Esey ta un di e textonan di Bijbel mas conoci y mas uza. Nan ta bisa cu no tin ningun otro texto di Bijbel “cu ta resumi na un manera asina cla e relacion cu tin entre Dios y hende y tambe con nan por haya salbacion.” Pa e motibo ey, na algun pais bo ta haya sea e texto di Bijbel Juan 3:16 of e palabranan di e texto ey skirbi entre otro riba borchi na eventonan publico, riba sticker di auto y riba muraya.

Muy probablemente, e hendenan cu ta haci esey ta convenci cu nan lo haya salbacion eterno pasobra Dios ta stima nan. Kico di abo? Kico Dios su amor ta nifica pa bo? Y kico bo ta pensa cu Dios a haci pa mustra cu e ta stima bo?

Hopi hende ta admiti cu ta Dios a crea universo, naturaleza y hende. Como cu tur loke ta bibo ta asina complica y bon traha, no tin duda cu mester tin un ser sumamente inteligente cu a crea tur e cosnan ey. Tur dia, un gran cantidad di hende ta gradici Dios pa e bida cu el a duna nan. Ademas, nan ta reconoce cu nan ta depende completamente di Dios pa tur loke ta necesario, manera aire, awa, cuminda y tur e ciclonan di naturaleza, pa nan por sigui biba y disfruta di loke nan ta haci.

Como cu Dios ta nos Creador y Esun cu ta mantene nos na bida, ta na su luga pa gradicie pa tur e cosnan ey. (Salmo 104:10-28; 145:15, 16; Echonan 4:24) Ora nos pensa riba tur loke Dios ta haci pa nos, nos ta mira cu e ta stima nos. Apostel Pablo a describi esaki na e siguiente manera: “[Dios] mes ta duna tur hende bida, rosea y tur cos. Pasobra ta pa medio di dje nos tin bida y ta move y ta existi.”—Echonan 17:25, 28.

 Dios ta mustra su amor no solamente door di percura pa nos necesidadnan fisico, sino tambe, distinto for di bestia, el a duna nos un capacidad special pa compronde cosnan spiritual y ta yuda nos satisface e necesidad spiritual aki. (Mateo 5:3) Di e manera ey, hende obediente tin e speransa di bira parti di Dios su famia, esta, su “yiunan.”—Romanonan 8:19-21.

Manera Juan 3:16 ta sigui bisa, Dios a mustra su amor na nos door di manda su Yiu, Hesus, na mundo pa el a siña nos tocante su Dios y Tata y pa muri pa nos. Pero, hopi hende ta admiti cu nan no ta compronde realmente pakico tabata necesario pa Hesus muri pa humanidad y di ki manera e morto di Hesus ta un muestra di Dios su amor pa nos. Bijbel ta splica dicon Hesus mester a muri y ki balor su sacrificio tin. Laga nos wak con.

Tur hende ta bira malo, bira bieu y muri. Pero esey no tabata e proposito di Jehova Dios. El a duna e prome pareha e speransa di biba pa semper den Paradijs riba Tera. Pero el a pone un condicion: Nan mester a obedec’ele. Dios a bisa, si nan no obedec’e, nan lo muri. (Genesis 2:17) Esey ta net loke e prome homber, Adam, a haci: El a rebela contra Dios su autoridad. Como consecuencia, el a causa su mes morto y di su descendientenan. Apostel Pablo a splica: “Pa medio di un hende pica a drenta mundo, y morto pa medio di pica, y asina morto a pasa pa tur hende pasobra nan tur a peca.”—Romanonan 5:12.

Sinembargo, Dios “ta stima husticia.” (Salmo 37:28) Pesey, e no por a pasa por halto di e pica cu e prome homber a comete deliberadamente. Pero esey kiermen cu pa motibo di e homber ey Dios a condena henter humanidad pa semper na sufrimento y morto? No, al contrario, como cu Dios a aplica su propio principio di “bida pa bida”, el a cumpli cu husticia y asina a habri caminda pa hende obediente por haya bida eterno. (Exodo 21:23) E pregunta ta: Con hende por logra haya e bida perfecto cu Adam a perde? Wel, e contesta ta: Un hende mester a entrega of sacrifica su bida. Pero como cu Adam tabata perfecto, e persona cu ta sacrifica su bida tambe lo mester tabata perfecto.

Ta claro cu ningun descendiente di Adam no tabata perfecto y no por a ofrece e sacrificio ey, ta Hesus so por a haci esey. (Salmo 49:6-9) Hesus no a hereda pica ora el a nace, e tabata perfecto mescos cu Adam tabata na principio. Pues, ora Hesus a entrega su bida, el a libra humanidad for di sclavitud na pica. Di e manera ey, el a duna e descendientenan di e prome pareha humano e oportunidad pa disfruta di e mesun bida perfecto cu Adam cu Eva tabatin na principio. (Romanonan 3:23, 24; 6:23) Anos mester haci algo pa por beneficia di e gran amor ey cu a ser mustra na nos?

Si nos bay bek na Juan 3:16, nos ta mira cu e ta bisa “ken cu kere den [Hesus lo] no bay perdi, ma tin bida eterno.” Esaki ta nifica cu pa nos haya bida eterno nos tin cu cumpli cu cierto rekisito. Kico nos mester haci pa haya “bida eterno”? Nos mester kere den Hesus y obedec’e.

Kisas bo ta puntra bo mes: ‘Dicon mi mester obedec’e? Hesus no a bisa cu “ken cu kere den dje” lo haya bida eterno?’ Si, kere den dje ta esencial. Pero, ta importante pa corda cu segun Bijbel, fe ta nifica mas cu djis kere so. Pa un hende por haya aprobacion di Dios, e mester haci mas cu simplemente reconoce cu Hesus ta e Salbador. E mester haci esfuerso sincero tambe pa aplica loke Hesus a siña hende. Si un hende ta bisa cu e tin fe, pero no ta haci loke Hesus ta bisa, esey no ta bal nada. Pasobra Bijbel ta bisa: “Fe sin obra ta morto.” (Santiago 2:26) Cu otro palabra, loke un hende tin cu haci ta pone fe den Hesus, es decir, e mester biba na harmonia cu su fe.

Pablo a splica e punto aki na e siguiente manera: “Ta e amor di Cristo ta obliga nos pa haci esaki, ya cu ta na e conclusion aki nos a yega: un hende [Hesus] a muri pa tur ..., pa esnan cu ta biba no biba mas pa nan mes, ma pa esun cu a muri pa nan y a ser lanta for di morto.” (2 Corintionan 5:14, 15) Gratitud sincero pa e sacrificio di Hesus mester conmove nos pa haci cambio den nos bida. En bes di biba pa nos mes, nos ta laga egoismo un banda, y nos ta biba pa Hesus kende a muri pa nos. Kiermen, nos tin cu pone na practica loke Hesus a siña nos, y esey mester haya prioridad den nos bida. Y automaticamente esey lo tin un efecto riba nos norma y balornan, riba nos decisionnan y riba tur loke nos ta haci. Ki recompensa lo tin pa esnan cu ta kere den Hesus y ta pone fe den dje?

E ultimo parti di Juan 3:16 ta menciona e promesa cu Dios ta duna na tur hende cu ta pone fe den e sacrificio di rescate y cu ta biba na harmonia cu e normanan di Dios. Dios kier pa e hendenan fiel ey “no bay perdi, ma tin bida eterno.” Sinembargo, no ta tur hende cu ta beneficia di Dios su amor ta bay biba na e mesun caminda.

Hesus a priminti un grupo cu nan lo haya bida eterno den cielo. El a bisa su fiel discipelnan bon cla cu e ta bay prepara un luga pa nan den cielo pa nan por goberna cu ne eynan. (Juan 14:2, 3; Filipensenan 3:20, 21) Esnan cu haya resureccion pa biba den cielo “lo ta sacerdote di Dios y di Cristo, y nan lo reina como rey hunto cu ne pa e 1.000 añanan.”—Revelacion 20:6.

Solamente un cantidad limita di Cristo su siguidornan lo haya e privilegio ey. Si, Hesus a bisa: “No tene miedo, tou chikito, pasobra boso Tata a haya ta bon pa duna boso e Reino.” (Lucas 12:32) Cuanto hende lo forma parti di e “tou chikito” ey? Revelacion 14:1 y 4 ta bisa: “Mi a wak, y ata e Lamchi [Hesucristo resucita] para riba Sero di Sion [celestial], y hunto cu ne 144.000 cu tabatin su nomber y nomber di su Tata skirbi riba nan frenta ... Nan a ser cumpra for di entre humanidad como e prome frutanan pa Dios y pa e Lamchi.” Compara cu miles di miyones di hende cu a yega di biba, 144.000 persona en berdad ta un “tou chikito.” Bijbel ta yama nan rey. Pues, ta riba ken nan lo goberna?

Hesus a papia di un otro grupo di hende fiel cu lo beneficia di e Reino di Dios cu ta den cielo. Manera nos por mira na Juan 10:16, Hesus a bisa: “Mi tin otro carne cu no ta di e cura aki; nan tambe mi tin cu trece, y nan lo scucha mi stem, y nan tur lo bira un tou bou di un wardador.” E ‘carnenan’ ey tin speransa di biba pa semper riba Tera, esta, e mesun speransa cu Adam cu Eva tabatin na principio. Con nos por sa cu e ‘carnenan’ ey lo bay biba riba Tera?

 Na hopi ocasion Bijbel ta bisa con bida ta bay ta den Paradijs riba Tera. Si bo ta desea, bo por comproba esey pa bo mes door di lesa e siguiente textonan den bo Bijbel: Salmo 37:9-11; 46:8 y 9; 72:7, 8 y 16; Isaias 35:5 y 6; 65:21-23; Mateo 5:5; Juan 5:28 y 29 y Revelacion 21:4. E textonan ey ta profetisa cu Dios lo pone un fin na guera, hamber, maleza y morto. Ademas, e textonan ey ta papia di un tempo cu bon hende lo tin e goso di traha nan propio cas, planta den nan mes cunucu y cria nan yiunan den un ambiente pacifico. * Abo lo desea di biba den un ambiente asina? Nos tin bon motibo pa kere cu pronto e promesanan ey lo bira realidad.

Si bo pensa un rato riba tur loke Dios a haci pa bo y pa henter humanidad, bo ta mira claramente cu el a haci masha hopi cos caba. Nos tin bida, inteligencia, un cierto grado di salud y tambe tur loke nos tin mester den bida. Y mas importante ainda, manera Juan 3:16 ta siña nos, Dios a duna su Yiu como un sacrificio di rescate pa nos por haya bendicionnan mas grandi ainda.

Sin duda, bida eterno den un ambiente agradabel di paz, den cua lo no tin maleza, guera, ni hamber, ni morto, lo habri caminda pa hende disfruta di felicidad y bendicionnan pa semper. Ta depende completamente di bo mes si bo lo disfruta di e bendicionnan ey den futuro. E pregunta cu ta lanta ta: Kico abo ta haciendo pa Dios?