cu e guera lo a habri caminda pa un mundo mas mihor. E canciyer Aleman a declara: “Nos ta lucha pa e frutanan di nos industria pacifico, pa proteha e herencia di nos pasado glorioso y pa nos futuro.” Presidente Mericano Woodrow Wilson tabata tras di e lema popular di e tempo ey di cu guera lo a “haci mundo un luga mas safe pa democracia.” Y na Britania, hende a kere cu esaki lo tabata “un guera pa caba cu tur guera.” Pero nan tur tabata ekiboca.

Cu entusiasmo e lidernan religioso a apoya e guera. Segun The Columbia History of the World: “E defensornan di e palabra di Dios a anima hende pa bay guera. Pero guera a plama odio tur caminda.” Y en bes di yuda elimina odio, lidernan religioso a foment’e mas. A History of Christianity ta remarca cu “lidernan religioso no tabata capaz y den mayoria caso no tabata dispuesto tampoco pa pone fe cristian prome cu nacionalidad. Mayoria di nan a bula pipa y a haci cristianismo igual cu patriotismo. Nan a encurasha soldaatnan cristian di tur religion pa mata otro den nomber di nan Salbador.”

E generalnan a priminti un victoria lihe y facil, pero cosnan no a bay asina. No a dura mucho cu e ehercitonan cu tabata bringa contra otro a haya nan den un guera sin ganado. Despues di esey, miyones di soldaat a pasa den loke un historiador a describi como “probablemente e trauma di mas cruel cu hende a yega di experencia, tanto fisicamente como emocionalmente.” A pesar di perdidanan grandi, e generalnan a sigui manda soldaat bay muri den campo di bataya. No ta nada straño cu hopi soldaat a rebela.

Con e guera aki a afecta sociedad? Un obra di historia a cita e palabranan di un veterano di guera, bisando: “E guera a haci un impacto negativo riba e pensamento y comportacion di henter un generacion.” En berdad, como resultado di e guera ey, imperionan completo a disparce. E conflicto tragico ey a marca e comienso di e siglo di mas sangriento cu humanidad a yega di mira. Revolucion y welga a bira cos di tur dia.

Pakico e guera ey a causa asina tanto caos den e mundo aki? Ta djis un accidente teribel e tabata? E contestanan ta revela algo tocante nos futuro?