MARIA a cay na rudia. No tin palabra pa describi e agonia cu el a sinti ora su yiu homber a muri despues di oranan largo di sufrimento. Ainda e ultimo palabranan di Hesus tabata resona den su cabes. A bira scur aunke tabata di dia cla. Tera a cuminsa sacudi hopi duro. (Mateo 27:45, 51) For di Maria su punto di bista tabata comosifuera Jehova mes tabata kier pa mundo haya sa cu e, mas cu cualkier otro persona, tabata hopi tristo ora Hesucristo a muri.

Segun cu cielo a cuminsa bira mas cla atrobe e atardi ey na Golgota, of Luga di Carpachi, Maria tabata yora su yiu. (Juan 19:17, 25) Probablemente e tabata corda yen di cos. Un di nan cu kisas a bin na su mente tabata algo cu a sosode un 33 aña prome. Ora cu Maria cu Jose tabata cu nan baby stima na e tempel di Jerusalem, un homber di edad cu yama Simeon a profetisa bou di inspiracion cosnan maraviyoso tocante Hesus, pero el a profetisa tambe cu algun dia Maria lo sinti comosifuera un spada largo lo pasa door di su alma. (Lucas 2:25-35) Na momento cu Hesus a muri, Maria a compronde completamente kico e palabranan ey a nifica.

Hende ta bisa cu morto di un yiu ta e cos di mas duro y doloroso cu un hende por pasa aden. Morto ta un enemigo masha cruel, y di un manera of otro, e ta afecta cada un di nos. (Romanonan 5:12; 1 Corintionan 15:26) Ta posibel pa supera e dolor ey? Ora nos analisa Maria su bida for di comienso di Hesus su ministerio te na su morto y despues di esey, nos lo siña hopi tocante e fe di Maria. Ademas, nos lo mira con su fe a yud’e sobrevivi e dolor inmenso cu ta comparabel cu un hinca di spada.

Laga nos bay bek un tres aña y mey prome cu Hesus su morto. Maria tabata sinti cu un cambio tabata na caminda. Hasta den e stad chikito Nazaret, tur hende tabata papia tocante Juan Bautista y su mensahe conmovedor tocante arepentimento. Hesus a considera e noticia ey como un señal pa e cuminsa cu su ministerio, anto Maria tabata sa esey. (Mateo 3:1, 13) E echo cu Hesus, e yiu mayo, tabatin cu bay pa cumpli cu su ministerio tabata algo dificil tanto pa Maria como e otro yiunan na cas. Dicon?

Wel, ta parce cu Maria su esposo, Jose, no tabata na bida mas. Si esey ta e caso, Maria tabata sa kico ta nifica perde un ser keri. * E tempo ey, hende no solamente tabata yama Hesus “yiu di e carpinte” sino tambe “e carpinte.” Aparentemente, Hesus a tuma e negoshi di su tata over y e tabata percura pa e famia cu tabata consisti di por lo menos seis yiu cu a nace despues di dje. (Mateo 13:55, 56; Marco 6:3) Hasta si Hesus a siña Santiago, kende probablemente tabata e di dos yiu, e ofishi ey, toch e echo cu e yiu mayo lo a bay no tabata facil pa e famia. Maria ya tabatin un carga pisa riba su lomba. Acaso e tabatin miedo di e cambio aki? Nos no sa. Pero tin un pregunta mas importante: Con lo el a reacciona ora Hesus di Nazaret bira Hesucristo, e Mesias priminti? Tin un relato di Bijbel cu ta revela algo tocante su reaccion.—Juan 2:1-12.

 Hesus a bay cerca Juan pa batisa, y e ora ey el a bira Dios su Ungi, of Mesias. (Lucas 3:21, 22) Despues el a cuminsa scoge su discipelnan. Maske con urgente su trabou tabata, toch el a tuma tempo pa pasa momentonan agradabel cu su famia y amigonan. Hunto cu su mama, su discipelnan y su rumannan, el a bay un fiesta di casamento na Cana, aparentemente un pueblo riba sero cu a keda un 13 kilometer for di Nazaret. Durante e fiesta, Maria a ripara cu un problema a surgi. Kisas el a nota cu algun miembro di famia di e pareha recien casa tabata wak otro tur preocupa y cu nan tabata cuchicuchi cu otro. Ta kico a pasa? Biña a caba! Den nan cultura tabata sumamente importante pa mustra hospitalidad, sino e famia lo pasa berguensa y e fiesta lo a daña. Maria tabata preocupa pa nan, y pesey el a acerca Hesus pa yudansa.

Maria a bisa su yiu: “Nan no tin mas biña.” Ta kico el a pensa cu Hesus lo a haci? Nos no sa esey; pero e tabata sa cu su yiu tabata un gran homber cu por haci hopi cos impresionante. Kisas el a spera cu Hesus lo a cuminsa haci esey na e momento ey. Cu otro palabra, Maria a bisa Hesus: “Mi yiu, por fabor soluciona e problema!” Probablemente Hesus su contesta lo a sorprende Maria. Hesus a bisa Maria: “Kico mi tin di haber cu bo?” Aunke tin hende ta pensa cu Hesus a mustra falta di respet, esey no ta asina. Den e idioma original esey a indica cu Hesus no tabata di acuerdo cu loke Maria a sugeri. Hesus a recorda su mama na un manera bondadoso cu e no por bis’e con e tin cu cumpli cu su sirbishi; ta su Tata, Jehova, ta e unico persona cu por haci esey.

Maria a acepta e coreccion di su yiu, pasobra e tabata un muher prudente y humilde. El a compronde cu djey padilanti e no por a sigui bisa su yiu kico pa haci; mas bien, tanto e como tur otro hende mester a sigui Hesus su instruccion. Pesey, Maria a bay bek cerca e sirbientenan di e fiesta y a bisa nan: “Hasi loke e bisa boso.” (BPK) Anto Hesus a demostra cu e tambe tabata sinti compasion pa e pareha recien casa. Con? El a haci su prome milager, esta, el a comberti awa den biña di bon calidad. Cu ki resultado? Tanto Maria como Hesus “su discipelnan a pone fe den dje.” Y Maria no solamente tabata mira Hesus como su yiu, sino tambe como su Señor y Salbador.

Mayornan di awendia por siña hopi for di e fe di Maria. Ta berdad cu ningun otro mayor no mester a lanta un yiu perfecto manera Hesus. Pero tur mayor ta enfrenta e mesun desafio, esta, mira nan yiunan imperfecto bira adulto. Mayornan por tin e tendencia di sigui trata nan yiu manera mucha chikito, pero esey no ta corecto. (1 Corintionan 13:11) Con mayornan por yuda nan yiunan adulto? Un manera cu nan por haci esey ta door di laga nan yiunan sa cu nan tin confianza cu nan lo sigui obedece Jehova, y como resultado, e lo bendiciona nan. Si mayornan haci esaki humildemente, esey por tin un bon efecto riba nan yiunan. No cabe duda cu Hesus a aprecia Maria su sosten durante e añanan remarcabel cu a sigui.

Durante Hesus su ministerio di tres aña y mey, e Evangelionan no ta bisa dje hopi ey tocante Maria. Loke ta comprendibel pasobra Maria probablemente tabata un viuda, y esey kiermen cu si e tabatin yiu na cas ainda, e so mester a cria nan. Bou di e circunstancianan ey, tabata hopi dificil pa Maria bay predica cu Hesus na otro partinan di e pais. (1 Timoteo 5:8) Pero, el a sigui medita riba e cosnan cu el a siña tocante e Mesias y el a sigui bay e  reunionnan na e sinagoga local manera tabata custumber di su famia.—Lucas 2:19, 51; 4:16.

Esey ta nifica cu kisas Maria tabat’ey ora Hesus tabata papia cu e publico den e sinagoga na Nazaret. Dado momento, ora Hesus a bisa cu un profecia mesianico di hopi siglo bieu a cumpli riba dje, Maria lo mester a sintie hopi emociona. Pero di otro banda, lo no tabata facil p’e mira con hende di Nazaret a rechasa su yiu Hesus. Nan a hasta purba mat’e!—Lucas 4:17-30.

Pa colmo, Juan 7:5 ta menciona cu ningun di e cuater ruman hombernan di Hesus no tabata comparti e fe di Maria. E texto ta bisa: “Su rumannan no tabatin fe den dje.” Hesus tabatin por lo menos dos ruman muher. Con nan a reacciona? Bijbel no ta bisa nada tocante esey. * Sea loke sea e caso, Maria a sinti e dolor di biba den un cas caminda no ta tur miembro di e famia tabatin e mesun religion. E mester a haci esfuerso pa keda leal na Dios y na mes momento gana curason di su yiunan sin bira fanatico of pleitista.

Na un ocasion algun famia di Hesus, entre otro, su ruman hombernan, a dicidi di bay busc’e pa nan “bay cu ne.” Nan a bisa cu “su cabes no ta bon!” (Marco 3:21, 31, Beibel Santu) Claro cu Maria si no tabata pensa asina, pero toch el a bay cu su yiu hombernan; kisas el a carga speransa cu nan lo siña algo cu lo yuda nan pone fe den Hesus. Esey a sosode? Wel, maske Hesus a sigui haci milagernan asombroso y siña hende berdadnan maraviyoso, toch Maria su otro yiu hombernan no a pone fe den dje. Acaso Maria a bira desespera y pensa, ‘Ta kico mas lo por touch nan curason anto’?

Abo ta biba den un cas caminda no ta tur miembro di famia tin e mesun religion? Si ta asina, Maria por ta un bon animacion pa bo. E no a pensa cu su famianan tabata un caso perdi. Mas bien, el a laga nan mira cu su fe tabata dun’e goso y paz mental. Pero e tabata sostene Hesus tambe. Acaso e tabata haya su falta? Tabatin momento cu el a desea cu Hesus tabata na cas ainda? Si ta asina, el a domina su sintimentonan hopi bon. P’e tabata un privilegio pa sostene y anima Hesus. Abo ta yuda bo yiunan pone Dios na prome luga den nan bida?

Maria a ser recompensa pa su fe den Hesus? Jehova nunca ta keda sin recompensa fe di su sirbidornan. Pues, nos por tin sigur cu el a recompensa Maria tambe pa su fe. (Hebreonan 11:6) Djis imagina con contento lo el a sintie ora el a tende su yiu duna sermon of ora otro hende a cont’e di e sermonnan ey.

Acaso e ilustracionnan cu Hesus a uza a pone Maria pensa riba cosnan cu su yiu a siña durante su niñez? Por ehempel, ora Hesus a papia di un señora cu tabata bari su cas pa e haya un moneda cu el a perde, di dos muher cu tabata mula hariña di pan y di un hende cu a cende lampi y pon’e riba candelaria, acaso esaki a pone Maria corda riba su yiu homber chikito cu tabata hunto cu ne ora e tabata haci su quehaceres? (Lucas 11:33; 15:8, 9; 17:35) Ora Hesus a bisa cu su yugo ta suave y su carga no ta pisa, acaso Maria lo a corda bek riba un merdia inolvidabel hopi tempo pasa ora Jose tabata siña Hesus traha yugo cu ta comodo pa un bestia? (Mateo 11:30) Sin duda, Maria lo a sinti un tremendo satisfaccion cu Jehova a dun’e e privilegio unico pa lanta y educa e yiu cu lo a bira e Mesias. Nos por imagina cu el a sintie hopi feliz ora e tabata scucha Hesus, e mihor maestro den historia, kende a uza obhetonan y sucesonan comun y coriente pa siña hende lesnan masha profundo.

 Pero toch, Maria a keda humilde. Nunca su yiu no a pon’e riba un pedestal, ni e no a duna e impresion cu hende mester adora Maria. Durante su ministerio, un señora den un multitud a bisa na bos halto cu e mama di Hesus mester ta sumamente feliz cu el a duna luz na dje. Pero Hesus a contesta: “Mas feliz ta esnan cu ta tende e palabra di Dios y ta cumpli cu ne!” (Lucas 11:27, 28) Y ora algun hende a bisa Hesus cu su mama y su rumannan a yega, el a bisa cu esnan cu kere den dje ta su mama y su rumannan. Maria no a sintie ofendi ora el a tende esey; el a compronde loke Hesus tabata kiermen: E laso cu nos tin cu rumannan den fe ta mas importante cu e laso cu nos tin cu nos famia.—Marco 3:32-35.

Ta imposibel pa describi e dolor cu Maria a sinti ora cu e tabata mira su yiu sufri un morto cruel riba un staca di tormento. Apostel Juan kende a mira con Hesus a ser mata, a menciona den su Evangelio e siguiente detaye interesante tocante Maria: ‘Su mama tabata para banda di Hesus su staca.’ Nada no por a stroba e mama amoroso y leal ey di apoya su yiu te na final. Hesus a mira Maria, y aunke cada palabra cu el a papia a exigi hopi esfuerso y cada rosea cu el a hala tabata sumamente doloroso, toch el a pidi su apostel stima Juan pa cuida su mama. Hesus a prefera di pidi un siguidor di dje pa haci esey, pasobra te ne momento ey su rumannan no a pone fe den dje ainda. Di e manera ey, Hesus a mustra con importante ta pa un homber di fe percura pa e necesidad di su famia, specialmente pa nan necesidad spiritual.—Juan 19:25-27.

Ora Hesus a muri, Maria a sinti e dolor cu a ser predeci asina tanto tempo pasa, esta cu un spada largo lo pasa door di su alma. Ta dificil pa nos imagina cuanto dolor el a sinti, pero kisas ta mas dificil ainda pa imagina e felicidad cu el a sinti tres dia despues ora cu e milager mas grandi den historia a tuma luga, esta e resureccion di Hesus. Pero esey no ta tur, Maria a sinti un goso profundo tambe ora Hesus a aparece den priva na su mitar ruman Santiago. (1 Corintionan 15:7) Esaki a touch e curason di Santiago y Hesus su otro mitar rumannan. Dicon no sa esey? Pasobra despues nan a cuminsa kere cu Hesus ta e Cristo. No a dura hopi cu nan a cuminsa bay reunion cristian cu nan mama y “tabata persisti den oracion.” (Echonan 1:14) Despues di tempo, dos di su rumannan, tanto Santiago como Judas, a skirbi un buki di Bijbel.

E ultimo biaha cu Maria ta ser menciona ta ora e tabata na e reunion ey hunto cu su yiu hombernan na momento cu nan tabata haci oracion. Ki un bunita final! Y esta un excelente ehempel el a laga pa nos! Pa motibo di su fe, el a sobrevivi, na moda di papia, e dolor di un hinca di spada, y finalmente el a ricibi e recompensa di biba den cielo. Si nos imita Maria su fe, nos tambe lo sobrevivi cualkier dolor cu e mundo malo aki por causa nos, y nos lo ricibi un recompensa mas grandi cu nos por imagina.